6
Tachi chun ju lapanacni ju talhilacaꞌanta ju Cristo ju astꞌacanta catatalhonilh ju ixꞌucxtinꞌan.
Ju chunch jantu va kꞌaya calhichivinincanaꞌ ju ixtapakaꞌut ju Dios nin yuchi ju ixchivinti.
2 Pus ni vachuꞌ lhilacaꞌanta ju Cristo ju ixꞌucxtinꞌan pus ju xalapanacni jantu lai catitanaulh ni jantu tuꞌuꞌ talhiulai ju ixꞌucxtinꞌan va ixlacaꞌatalh ni vachuꞌ talhilacaꞌanta ju Cristo ju yuꞌunch.
Alai va palai kꞌox catachꞌalhcatnanilh ni taꞌaktaijui xamatiꞌ ju vachuꞌ lhilacaꞌanta ju Cristo chai ni tatꞌalamapaini.
Pus icjunan ni chunchach ju amalanitꞌi chai chunchach ju alhimapꞌaksitꞌi ju lapanacni.
Ju lhilacaꞌanta ju Cristo lhikꞌach catsuculh
3 Pus jantu xcai ni caꞌalilh xamatiꞌ ju amalaninin atumpa chivinti chai jantu chun najun tachi ju ixchivinti quiꞌucxtinꞌan Jesucristo ju sok junita chai jantu najun ta yu laich caputsuculh tachi ju kꞌoxich lhiulai ju Dios.
4 Pus ni chunch ju chivinin tam xamatiꞌ pus ju yuchi na lhitakꞌayatach mas jantu tuꞌuꞌ mispai.
Va lhilakachapui ju lakꞌaiti chai lasat ixlacata ju tuꞌuꞌ lacatsꞌunin chivinti.
Para ju chunch va puꞌalin ju alhacchaꞌanti chai lakꞌaiti chai tachi chun ju macxcai chivinti ixlacata apumatam chai tamucꞌani ixtalakꞌalhin mas jantu slivasalh.
5 Chai lana jantu tavanan tamamactai ju laclakꞌaiti.
Pus na takꞌalhinitach ju ixꞌatalacpastꞌacꞌatꞌan ju lapanacni ju chunch talai chai va tamacajunta ju stavasalanti.
Ju yuꞌunch va tapulhajaputun ju tuchi tamalani ju lapanacni ixlacata ju Dios.
Para ju uxintꞌi amacꞌauch ju yuꞌunch.
6 Pus ju palai kꞌox ju lhajayau yuchi ni kꞌox lhiulai ju Dios ju quiꞌatsucuntiꞌan chai lhikꞌach catsucuyau.
Jantu va yuchi ju ixmakꞌaixtꞌokꞌach ju tumin ju capastactsucu.
7 Pus tasqꞌuini ni jantu va yuchi ju tumin ju canaviyau cuenta ni jantu tuꞌuꞌ lhimintau ju ani lacamunutpaꞌ chai acsni caniyau jantu tuꞌuꞌ calhiꞌanau.
8 Pus ni alinch ju quimpumpuꞌan chai quivaitiꞌan pus calhikꞌachauch.
9 Para ju va makꞌaliꞌ tajumputun na paklhu amapastꞌacꞌanican ju macxcai chai aꞌokxchokꞌocanta.
Chai na tijlhu taxtokni ju talacasqꞌuin mas jantu lhitapalai chai mas na macxcai.
Pus yuchach ju taputakꞌalhini ju isꞌatsucuntiꞌan chai taputsꞌankꞌakꞌalhi ju lapanacni.
10 Pus ni na kꞌachaniyau ju tumin pus anchach ju na lhu puꞌalin ju quiꞌalactuꞌuntiꞌan.
Ju aliꞌin ni yuchach ju tumin ju na takꞌachani pus jantuch vana talhilacaꞌanta ju Jesús.
Chai na lhu talhimakꞌalhkꞌajnanchokoi isꞌakstuꞌan ju chavai.
11 Para ju uxintꞌi ni ixlapanac Diosꞌat pus amacꞌauch tachi chun ju ani taxtokni.
Va tachi asastꞌuctꞌich ju macxcai
Yuchi ju anavitꞌi cuenta ta yu laich soknicꞌa aꞌuntꞌi chai ta yu kꞌox calhiula ju Dios ju miꞌatsucunti.
Chai vachuꞌ va tachi alhilacꞌapꞌich ju Dios.
Chai va tachi amapꞌainininch chai achꞌixkꞌoꞌ mas va tuchi camilh lamiꞌatsucunti.
Chai jantu alhitꞌakꞌayatꞌi tuꞌuꞌ.
