Tatakꞌaixtoklh ju lakꞌachakꞌan Jerusalén ju xalackꞌajin
15
Pus ju acsnich ju aliꞌin lapanacni taminchalh ju xaꞌestado Judea.
Tachilh ju Antioquía.
Chai ju yuꞌunch tajuni ju ixtalhilacaꞌanta Jesús amachakꞌan Antioquía ni jantu lai catatitakꞌalhtaxtulh ni jantu caꞌachꞌucꞌunicalh ixꞌaxtꞌakꞌaꞌan ju papanin tachi ju ixꞌamalaninin ju Moisés ju makꞌanchich.
2 Pus ju Pablo chaich ju Bernabé ajuni ni jantu tasqꞌuini ni chunch catalalh.
Para jantu lai xaꞌamalacaꞌini ju anuch lapanacni.
Chai ni jantu lai xatalakꞌoxi ju kꞌai lhamakꞌan ju anch pus asacxtucalh ju Pablo chaich ju Bernabé chaich ju aliꞌin ni cataꞌalh ju lakꞌachakꞌan Jerusalén chai catatꞌachivinchalh ju ixtamalakachan ju Jesús chai ju lapanacni ju anch.
3 Pus ju ixtalhilacaꞌanta Jesús yuꞌunch ju taꞌalacmalakachalh ju lapanacni ju Jerusalén.
Chai ju yuꞌunch tapasatilalh ju xaꞌestado Fenicia chai ju Samaria.
Chai lakatamin lakatamin lakꞌachakꞌan junta ixtatapasai pus alacjuni ju ixtalhilacaꞌanta Jesús ni vachuꞌ tamacaulh tachi ju aktsꞌiya ixtalhilanitach ju yuꞌunch ju jantu israelitanin ixtajunita chai talhilacaꞌalh ju Jesús.
Pus tachi chun ju ixtalhilacaꞌanta Jesús na ixtalhikꞌachan acsni takꞌasmatlh ju chunch.
4 Chai ju Pablo chai ju Bernabé chaich ju aliꞌin ju ixꞌalactꞌaꞌanta acsni tachaꞌalh ju Jerusalén pus lhikꞌach amaklhtayanancalh.
Na talhikꞌachalh ju ixtamalakachan ju Jesús chaich ju aliꞌin ju vachuꞌ ixtalhilacaꞌanta Jesús chaich ju ixtalhinajun laꞌixpujitatꞌan.
Chai ju Pablo chaich ju Bernabé alacjuni tachi chun ju taxtokni ju xaꞌalactꞌanavi ju Dios ju yuꞌunch.
5 Para ju aliꞌin fariseonin ju ixtalhilacaꞌanta ju Jesús tataya chai chani tajuni ju lapanacni:
―Ju lapanacni mas jantu quintꞌaꞌisraelitaninꞌan tajunita para ni talhilacaꞌanta Jesús pus aktsꞌiya tasqꞌuini ni vachuꞌ cachꞌucꞌunicalh ju ixꞌaxtꞌakꞌaꞌan ju jokꞌatni chai catanavilh tachi ju najun laꞌixlhamapꞌaksin ju Moisés.
―Chunch ju tanaulh ju fariseonin.
6 Pus ju acsnich tatakꞌaixtoklh ju ixtamalakachan ju Jesús chaich ju ixtalhinajun laꞌixpujitatꞌan.
Va ixtacꞌatsaputun ta yu laich catalakꞌoxi ju ani lhamakꞌan.
7 Chai acsni na lhu talacchivinilh pus ju Pitaluꞌ kꞌostaya chai alacjuni:
―Quiꞌalakꞌavin ju uxijnan cꞌatsꞌayatꞌit ni quisacxtulh ju Dios ju makꞌanch ni laich acꞌajuni ju yuꞌunch ju jantu quintꞌaꞌisraelitaninꞌan tajunita ta yu lai cataputakꞌalhtaxtulh chai jantu catitaꞌalh ju lacajipi.
Chai ni acꞌajunilh pus vachuꞌ laich catalhilacaꞌalh ju Jesús ju yuꞌunch.
8 Chai Dios ju lai laktsꞌin lakatamin alhunut.
Chai yuchach ju mavasalalh ni vachuꞌ ixtalhilacaꞌanta Jesús ju yuꞌunch.
