Ju Pablo chai ju Bernabé ixtavilanancha ju lakꞌachakꞌan Iconio
14
Pus ju Pablo chaich ju Bernabé acsni tachaꞌalh ju lakꞌachakꞌan Iconio pus kꞌaixtam tatanucha laꞌixpujitatꞌan ju istꞌaꞌisraelitanin.
Chai ni na kꞌox ju xaꞌamavasalani ju lapanacni ju chivinti ixlacata ju Jesús pus na lhu talhilacaꞌalh ju yuchi.
Na lhu ju israelitanin chai ju jantu israelitanin.
2 Pus ju acsnich ju israelitanin ju jantu ixtalacaꞌi taꞌamaktalhkꞌamanalh ju yuꞌunch ju jantu israelitanin ixtajunita.
Tatꞌalaxcailich ju ixtalhilacaꞌanta Jesús.
3 Pus ni na lhu xatalhilacaꞌan ju Jesús pus ju Pablo chaich ju Bernabé makꞌanch tatavi ju anch chai ixtamasui ju chivinti ixlacata ju kꞌai ixꞌucxtinꞌan Jesús chai lana jantu ixtatalhanan.
Va ixtalhilaksi ju Dios ni yuchi ju caꞌaꞌaktaijuyach.
Chai ju Dios axtaknilh ju Pablo chai ju Bernabé ixtachaputꞌan ni lai xatanavi ju tuꞌuꞌ ju laich catapucꞌatsalh ju lapanacni ni vasalh Dios ju xaꞌalacmalakachayachilh chai ixtanavi ju lhamakꞌan.
Ju chunch laich catacꞌatsayaꞌ ju lapanacni ni slivasalh tachi ju ixtanajun ju Pablo chaich ju Bernabé acsni alacjuni ni na alacmapaini ju lapanacni ju Dios.
4 Para ju amachakꞌan anch quilhmactꞌui ixtajunita.
Ju aliꞌin ixtachꞌakꞌokꞌai ju israelitanin ju jantu ixtalhilacaꞌanta Jesús.
Chaich ju aliꞌin ixtachꞌakꞌokꞌai ju ixtamalakachan ju Jesús.
5 Pus ju israelitanin chaich ju yuꞌunch ju jantu israelitanin ixtajunita chaich ju xalackꞌajin ucxtinin kꞌaixtam tataiꞌula ixlacchivintiꞌan ni catamamaxanilh ju Pablo chai Bernabé.
Ixtanajun ni caꞌalacatꞌalhmayach.
6 Para acsni tacꞌatsa ju Pablo chaich ju Bernabé pus lana taꞌatsꞌalalh.
Taꞌalh ju lakꞌachakꞌan Listra chai ju lakꞌachakꞌan Derbe ju xalacatꞌun Licaonia.
Vachuꞌ talacaputocꞌalh ju aliꞌ lakꞌachakꞌanixni ju vanin ixvi.
7 Ju anchach vachuꞌ alacjuni ju lapanacni ni laich catatakꞌalhtaxtulh chai jantu catitaꞌalh ju lacajipi.
Alacatꞌalhmacalh ju Pablo ju lakꞌachakꞌan Listra
8 Pus anch ju lakꞌachakꞌan Listra ixvi pumatam lapanac ju va ixchꞌantakꞌalhita tus laꞌixpulakꞌau.
Jantu tavanan lai ixꞌalhtanan.
9 Pus ju yuchi kꞌasmatnilh ixchivinti ju Pablo chai ju Pablo machakxalh ni ixlacaꞌi ju anuꞌ lapanac ni lai palaich canavi ju Dios.
10 Pus yuchi pꞌas lhixakꞌala.
Chanich juni:
―Sokch atꞌai ju laminchꞌajaꞌ.
Pus ju anuꞌ lapanac alhtujnutaya chai tsuculh alhtanan.
11 Pus ju acsnich ixtalhavat lapanacni talaktsꞌilh ju tuchi ixnavita ju Pablo chai talactꞌasalh.
Pus ju yuꞌunch ixtachivinin ju lhilicaonia.
Chai laꞌixchivintiꞌan chani ixtanajun:
―Ju diosnin quintalakmintanch para tatalacasuta tachi ju va lapanacni.
12 Ixtanajun ni ma yuchi ju isdiosꞌan Júpiter ju Bernabé chai ju Pablo ma yuchi ju isdiosꞌan Mercurio ni yuchach ju palai lhu ixchivinin ju Pablo.
13 Pus ju amachakꞌan anch ixtayajuta ju ixpujitatꞌan lacamacni chai anch ixtalakꞌayai ju isdiosꞌan ju Júpiter ixjuncan.
Pus ju xapali anch alakmilh ju Pablo chaich ju Bernabé chai lhimilh ju vacax ju ixpixtumucꞌacanta ju xanti.
Ju yuchi chaich ju lapanacni va ixtanajunch ni catamakniniyaꞌ ju Pablo chaich ju Bernabé ni ixtanajun ni diosnin ixtajunita.
14 Para acsni tacꞌatsa ju ixtamalakachan ju Jesús yuꞌunch ju Pablo chaich ju Bernabé tuchi ixtanaviputun ju lapanacni pus lana takꞌexlh ixpumpuꞌan.
