Ju Pablo ixvi ju lakꞌachakꞌan Corinto
18
Ju astan ju Pablo taxtulh ju lakꞌachakꞌan Atenas.
Alh ju lakꞌachakꞌan Corinto.
2 Pus ju anch ju Pablo lhitajulh pumatam israelita ju Aquila ixjuncan.
Amachakaꞌ Ponto ixjunita.
Jantucaꞌ makꞌan ixminacha ju laxalacatꞌun Italia.
Anchach ixtꞌamintacha ju ixꞌamachakaꞌ ju Priscila ixjuncan.
Pus ju kꞌai ucxtin anch ju Claudio ixjuncan ixtakta ju lhamapꞌaksin ni catataxtuchalhch ju lakꞌachakꞌan Roma laxalacatꞌun Italia tachi chun ju israelitanin.
Yuchi talhitaxtulh ju yuꞌunch.
Pus ju Pablo alakꞌalh ju yuꞌunch.
3 Chai ni vana va chunch ju ixtalhichꞌalhcatnan tachi ju ixlhichꞌalhcatnan ju Pablo pus alactꞌatavi.
Alactꞌachꞌalhcatnalh.
Pus ju yuꞌunch va ixtanavi ju kꞌai lona chakaꞌ chai istastꞌai.
4 Chai chux avilhchan paꞌastacni ju Pablo ixꞌan laꞌixpujitatꞌan ju istꞌaꞌisraelitanin chai ixmakchivinin ju anch.
Ixꞌamalacaꞌiniputun ixchivinti Dios ju istꞌaꞌisraelitanin chai ju yuꞌunch ju jantu israelitanin ixtajunita.
5 Para acsni tavanan tamincha ju lakꞌachakꞌan Macedonia ju Silas chai ju Timoteo pus ju Pablo macaulicaꞌ ju ixlhichꞌalhcat ju ixnavica ju anuꞌ lona chakaꞌ.
Jantu tuꞌuꞌ atumpa ixnavi.
Va ixꞌalacmalani ju lapanacni ixchivinti Dios.
Chai ixꞌalacmavasalani ju istꞌaꞌisraelitanin ni Jesús yuchach ju Cristo ju ixnoncan camalakachatachilh ju Dios.
6 Para ju yuꞌunch talhitalhkꞌamalh chai tajuni macxcai chivinti.
Pus ju Pablo alaccꞌalhanilh ixpumpuꞌ ni catapumachakxayaꞌ ni camaconach ni jantu talacaꞌiputun.
Chai chani ajuni:
―Jantu quintalakꞌalhin quitꞌin ni apꞌinaꞌitꞌit ju lacajipi.
Mintalakꞌalhin miꞌakstuꞌan.
Ju chavai aclakꞌanaꞌ ju yuꞌunch ju jantu israelitanin tajunita.
7 Pus lana taxtulh ju lacpujitat chai tanucha laꞌixchakaꞌ pumatam lapanac ju Justo ixjuncan.
Ju ixchakaꞌ vanin ixtꞌaya ju pujitat.
Pus ju yuchi na ixlakꞌayai ju Dios.
8 Pus vachuꞌ lhilacaꞌalh ju kꞌai ucxtin Jesús ju xaꞌucxtin pujitat ju Crispo ixjuncan.
Yuchach chai tachi chun ju ixtatanumanalh laꞌixchakaꞌ.
Vachuꞌ na lhu amachakꞌan Corinto acsni takꞌasmatlh ju chivinti talhilacaꞌalh ju Jesús chai amakpaxakꞌo.
9 Pus ju acsnich ju Pablo laktsꞌilh ju kꞌai ixꞌucxtin Jesús tachi ju va laꞌixꞌaklakꞌavanti.
Chai chani junicalh ju Pablo:
―Jantu atꞌalhan.
Va tachi aꞌun ju lapanacni ju quinchivinti.
Jantu va sek aꞌuntꞌi.
10 Quitꞌin ju ictꞌavilan chai jantu xamatiꞌ lai tuꞌuꞌ canaviyan.
Atꞌailhipꞌich ju ixnajunca ju quinchivinti ni na lhu alin ju lapanacni ju aquintalhilacaꞌanaꞌ ju ani lakꞌachakꞌan.
11 Pus tam cꞌata a lakachaxan malhquiyuꞌ ixvilhcha ju anch ju Pablo.
Chai ixꞌalacmasuni ixchivinti Dios ju lapanacni.
12 Para acsni kꞌai ucxtin ixjunita ju Galión laxalacatꞌun Acaya pus ju israelitanin tatakꞌaixtoklh.
Tachꞌapalh ju Pablo.
Talhiꞌalh lacapuꞌucxtin.
13 Chai chani tajuni ju kꞌai ucxtin:
―Ju ani ya lapanac va amalacaꞌini ju lapanacni ni catalakꞌaya ju Dios para jantu lhijun ju quilhamapꞌaksin quincꞌan tachi ju najun ju yuchi.
14 Pus ju Pablo ixchivimputun para ju Galión lana ajuni ju israelitanin:
―Ji israelitanin ni tuꞌuꞌ cava navitꞌa kꞌai talakꞌalhin u tuꞌuꞌ macxcai ju canavi ca aktsꞌiya xaclakꞌasmatniu.
15 Para ni va jantu kꞌox lhiulayatꞌit ju tuchi masui ju ani ya lapanac chai jantu kꞌox lhiulayatꞌit tachi ju lhichivinin pumatam lapanac chai tachi ju lhichivinin ju milhamapꞌaksinꞌan pus alaktsꞌintꞌitch miꞌakstuꞌan ju uxijnan.