Pumavasala ni vachuꞌ axtaknilh ju yuꞌunch ju Spiritu Santu tachi ju quintaxtaknitan ju quijnanꞌan.
9 Ju Dios vachuꞌ amapaini ju yuꞌunch tachi ju quintamapainiyan ju quijnanꞌan.
Chai vachuꞌ achꞌakꞌanilh ixꞌalhunutꞌan ju yuꞌunch acsni talhilacaꞌalh ju Jesús.
10 Pus ju chavai tajuch ni jantu kꞌox lhiulayatꞌit tuchi navita ju Dios.
Tajuch ni va axtꞌaknipꞌutꞌunatꞌit ju yuꞌunch ju tsꞌinqꞌui lhamapꞌaksin.
Ju makꞌaniya quilacpaꞌitniꞌan nin quijnanꞌan jantu lai xanavipalau.
11 Jantu kꞌox cava ni va chunch calau.
Ju quijnanꞌan cꞌatsayau ni takꞌalhtaxtuyau acsni lhilacaꞌanau ju quiꞌucxtinꞌan Jesús ju ixnoncan camalakachatachilh Dios.
Takꞌalhtaxtuyau ni na kꞌai ju ixꞌamapaininti ju yuchi.
Chai ni chunch ju putakꞌalhtaxtuyau ju quijnanꞌan pus vachuꞌ chunch cataputakꞌalhtaxtuyaꞌ ju aliꞌin lapanacni ju jantu israelitanin tajunita.
―Chunch ju ajuni ju Pitaluꞌ.
12 Pus ju acsnich chux ixtalhavat lapanacni va sek taquicva.
Takꞌasmatnilh ixchivintiꞌan ju Bernabé chaich ju Pablo acsni tatsuculh nonin ni Dios ju ixꞌaxtaknita ju ixtachaput ni laich xatanavi ju tuꞌuꞌ ju lai catapuꞌalacpastacnalh ju lapanacni chai laich xatanavi ju lhamakꞌan laꞌixꞌucxlacapuꞌan ju yuꞌunch ju jantu israelitanin ixtajunita.
13 Pus acsni tachivinkꞌo ju Bernabé chaich ju Pablo pus ju Jacobo chanich alacjuni ju lapanacni:
―Quiꞌalakꞌavin aquilakꞌasmatniuch.
14 Ju Simón quintajuntan ta yu pꞌulhnan anavinilh lamapainin ju Dios ju yuꞌunch ju jantu quintꞌaꞌisraelitaninꞌan tajunita chai asacxtulh ju aliꞌin sia yuꞌunch ni laich vachuꞌ ixlapanacni catava.
15 Chai ni chunch ju lai ju Dios ju chavai pus va uctaxtui ju ixchivinti ju makꞌaniya lapanac ju ixnajun ixchivinti Dios.
Ju yuchi chani ju tsꞌokta:
16 Ju Dios ma najun ni ma caminchokopalaꞌ astan chai ma calakꞌoxichokoyaꞌ ju ixpuꞌucxtin David ju aclatach.
Ma chunch calayaꞌ tachi ju lai pumatam lapanac ni lakꞌoxichokoi ixchakaꞌ ju taꞌaktalh.
Chai ma caꞌalinchokoyaꞌ ju catolaꞌ laꞌixpuꞌucxtin David.
Ma chunch cajunaꞌ tachi acsni sayochokocan ju tuꞌuꞌ chakaꞌ ju taꞌaktalh.
17 Ma ju chunch ju yuꞌunch ju jantu israelitanin tajunita ma laich catalhilacaꞌanaꞌ ju yuchi ju kꞌai ixꞌucxtinꞌan junita.
Ma lacasqꞌuin ju kꞌai ucxtin Dios ni vachuꞌ ixlapanacni catava.
18 Ma chunch ju ixnajunta ju Dios ju makꞌanchich ni laich camachakxayau ju ani taxtokni ju tꞌajun tapasanaꞌ ju chavai.
19 Pus ni chunch ju najunta ju Dios pus yuchi iclhinajun ju quitꞌin ni jantu calhimakchapu ju yuꞌunch ju jantu quintꞌaꞌisraelitaninꞌan tajunita ju tamacaulh tachi ju aktsꞌiya ixtalhilanita chai tachꞌakꞌokꞌata ju Dios.
