JU ALHIQUI JU ATSꞌOKNUNICALH JU ISRAELITANIN JU TALHILACAꞌANTA JU CRISTO
Ju Dios quintapumacꞌatsanin ju ixchivinti ni malakachachilh ju istsꞌalh
1
Ju makꞌanchich ju Dios na paklhu ju alacxakꞌala ju quilacpaꞌitniꞌan laꞌixchivintiꞌan ju lapanacni ju ixtanajun ixchivinti.
Chai na tijlhu ju apuxakꞌala ju Dios ju yuꞌunch.
2 Ju makꞌanchich chunch ju alhixakꞌala ju Dios ju lapanacni.
Para ju chavai ju yuchi malakachatachilh ju istsꞌalh ju ani lacamunutpaꞌ ni laich aquintajunan ixchivinti ju ixpai.
Yuchach ju junilh ju ixpai ni canavilh ju lacamunutpaꞌ chai ju lactꞌiyan.
Junicalh ju istsꞌalh.
Chai ju yuchi navilh.
3 Yuchi ju quintamalacasunin ni vasalh xakꞌai ju Dios.
Chai vachuꞌ quintamalacasunin ta yu tucan junita ju Dios va ixlacaꞌatalh ni vaklhtam chun tꞌajunita.
Chai yuchi ju lhinonkꞌojui tachi chun ju taxtokni ni na tachapun ju ixchivinti.
Chai yuchach ju quinichilh ni laich aquintaxacaniyan ju quintalakꞌalhinꞌan.
Chai ju chavai ju yuchi vi ju lactꞌiyan vanin junta vi ju ixpai ju tucan xakꞌai.
Palai xakꞌai ju istsꞌalh Dios. Palai jantu ju anquilhnin
4 Ju istsꞌalh Dios palai xakꞌai.
Palai jantu ju anquilhnin.
Chai tasui ni palai xakꞌai ni istsꞌalh Dios juncan.
Jantu chun ajuncan ju anquilhnin.
5 Pus ju Dios jantu tavanan laich chani cajunilh tam anquilh:
Ju uxintꞌi quintsꞌalhꞌat.
Chai ju chavai icmalacasuta ni mimpai icjunita.
Nin lai chani cajunilh tam anquilh:
Ju quitꞌin ixpai acjunaꞌ.
Chai ju yuchi quintsꞌalh cajunaꞌ.
6 Para acsni tavanan quitsucuchilh ju lakatami istsꞌalh ju ani lacamunutpaꞌ pus chani ma naulh ju Dios:
Chach talakꞌaya ju yuchi tachi chun ju quiꞌanquilhnin.
7 Chai ju Dios chani ma naulh ixlacata ju anquilhnin:
Icnavi ju quiꞌanquilhnin ni vatsꞌalhti cataꞌalh tachi ju tuꞌuꞌ un.
Chai yuꞌunch ju quintachꞌalhcatnani.
Na tachapunin tajunita tachi ju tuꞌuꞌ alapnaꞌ.
Ju mimpuꞌucxtin ju uxintꞌi ji Dios jonkꞌalhita.
Chai soknicꞌa navi ju uxintꞌi lamimpuꞌucxtin.
9 Ju uxintꞌi kꞌachꞌanitꞌach ju soknicꞌa chai lhitsꞌisitꞌa ju amacxcai.
Pus yuchi palai iclhimakꞌankꞌachayan.
Palai jantu na chun ju mincompañerojni.
Quitꞌin ju acxtakniyan chun.
Quitꞌin ju miDios icjunita.
10 Chai vachuꞌ chani ma junilh ju istsꞌalh:
Uxintꞌi ji ucxtin ju navitꞌa ju lacamunutpaꞌ acsni matiꞌcaꞌ tuꞌuꞌ ixjunita.
Chai lamimacaꞌ ju navitꞌa ju lactꞌiyan.
11 Pus tachi chun ju ani taxtokni catatsꞌankꞌakꞌoyaꞌ.
Para ju uxintꞌi onkꞌalhitꞌach.
Chux ju yuꞌunch catalaclayaꞌ tachi ju tuꞌuꞌ pumpuꞌ.
12 Chai alacpꞌasmilaꞌ tachi ju ulhtucan ju tuꞌuꞌ pumpuꞌ.
Chai chux catapaxakꞌoyach.
Para ju uxintꞌi jantu tavanan atꞌapꞌaxayaꞌ.
Chai jantu tavanan caꞌaclayaꞌ ju miꞌatsucunti.
Vanin atꞌaꞌulh junta icvi tus acsni acꞌaktaijuyan ni atꞌalalhaꞌayaꞌ ju mintꞌalaxcai.
14 Pus jantu chunch ju ajuncan ju anquilhnin ni va tachꞌalhcatnani ju Dios ju yuꞌunch.
Va amalakachacantachilh ju ani ni aquintaꞌaktaijuyan ju quijnanꞌan ju catakꞌalhtaxtuyau.