JU ALHIQUI JU ATSꞌOKNUNICALH JU TITO
Ju Pablo macꞌami ju Tito
1
Ju quitꞌin icPablo.
Ixlapanac Dios icjunita chai ixtamalakachan ju Jesucristo ni acꞌaꞌaktaijuyach ju asacxtuta ju Dios ni catalhilacaꞌanach ju yuchi chai catamispayach ju stavasalanti ixlacata ju Cristo.
Chai ju chunch pus ju isꞌatsucuntiꞌan chunch cajunaꞌ tachi ju kꞌachanich ju Dios.
2 Chai chunch icꞌajuni ju lapanacni ni laich vachuꞌ caꞌalinaꞌ ju isꞌatsucuntiꞌan ju conkꞌalhiyanta ju lactꞌiyan.
Pus ju Dios chunch ju ilhcaꞌulata acsni tucaꞌ ixnavi ju lacamunutpaꞌ.
Chai ju yuchi jantu lai aꞌokxchokꞌonun.
3 Pus mas makꞌanchich ju ispastacta ju Dios ni aquintaxtakniyan ju anuꞌ atsucunti para va chavaicaꞌ chilh ju avilhchan ju ilhcaꞌulata ju Dios acsni xalakꞌaꞌich ni cacꞌatsacalh ta yu laich capuꞌalilh ju anuꞌ atsucunti.
Chai Dios ju quiꞌamakꞌalhtaxtunuꞌan junita chai yuchi ju quijunilh ni acꞌajunilh ju lapanacni ju ani ixchivinti.
4 Va icmacꞌamiyan ji Tito.
Ju uxintꞌi tachi ju va vasalh quintsꞌalhꞌat ni quitꞌin ju xacjunan ixchivinti Dios chai ni lacꞌaꞌinich ju yuchi pus ju chavai lhilacꞌapꞌintꞌa ju Cristo tachi ju quitꞌin.
Ictapainini ju quimpaiꞌan Dios chai ju quiꞌamakꞌalhtaxtunuꞌan Jesucristo ni catanaviniyan lamapainin chai cataꞌaktaijuyan ni jantu calacꞌalh ju miꞌalhunut.
Ju Tito ixchꞌalhcatnan ju xalacatꞌun Creta
5 Acsni ictaxtucha ju xalacatꞌun Creta va xaclacasqꞌuin ni isꞌasacxtꞌu ju ixticꞌacx ju catalhinaulh laꞌixtalhavat lapanacni ju talhilacaꞌanta ju Cristo ju lakatamin lakatamin lakꞌachakꞌan tachi ju iclhimapꞌaksitanch.
Chai yuchi iclhimacontan ju anch ju xalacatꞌun Creta.
6 Pus yuchach ju asacxtꞌu ju salaka ju isꞌatsucunti chai va pumatam ixꞌamachakaꞌ.
Vachuꞌ tasqꞌuini ni si catalhilacaꞌalh ju Jesús ju isꞌaskꞌatꞌan chai jantu alhimispacan ni va kꞌaya catalalh nin alhimispacan ni va jantu catalacaꞌi.
7 Pus ju lhinajun lacatalhavat ni navini ixlhichꞌalhcat ju Dios pus aktsꞌiya tasqꞌuini ni jantu tuꞌuꞌ camalacasu ju macxcai.
Chai jantu va ixkꞌachat isꞌakstu ju capuxcaulh.
Jantu lana vatsꞌalhti calhitalhkꞌamalh ju tuꞌuꞌ.
Jantu catꞌakꞌapꞌa.
Chai jantu va lasani lapanac cava.
Chai jantu na cakꞌachanilh ju tumin.
8 Chai tasqꞌuini ni yau cajunilh xamatiꞌ acsni lakacujtilaputun laꞌixchakaꞌ.
Vachuꞌ na cakꞌachanilh ju kꞌox.
Chai na caꞌacꞌatsanalh.
Chai sok cajunlh ju isꞌatsucunti.
Chai salaka junita ju isꞌatsucunti laꞌixmacni Dios.
Chai tasqꞌuini ni lai cakꞌaichokocalh isꞌakstu.
9 Vachuꞌ tasqꞌuini ni vasalh caquiclacaꞌi ju ixchivinti Dios tachi ju lhimalanicanta.
Ju chunch ni lai sok caꞌamalaniyaꞌ ju aliꞌin chai lai caꞌamasuniyaꞌ ju stavasalanti ju tanajun ni jantu kꞌox ju ixchivinti Dios.
10 Pus tasqꞌuini ni chunch cajunlh isꞌatsucuntiꞌan ju yuꞌunch ju talhinajun ni na lhu alin ju lana jantu talacaꞌi.
Ju jantu talacaꞌi tajuni ju aliꞌin lapanacni ju chivinti ju jantu lhitapalai chai va taꞌaꞌokxchokꞌonun.
Pus yuꞌunch ju quintꞌaꞌisraelitanin quincꞌan ju palai chunch tachivinin.
11 Pus tasqꞌuini ni jantuch alacꞌasqꞌuinin ni laich cataꞌamalaninilh ju yuꞌunch.
Pus taꞌamalacaꞌinikꞌojui ixtaꞌaklhtamatchivintiꞌan tachi chun ju tatanumanalh lacalakatamin chakaꞌ.
Para jantu lhijun ni caꞌamalanicalh ju lapanacni ju ixchivintiꞌan ni jantu soknicꞌa chai na va takꞌachani ju tumin.
12 Pus pumatam atalaniniꞌ sia yuꞌunch ju amachakꞌan xalacatꞌun Creta chani naulh:
“Ju amachakꞌan Creta va tachi tanajunch taꞌaklhtamat chivinti.
Chai va isꞌakstuꞌan ju mapainichokocan chai va ixvaitiꞌan ju tapastactꞌajun para ni va tamalheknin”.
Ma chunch ju naulh ju anuꞌ lapanac.
13 Chai vas xanajun.
Chai ixlhiyuchi tasqꞌuini ni pꞌas alakꞌakꞌaimatꞌi.
Ju chunch pꞌas catalhilaksiyaꞌ ju stavasalanti ixlacata ju Cristo.
14 Aꞌunch ni jantuch cataquiclacaꞌilh tuꞌuꞌ ju va chivintich ju tanajun ju quintꞌaꞌisraelitanin.
Nin yuchi ju ixlhamapꞌaksinꞌan ju lapanacni ju jantu takꞌachani ju stavasalanti ixlacata ju Cristo.
15 Pus ju salaka isꞌatsucunti laꞌixmacni Dios si kꞌox lhiulai tachi chun ju taxtokni ju navita ju Dios.
Para ju na taꞌalactuꞌunun chai ju jantu talhilacaꞌanta ju Cristo pus tachi chun ju taxtokni va si macxcai talhipastꞌacꞌa ni na lhquiliqui junita ju ixtacꞌatsanꞌan chai lana jantu tuꞌuꞌ lhixcani ju ixꞌalhunutꞌan.
16 Ju yuꞌunch tanajun ni tamispai ju Dios para laꞌisꞌatsucuntiꞌan lana tasui ni jantu slivasalh ni catamispa ju Dios.
Pus ju yuꞌunch na kꞌai tajunita.
Jantu lai talacaꞌi chai lana jantu lai tanavi tuꞌuꞌ ju kꞌox calhiula ju Dios.