Tatalhkꞌamalh ju amachakꞌan Tesalónica
17
Pus ju Pablo chai ju Silas tatapasacha ju lakꞌachakꞌan Anfípolis chai ju lakꞌachakꞌan Apolonia.
Astan tachaꞌalh ju lakꞌachakꞌan Tesalónica.
Chai ju anch ixꞌalin ixpujitatꞌan ju istꞌaꞌisraelitanin.
2 Pus ju Pablo tavilh ju anch ju lakꞌachakꞌan lakatꞌutu semana.
Chai tachi ju aktsꞌiya ixlai acsni jintaꞌ ixchaꞌan ju yuchi pus alh laꞌixpujitatꞌan chai lakatꞌutu avilhchan paꞌastacni amasunilh ju lapanacni ixchivinti Dios.
3 Chai laꞌixchivinti Dios ju tsꞌokcanta anch ju ixꞌapumavasalanich ju lapanacni ni aktsꞌiya istasqꞌuinich ni camakꞌalhkꞌajnalh ju anuꞌ ju ixnoncan camalakachatachilh Dios.
Chai canilh chai astan cataꞌacxtuchokolh junta ixmacnucanta.
Chai ixꞌalacjuni:
―Ju anuꞌ Jesús ju iclajunau ju uxijnan yuchach ju ixnoncan camalakachatachilh ju Dios.
4 Pus ju aliꞌin israelitanin talhilacaꞌalh ju Jesús chai tachꞌakꞌokꞌalh ju Pablo chai ju Silas.
Vachuꞌ na lhu griegonin ju na ixtalakꞌayai ju Dios talhilacaꞌalh ju Jesús.
Chai vachuꞌ na lhu chakolun ju xalackꞌajin ixtajunita talhilacaꞌalh ju yuchi.
5 Para ju israelitanin ju jantu ixtalhilacaꞌanta Jesús talhacchaꞌanilh ju Pablo chai ju Silas ni na lhu ixtachꞌakꞌokꞌai.
Chai tamakꞌaixtoklh ju lapanacni ju kꞌai ixtajunita ju jantu ixtachꞌalhcatnan ni va ixtamalhekninch.
Pus na lhu tatakꞌaixtoklh chai na ixtalactꞌasai.
Pus taꞌalh laꞌixchakaꞌ ju Jasón chai tapꞌastu ixtatanuputun ni va ixtapuxcajui ju Pablo chai ju Silas.
Va ixꞌamaxtuputun ni laich ixꞌamakꞌaxtaknilh laꞌixtalhavat lapanacni.
6 Para jantu alhitajucalh ju anch.
Pus taxakꞌamalhiꞌalh ju Jasón chai ju aliꞌin ju ixtalhilacaꞌanta Jesús lacapuꞌucxtin.
Pꞌas ixtalhichivinin ju Pablo chai ju Silas.
Ixtanajun:
―Vanta anchach ju taꞌan ju anuꞌ lapanacni tatꞌajun juninin ju lapanacni ni jantu catachꞌakꞌokꞌalh ju kꞌai quiꞌucxtinꞌan César.
Chai ju chavai tamilh ju ani.
7 Chai ju ani Jasón aꞌulata ju yuꞌunch laꞌixchakaꞌ.
Pus ju yuꞌunch lana jantu tuꞌuꞌ talhiulai ju ixlhamapꞌaksin ju César ju lhinajun laquilakꞌachakꞌanꞌan.
Ju yuꞌunch tanajun ni alai yuchi ju kꞌai ucxtin pumatam ju Jesús juncan.
8 Pus acsni takꞌasmatlh junima chivinti pus ju lapanacni chai ju xalackꞌajin ucxtinin ju anuꞌ lakꞌachakꞌan na tatalhkꞌamalh.
9 Pus ju Jasón chai ju aliꞌin taxtaknilh tumin ju ucxtinin.
Chai ju ucxtinin alacjuni ni caꞌaxtaknichokocanaꞌ ju ixtuminꞌan acsni tavanan catataxtulh ju anuꞌ lakꞌachakꞌan ju Pablo chai ju Silas.
Pus acsnicaꞌ ju amacajuncalh ju Jasón chai ju aliꞌin.
Pablo chai Silas ixtavilanancha ju lakꞌachakꞌan Berea
10 Pus ju acsnich atatsꞌisni ju lhiꞌalakꞌavin laꞌixmacni Jesús lana tamalakachalh ju Pablo chai ju Silas ni cataꞌalh ju lakꞌachakꞌan Berea.
Chai acsni tavanan tachaꞌalh ju anch taꞌalh laꞌixlacpujitatꞌan ju istꞌaꞌisraelitanin.
