Chani lai ju vasalh ixlapanac Jesús junita
2
Ju Cristo Jesús navinitan lamapainin ju uxintꞌi ji quintsꞌalh.
Pus apꞌutꞌachꞌapꞌutꞌich ju yuchi.
2 Pus ju uxintꞌi na paklhu xakꞌasmatꞌa ju quinchivinti chai na pumalhu vachuꞌ tacꞌatsai ni yuchach ju stavasalanti.
Pus yuchach ju amalanichꞌokꞌoyaꞌich ju anuꞌ lapanacni ju alaktsꞌinch ni laich catamuctaxtuyaꞌ.
Ju chunch ni laich cataꞌamalaniyaꞌ vachuꞌ ju aliꞌin.
3 Pus achꞌixtꞌich ju makꞌalhkꞌajnat ju axtꞌaknicꞌanaꞌ va ixlacaꞌatalh ni anonaꞌ ixchivinti Dios.
Achꞌixtꞌich tachi ju lai tam taropa ju makꞌalhkꞌajnan lacalhilucut.
Pus vachuꞌ ixtaropajni juntau ju Dios chai yuchi ju quincapitánꞌan junita.
4 Pus ju tam taropa ju tꞌonacha lacalhilucut jantu tuꞌuꞌ navi cuenta ixlacata ju atumpa atsucunti.
Va yuchi ju navi cuenta ju tuchi kꞌox calhiulayaꞌ ju ixꞌucxtin.
Pus tasqꞌuini ni vana va chun calau laꞌixmacni ju Dios.
Jantu va yuchi ju canaviu cuenta ju xataxtokni ju ani lacamunutpaꞌ.
5 Chai vana va chun tachi chun ju takꞌamanan.
Ni jantu sok takꞌamanan tachi ju lhijun ju xalhamapꞌaksin pus jantu tuꞌuꞌ talhajai.
Pus tasqꞌuini ni vana va chun calau laꞌixmacni Dios.
Acsni jantu naviyau cuenta tachi ju lhijun laꞌixlhamapꞌaksin Dios pus jantu lai tuꞌuꞌ calhajatachau ju lactꞌiyan.
6 Chai ju tam lapanac ju na lhixkꞌopta ixꞌachꞌananti pus yuchi ju pꞌulhnan caꞌamaklhtayananach ju xatocꞌat.
Pus tasqꞌuini ni vana va chun calau laꞌixmacni ju Dios.
Acsni slivasalh laꞌixlhichux quiꞌalhunutꞌan canaviniyau ju ixlhichꞌalhcat pus calaktsꞌinau ju xalhiꞌut ju quilhichꞌalhcatꞌan ju ani lacamunutpaꞌ.
7 Apꞌastꞌactꞌich ju ani ju icjunan chai yuchi ju miꞌucxtin Jesús ju camamachakxaniyan tuchi ju nomputun.
8 Apꞌastꞌactꞌich ni makꞌaniya ixpapanti ju kꞌai ucxtin David ixjunita ju Jesucristo.
Chai ju yuchi lokꞌonchokolh junta ixmacnucanta.
Chai icꞌajuni ju lapanacni ni ixlacata yuchi lai takꞌalhtaxtucan.
9 Chai va ixlacata ni chunch icꞌajuni ju lapanacni pus na icmamakꞌalhkꞌajnican.
Tus tachꞌin quintanavi tachi ju va icꞌalactuꞌunuch.
Para ju ixchivinti Dios makpitsicanta ixlhilacaputsꞌun ju lacamunutpaꞌ.
Jantu lai xamatiꞌ tachꞌin navi ju yuchi.
10 Chai yuchi chux iclhimakꞌalhkꞌajnan va ixlacataꞌan ju asacxtulh ju Dios.
Chai ju chunch ju yuꞌunch lai catatakꞌalhtaxtuyaꞌ ni catalhilacaꞌanaꞌ ju Cristo Jesús.
Chai vachuꞌ laich catatꞌatolhkꞌalhiyanta ju Cristo ju lactꞌiyan.
11 Vasalh junima chivinti.
Ni quintalhilhcatan ju Dios ni tachi ju va tꞌanitauch ju Cristo acsni tavanan xtujcalh ju yuchi ju lacacurus pus vachuch catꞌatolhtachau ju yuchi ju lactꞌiyan.
12 Ni jantu tavanan cꞌapꞌau ju Cristo mas va tuchi min laquiꞌatsucuntiꞌan pus vachuꞌ catꞌataꞌucxtinitachau ju yuchi ju lactꞌiyan.
Ni canonau ni jantu mispayau ju yuchi pus ju yuchi vachuꞌ canonaꞌ ni jantu quintamispayan ju quijnanꞌan.
13 Mas jantu muctaxtuyau ju quijnanꞌan para ju yuchi aktsꞌiya camuctaxtuyaꞌ tuchi najunta.
Ju yuchi jantu tavanan lai tam catinaulh astan.
Chunch alatꞌi tachi ju tam chꞌalhcatnaꞌ
14 Amapꞌastꞌacꞌanitꞌi ju yuꞌunch ju talhilacaꞌanta ju Jesús tachi chun ju icjuntan ju uxintꞌi.
Pus ju quiꞌucxtinꞌan Dios quintalaktsꞌinan tachi chun ju naviyau.
Chai yuchi iclhijunan ni amapꞌaksitꞌich ni jantu catalhilasalh ju tuꞌuꞌ ju va chivinti junita.
Ju chunch jantu lhitapalai.
