Ju Timoteo alactꞌaꞌalh ju Pablo chai ju Silas
16
Astan ju Pablo chai ju Silas tachaꞌalh ju lakꞌachakꞌan Derbe chai astan taꞌalh ju lakꞌachakꞌan Listra.
Ju anch talhitajulh pumatam lapanac ju vachuꞌ ixlhilacaꞌanta Jesús chai ju yuchi Timoteo ixjuncan.
Istsꞌalh ixjunita pumatam chakoꞌulh israelita ju ixlhilacaꞌanta ju Jesús.
Para ju ixpai ixchivinin ju lhigriego.
2 Pus ju lhiꞌalakꞌavin laꞌixmacni Jesús ju ixtavilanalh ju lakꞌachakꞌan Listra chai ju lakꞌachakꞌan Iconio ixtanajun ni na kꞌox lapanac ixjunita ju Timoteo.
3 Pus ju Pablo ixlacasqꞌuin ni caꞌalactꞌaꞌalh ju Timoteo junta cataꞌanaꞌ.
Para pꞌulhnan lhinaulh ixchꞌucꞌuca ju ixꞌaxtꞌakꞌa.
Pus ju israelitanin amachakꞌan anch ixtacꞌatsakꞌojui ni griego ixjunita ju ixpai chai ixlhiyuchi jantu ixchꞌucꞌucanta.
Ju chunch ni jantuch lai ta catitanaulh.
4 Chai acsni ixtachaꞌan ju lakatamin lakatamin lakꞌachakꞌan ixtajuni ju lhiꞌalakꞌavin laꞌixmacni Jesús ju jantu israelitanin ixtajunita ni chunch catalalh tachi ju ixtanajuntach ju ixtamalakachan Jesús chai ju ixtalhinajun laꞌixpujitatꞌan ju ixtavilanancha ju Jerusalén.
5 Pus ju ixtalhilacaꞌanta ju Jesús lana ixlhichux ixꞌalhunut ju ixtalhilacaꞌanta ju yuchi.
Chai tuncujun tuncujun ixtatalhavai ju vachuꞌ ixtalhilacaꞌanta Jesús.
Ju Pablo laktsꞌilh tachi ju va laꞌixꞌaklakꞌavanti pumatam lapanac
6 Pus ju Spiritu Santu jantu xaꞌalacasqꞌuini ju Pablo chai ju ixꞌalactꞌaꞌanta ni cataꞌalh nonin ju ixchivinti Dios ju xalacatꞌun Asia.
Pus ixlhiyuchi tatapasacha ju xalacatꞌun Frigia chai ju xalacatꞌun Galacia.
7 Chai acsni tamilh ju xalacatꞌun Misia ixtanajun ni cataꞌanaꞌ ju xalacatꞌun Bitinia.
Para ju Spiritu Santu jantu alacasqꞌuinilh.
8 Pus tapasatilalh laxalacatꞌun Misia tus tachaꞌalh ju lakꞌachakꞌan Troas.
9 Pus ju acsnich atatsꞌisni ju Pablo laktsꞌilh tuꞌuꞌ tachi ju va laꞌixꞌaklakꞌavanti.
Laktsꞌilh pumatam lapanac amachakaꞌ Macedonia ni anch ixya chai ixtapainini.
Ixjuni:
“Atꞌatꞌich ju ani Macedonia.
Aquilaꞌaktaijuyauch ju quijnan”.
10 Pus ni xalaktsꞌin ju anuꞌ lapanac ju Pablo tachi ju va laꞌixꞌaklakꞌavanti pus lana tapuxcaulh ta yu laich catapuꞌalh ju xalacatꞌun Macedonia.
Chai ju quitꞌin icLucas.
Icꞌalactꞌaꞌalh.
Icꞌauch ju anch ni icmachakxauch ni yuchi ju quiꞌucxtinꞌan Dios ju xaquintatꞌasaniyan ni acꞌauch ajuninin ju amachakꞌan anch ta yu laich cataputakꞌalhtaxtulh chai jantu cataꞌalh ju lacajipi.
Pablo chai Silas ixtavilanancha ju lakꞌachakꞌan Filipos
11 Pus ictajutauch lacabarco ju lakꞌachakꞌan Troas chai sok icpuꞌau tus icchaꞌauch ju lacatꞌicstꞌi lacatꞌun ju vi lacaꞌalama junta Samotracia juncan.
Chai ni tuncunchokolh ictaxtuch chai icchaꞌauch ju lakꞌachakꞌan Neápolis.
12 Ju anch ictacutꞌauch ju lacabarco chai icꞌauch ju lakꞌachakꞌan Filipos junta ixlhinajun ju Roma.
Pus ju anuꞌ lakꞌachakꞌan saꞌaktsulh ixjunita tachi chun ju lakꞌachakꞌanixni ju lhiꞌanch xalacatꞌun Macedonia.
Pus ju anch ictolhtilau lakatꞌui lakatꞌutu avilhchan.
