Alin ju jantu talacaꞌi ju chivinti ixlacata ju Cristo
4
Ju Spiritu Santu vas naulh laꞌixchivintiꞌan ju lapanacni ju tanajun ixchivinti acsni naulh ni cataꞌalinach astanch ju lapanacni ju catacꞌapꞌaꞌ ju chivinti ixlacata ju Cristo.
Chai catakꞌasmatniyach ju aꞌokxchokꞌoni amamakaꞌunin.
Chai catalacaꞌiyaꞌ ixchivinti ju lhacaticuru.
2 Chai ju anuch lapanacni catamasuyaꞌ ju anuꞌ chivinti tachi ju va istavasalanti mas va aꞌokxchokꞌonti.
Pus mas taꞌokxchokꞌoi ixtꞌalapanacni nin lacatsꞌunin jantu alhixcani ixꞌalhunutꞌan.
3 Ju yuꞌunch va catanonaꞌ ni jantu kꞌox ni tamakꞌaxtokcan chai ma alin vaiti ju jantu lai ucan.
Chunch catanonaꞌ mas yuchi ju Dios ju navikꞌota tachi chun ju quilacatunaꞌan chai tachi chun ju vaiti.
Chai yuchi lhinavicalh ni laich caꞌamaklhtayananauch chai cajunauch lakꞌailaktsꞌiuch ju Dios tachi chun ju quijnanꞌan ju lhilacaꞌantauch ju Cristo chai mispayauch ju stavasalanti.
4 Pus tachi chun ju navita ju Dios si kꞌox.
Chai jantu tasqꞌuini ni tuꞌuꞌ aclacmackꞌalh.
Va yuchi ni aclhixtaknilh lakꞌailaktsꞌiuch ju Dios acsni icꞌamaklhtayananch tuꞌuꞌ.
5 Pus isꞌakstu Dios ju naulh ni na kꞌox tachi chun ju ani taxtokni.
Chai acsni icꞌamaklhtayanan tuꞌuꞌ ni icjuni lakꞌailaktsꞌiuch ju yuchi pus jantu talakꞌalhin icnavi acsni icꞌui.
Chani calalh ju Timoteo
6 Ni chunch ju alhimasuni ju quiꞌalakꞌavinꞌan pus na kꞌox amalaniniꞌ aꞌunaꞌ laꞌixmacni Cristo.
Chai palai tachapun capujunaꞌ ju mintacꞌatsan ju chivinti junta najun tichi chavaich ju lhilaksiyau.
Vachuꞌ palai tachapun capujunaꞌ ju mintacꞌatsan ju kꞌox lhamapꞌaksin ju tꞌaꞌun muctaxtunuꞌ.
7 Nin lacatsꞌunin jantu anavitꞌi cuenta ju anuꞌ chivinti ju tatꞌajun nonin ju aꞌokxchokꞌoni amamakaꞌunin.
Pus ju ixchivintiꞌan jantu lai catiꞌaktaiju xamatiꞌ ni laich camispa ju Dios ni va chivintich junita.
Jantu anavitꞌi cuenta.
Alai va yuchi ju anavitꞌi cuenta ta yu laich atsꞌucꞌu tachi ju kꞌachani ju Dios.
8 Ju quintꞌalapanacniꞌan acsni talhitalacaxnuj ju tuꞌuꞌ pus va ixlacatunaꞌan ju talhilachapui.
Para ju palai tasqꞌuini yuchi ni acnavi tachi ju kꞌachani ju Dios.
Yuchach ju quintaꞌaktaijuyan laquiꞌatsucuntiꞌan ju ani lacamunutpaꞌ chai ixlacata ju quiꞌatsucuntiꞌan ju caꞌalinach astan.
9 Pus slivasalh junima chivinti chai lhijunch ni catalacaꞌilh tachi chun ju lapanacni.
10 Pus icnaviputunau tachi ju kꞌachani ju Dios chai yuchi iclhichꞌalhcatnanau chai ixlhichux quintachaput quincꞌan icsastꞌucꞌau ju macxcai.
Chai icnaviyau chunch ni iclhilacaꞌantauch ju Dios ju lakꞌajunta.
Pus va yuchi ju lai amakꞌalhtaxtunun chai yuchi ju quintamakꞌalhtaxtun ni lhilacaꞌanauch ju yuchi.
11 Pus chunch ju alhimapꞌaksitꞌi chai chunchach ju amalanitꞌi ju lapanacni.
12 Chai mas va antacaꞌ ju mintakꞌayanti para jantu tuꞌuꞌ anavitꞌi ta yu laich jantu tuꞌuꞌ capulhiulayan xamatiꞌ.
Alai atꞌalacꞌasutꞌich tachi ju kꞌox lhilaktsꞌintaiti ixlacataꞌan ju talhilacaꞌanta ju Jesús.
Amalacꞌasuninch ni na kꞌox ju chꞌivinin chai ni salaka ju miꞌatsucunti chai ni na amapꞌaininin chai ni lacꞌaꞌinikꞌoꞌui ixchivinti Dios chai ni tꞌalhonich ju Dios.
13 Chai ni jantucaꞌ lai icꞌanacha pus va tsa anavitꞌi cuenta ixlaktsꞌinca ju ixchivinti Dios junta tatakꞌaixtꞌokꞌa ju talhilacaꞌanta ju Cristo.
Vachuꞌ amapꞌaksitꞌich ju yuꞌunch chai amasunin ju ixchivinti Dios.
14 Jantu alakꞌaꞌitꞌi ni xamatiꞌ calakꞌalhinin ju kꞌox mintacꞌatsan ju xalhikꞌailaktsꞌinan ju Dios laꞌixchivintiꞌan ju tanajun ixchivinti.
Chai ju yuꞌunch ju talhinajun lacatalhavat tamokslanin ju ixmacaꞌan ni cacꞌatsacalh ni xtꞌaknicꞌantꞌa ju milhichꞌalhcat ni aꞌunaꞌ ju lapanacni ixchivinti Dios.
15 Va tachi anavitꞌich tachi chun ju ani taxtokni ju icjuntan.
Chai anavitꞌich ixlhichux ju miꞌalhunut.
Ju chunch catalaktsꞌinan ixchuxꞌan ni tꞌaꞌun palaich mispanaꞌ ixchivinti Dios.
16 Alhistꞌacchꞌokꞌocꞌach miꞌakstu.
Chai vachuꞌ anavitꞌi cuenta tuchꞌi amalaniyaꞌ ju lapanacni.
Ju chunch atꞌakꞌalhtꞌaxtꞌuyaꞌ ju uxintꞌi chai vachuꞌ catatakꞌalhtaxtuyaꞌ ju yuꞌunchach ju catakꞌasmatniyanch.