4
Ju quiꞌucxtinꞌan Jesucristo camakꞌosaspitaꞌ ju lapanacni ju tatꞌajun chai ju tanitach.
Chai yuchi ju caminchokoyaꞌ chai caꞌalinach ju ixpuꞌucxtin.
Pus ju yuchi chai ju Dios quintalaktsꞌinan acsni icmapꞌaksiyan.
2 Icjunan ni amalanitꞌich ju ixchivinti Dios.
Amalanitꞌich acsni kꞌox talhiulai ju lapanacni chai mas jantu kꞌox talhiulai.
Amalacꞌaꞌinitꞌi ju lapanacni ixchivinti Dios.
Chai alakꞌakꞌaimatꞌi ju va tsa taꞌalactuꞌunun.
Chai aqꞌuilhtꞌapꞌuꞌutꞌich ju jantu taꞌalacaꞌininan.
Para acsni chunch alatꞌi pus jantu jeks aꞌunin ju lapanacni.
3 Chunch ju alatꞌi ni caminaꞌ avilhchan acsni jantu lana catakꞌasmatputunaꞌ ju lapanacni ju ixchivinti Dios ju soknicꞌa junita.
Alai va catakꞌasmatputunach ju tuꞌuꞌ ju cꞌus.
Chai catamakꞌaixtꞌokꞌaꞌ ju amalaninin ju catanonach tachi ju takꞌachani ju yuꞌunch.
4 Chai jantu catakꞌasmatꞌaꞌ ju stavasalanti ixlacata ju Cristo para catakꞌasmatꞌaꞌ ju tuꞌuꞌ ju va chivinti junita.
Ju jantu slivasalh.
5 Para ju uxintꞌi va tachi kꞌoxich alaccꞌatsꞌan.
Achꞌixtꞌich mas va tuchi makꞌalhkꞌajnat.
Aꞌunch ju lapanacni ixlacata ju Jesús.
Amuctꞌaxtꞌutꞌich ju laꞌixlhichꞌalhcat Dios.
6 Chunch ju alatꞌi ni chinta ju avilhchan acsni acniyach ju quitꞌin ixlacata ju Cristo.
Acmaconach ju ani lacamunutpaꞌ.
7 Pus ju quitꞌin vasalh ictastucnikꞌota ju macxcai.
Icnavikꞌolh chux tuchi xaclhcaꞌulanicanta.
Ju quitꞌin iclacaꞌinikꞌolhch ju ixchivinti Dios.
8 Pus ju lactꞌiyan acxtaknicananta ju quintalhaja ni sok xactsucui ju ani lacamunutpaꞌ.
Yuchi ju quiꞌucxtin Jesús ju aquixtakniyach acsni cachinach ju anuꞌ avilhchan laꞌixꞌaclanti ju lacamunutpaꞌ.
Chai quiꞌucxtinꞌan yuchi ju navi ju soknicꞌa.
Chai jantu va quitꞌin ju acxtaknicanaꞌ para vachuꞌ caꞌaxtakniyaꞌ ju yuꞌunch ju tapacxantajich ju Jesús acsni caminchokoyaꞌ.
Tapaininican ju Timoteo
9 Ni laich cava pus vatsꞌalhti aqꞌuilaktꞌatꞌi.
10 Pus ju quilakꞌauꞌan Demas kꞌachanilh ju taxtokni ju alin ju ani lacamunutpaꞌ chai quimacaulh.
Alh ju lakꞌachakꞌan Tesalónica.
Chai ju Crescente alh ju xalacatꞌun Galacia.
Chai ju Tito alh ju xalacatꞌun Dalmacia.
11 Va yuchi ju Lucas ju quintꞌavi.
Pus atꞌasaninch vachuꞌ ju Marcos chai aqꞌuintꞌalaktꞌanaꞌich ni na lai quiꞌaktaijui ju yuchi lacalhichꞌalhcat.
12 Ju Tíquico icmalakachalh ju lakꞌachakꞌan Efeso.
13 Acsni atꞌanaꞌ alhitꞌanaꞌich ju quilakchꞌit ju icmacontacha lakꞌachakꞌan Troas laꞌixchakaꞌ ju Carpo.
Vachuꞌ alhitꞌanaꞌ ju kꞌalhtankꞌai alhiqui.
Para ju palai icmaktasqꞌuini yuchi ju alhiqui ju tsꞌapscanta.
14 Ju Alejandro ju puchꞌalhcatnan cobre slivasalh na xaquisastꞌucꞌa lacalhichꞌalhcat.
Para ju quiꞌucxtinꞌan Dios camamapalaniyaꞌ tachi ju lhijunch ixlacata ju tuchi talakꞌalhin xaquinavini.
15 Pus vachuꞌ ju uxintꞌi alaccꞌatsꞌan ju ixlacata ju yuchi.
Ju yuchi slivasalh na tꞌalasai ju quinchivintiꞌan.
16 Acsni pꞌulhnan icchivimakꞌancalh jantu xamatiꞌ quiꞌaktaiju.
Ixchuxꞌan va quintamacoyokꞌo.
Para ictapainini ju Dios ni jantu caꞌalaclhixcailh mas chunch xaquintanavich.
17 Mas chunch quintanavilh ju aliꞌin para ju quiꞌucxtin Dios quintꞌatayalh chai quixtaknilh ju tachaput ni laich xacnajun ixchivinti.
Chai takꞌasmatlich tachi chun ju jantu israelitanin tajunita.
Chai ju Dios quimakꞌalhtaxtulh ni va xaquintamakniputun.
18 Chai ju quiꞌucxtin Dios aquimakꞌalhtaxtuyaꞌ ni jantu aquintanaviyaꞌ tuꞌuꞌ macxcai.
Chai aquilhiꞌanaꞌ junta lhinajun ju yuchi ju lactꞌiyan.
Chach lakꞌayacalh ju yuchi tus va tavanan.
Vasalh iclacasqꞌuin ni chunch caꞌulhtucalh.
Amacꞌaminin ju Pablo
19 Amacꞌamitꞌi ju Aquila chai ju Prisca ju ixꞌamachakach junita.
Vachuꞌ amacꞌamitꞌi ju yuꞌunch ju tatanumanalh laꞌixchakaꞌ ju Onesíforo.
20 Ju Erasto tolhcha ju lakꞌachakꞌan Corinto.
Chai ju Trófimo icmacontacha ju lakꞌachakꞌan Mileto ni va ixtakꞌankꞌai.
21 Atꞌatꞌich acsni jantucaꞌ lhicꞌasnin jun ni laich calayaꞌ.
Ju Eubulo macꞌamiyan.
Vachuꞌ ju Pudente chai ju Lino chai ju Claudia chai tachi chun ju lhiꞌalakꞌavin ju ani tavilanalh.
22 Pus ictapainini ju quiꞌucxtinꞌan Jesucristo ni catolach ju yuchi lamiꞌalhunut.
Vachuꞌ ictapainini ju Dios ni catanaviniyan lamapainin minchuxꞌan ju uxijnan.
Vasalh iclacasqꞌuin ni chunch aꞌulhtꞌucꞌanaꞌitꞌit.