Tasqꞌuini ni tuꞌuꞌ calhiulayau ju kꞌai ixꞌamapaininti Dios
2
Pus palai xakꞌai ju istsꞌalh Dios.
Palai jantu ju va anquilhnin.
Yuchi lhitasqꞌuini ni canaviu cuenta ju ixchivinti Dios ju juncantauch.
Jantu xcai ni camaconau ju ixti Dios.
2 Pus ju makꞌanchich ju anquilhnin tajunilh ju lapanacni ixchivinti Dios.
Chai ju anuꞌ chivinti stavasalanti ixjunita.
Chai tachi chun ju jantu tamuctaxtulh chai ju jantu talacaꞌilh amamakꞌalhkꞌajnicalh tachi ju ixlhijunch ni tapꞌakxlh ju ixlhamapꞌaksin ju Dios.
3 Pus ja va a ti quijnanꞌan lai catitakꞌalhtaxtu ni jantu tuꞌuꞌ calhiulayau ju ixchivinti ju istsꞌalh Dios junta najun ta yu lai catakꞌalhtaxtuyau.
Chai ju anuꞌ chivinti slivasalh na kꞌox.
Pus isꞌakstu ju quiꞌucxtinꞌan Jesús ju pꞌulhnan naulh ni laich catatakꞌalhtaxtuyaꞌ ju lapanacni.
Chai ju yuꞌunch ju takꞌasmatnilh ixchivinti quintamavasalaninch ju quijnanꞌan.
4 Chai vana acs ju Dios quintamalacasunin ju quijnanꞌan ni stavasalanti ju tuchi xaquintajunan.
Quintapumavasalanin laca tuꞌuꞌ kꞌai lhamakꞌan ju ixtanavi ju yuꞌunch.
Chai lacalhu tuꞌuꞌ ju jantu lai catitanavi ju va lapanacni.
Vachuꞌ pumavasala ixchivinti acsni axtaknicalh ju talhilacaꞌalh yuchi ju lhakꞌailaktsꞌin ju xtꞌakꞌa ju Spiritu Santu tachi ju kꞌoxich lhiulai ju yuchi.
Ju Jesús chunch junlh tachi ju quijnanꞌan ju ixꞌalakꞌavin juntau
5 Ju Dios naulh ni jantiyuꞌ ju anquilhnin ju catalhinonaꞌ acsni caꞌalinaꞌ ju sastꞌi lacamunutpaꞌ ju tuchi lhichivinau ju chavai.
6 Alai laꞌixchivinti Dios chani ju tsꞌokcanta:
Na kꞌai lhamakꞌan iclhiulai ni laich tuꞌuꞌ lhiulai ju uxintꞌi ji Dios ju va lapanac.
Na kꞌai lhamakꞌan iclhiulai ni laich lhistꞌacꞌa ju uxintꞌi ju istsꞌalh ju va lapanac.
7 Pus pantsꞌiquis palai lacatꞌicstꞌi ju navitꞌa.
Palai xalackꞌajin ju anquilhnin.
Para ju chavai xtꞌaknitꞌa ju ixpuxakꞌai chai lacꞌasqꞌuin ni calakꞌayacalh.
Chai ulatꞌa yuchi ni calhijunaꞌ tachi chun ju navitꞌa ju uxintꞌi.
8 Lhcꞌaꞌulatꞌa ni yuchi ju calhinonkꞌoyaꞌ chux.
Chunch ju najun laꞌixchivinti Dios.
Pus ni lhcaꞌulata ni yuchi ju lapanac ju calhijunaꞌ chux pus jantu tuꞌuꞌ ju jantu caquiclacaꞌi ju yuchi.
Para mas chunch ju lhcaꞌulata ju Dios para jantucaꞌ laktsꞌinau ni vasalh catalacaꞌinikꞌo tachi chun ju taxtokni.
9 Para cꞌatsayau ni xakꞌai navicanta ju Jesús chai lakꞌayacanta va ixlacaꞌatalh ni quilhimakꞌalhkꞌajnanchilh ju aninti.
Para pꞌulhnan ju yuchi lacatꞌicstꞌi cꞌatsalh isꞌakstu pantsꞌiquis.
Palai xalackꞌajin ixtajunita ju anquilhnin.