Ju quitꞌin jantu icmaktanuputun ju anch.
16 Chai lana alactixcoxtucalh lacapuꞌucxtin.
17 Pus ju acsnich tachi chun ju griegonin tachꞌapalh ju Sóstenes ju xaꞌucxtin lacpujitat.
Tatsuculh lakanekmanin laꞌismakspaꞌ lacapuꞌucxtin.
Para ju Galión jantu xanavi cuenta.
Ju Pablo taxtuchokopa ixlhipaktꞌutu ajuniniꞌ ju lapanacni ixlacata Jesús
18 Ju Pablo na lhu avilhchan titavilhcaꞌ ju anch.
Astan alacmacꞌami ixlhiꞌalakꞌavin laꞌixmacni Jesús chai taxtulh.
Vachuꞌ tatꞌaꞌalh ju Priscila chaich ju Aquila.
Chai acsni tachaꞌalh ju lakꞌachakꞌan Cencrea pus ju Pablo sitcalh ni ixmuctaxtutach ju tuchi ixlhitꞌatakꞌoxitach ju Dios.
Astan tataju ju lacabarco ni ixtaꞌamputun ju xalacatꞌun Siria.
19 Chai acsni tachaꞌalh ju lakꞌachakꞌan Efeso pus amacoꞌulacha ju Priscila chaich ju Aquila.
Chai ju Pablo alh laꞌixpujitatꞌan ju istꞌaꞌisraelitanin chai alactꞌachivinilh ju yuꞌunch ju ixtatakꞌaixtokta ju anch.
20 Pus ju yuꞌunch tapꞌastu ixtajuni ni ixꞌalactꞌatolhcha makꞌanch para ju Pablo jantu tolhputulh.
21 Ju yuchi alacmacꞌami chai chani alacjuni:
―Aktsꞌiya tasqꞌuini ni aclaktsꞌinanta ju cꞌatan ju caꞌalinanta ju Jerusalén.
Para aclalakminchokopalau ni Dios calacasqꞌuinaꞌ.
Chai acsni ajuni ju chunch lana taxtulh ju Efeso.
Tajulh lacabarco.
22 Chai acsni chaꞌalh ju lakꞌachakꞌan Cesarea tacutlh lacabarco chai alh lakꞌachakꞌan Jerusalén.
Alh alacmacꞌaminiꞌ ju yuꞌunch ju vachuꞌ ixtalhilacaꞌanta Jesús amachakꞌan anch.
Chai astan alhch ju lakꞌachakꞌan Antioquía.
23 Ju anch tolhcha lakatꞌui lakatꞌutu malhquiyuꞌ.
Astan taxtulh chai lacaputocꞌalh junta pumilh ju lakꞌachakꞌanixni ju alin ju laxalacatꞌun Galacia chai ju lakꞌachakꞌanixni ju alin ju xalacatꞌun Frigia.
Ixꞌalacjuni ju lapanacni ju ixtalhilacaꞌanta Jesús ni jantu tavanan catacaplh.
Ju Apolos ajuni ju amachakꞌan Efeso ixlacata ju Jesús
24 Pus ju acsnich chaꞌalh ju lakꞌachakꞌan Efeso pumatam israelita ju Apolos ixjuncan.
Amachakaꞌ Alejandría.
Ju yuchi na lai ixchivinin chai na ismispai ju ixchivinti Dios ju tsꞌokcanta.
25 Ju yuchi ismasunicanta ixlacata ju kꞌai ixꞌucxtin Jesús chai ixlhichux ixꞌalhunut ixꞌamalaninin ixlacata ju yuchi.
Chai ju tuchi ismispai lana vas ixnajun.
Va yuchi ni jantu tuꞌuꞌ atumpa ismispai.
Va yuchi ju ismispai tachi ju ixnajun ju Xivan acsni ixꞌamakpaxanan.
26 Pus ju yuchi alh laꞌixpujitatꞌan ju istꞌaꞌisraelitanin chai lana jantu ixtalhanan.
Chai ajuni ju lapanacni ixchivinti Dios.
Para ju Priscila chai Aquila acsni takꞌasmatlh ju ixchivinti pus takꞌailhiꞌalh laꞌixchakaꞌan.
Tamavasalanilh ju aliꞌ taxtokni ixlacata ju Jesús ju jantucaꞌ iscꞌatsai ju Apolos.
27 Chai ju Apolos acsni ixꞌamputun ju xalacatꞌun Acaya pus ju ixlhiꞌalakꞌavin laꞌixmacni Jesús taꞌaktaijulh.
Tatsꞌoklh lakatam alhiqui ju laich caꞌalhiꞌanilh ju ixtalhilacaꞌanta Jesús amachakꞌan anch.
Va alacjuncan ni kꞌox cataꞌamaklhtayanalh ju Apolos acsni cachaꞌanach ju anch.
Pus ju yuchi acsni tavanan chaꞌalh na aꞌaktaijulh tachi chun ju ixtalhilacaꞌanta Jesús.
Pus ju yuꞌunch talhilacaꞌalh ju Jesús va ixlacaꞌatalh ni anavinilh lamapainin ju Dios.
28 Pus ju Apolos laꞌixtalhavat lapanacni ixnajun ni jantu kꞌox tachi ju ixtalacaꞌi ju istꞌaꞌisraelitanin.
Chai ni na vas ixnajun pus ju yuꞌunch jantu lai ixtamapuspꞌitni ju chivinti.
Chai laꞌixchivinti Dios ju tsꞌokcanta ixꞌamavasalani ni Jesús yuchach ju Cristo ju ixnoncan camalakachatachilh ju Dios.