Chanich catajunaꞌ ju lapanacni acsni caminchokoyaꞌ ju Jesús
3
Amachꞌakxatꞌich ju ani.
Acsni vanin chimputun ju avilhchan acsni caminchokoyaꞌ ju Cristo pus na lhu caꞌalinaꞌ ju makꞌalhkꞌajnat.
2 Pus caꞌalinaꞌ ju lapanacni ju va isꞌakstuꞌan caꞌamapainichokocanach.
Chai catakꞌachaniyaꞌ ju tumin.
Chai catanonaꞌ ni palai lackꞌoxin tajunita.
Palai jantu ju aliꞌin.
Chai jantu tuꞌuꞌ catalhiulayaꞌ ju ixtꞌalapanacꞌan.
Chai macxcai chivinti catanonaꞌ.
Chai jantu cataquiclacaꞌiyaꞌ ju ixpaiꞌan ixnatiꞌan.
Chai jantu tuꞌuꞌ catalhiulayaꞌ ju lhakꞌailaktsꞌinch ju anavinicanta.
Chai jantu tuꞌuꞌ catalhiulayaꞌ ju ixtaxtokni Dios.
3 Chai jantu catamapainiyaꞌ ju ixtꞌalapanacꞌan.
Chai jantu lai caꞌamakꞌoxamixicanaꞌ.
Chai va kꞌaya catalhichivinach ju ixtꞌalapanacꞌan.
Chai jantu lai amapꞌaksichokocan isꞌakstuꞌan.
Chai kꞌai tajunita catajunaꞌ.
Chai jantu catakꞌachaniyach ju kꞌox.
4 Catamakꞌaxtꞌakꞌach ju ixtꞌalapanacꞌan.
Chai jantu tuꞌuꞌ catakꞌasmatꞌaꞌ.
Chai na kꞌai catacꞌatsayaꞌ va laꞌisꞌakstuꞌan.
Chai palai tuꞌuꞌ catalhiulayaꞌ ju ixkꞌachat ju lacamunutpaꞌ.
Palai jantu ju Dios.
5 Catatalacasuyach tachi ju vasalh talhilacaꞌanta ju Dios para lana jantu catasuyaꞌ ju ixtachaput Dios laꞌisꞌatsucuntiꞌan.
Pus alackꞌostꞌi ju yuꞌunch.
6 Pus sia yuꞌunch alin ju taꞌaꞌokxchokꞌonun.
Ju yuꞌunch tatanui laꞌixchakaꞌan ju chakolun ju va jantu taꞌacꞌatsananta chai taꞌamalacaꞌini ixchivintiꞌan.
Pus ju anuch chakolun na lhu alactuꞌunti ju tanavita.
Para tapuxcajui aliꞌ taxtokni ju jantu soknicꞌa.
7 Pus ju yuꞌunch takꞌasmatni ixchivinti va tichi chavaich para jantu tavanan lai tamachakxai ju stavasalanti ixlacata ju Cristo.
8 Pus ju makꞌanchich ju Janes chai ju Jambres tatꞌalakꞌailh ju Moisés.
Pus chunchach vachuꞌ talai ju ani lapanacni.
Jantu kꞌox talhiulai ju stavasalanti ixlacata ju Cristo.
Jantuch kꞌox ju ixꞌatalacpastꞌacꞌatꞌan ju yuꞌunch.
Pus lana tasui ni jantu talhilacaꞌanta ju Cristo.
9 Para tachi ju tatapasalh ju ixtꞌalaxcai ju Moisés acsni tasu ni va aꞌokxchokꞌonin ixtajunita pus vana va chunch catapasayaꞌ ixlacataꞌan ju ani aꞌokxchokꞌonin.
Jantu lai catatailhiꞌanaꞌ ju ixꞌaꞌokxchokꞌontiꞌan.
Aktsꞌiya catasuyach ni va lakachapunin tajunita.
Ju Pablo mapꞌaksi ju Timoteo
10 Para ju uxintꞌi cꞌatsꞌatꞌa ta yu xacꞌamalaninin chai ta yu ixjunita ju quiꞌatsucunti chai tuchi xacnaviputun chai ni vasalh iclhilacaꞌanta ju Jesucristo.
Chai cꞌatsꞌatꞌa ni jantu tavanan jeks xacꞌui.
Cꞌatsꞌatꞌa ni na xacꞌamapaininin chai xacchꞌixkꞌojui tachi chun ju macxcai.
11 Cꞌatsꞌatꞌa ta yu xacxcaicanta chai ta yu xacmakꞌalhkꞌajnan.
Cꞌatsꞌatꞌa tuchi ictapasalh ju lakꞌachakꞌanixni Antioquía chai Iconio chai Listra.
Cꞌatsꞌatꞌa ta yu xaquintamamakꞌalhkꞌajni.
Para lhichux quimakꞌalhtaxtulh ju quiꞌucxtin Jesús.
12 Pus tachi chun ju tatsucuputun tachi ju kꞌachani ju Cristo Jesús camamakꞌalhkꞌajnicanaꞌ.
13 Para ju na taꞌalactuꞌunun chai ju taꞌaꞌokxchokꞌonun palai kꞌai junita catajunaꞌ.
Ju yuꞌunch cataꞌaꞌokxchokꞌonunach ju aliꞌin chai caꞌokxchokꞌocanaꞌ isꞌakstuꞌan.
14 Para ju uxintꞌi va tachi alacꞌaꞌitꞌi ju tuchi lanitꞌach chai cꞌatsꞌaich ni stavasalanti chai cꞌatsꞌaich tichi chavaꞌitnich ju tamalanitan.
15 Pus tus milhitalacatꞌicstꞌin ju mispꞌatꞌa ju ixchivinti Dios ju tsꞌokcanta.
Anchach ju pucꞌatsacan ni lai takꞌalhtaxtucan acsni maklacaꞌanican ju Cristo Jesús.
16 Pus tachi chun ju ixchivinti Dios ju tsꞌokcanta isꞌakstu ju Dios ju amaꞌatsꞌokꞌulani ju lapanacni.
Chai ni chunch junita ju ixchivinti Dios pus anchach ju pulanican ju kꞌox chai pucꞌatsacan junta jantu soknicꞌa ju laquiꞌatsucuntiꞌan.
Chai ni laktsꞌincan ju ixchivinti Dios pus lai pulakꞌoxican ju quiꞌatsucuntiꞌan.
Chai anchach ju pulanican ju atsucunti ju kꞌox lhiulai ju Dios.
17 Chai ni chunch junita ixchivinti Dios pus jantu tuꞌuꞌ cꞌacxni laꞌisꞌatsucunti ju ixlapanac ju Dios ni lai cacꞌatsa ju ixkꞌachat ju Dios chai lai canaviyaꞌ.