Chani catatsuculh ju talhinajun lacatalhavat
3
Slivasalh ju anuꞌ chivinti junta najun ni na kꞌox lhichꞌalhcat ju naviputun ni xamatiꞌ lhinomputun lacatalhavat ju talhilacaꞌanta ju Jesucristo.
2 Pus tasqꞌuini ni jantu tuꞌuꞌ catamalacasu ju macxcai ju yuꞌunch ju talhinomputun lacatalhavat ju talhilacaꞌanta ju Cristo.
Chai vachuꞌ tasqꞌuini ni va pumatamch ixꞌamachakaꞌ cava chai calhistacchokocalh isꞌakstu.
Chai tasqꞌuini ni na acꞌatsananta cava chai na seknicꞌa lapanac cava chai yau cajunilh xamatiꞌ acsni lakacujtilaputun laꞌixchakaꞌ.
Vachuꞌ tasqꞌuini ni na laich caꞌamalaninilh.
3 Chai tasqꞌuini ni jantu cakꞌachanilh ju tꞌakꞌapꞌat chai jantu vatsꞌalhti calhitalhkꞌamalh ju tuꞌuꞌ.
Alai cachꞌixkꞌo ju macxcai.
Vachuꞌ jantu lasani lapanac cava chai jantu cakꞌachanilh ju tumin.
4 Kꞌox calhinaulh ju laꞌixchakaꞌ chai cataquiclacaꞌi ju isꞌaskꞌatꞌan chai catatalhonilh.
5 Pus ju jantu lai lhistꞌacꞌa ju laꞌixpulacni ixchakaꞌ tas caꞌalhimapꞌaksiyach ju aliꞌin ju vachuꞌ talhilacaꞌanta ju Cristo.
6 Vachuꞌ jantu lai catilhinaulh lacatalhavat ju jantucaꞌ makꞌan lhilacaꞌanta ju Cristo.
Jantu xcai ni va calhitakꞌaya tachi ju lalh ju lhacaticuru.
Chai ju chunch pus vachuꞌ caꞌulanicalh ixtalakꞌalhin tachi ju navicalh ju lhacaticuru.
7 Vachuꞌ tasqꞌuini ni kꞌox lapanac catalhiula ju jantucaꞌ talhilacaꞌanta ju Cristo.
Jantu xcai ni va kꞌaya catalhichivinilh chai ju chunch lai camalactuꞌuni acsni caꞌokxchokꞌolh ju lhacaticuru.
Chani catatsuculh ju taꞌaꞌaktaijunun lacatalhavat
8 Pus chunchach vachuꞌ ju diácononin ju taꞌaktaijui ju taꞌamalaninin.
Tasqꞌuini ni seknicꞌa lapanacni catava.
Chai jantu cataꞌacxputꞌiyunulh laꞌixchivintiꞌan.
Jantu catakꞌachanilh ju pinquin.
Jantu cataꞌokxchokꞌosqꞌuinlh ju tumin.
Ju chun slivasalh na lhimaxan.
9 Chai tasqꞌuini ni cataquiclacaꞌilh ju ixchivinti Dios.
Chai ju yuchi jantu lai machakxacan ju va laquiꞌakstuꞌan.
Chai ni tanajun ni taquiclacaꞌi ju ixchivinti Dios pus tasqꞌuini ni jantu tuꞌuꞌ catanavilh ju lai catalhixcanilh ixꞌalhunutꞌan.
10 Para pꞌulhnan acsni tucaꞌ xtaknican ju ixlhichꞌalhcat tasqꞌuini ni calaktsꞌintanucanach ju taꞌaꞌaktaijunumputun.
Chai ni soknicꞌa ju isꞌatsucuntiꞌan pus laich cataꞌaꞌaktaijununaꞌ.
11 Pus chunchach vachuꞌ ju chakolun ju taꞌaꞌaktaijunumputun.
Jantu va lakachapuni chakolun catava.
Nin yuchi ni lai catamapuchokolh ju chivinti.
Calhistacchokocalh isꞌakstuꞌan chai tasqꞌuini ni lai calhilaksicalh ni catamuctaxtuyaꞌ tachi chun ju tanaviputun.
12 Pus ju anuꞌ aꞌaktaijunin va pumatam ixꞌamachakaꞌ catapacxalh.
Chai tasqꞌuini ni cataquiclacaꞌi ju isꞌaskꞌatꞌan chai kꞌox calhinaulh laꞌixchakaꞌ.
13 Pus tachi chun ju tachꞌalhcatnan lacatalhavat ni kꞌoxich catanaviyaꞌ ju lhichꞌalhcat pus kꞌox capulhiulacanaꞌ chai jantu catatalhananaꞌ acsni catajunaꞌ ju lapanacni ni catalhilacaꞌalh ju Cristo.
Ju makꞌanchich jantu xacmachakxayau ixlacata ju Cristo
14 Pus xacnajunta ni vatsꞌalhti xaclakꞌanchan ji Timoteo.
Para alai va acꞌatsꞌoknuniyan ju tuchi xacjumputunan.
15 Ju chunch mas jantu lai vatsꞌalhti acꞌananta para laich acꞌatsꞌayaꞌ ta yu catalalaktsꞌinaꞌ ju isꞌaskꞌatꞌan Dios.
Pus ju yuꞌunch chunch tajunita tachi ixpujitat Dios ju lakꞌajunta ni tꞌajun ju yuchi laꞌixꞌalhunutꞌan.
Chai ju yuꞌunch chunch tajunita tachi ju tuꞌuꞌ xatantun chakaꞌ ju na makat machꞌanꞌacnucanta.
Pus laich acnaulh ni chunch tajunita ni pꞌas talhilaksi ju ixchivinti Dios chai jantu tuꞌuꞌ lai catiꞌamacꞌapꞌani.
Chai ju chunch pus lai tasui ni slivasalh ju ixchivinti Dios.
16 Pus ju makꞌanchich jantu iscꞌatsayau ta yu laich takꞌalhtaxtucan.
Para ju chavai machakxayau.
Chai na tasqꞌuini ni cacꞌatsayau tuchi lacaꞌiyauch ixlacata ju Cristo.
Pus lacaꞌiyau ni talacasu ju Dios ju ani lacamunutpaꞌ acsni lapanac quitsucuchilh ju istsꞌalh.
Yuchi ju Jesucristo.
Chai ju Dios masulh ni na soknicꞌa junita ju isꞌatsucunti ju istsꞌalh.
Chai ju anquilhnin talaktsꞌilh.
Chai ajunicalh tachi chun ju lapanacni ixlacata ju yuchi.
Chai tachi chun ju yuꞌunch va aliꞌin ju talhilaksilh ju yuchi.
Chai ju yuchi lhiꞌanchokocalh ju lactꞌiyan junta slivasalh na kꞌox.