11 Pus palai kꞌox ixjunita ju ixꞌalhunutꞌan ju amachakꞌan Berea.
Palai jantu ju amachakꞌan Tesalónica.
Pus ju amachakꞌan Berea na ixtakꞌasmatputun ju ixchivinti Dios chai chux avilhchan ixtalaktsꞌin ixchivinti Dios ju tsꞌokcanta.
Va istacꞌatsaputun u vasalh tachi ju ixtanajun ju Pablo chai ju Silas u jantu.
12 Pus na lhu israelitanin talhilacaꞌalh ju Jesús.
Vachuꞌ na lhu ju griegonin talhilacaꞌalh chai sia yuꞌunch ixꞌalin ju chakolun chai ju papanin ju xalackꞌajin ixtajunita ju anuꞌ lakꞌachakꞌan.
13 Para acsni tamachakxalh ju israelitanin amachakꞌan Tesalónica ni ixtꞌonacha vachuꞌ ju lakꞌachakꞌan Berea amalaniniꞌ ixchivinti Dios ju Pablo pus taꞌalh ju anch chai tamaktalhkꞌamalh ju lapanacni.
14 Pus ju acsnich ju ixlhiꞌalakꞌavin laꞌixmacni Jesús lana tamalakachalh ju Pablo ni caꞌalh laꞌixquilhtuꞌ alama.
Para ju Silas chai ju Timoteo tatavilhcaꞌ ju lakꞌachakꞌan Berea.
15 Chai ju yuꞌunch ju tatꞌaꞌalh ju Pablo ni catamacuvilayaꞌ ju lacati talhichaꞌalh ju lakꞌachakꞌan Atenas.
Chai acsni ixtaminchokoputun ju yuꞌunch pus ju Pablo alacjuni ni catajunantach ju Silas chai ju Timoteo ni vatsꞌalhti catalakꞌalh ju Pablo.
Pus taminchalh ju ixtꞌaꞌalhtanin ju Pablo.
Ju Pablo ixvi ju lakꞌachakꞌan Atenas
16 Pus ju Pablo acsni ixꞌalacpacxan ju Silas chai ju Timoteo ju lakꞌachakꞌan Atenas na amakꞌaninilh acsni laktsꞌilh ni na lhu taxtokni ixꞌalin ju ixtalaktsꞌin tachi ju isdiosnin ju amachakꞌan anch.
17 Pus yuchi va tsa ixlhiꞌan laꞌixpujitatꞌan ju istꞌaꞌisraelitanin chai ixꞌalactꞌachivinin ju yuꞌunch chai ju aliꞌin lapanacni ju vachuꞌ ixtalakꞌayai ju Dios.
Vachuꞌ chux tuncujun ixꞌalactꞌachivinin ju lapanacni ju ixꞌalacpakxtꞌokꞌa ju laclhitamau.
18 Chai ju aliꞌin ixꞌamamakaꞌun ju Epicúreo chai ju ixꞌamamakaꞌun ju Estoico ixtatꞌachivinin ju Pablo.
Pus ju aliꞌin sia yuꞌunch ixtalaclajuni:
―Va kꞌaya najun ju anuꞌ lapanac ju na lhu chivinin.
Chai ju aliꞌin ixtanajun:
―Ju yuchi tachi ju va ixnonach ni alin atumpa dios.
Chunch ixtanajun ni va ixꞌajuni ju Pablo ixlacata ju Jesús chai ixꞌajuni ni lai lokꞌonchokocan mas nitach.
19 Pus takꞌailhiꞌalh ju Pablo junta ixtatakꞌaixtꞌokꞌa ju xalackꞌajin junta Areópago ixjuncan.
Chai tajuni:
―Iccꞌatsaputunau tis talakxtuch ju ani sastꞌi atalaninti ju naꞌun.
20 Pus ju tuchi quilamakꞌasmatniuch tachi ju va sastꞌi atalaninti iclhiulayau.
Chai iccꞌatsaputunau tuchi ju nomputunch ju ani.
―Chunch ju tajuni ju Pablo.
21 Pus tachi chun ju amachakꞌan Atenas chai ju amachakꞌan alacatam lacatꞌun ju anch ixtatꞌajun jantu tuꞌuꞌ atumpa ixtanavi.
Va yuchi ni ixtanajun u ixtakꞌasmatꞌa ju tuꞌuꞌ sastꞌi atalaninti.
22 Pus ju acsnich ju Pablo taya laꞌixlacaitat junta ixtatakꞌaixtokta ju xalackꞌajin junta Areópago ixjuncan chai chani ajuni:
―Quintꞌalapanacni amachakꞌan Atenas iclalaktsꞌinau ni slivasalh na tꞌalhoniyatꞌit ju midiosꞌan.