Alai va alakꞌalhini ixꞌatalacpastꞌacꞌatꞌan ju tatꞌajun kꞌasmatnin.
15 Va yuchi ju anavitꞌi cuenta ta yu laich atꞌalacꞌasunin ju Dios ta yu kꞌoxich capulhiulayan.
Chunch ju alatꞌi tachi ju tam chꞌalhcatnaꞌ ju jantu lai mamaxanican ixlacata ju tuchi navita.
Sok amasunin ju ixchivinti Dios.
Yuchach ju stavasalanti.
16 Amacꞌauch ju chivinti ju jantu lai xamatiꞌ catiꞌaktaiju ni laich camispa ju Dios chai ju tuꞌuꞌ chivinti ju jantu lhitapalai.
Pus ju chunch tachivinin va palai palai catacꞌapꞌaꞌ ju Dios.
Yuchi iclhijunan ni amacꞌauch ju chunch ju uxintꞌi.
17 Chai ju ixchivintiꞌan ju yuꞌunch va palai palai calakꞌalhiniyaꞌ ju isꞌatsucuntiꞌan tachi ju tuꞌuꞌ tsꞌitsꞌi ju va puchꞌiꞌan.
Chai chunchach ju tachivinin ju Himeneo chai ju Fileto.
18 Ju ixtꞌiyunꞌan makyuꞌunch tajunita ju lapanacni ju jantu sok taꞌamalaninin.
Pus ju yuꞌunch va tanajun ni alokꞌonchokocantach ju lapanacni ju chavai chai jantu aktam catilokꞌonchokocalh.
Chai ni chunch tanajun pus tamalacaꞌinita ju aliꞌin chai taꞌamacꞌapꞌanita ju ixchivinti Dios.
19 Pus cꞌatsacan ni xtakni ixtachaput ju Dios tachi chun ju talhilacaꞌan ju yuchi ni chani najun laꞌixchivinti ju tsꞌokcanta:
“Ju Dios mispai ju ixꞌanuch tajunita”.
Chai alacatam chani najun:
“Chach macaulh ju alactuꞌunti tachi chun ju tanajun ni talhilacaꞌanta ju ixꞌucxtinꞌan Jesús”.
Chunch ju najun chai yuchi pucꞌatsayau ni vasalh alin ixtachaput ju Dios.
20 Pus ju lacakꞌai chakaꞌ jantu va yuchi ju alin ju puchꞌalhcatna ju oro lhinavicanta chai ju plata lhinavicanta.
Para vachuꞌ alin ju puchꞌalhcatna ju va qꞌuiu lhinavicanta chai ju va tꞌun lhinavicanta.
Pus ju lhinavicanta oro chai plata vasalh lhitapalai.
Para ju lhinavicanta qꞌuiu chai ju lhinavicanta tꞌun jantu na chun tapalai.
21 Pus ju quijnanꞌan chunch juntau tachi ju ani puchꞌalhcatna.
Pus ni alin xamatiꞌ ju lana jantu caꞌamalakꞌavi ju yuꞌunch ju jantu sok masui ju ixchivinti Dios pus calhimispacanaꞌ ni lhitapalai ju laꞌixmacni Dios.
Va ixꞌanuꞌ isꞌakstu Dios cajunaꞌ chai laich capunaviyaꞌ ju ixlhichꞌalhcat.
Chai kꞌox cajunaꞌ ixlacata va tuchi kꞌoxi lhichꞌalhcat ju xtakniputun ju Dios.
22 Ni jantuch vana navi ju chavai tachi ju va puꞌaskꞌatꞌa pus atꞌailhipꞌich ju chunch.
Vachuꞌ atꞌailhipꞌich ixpuxcajuca ta yu laich soknicꞌa capujunlh ju miꞌatsucunti laꞌixmacni Dios.
Chai va tachi alhilacꞌapꞌi ju Jesucristo.
Chai va tachi amapꞌainininch.
Chai jantu lana atꞌalakꞌaꞌitꞌich xamatiꞌ.
Chunch ju alatꞌi ni vachuꞌ chunch talai ju yuꞌunch ju vasalh talhilaksi ju Dios chai salaka junita ju ixꞌalhunutꞌan.
23 Jantu anavitꞌi cuenta ju va jantu taꞌacꞌatsananta chai ju va jantu taꞌamachakxanan.
Jantu anavitꞌi cuenta ni cꞌatsꞌaich ni va puꞌalin lhilucut ju chunch chivinti.
24 Chai tasqꞌuini ni jantu va lasani lapanacni catava ju ixlapanacni ju quiꞌucxtinꞌan Jesús.
Alai tasqꞌuini ni kꞌox lapanac cava lhichux chai laich camalaninilh chai laich cachꞌixlh ju makꞌalhkꞌajnat.
25 Chai tasqꞌuini ni lacalhikꞌox caꞌalacjunilh ju yuꞌunch ju jantu kꞌaixtam tatꞌaꞌan.
Chunch caꞌalactꞌalalh ni jantu xcai ni Dios caꞌalacxtaknilh tumpa ixꞌatalacpastꞌacꞌatꞌan ta yu laich catapumispa ju stavasalanti.
26 Ju chunch catamachakxayaꞌ ni va aꞌokxchokꞌolh ju lhacaticuru.
Chai catacꞌatsayaꞌ ni yuchi ju lhacaticuru ju ixlhinajun laꞌisꞌatsucuntiꞌan chai ixtanavini ixkꞌachat ju yuchi.