Tasqꞌuini ni chani catalalh ju talhilacaꞌanta ju Cristo
3
Amapꞌastꞌacꞌanitꞌich ju yuꞌunch ju talhilacaꞌanta ju Cristo ni catatalhonilh ju ucxtinin chai ju aliꞌin xalackꞌajin.
Chai catalacaꞌinilh chai catanavinilh va tuchi kꞌox lhichꞌalhcat ju caꞌalhijunicalh.
2 Amapꞌastꞌacꞌanitꞌich ni jantu catanaulh macxcai ixlacata akꞌantam.
Nin yuchi ni va lasani lapanacni catava.
Alai na kꞌox lapanacni catava chai va kꞌox caꞌatꞌalalhiꞌalh tachi chun ju lapanacni.
3 Chunch ju calactꞌalalhiꞌau ju aliꞌin ni vachuꞌ jantu ixꞌacꞌatsanantauch ju quijnanꞌan ju pꞌulhnan.
Chai jantu lai ixlacaꞌiyau.
Na ixꞌokxchokꞌocantau vachuꞌ.
Va yuchi ixnaviyau ju macxcai atalacpastꞌacꞌat chai tachi chun ju xakꞌachat ju ani lacamunutpaꞌ.
Na ixꞌalactuꞌununau chai na ixlhacchaꞌanau ju ixꞌanuchꞌan ju aliꞌin.
Jantu kꞌox ixlhiulacanau chai jantu tuꞌuꞌ ixꞌalhiulayau ju aliꞌin.
4 Para chilh avilhchan acsni quintamalacasunin ni na kꞌox lapanac junita ju Dios quiꞌamakꞌalhtaxtunuꞌan chai na quintamapainiyan ju quijnanꞌan chai tachi chun ju lapanacni.
5 Pus quintamakꞌalhtaxtun.
Para jantu va ixlacaꞌatalh ni xanaviyau ju tuꞌuꞌ ju kꞌox cava.
Alai va ixlacata ni xaquintaꞌaktaijuputunan va laꞌixꞌamapaininti.
Pus quintamakꞌalhtaxtun acsni quintachꞌakꞌanin ju quiꞌalhunutꞌan chai quintaxtaknitan ju sastꞌi quiꞌatsucuntiꞌan.
Chai yuchi ju Spiritu Santu ju quintaxtaknitan ju sastꞌi quiꞌatsucuntiꞌan.
Chai yuchi ju Spiritu Santu ju quintalasastꞌikꞌoyan.
6 Pus ju Dios lhu quintaxtaknitan ju ixtachaput ju Spiritu Santu va ixlacata ju quiꞌamakꞌalhtaxtunuꞌan Jesucristo.
7 Pus ni quintanavinitan lamapainin ju Dios chai quintalaktsꞌinan ni soknicꞌa juntau pus ju chavai cꞌatsayau ni vasalh aquintaxtaknitachan ju lactꞌiyan ju ixlaktsan ju quiꞌatsucuntiꞌan ju jonkꞌalhita.
8 Pus slivasalh ju ani ju icjuntan.
Chai iclacasqꞌuin ni lana vas aꞌunch ju lapanacni ju talhilacaꞌanta ju Cristo tachi chun ju ani taxtokni.
Ju chunch ju yuꞌunch va tachi catanaviyaꞌ cuenta ixnavica ju kꞌox.
Pus tachi chun ju icjuntan si na kꞌox chai na caꞌaꞌaktaijuyaꞌ tachi chun ju lapanacni ni laich catanavi.
9 Para lana jantu atꞌalhilacchꞌivin ju lapanacni ju tasacmiyan ju tuꞌuꞌ ju va tonto chivinti.
Vachuꞌ jantu atꞌalhilacchꞌivin ju talhilaclakꞌaji tuchi tanajun ni tanavita ju makꞌaniya ixlacpaiꞌan mas jantu.
Vachuꞌ jantu atꞌalhilacchꞌivin ju lapanacni acsni talaclakꞌaji chai talaclhilasai tuchi ju nomputun ixlhamapꞌaksin ju Moisés.
Jantu anavitꞌi ju chunch ni jantu tuꞌuꞌ pulanican nin lai caꞌaktaiju xamatiꞌ laꞌisꞌatsucunti.
10 Ni alin xamatiꞌ ju va puxcajui lakꞌaiti lacatalhavat ju talhilacaꞌanta ju Cristo ni quilhmactꞌui canaviputulh pus paktꞌui ju akꞌai.
Ni jantu xalacaꞌi ni xakꞌaꞌich paktꞌui pus jantu atꞌalalhipꞌi ju anuꞌ lapanac.
11 Pus ju uxintꞌi miꞌakstu cꞌatsꞌaich ni va lakꞌalhinicanta ju istacꞌatsan ju anuꞌ lapanac chai na alactuꞌununch.
Pus ju tuchi ixnaviputun ju yuchi lana putasui ni alinch ju ixtalakꞌalhin.
Ajuncan ni catalakchaꞌananch ju aliꞌin lapanacni
12 Acsni acmalakachanitachan ju Artemas u yuchi ju Tíquico pus vatsꞌalhti aqꞌuilaktꞌanaꞌ ju uxintꞌi ju lakꞌachakꞌan Nicópolis ni icnajun ni anchach ju actolanta ju lacalhicꞌasnin.
13 Acsni catachaꞌananta ju Zenas ju lhaꞌatalanininta ju ixlhamapꞌaksinꞌan ju romanonin chai ju Apolos pus aꞌunch ju milhiꞌalakꞌavin laꞌixmacni Cristo ni cataꞌaꞌaktaijuyach ni jantu tuꞌuꞌ catamakꞌancꞌacxayaꞌ ixlacata ju lacati acsni catataxtuchokoyanta.
14 Chai ju chunch vachuꞌ ju yuꞌunch ju talhilacaꞌanta ju Cristo ju tavilanancha anch catapulaniyaꞌ ju ixnavica ju kꞌox acsni alin ju ixmaktasqꞌuinit tam xamatiꞌ.
Chai ju chunch cacꞌatsacanaꞌ ni na kꞌox ju isꞌatsucuntiꞌan ju talhilacaꞌanta ju Cristo.
Amacꞌaminin ju Pablo
15 Tachi chun ju lapanacni ju quintatꞌavi tamacꞌamiyan.
Vachuꞌ amacꞌamitꞌich ju quilhiꞌalakꞌavin ju tavilanancha ju anch.
Pus ictapainini ju Dios ni catanaviniyan lamapainin minchuxꞌan ju uxijnan.
Vasalh iclacasqꞌuin ni chunch cataꞌulhtuyan.