20 Va yuchi ni caꞌatsꞌoknuniyau ni jantu cataꞌulh ju tuꞌuꞌ ju lhakꞌailaktsꞌinicanta ju tuꞌuꞌ ju laktsꞌincan tachi dios.
Chai jantu catalhitsuculh apumatam ju jantu ixꞌamachakaꞌ u jantu ixpapa.
Jantu cataꞌulh ju lhivai ju va pixtuchꞌimaknicanta chai jantu cataꞌulh ju acꞌalhni.
21 Chunch ju calayau ni tus makꞌanchich va tachi alin ju lapanacni ju lakatamin lakatamin lakꞌachakꞌan ju tamalani ixlhamapꞌaksin ju Moisés.
Chux avilhchan paꞌastacni laktsꞌincan ju yuchi laꞌixpujitatꞌan ju quintꞌaꞌisraelitaninꞌan.
―Chunch ju ajuni ju lapanacni ju Jacobo.
22 Pus ju acsnich ju ixtamalakachan ju Jesús chai ju ixtalhinajun laꞌixpujitatꞌan chai chux ju aliꞌin ju ixtalhilacaꞌanta Jesús na kꞌoxich talhiula ju ixchivinti.
Chai tasacxtulh ju lapanacni sia yuꞌunch ju laich caꞌalactꞌaꞌalh ju Pablo chai ju Bernabé ju lakꞌachakꞌan Antioquía.
Pus tasacxtulh ju Silas chai ju Judas ju vachuꞌ ixjuncan Barsabás.
Yuꞌunch ju xalackꞌajinch ixtajunita sia yuꞌunch ju ixtalhilacaꞌanta ju Jesús.
23 Chai taꞌatsꞌoknunilh lakatam alhiqui junta chani tajuni ju yuꞌunch ju jantu israelitanin ixtajunita:
“Ju quijnan ju ixtamalakachan Jesús icjuntau chai ju quijnan ju iclhinonau laquimpujitat quincꞌan chai chux ju quijnan ju iclhilacaꞌantau ju Jesús iclamacꞌamiyau ju uxijnan ju jantu israelitanin untꞌatꞌit ju vilhchitꞌit ju Antioquía chai ju xalacatꞌun Siria chai Cilicia.
24 Pus ju quijnan icꞌalakꞌalhakꞌasmatꞌauch ni ma tataxtulh ju aliꞌin ju sia quijnan chai ma taquilacha chai ma tamakꞌatsꞌankꞌaniyan ju miꞌatalacpastꞌacꞌatꞌan.
Ma va tajunan ni ma tasqꞌuini ni achꞌucꞌunicꞌanatꞌit ju miꞌaxtꞌakꞌaꞌan chai ma anaviyaꞌitꞌit ju ixlhamapꞌaksin ju Moisés.
Para jantu quijnan ju xacꞌamalakachayau.
25 Pus yuchi na kꞌoxich xaclhilhiulayau junta xactakꞌaixtꞌokꞌau ni acsacxtuyauch ju lapanacni ju sia quijnan ju caꞌalactꞌaꞌalh ju quilakꞌauꞌan Pablo chaich ju Bernabé ju na amapainiyau.
Cataꞌanchan lalaktsꞌinin ju uxijnan.
26 Pus ju Pablo chai ju Bernabé na paklhu taquilata junta ixꞌamakniputuncan va ixlacata ni ixꞌajumputun ju lapanacni ixlacata ju kꞌai quiꞌucxtinꞌan Jesús ju ixnoncan camalakachatachilh ju Dios.
27 Pus icꞌatꞌamalakachatauch ju Judas chai ju Silas.
Chai ju yuꞌunch catamavasalaniyan tachi chun ju ani taxtokni.
28 Pus ju Spiritu Santu quintamapastꞌacꞌaniyan ju quijnan ni palai kꞌox cava ni jantu tuꞌuꞌ tsꞌinqꞌui lhamapꞌaksin aclaxtakniyau ju uxijnan.
Va yuchi ju ani taxtokni ju aktsꞌiya tasqꞌuini ni anavitꞌit.