12 Chai ni lhilacꞌapꞌintꞌa ju Cristo pus ixlhichux ju miꞌalhunut asastꞌuctꞌi ju macxcai ju va camacꞌapꞌaniputunan ju Cristo.
Chai va tachi anavitꞌich cuenta ju miꞌatsucunti jonkꞌalhita ju lhitꞌasanicꞌantꞌa.
Chai miꞌakstu nauch laꞌixꞌucxlacapuꞌan ixtalhavat lapanacni ni lhilacꞌapꞌintꞌa ju Cristo.
13 Pus Dios ju axtaknikꞌojui isꞌatsucuntiꞌan tachi chun ju taxtokni.
Chai ju Jesucristo naulh tichi lapanac junita laꞌixꞌucxlacapuꞌ ju Poncio Pilato.
Pus ju yuꞌunch quintalaktsꞌinan acsni icmapꞌaksiyan.
14 Pus icjunan ni amuctꞌaxtꞌukꞌoch ju ixchivinti Dios.
Chai jantu amalhqꞌuiliqꞌuitꞌi nin yuchi ni lai macxcai calhichivinincalh ju va milacata.
Chunchach ju alatꞌi tus acsni caminchokoyaꞌ ju quiꞌucxtinꞌan Jesucristo.
15 Chai yuchi ju Dios ju lhcata ju anuꞌ avilhchan chai yuchi ju camalacasuyach ju Jesucristo acsni cachinach ju anuꞌ avilhchan.
Pus yuchi ju Dios ju lhinonkꞌojui chux.
Matich apumatam tachi ju yuchi chai na kꞌoxich lhichivincan ju yuchi.
Yuchi ju palai kꞌai ucxtin tachi chun ju ucxtinin chai yuchi ju palai xakꞌai tachi chun ju xalackꞌajin.
16 Va yuchach ju jantu lai ni.
Chai ju yuchi tꞌajun lacaꞌatuncunuꞌ junta jantu lai xamatiꞌ lakchaꞌan.
Ju yuchi jantu xamatiꞌ laktsꞌinta nin xamatiꞌ lai catalaktsꞌilh tachi ju juntau ju chavai.
Yuchi ju talhonikꞌocan.
Chai yuchi ju alin ixtachaput ju jonkꞌalhita.
Slivasalh chunch ju junita.
17 Pus amapꞌaksitꞌich ju makꞌalinin ju ani lacamunutpaꞌ ni jantu catalhitakꞌaya ju ixmakꞌalitꞌan.
Nin yuchi ni lai catalhilaksi ju ixmakꞌalitꞌan ju lai tsꞌankꞌai lhi tꞌuxam.
Aꞌunitꞌich ni alai yuchi ju Dios ju catalhilaksi.
Yuchach ju quintaxtaknikꞌoyan tachi chun ju taxtokni ju maktasqꞌuiniyau ni laich calhikꞌachanauch.
Chai jantu va quintalhcaxtakniyan.
18 Pus aꞌunitꞌi ju makꞌalinin ni catanavilh ju kꞌox.
Chai lhu catanavilh ju lamapainin.
Chai jantu va lacatapꞌastu cataxtaknilh ju ixtuminꞌan ju vasalh tamaktasqꞌuini.
Alai va lacakꞌachat ju catapuꞌaktaiju ju ixtuminꞌan.
19 Chai ju chunch na lhu catamakꞌayaꞌ ju stavasalanti ixmakꞌalitꞌan ju lactꞌiyan.
Chai caꞌalinaꞌ ju isꞌatsucuntiꞌan ju lactꞌiyan ni jantu talhilaksi ju ixtuminꞌan.
Ju va yuchach lhamapꞌaksin ju junicalh ju Timoteo
20 Ju uxintꞌi ji Timoteo kꞌoxich alhistꞌactꞌi ju ixchivinti Dios ju xtꞌaknicꞌantꞌa ni amasuniyaꞌ ju aliꞌin.
Jantu alakꞌaꞌitꞌi ni xamatiꞌ camapaxalh.
Chai amacꞌauch ju chivinti ju jantu lai aktaijui xamatiꞌ ni camispa ju Dios chai ixchivintiꞌan ju lapanacni ju tanajun ni na kꞌox atalaninin tajunita mas jantu.
21 Chai icpujunan chunch ni talhilacaꞌalh ju chunch chivinti ju aliꞌin chai jantu talhitajuta ixti ju Dios.
Pus ictapainini ju Dios ni caꞌaktaijuyan lacaꞌamapaininti.
Vasalh iclacasqꞌuin ni chunch caꞌulhtuyan.