13 Chai ju lakatam avilhchan paꞌastacni ictaxtuchau ju lakꞌachakꞌan.
Icꞌauch ju lacxcan.
Anch ixtaꞌanch tꞌachivinin ju Dios ju lapanacni.
Pus ictolauch anch chai ni ixtatakꞌaixtokta ju aliꞌin chakolun pus icꞌajuniu ixchivinti Dios.
14 Pus pumatam chakoꞌulh ju quintakꞌasmatnin Lidia ixjuncan.
Ju yuchi istꞌai lakslapulh pumpuꞌ chai amachakaꞌ Tiatira ixjunita.
Chai ju yuchi na ixlakꞌayai ju Dios.
Chai ju kꞌai ucxtin Dios aktaijulh ju Lidia ni laich xamachakxai tuchi ixtꞌajun nonaꞌ ju Pablo.
15 Chai ju yuchi makpaxacalh chai chux ju ixtatanumanalh laꞌixchakaꞌ.
Chai astan quintatapaininin.
Quintajunanch:
―Ni nonatꞌit ni vasalh iclhilacaꞌan ju quiꞌucxtinꞌan Jesús pus caꞌauch tolhnin laquinchakaꞌ.
Chunch ju xaquintajunan chai tapꞌastu xaquintalhiꞌanan.
16 Pus ju aktam acsni icꞌauch junta ixtatꞌachivinin ju Dios ju lapanacni pus icpakxtokvi pumatam atsiꞌ ju ixtanun ju lhacaticuru laꞌixꞌalhunut.
Chai ju anuꞌ lhacaticuru ixnajun tuchi catapasayaꞌ mas tucaꞌ tapasai.
Chai ixꞌalin ju ixꞌucxtinin ju anuꞌ atsiꞌ chai ju yuꞌunch na lhu ixtapulhajaich laꞌixchivinti ju anuꞌ atsiꞌ.
17 Pus ju yuchi ixchꞌakꞌokꞌai ju Pablo chai ju quijnanch.
Na pꞌas ixchivinin chai chani ixnajunch:
―Ju ani lapanacni ixlapanacni tajunita ju Dios ju vilhcha talaclhman.
Ju yuꞌunch tajunan ta yu laich apꞌutꞌakꞌalhtꞌaxtꞌuyaꞌitꞌit ni jantu apꞌitꞌit ju lacajipi.
18 Pus na lakalhu avilhchan ju ixquilhuntꞌajun ju chunch.
Pus ju Pablo jeks ulh chai talakaspꞌitlh chai juni ju lhacaticuru ju ixtanun laꞌixtanquilhacni ju anuꞌ atsiꞌ:
―Icjunan laꞌixtapakaꞌut ju Jesucristo ni atꞌaxtꞌu laꞌixlacatuna ju atsiꞌ.
Pus lana taxtulh ju anuꞌ pantsꞌiquis ju lhacaticuru.
19 Para ju ixꞌucxtinin ju anuꞌ atsiꞌ acsni talaktsꞌilh ni ixtaxtuta ju lhacaticuru chai jantu lai ixtapulhajai aliꞌ laꞌixchivinti ju atsiꞌ pus lana tachꞌapalh ju Pablo chai ju Silas.
Alhiꞌancalh lacapuꞌucxtin junta ixtavilanancha ju xalackꞌajin ucxtinin.
20 Chai acsni alacmalacasunicalh ju lackꞌajin ucxtinin pus ju anuꞌ lapanacni chani tajunich:
―Ju ani tayanalh jokꞌatni va israelitanin tajunita chai na tamaktalhkꞌaman ju quintꞌaꞌamachakꞌanꞌan.
21 Ju yuꞌunch tamasui ju ixꞌatalanintiꞌan.
Para ju quijnanꞌan ju romanonin juntau jantu lai naviyau tachi ju tanajun ni jantu chun najun laquilhamapꞌaksinꞌan.
22 Pus ju acsnich ju amachakꞌan anch tatꞌalasalh ju Pablo chai ju Silas.
Chai astan ju xalackꞌajin ucxtinin talhinaulh ixmaxtunica ixpumpuꞌan ju Pablo chai ju Silas chai talhinaulh ixꞌakꞌainekmacaꞌan lacaqꞌuiu.
23 Chai acsni na paklhu ju xaꞌalackꞌainekmai pus alactꞌalhnucalh lacapulachꞌin.
Chai junicalh ju alhistacnan lacapulachꞌin ni kꞌoxich caꞌalhistaclh.
24 Chai ju yuchi ni chunch juncan pus alacmanulh palai pulacni lacapulachꞌin.
Chai alacchꞌantꞌalhma.
25 Pus acsni chaꞌalh paitat tsꞌis ju Pablo chai ju Silas ixtatꞌajun tꞌachivinin ju Dios chai ixtatꞌajun milhpanin ju Dios chai ju ixꞌalactꞌatꞌalhnucanta vachuꞌ takꞌasmatnilh.
26 Pus ju acsnich lana na tataclh ju lacatꞌun chai ju xalactantun ju lacapulachꞌin ixtalacchiqꞌuixkꞌojui.
Chai ju xamalhtich ju pulachꞌin lana talhtekꞌakꞌo.