23 Pus ju quitꞌin icquipixiyalhnalh junta alin ju midiosnin chai iclhitajulh lacatam junta mokslayatꞌit ju ixlhakꞌailaktsꞌin ju midiosꞌan chai ju anch chani ju tsꞌokcanta:
“Ixꞌanuch ju anuꞌ dios ju jantu icmispayau”.
Pus ju anuꞌ ju tꞌalhoniyatꞌit ju uxijnan mas jantu mispꞌayatꞌit yuchach ju iclajunau ju quitꞌin.
24 Yuchach ju navilh ju lacamunutpaꞌ chai tachi chun ju taxtokni ju alinch.
Chai yuchach ju xaꞌucxtin lactꞌiyan chai ju ani lacatꞌun.
Pus ju yuchi jantu lai tanui ju lacpujitat ju va yajutach lapanac.
25 Ju yuchi jantu tasqꞌuini ni va cachꞌalhcatnanilh ju va tam lapanac tachi ju va camaktasqꞌuinilh tuꞌuꞌ ni yuchach tucan ju quintaxtaknikꞌojun ju quiꞌatsucuntiꞌan chai quiꞌaxanitꞌan chai tachi chun ju taxtokni ju maktasqꞌuiniyau.
26 Ju Dios navilh ju pꞌulhnan lapanac chai si ixꞌapapanatnich juntau tachi chun ju quijnanꞌan ju tꞌonau ju ani lacamunutpaꞌ.
Chai Dios ju quintaꞌulatan ju ani lacamunutpaꞌ.
Chai yuchi ju quintalhcanitan ju quiꞌatsucuntiꞌan chai yuchach ju najun taꞌanchach ju catsucuyaꞌ pumatamin pumatamin.
27 Chunch ju navilh ju kꞌai ucxtin Dios ni laich catacꞌatsa ju lapanacni ixlacata ju yuchi chai catamispalh.
Catalhitaju ni jantu vasalh makat tꞌajun ju yuchi laquiꞌalhunutꞌan.
28 Laꞌixmacni yuchi ju tꞌonau chai alin ju quintacꞌatsanꞌan.
Tachi ju tanaulh ju aliꞌin makꞌaniya atalaninin ju mintꞌachivintiꞌan ixtajunita.
Ju yuꞌunch tanaulh ni isꞌaskꞌatꞌan Dios juntau.
29 Chai ni isꞌaskꞌatꞌan Dios juntau pus jantu kꞌox ni canonau ni chunch junita ju Dios tachi ju tuꞌuꞌ lhinavicanta oro u plata u chiux tachi ju talacxuclakꞌoxi ju lapanacni laꞌixmacaꞌan chai tachi ju kꞌoxich talhiulai.
30 Pus ju makꞌanchich ju Dios va chꞌixlh ju ixlhitontoꞌan ju lapanacni.
Para ju chavai kꞌasi alacjuni tachi chun ju lapanacni ixlhilacaputsꞌun ju lacamunutpaꞌ ni catamacaulh ju ixꞌalactuꞌuntiꞌan.
31 Ni lhcaꞌulata ju yuchi ju avilhchan acsni sok calaktsꞌintanuyach tachi chun ju lapanacni pus yuchi lhinajun ju Dios ni catamacaulh ju ixꞌalactuꞌuntiꞌan.
Chai ju yuchi sacxtutach pumatam ju canonaꞌ tichi chavaich ju catakꞌalhtaxtuyaꞌ chai tichi chavaich ju camamakꞌalhkꞌajnicanaꞌ.
Chai apumavasalanilh tachi chun ju lapanacni ni chunch ju catapasayaꞌ ni macxtuchokolh ju anuꞌ lapanac junta ixmacnucanta.
―Chunch ju ajuni ju lapanacni ju Pablo.
32 Pus acsni takꞌasmatlh ni lai macxtuchokocan junta macnucan pus ju aliꞌin va talhitsꞌiꞌilh.
Chaich ju aliꞌin ixtanajun:
―Aclakꞌasmatnichokopalauch aktam ixlacata ju ani ju naꞌun.
33 Pus ju acsnich ju Pablo taxtulh junta ixtatakꞌaixtokta ju lapanacni.
34 Pus ju aliꞌin ju takꞌasmatnilh ixchivinti ju Pablo talhilacaꞌalh ju Jesús chai tachꞌakꞌokꞌalh ju Pablo.
Ju sia yuꞌunch yuchi ju Dionisio ixjuncan.
Ju yuchi pumatam xakꞌai ixjunita sia yuꞌunch ju ucxtinin ju ixtatakꞌaixtꞌokꞌa junta Areópago ixjuncan.
Vachuꞌ ixꞌalin pumatam chakoꞌulh ju Dámaris ixjuncan chaich ju aliꞌin lapanacni.