3 Atꞌalhoninch chai aꞌaktꞌaiꞌutꞌich ju animacontilacanta ju vasalh va isꞌakstuꞌan tatꞌajun.

4 Para ju tam chakoꞌulh ju nimacontilacanta ni catꞌanimacontilacalh isꞌaskꞌatꞌa u tam ixpapanti pus chach yuꞌunch ju taꞌaktaiju ju laꞌixmaktasqꞌuinit.

Pus lhijunch ni catamapuspꞌitnilh ju ixpaiꞌan u ixnatiꞌan tuchi tamakꞌalhkꞌajnalh ixlakꞌayacaꞌan.

Chai ju Dios na kꞌoxich lhiulai acsni chunch lai ju tam askꞌatꞌa.

5 Para ju tam chakoꞌulh ju va nimacontilacanta chai ju va isꞌakstu tꞌajun lhilaksi ju Dios chai va tachi tapaininich chai va tachi tꞌachivininch tsꞌis chai tuncuj.

6 Para ju tam chakoꞌulh mas nimacontilacanta ju na kꞌachani ixtaxtokni ju ani lacamunutpaꞌ pus mas tꞌajuncaꞌ para ju Dios laktsꞌin ni tachi ju va nita.

7 Pus yuchi ju alhimapꞌaksitꞌi ju lapanacni.

Ju chunch ni matich cajunaꞌ ixꞌalactuꞌuntiꞌan ixlacata ju ani taxtokni.

8 Pus ju tam xamatiꞌ ni jantu caꞌaktaiju ju ixpai ixnati u ixlakꞌau u ixpuxlimti u ixcucu u ixquin u yuꞌunch ju tatanumanalh laꞌixchakaꞌ laꞌixmaktasqꞌuinitꞌan pus lana putalacasui ni jantu slivasalh ni lhilacaꞌanta ju ixchivinti Dios.

Va palai lakꞌalhini ixlhamapꞌaksin ju Dios ju yuchi.

Palai jantu ju jantucaꞌ lhilacaꞌanta ju Cristo.

9 Laich catsꞌokꞌulanicalh ixtapakaꞌut tam chakoꞌulh ju nimacontilacanta ni caꞌaktaijucalhch ju pacxanta sesenta cꞌata chai va pumatam ixpapa ixjunita.

10 Vachuꞌ tasqꞌuini ni catanaulh chux ju lapanacni ni na ixnavi lamapainin.

Chai tasqꞌuini ni alakꞌayalh ju isꞌaskꞌatꞌan chai yauch ixꞌajuni ni xamatiꞌ ixlakacujtilaputun laꞌixchakaꞌ chai ixꞌachꞌalhcatnani ju ixlapanacni Dios mas va lacatꞌicstꞌi ixlhicꞌatsai chai ixꞌaꞌaktaijui ju na ixtamakꞌalhkꞌajnan chai va tachi ixnavich tachi chun ju amapaininti.

Pus ni ixnavi tachi chun ju ani pus lai tsꞌokꞌulanican ixtapakaꞌut.

11 Para ju animacontilacanta ju va palaicaꞌ atsiꞌin jantu atsꞌokꞌulatꞌi.

Pus ju aliꞌin sia yuꞌunch catamacomputunach ju lhichꞌalhcat ju tanaulh ni tanaviputun ixlacata ju Cristo chai catatamakꞌaxtokchokoputunach.

Ni chunch catanavi pus matich cunaꞌ ispantsꞌiquisꞌan ni lai lhu catanavi ju ixlhichꞌalhcat Dios.

12 Chai ju chunch caꞌulanicanaꞌ ixtalakꞌalhinꞌan ni tamacaulich ju lhichꞌalhcat ju ixtakꞌalhtasuta ni catanaviyaꞌ.

13 Vachuꞌ tapusmani ni jantu tuꞌuꞌ tanaviputun.

Va taꞌatalacnunun ju lakꞌachakꞌanixni.

Chai jantu va yuchi ni jantu tachꞌalhcatnan para va tamapuchokoi ju chivinti chai tatachꞌanui junta jantu ixcuentaꞌan chai talhichivinin ju taxtokni ju jantu lhijun ni catanaulh.

14 Pus ni chunch ju talai ju va atsiꞌincaꞌ ju animacontilacanta pus yuchi iclhinajun ni chach aꞌicalh.

Chach taꞌalilh ju isꞌaskꞌatꞌaꞌan chai chach kꞌox talhistaclh ju laꞌixchakaꞌan.