Chai ju cadena ju ixpuchꞌican ju tachꞌin lana talaklhvakkꞌo.
27 Chai acsni cujcha ju alhistacnan lacapulachꞌin chai laktsꞌilh ni ilhtekꞌakꞌojuich ju pulachꞌin pus maxtulh ju ispada.
Ixmaknichokoputuncan isꞌakstu ni ixnajun ni caꞌixtaꞌatsꞌalhkꞌolhch ju tachꞌinin.
28 Para ju Pablo pꞌas xakꞌala.
Juni:
―Tun va amaknichꞌokꞌocꞌa.
Anich icvilhkꞌoju.
29 Ju acsnich ju anuꞌ alhistacnan lacapulachꞌin sqꞌuinlh ju maclhcu chai vatsꞌalhti tanu pulacni lacapulachꞌin.
Na ixꞌaxqꞌuipꞌipꞌitnintach ni na ixtalhananta.
Chai va lhikꞌox axakꞌala ju Pablo chai ju Silas.
30 Chai acsni amaxtulh makspaꞌ asacmich.
Ajunich:
―Quintꞌalapanacni tijuch ju lai acnavi ni laich actakꞌalhtaxtuyaꞌ chai jantu acꞌalh ju lacajipi.
31 Chai ju yuꞌunch tajunich:
―Alhilacꞌapꞌich ju kꞌai ucxtin Jesús ju ixnoncan camalakachatachilh ju Dios chai amakꞌalhtꞌaxtꞌucꞌanaꞌ ju uxintꞌi chai chux ju tavilanalh laminchakaꞌ.
32 Ju acsnich ju Pablo ajunich ixlacata ju kꞌai ixꞌucxtin Jesús.
Ajuni ju alhistacnan lacapulachꞌin chai chux ju ixꞌalactꞌatanui laꞌixchakaꞌ.
33 Chai mas na istsꞌistacaꞌ para ju anuꞌ alhistacnan lacapulachꞌin alacchꞌakꞌanilh ju Pablo chai ju Silas junta ixlacmacꞌatsanicanta.
Chai ju yuchi chai chux ju ixꞌalactꞌatanui lacachakaꞌ taꞌakpaxkꞌo.
34 Chai astan alackꞌailhiꞌalh laꞌixchakaꞌ chai amavalh.
Pus ju yuchi chai tachi chun ju ixtatanumanalh laꞌixchakaꞌ na ixtalhikꞌachanch ni ixtalhilacaꞌanta ju Jesús.
35 Chai acsni tunculh pus ju ucxtinin amalakachachilh ju ixpulasiyajni.
Tajunich ju alhistacnanch lacapulachꞌin ni caꞌalacmaxtulh ju Pablo chai ju Silas.
Chach taꞌancha laꞌixchakaꞌan.
36 Pus ju alhistacnan lacapulachꞌin quijunilh ju Pablo ju anuꞌ chivinti.
Junich:
―Ju ucxtinin quintajuni ni ma aclamaconauch.
Pus ju chavai atꞌaxtꞌutꞌitch.
Aꞌinchitꞌitch.
Jantu tuꞌuꞌ alhamakꞌaninintꞌit.
37 Para ju Pablo ajunich ju pulasiyajni:
―Ju quijnan ictꞌaputekꞌecantauch ju romanonin.
Para ju uxijnan quintalakanekmanch laꞌixꞌucxlacapuꞌan ju lapanacni mas jantucaꞌ xaquintakꞌasmatnin ju ucxtinin u alin ju quintalakꞌalhin quincꞌan u jantu.
Va yuchi ni quintatꞌalhnunch lacapulachꞌin.
Pus ju chavai ja tanajun ni va sekch aquintamaxtuyan.
Ca jantu.
Chach taminchokolh isꞌakstuꞌan chai aquintamaxtun.
38 Pus ju pulasiyajni taꞌanchokolh juninin ju xalackꞌajin ucxtinin ju ani chivinti.
Pus ju yuꞌunch na tatalhanalhch acsni tacꞌatsalh ni ixꞌalactꞌaputekꞌecanta ju romanonin ju Pablo chaich ju Silas chai ni jantu tuꞌuꞌ alhitajunicalh talakꞌalhin ju alhilakanekmacalh.
39 Pus ju xalackꞌajin ucxtinin tamilh lacapulachꞌin.
Tatapaininilh ju Pablo chai ju Silas ni catamacꞌacxanilh.
Chai astan tamaxtulh lacapulachꞌin chai ajuni ni catataxtulh ju anuch lakꞌachakꞌan.
40 Pus ju Pablo chai ju Silas tataxtulh lacapulachꞌin.
Taꞌalh laꞌixchakaꞌ ju Lidia.
Chai ju anch ajuni ju ixlhiꞌalakꞌavinꞌan ni jantu catamacaulh ju Jesús.
Chai astan tataxtulh ju anuch lakꞌachakꞌan.