Chunch ju navicalh ni laich canilh ju ixlacata pumatamin lapanacni ni ixꞌanaviniputun lamapainin ju Dios ju yuꞌunch.
10 Pus ixlacata Dios ju alilh tachi chun ju taxtokni.
Chai yuchi ju navikꞌolh tachi chun ju taxtokni.
Chai ju yuchi lhu ixꞌalhiꞌamputun ju isꞌaskꞌatꞌan ju lactꞌiyan.
Pus ni chunch ju ixnaviputun pus aktsꞌiya ixlhijun ni caꞌucsacꞌatsa ju Jesús lacamakꞌalhkꞌajnat ni laich aquintapumakꞌalhtaxtuyan ju quijnanꞌan laquiꞌalactuꞌuntiꞌan.
11 Pus yuchi ju Jesús ju lai lasoknicꞌai isꞌatsucunti tam lapanac.
Pus ixpai ju yuchi vachuꞌ quimpaiꞌan junita ju quijnanꞌan ju quintalasoknicꞌanitan quiꞌatsucuntiꞌan.
Pus yuchi jantu lhimaxanan ju Jesús acsni quintalhixakꞌalayan ixꞌalakꞌavin.
12 Pus laꞌixchivinti Dios ju tsꞌokcanta chani ma naulh ju Jesús:
Acꞌajunach ju quiꞌalakꞌavin ju milacata.
Chai aclakꞌayayan lacamilhpat junta tatakꞌaixtꞌokꞌa ju yuꞌunch ju talhilacaꞌanan.
13 Chai alacatam chani naulh:
Ju quitꞌin aclhilacaꞌanach ju Dios.
Chai vachuꞌ chani naulh:
Anch icꞌalactꞌaya ju quiꞌaskꞌatꞌan ju quixtaknita ju Dios.
Chunch ma naulh ju Jesús.
14 Pus tachi chun ju anuꞌ ju alhixakꞌala isꞌaskꞌatꞌan Dios alin ixlacatunaꞌan.
Pus yuchi vachuꞌ lhiꞌalilh ixlacatuna ju Jesús tachi ju yuꞌunch ni laich caniyaꞌ ixlacataꞌan.
Chai va ixlacata ni nilh ju yuchi pus taiꞌinilh ixtachaput ju lhacaticuru ju malactuꞌuni ju pꞌulhnan xatꞌin lapanacni.
Chai ni alactuꞌunulh ju yuchi pus yuchi lhiniyau ju chavai.
15 Pus tus ixlhitalacatꞌicstꞌinꞌan slivasalh na ixtatalhoni ju aninti ju lapanacni.
Para ju chavai ju talhilaksi ju yuchi jantu vana na tatalhoni ju aninti tachi ju ixtalai ju pꞌulhnan.
16 Pus ju Jesús jantiyuꞌ lhiquilachilh ju ani lacamunutpaꞌ ni va ixꞌaꞌaktaijuputun ju anquilhnin.
Alai va ixꞌaꞌaktaijuputun tachi chun ju talhilacaꞌanta ju Dios tachi ju lalh ju Abraham.
17 Pus aktsꞌiya istasqꞌuini ni lana ixtꞌachunch cajunlh ju Jesús tachi ju tajunita ju ixꞌalakꞌavin ju ani lacamunutpaꞌ.
Pus va chunch ju lai cajunlh ju xakꞌai pali ju na lai aꞌaktaijunun lacaꞌamapaininti chai ju na lai lhilaksican acsni an ju quilacataꞌan laꞌixmacni Dios.
Chai va ixlacata ixꞌaninti ju yuchi lai xacanican ixꞌalactuꞌuntiꞌan ju lapanacni.
18 Chai ju yuchi vachuꞌ makꞌalhkꞌajnalh ju ani lacamunutpaꞌ chai mapastꞌacꞌanicalh ju amacxcai.
Para jantu tavanan navilh tuꞌuꞌ alactuꞌunti ju yuchi.
Chai ni chunch ju tapasalh laꞌisꞌatsucunti pus yuchi lai quintalhiꞌaktaijuyan ju quijnanꞌan ju mapastꞌacꞌanicanau ju tuꞌuꞌ amacxcai.