29 Va yuchi ni jantu aꞌutꞌit ju tuꞌuꞌ ju va ixlhikꞌailaktsꞌinicanta ju tuꞌuꞌ ju laktsꞌincan tachi dios.
Chai jantu aꞌutꞌit ju acꞌalhni nin tuꞌuꞌ ju va pixtuchꞌimaknicalh.
Vachuꞌ jantu atꞌatsꞌucꞌutꞌit ju jantu miꞌamachakaꞌan u mimpapaꞌan.
Ni amacꞌaꞌuntꞌit ju ani taxtokni pus naviyatꞌit ju kꞌox.
Va yuchach”.
Chunch ju tatsꞌoklh ju lacaꞌalhiqui.
30 Pus ju anuch lapanacni acsni amalakachacalh pus taꞌalh ju lakꞌachakꞌan Antioquía.
Chai acsni tachaꞌalh tamakꞌaixtoklh ju ixtalhavat lapanacni ju ixtalhilacaꞌanta Jesús chai axtaknilh ju anuꞌ alhiqui.
31 Chai acsni talaktsꞌilh ju alhiqui pus na talhikꞌachalh ju anuꞌ chivinti junta ixnajun ni jantu tasqꞌuini ni tuꞌuꞌ atumpa catanavilh.
32 Pus ju Judas chaich ju Silas vachuꞌ laich ixtanajun ixchivinti Dios.
Pus na lhu xaꞌalacmapꞌaksi.
Chai xaꞌalacjuni ni va lakatamch catanavilh ju ixꞌalhunutꞌan.
33 Pus ju Judas chaich ju Silas tatolhcha lakatꞌui lakatꞌutu avilhchan.
Astan tanaulh ni catalakꞌanchokolh ju ixtaꞌamalakachananta.
Pus ju ixtalhilacaꞌanta Jesús amachakꞌan anch tamacꞌami chai tajuni ni Dios ju caꞌalhistaclh ju lacati.
34 Para ju Silas tam xanonchokopalai chai jantu xaꞌanchokoi ju Jerusalén.
Ju yuchi tolhkꞌalhi ju Antioquía.
35 Vachuꞌ ju Pablo chaich ju Bernabé tatavilh ju Antioquía.
Chai ju yuꞌunch chai ju aliꞌin va tachi taꞌalacmalanilh ju lapanacni chai taꞌalacjuni ixlacata ju kꞌai ixꞌucxtinꞌan Jesús.
Ju Pablo anchokolh ixlaktꞌui ajuniniꞌ ju lapanacni ixlacata ju Jesús
36 Ju astan acsni tapasalh lakatꞌui lakatꞌutu avilhchan pus ju Pablo juni ju Bernabé:
―Caꞌanchokoch alaktsꞌinin ju quilhiꞌalakꞌavinꞌan laꞌixmacni Jesús ju tavilanancha chux ju lakꞌachakꞌanixni junta quijuntau ixlacata ju quiꞌucxtinꞌan Jesús.
Ta tsꞌa vanach talhilacaꞌanta ju yuchi.
37 Pus ju Bernabé ixlacasqꞌuinta ni ixꞌalactꞌaꞌalh ju Xivan ju vachuꞌ Marcos ixjuncan.
38 Para ju Pablo jantu kꞌox lhiula ni laich caꞌalactꞌaꞌalh ju yuchi ni va alacmacoꞌulacha lakꞌachakꞌan Panfilia.
Jantu xaꞌalacꞌaktaijui aliꞌ laꞌixlhichꞌalhcat Dios.
39 Pus talaclakꞌailh chai talamacaulh.
Pus ju Bernabé tꞌaꞌalh ju Marcos.
Tataju lacabarco chai taꞌalh ju xalacatꞌun Chipre.
40 Chai ju Pablo sacxtulh ju Silas ni yuchi ju catꞌaꞌalh.
Pus ju ixlhiꞌalakꞌavin laꞌixmacni Jesús tatapaininilh ju kꞌai ixꞌucxtinꞌan Dios ju na amapaininin ni yuchi ju caꞌalhistaclh.
Chai ju yuꞌunch tataxtulh.
41 Taꞌalh ju xalacatꞌun Siria chai ju Cicilia chai tajuni ju ixlhiꞌalakꞌavin laꞌixmacni Jesús ni jantu tavanan catacaplh ju ixtaxtokni Dios.