Ju chunch jantu tuꞌuꞌ catiꞌalilh ju laich aquintapulhichivinin ju jantucaꞌ talhilacaꞌanta ju Cristo.

15 Icjunan chunch ni aktsꞌiya tachꞌakꞌokꞌachokolh ju lhacaticuru ju aliꞌin.

16 Pus ju tam lapanac u tam chakoꞌulh ju lhilacaꞌanta ju Cristo ni alin ixnati u ixlakꞌau ju va nimacontilacanta chach aꞌaktaiju laꞌixmaktasqꞌuinit.

Ju chunch ju ixtalhavatꞌan ju talhilacaꞌanta ju Cristo lai cataꞌaktaijuyaꞌ ju animacontilacanta ju vasalh va quilhpatinin tajunita ni lana va isꞌakstuꞌan.

Jantu tasqꞌuini ni cataꞌaktaiju ju alin tam xamatiꞌ.

17 Tasqꞌuini ni slivasalh catalhonicalh ju lapanacni ju tamuctaxtui laꞌixlhichꞌalhcatꞌan acsni talhinajun lacatalhavat ju talhilacaꞌanta ju Cristo.

Vachuꞌ caꞌaꞌaktaijucalh laꞌixmaktasqꞌuinitꞌan.

Chai palai catalhonicalh chai palai caꞌaꞌaktaijucalh ju yuꞌunch ju tanajun ixchivinti Dios vachuꞌ chai taꞌamalaninin ixlhichux ixꞌalhunutꞌan.

18 Pus chunch aꞌulhtꞌutꞌi ni chani najun laꞌixchivinti Dios:

“Jantu amakꞌankꞌatꞌanutꞌi tuꞌuꞌ ju mivacax acsni tꞌajun pꞌakxnaꞌ ju cebada”.

Chunch ju najun.

Chai ju alacatam chani najun:

“Lhijunch ni camapalacalh ixtapalh ixlhichꞌalhcat ju lapanac ju chꞌalhcatnan”.

Chunch ju najun.

19 Pus jantu anavitꞌi cuenta ni xamatiꞌ lhichivinin pumatam ju lhinajun lacatalhavat.

Va acsnich ju lai akꞌasmatniyaꞌ acsni catanonach tachi pumatꞌui u pumatꞌutu ni talaktsꞌilh acsni xanavi ju anuꞌ alactuꞌunti.

20 Para ju yuꞌunch ju talhinajun para ixlaquilhtu va tsa taꞌalactuꞌunun akꞌaich laꞌixꞌucxlacapuꞌan ju aliꞌin ju talhinajun.

Ju chunch ju aliꞌin catatalhananach vachuꞌ.

21 Pus ju Dios chai ju Jesucristo chai ju anquilhnin ju asacxtucanta si quintalaktsꞌinan tuchi naviyau.

Pus yuchi iclhitapaininiyan ni amuctꞌaxtꞌutꞌich tachi chun ju ani taxtokni ju icjuntan.

Vaklhtam chun alaktsꞌi ju lapanacni.

Jantu va pumacatami amapꞌainitꞌi.

22 Jantu va sokꞌo axtꞌaknin ju ixlhichꞌalhcat ju tam xamatiꞌ ni calhinaulh lacatalhavat.

Pus ni vatsꞌalhti caxtaknicalh ju ixlhichꞌalhcat chai astan jantu sok catailhiꞌalh pus aꞌulanicꞌanaꞌ ju mintalakꞌalhin ju uxintꞌi.

Alai salaka aꞌuntꞌi ju uxintꞌi.

23 Ju atipuꞌanta jantu va xcan ju akꞌotꞌi.

Para akꞌotꞌi lacatsꞌunin vino vachuꞌ ni cacꞌuchꞌulh ju mimpajan ni va tsa tꞌakꞌankꞌai.

24 Ju ixꞌalactuꞌunti ju aliꞌin lapanacni lana tasui.

Chai ju aliꞌin mas jantucaꞌ lai tasui ju macxcai ju tanavi para astan aktsꞌiya catatalacasuyach acsni cachinaꞌ ju avilhchan ju lhcata ju Dios.

25 Pus chunchach vachuꞌ ju kꞌoxi lhichꞌalhcat ju tanavi ju aliꞌin.

Ju aliꞌ lana tasui.

Chai ju aliꞌ tulai vatsꞌalhti tasui.

Para astan cacꞌatsacanaꞌ ni tanavita ju kꞌox.