Chani lhijunita ju soknicꞌa lhamapꞌaksin
2
Para ju uxintꞌi chunch ju anauch tachi ju najunch lacasoknicꞌa lhamapꞌaksin.
2 Aꞌunaꞌich ju na papaninch ni catalhistacchokocalh isꞌakstuꞌan.
Chai seknicꞌa lapanacni catava.
Chai cataꞌacꞌatsanalh.
Vachuꞌ pꞌas catalhilaksi ju Cristo chai slivasalh cataꞌamapaininilh.
Chai laich catachꞌixkꞌo mas va tuchi camilh laꞌisꞌatsucuntiꞌan.
3 Aꞌunaꞌich vachuꞌ ju tꞌacunin ni catamalacasu tachi ju kꞌoxich lhiulai ju Dios.
Jantu va catapuxcautsuculh ju chivinti.
Jantu catatꞌakꞌapꞌa.
Chach tajunlh tachi ju tuꞌuꞌ xalhilaktsꞌintaiti.
4 Ju chunch laich catamalaniyaꞌ ju va atsiꞌincaꞌ ni catatꞌalamapaini ju ixpapaꞌan chai catamapaini ju isꞌaskꞌatꞌanꞌan.
5 Vachuꞌ lai catamalaniyaꞌ ni cataꞌacꞌatsanalh chai salaka catava.
Chai catalhistaclh ju ixchakaꞌan.
Chai kꞌox lapanacni catava.
Chai cataquiclacaꞌi ju ixpapaꞌan.
Chai ni chunch ju catatsucuyaꞌ ju atsiꞌin pus jantu lai xamatiꞌ macxcai catalhichivinilh ju ixchivinti Dios.
6 Vachuꞌ amapꞌaksitꞌich ju tsꞌalan ni cataꞌacꞌatsanalh.
7 Chai ju uxintꞌi ixlhichux ju miꞌatsucunti chunchach ju atsꞌucꞌu tachi ju tuꞌuꞌ xalhilaktsꞌintaiti ixlacataꞌan ju aliꞌin.
Amalanitꞌich ju stavasalanti.
Chai acsni axakꞌalayaꞌ ju lapanacni pus jantu va alhakꞌamanaꞌaxakꞌalatꞌi.
8 Chunch ju achꞌivinch tachi ju jantu lai xamatiꞌ catijunin ni jantu sok ju naꞌun.
Ju chunch ju jantu lacaꞌi ju quinchivintiꞌan camaxananach ni jantu lai tuꞌuꞌ lhitajui macxcai ju laich aquintapulhichivinan quinchuxꞌan ju va milacata.
9 Amapꞌaksitꞌi ju xalapanacni ni cataquiclacaꞌi ju ixꞌucxtinꞌan mas va tuchi caꞌalhijunicalhch ni catanavi.
Chai laꞌixlhichux ixꞌalhunutꞌan catanavilh ju lhichꞌalhcat tachi ju kꞌachanich ju ixꞌucxtinꞌan.
Chai jantu catasaspitnilh ju alhijuni.
10 Jantu catakꞌalhonilh tuꞌuꞌ.
Alai catamalacasulh ta yu laich caꞌapulhilaksicanaꞌ.
Chai ni chunch ju catatsuculh pus cataputalacasuyach ju laꞌisꞌatsucuntiꞌan ni na kꞌoxich ju ixꞌamalaninti ju quiDiosꞌan quiꞌamakꞌalhtaxtunuꞌan.
11 Pus ju Dios quintamasunitan ju lamapainin ju quintanaviniputunan.
Yuchi ni laich catatakꞌalhtaxtuyaꞌ mas va tichi chavaich cava.
12 Chai ni machakxayau ni na kꞌai ju anuꞌ lamapainin ju quintanavinitan ju Dios pus yuchi lhimacomputunau ju xakꞌachat ju lacamunutpaꞌ chai tachi chun ju aliꞌ taxtokni ju jantu kꞌox lhiulai ju Dios.
Chai kꞌaichokocanau quiꞌakstuꞌan chai soknicꞌa jun ju quiꞌatsucuntiꞌan chai tasui ni vasalh talhoniyau ju Dios.
13 Vachuꞌ chunch ju catsucu tachi ju caputasuyach ni vasalh pacxanauch ju anuꞌ avilhchan acsni caꞌuctaxtuyaꞌ ju tuchi quintakꞌalhtasunitan ju Dios.
Yuchi ni caminchokoyaꞌ ju quiDiosꞌan Jesucristo ju quiꞌamakꞌalhtaxtunuꞌan junita.
Chai catasuyaꞌ ni yuchi ju xakꞌai tucan.
14 Pus ju yuchi tamakꞌaxtakchokolh isꞌakstu ju quilacataꞌan ni laich camacaju ju macxcai atsucunti.
Chai aquintachꞌakꞌaniyan ju quiꞌalhunutꞌan ni ixꞌanuch cajumvi chai ni slivasalh canaviputu ju kꞌox.
15 Chai ni alin ju mintachaput ni xakꞌaiꞌat pus vas anauch tachi chun ju ani chivinti chai yuchi ju alhimapꞌaksitꞌi ju lapanacni ni catanavi.
Chai alakꞌakꞌaimatꞌi ju jantu sok taꞌan.
Tachi chun ju anaviyaꞌ jantu tuꞌuꞌ anavitꞌi tachi ju va jantu tuꞌuꞌ catapulhiulayan ju lapanacni.