Chunch ixtalai ju israelitanin acsni na macxcai ixtalhiulai ju tuꞌuꞌ.
Chai ju Pablo chai ju Bernabé talakꞌalh ju lapanacni chai pꞌas ixꞌaxakꞌalai.
Chai chani alacjuni:
15 ―Quintꞌalapanacni tꞌas ni va naviyatꞌit ju ani.
Ju quijnan vachuꞌ va lapanacni icjuntau tachi ju uxijnan.
Chai yuchi iclhimintau ju ani ni va iclajumputunau ni amacꞌaꞌuntꞌit ju ani taxtokni ju jantu tuꞌuꞌ ixtapalhni chai alhilacꞌapꞌitꞌitch ju Dios ju lakꞌajunta.
Yuchi ju navilh ju lactꞌiyan chai ju lacatꞌun chai ju alama chai tachi chun ju alin ju anch.
16 Ju makꞌanchich ju Dios alacaꞌinilh chux ju lapanacni ni catatsuculh tachi ju kꞌachanich kꞌantam kꞌantam.
17 Para aktsꞌiya ixmacamin ju tuꞌuꞌ ju catalhimispalh ju lapanacni ni tꞌajun ju yuchi.
Ju yuchi ixꞌanavini kꞌox ju lapanacni.
Ju yuchi macamin ju xcan ju minacha lactꞌiyan.
Chai quintalalhavaniyan ju quiꞌachꞌanantiꞌan chai va tachi quintaxtakniyan quivaitiꞌan chai quinkꞌachatꞌan laquiꞌalhunutꞌan.
―Chunch ju ajuni ju lapanacni ju Pablo.
18 Para mas ixꞌajuni chunch ju Pablo chaich ju Bernabé na xcayama tamalacaꞌinilh ju lapanacni ni jantuch caꞌamakninicalh ju vacax.
19 Para ju acsnich tamilh ju israelitanin ju jantu ixtalhilacaꞌanta Jesús.
Ju yuꞌunch ixtamintacha ju lakꞌachakꞌanixni Antioquía chai ju Iconio.
Chai ju yuꞌunch tamaktalhkꞌamalh ju ixtalhavat lapanacni chai talacatꞌalhma ju Pablo.
Chai ni ixtanajunta ni nitach pus taxakꞌamaxtulh lacamacni lakꞌachakꞌan.
20 Para ju aliꞌin ju vachuꞌ ixtalhilacaꞌanta Jesús acsni talacaxcꞌavitnu ju Pablo pus ju yuchi kꞌostavi.
Chai alactꞌatanuchokolh ju lakꞌachakꞌan.
Chai acsni tuncunchokolh pus ju Pablo tꞌaꞌalh ju Bernabé ju lakꞌachakꞌan Derbe.
21 Chai ju anch tajunilh ju lapanacni ni laich catatakꞌalhtaxtulh chai jantu cataꞌalh ju lacajipi ni catalhilacaꞌalh ju Jesús.
Chai na pumalhu talhilacaꞌalh ju yuchi.
Chai astan ju Pablo chai ju Bernabé taminchokolh ju lakꞌachakꞌan Listra chai ju lakꞌachakꞌan Iconio chai ju Antioquía.
22 Chai ju lakatamin lakatamin lakꞌachakꞌan junta xatatapasatilai ixtaꞌaꞌaktaijui ju lapanacni ni palai lai catalhilacaꞌalh ju Cristo.
Chai vachuꞌ ajuni ni jantu tavanan catamacaulh ju ixti Dios.
Chai ajuni ni aktsꞌiya tasqꞌuini ni camakꞌalhkꞌajnanau ni tanuputunau junta lhinajun ju Dios.
23 Chai tasacxtulh ju lapanacni ju catalhinonaꞌ laꞌixtalhavat ju talhilacaꞌanta ju Jesús.
Chai acsni tatꞌachivinilh ju Dios chai tatascajalh pus tajunilh ju lapanacni ni ixꞌucxtinꞌan Dios ju caꞌalaclhistꞌacꞌaꞌ ni talhilacaꞌanta ju yuchi.
Ju Pablo chai ju Bernabé taꞌanchokolh ju Antioquía laxatꞌun Siria
24 Pus tataxtulh ju anch ju Pablo chai ju Bernabé chai tatapasatilalh ju xalacatꞌun Pisidia chai taꞌalh ju xalacatꞌun Panfilia.
25 Chai tajunilh ixchivinti Dios ju amachakꞌan Perge chai astan taꞌampa tus tachaꞌalh ju lakꞌachakꞌan Atalia.
26 Anchach ju tajucha lacabarco chai taꞌanchokolh ju lakꞌachakꞌan Antioquía junta ixtataxtuta acsni tataiꞌula ju ixlhichꞌalhcatꞌan.
Chai acsni tucaꞌ ixtataiꞌulata pus ju lapanacni ju ixtalhinajun laꞌixpujitatꞌan ju amachakꞌan anch tatapaininilh ju Dios ju na amapaininin ni yuchi ju caꞌaꞌaktaiju laꞌixlhichꞌalhcatꞌan.
Pus ju chavai ju Pablo chai ju Bernabé ixtanavikꞌota chai ixtaminchokota.
27 Chai acsni tachaꞌalh ju anch pus tamakꞌaixtokkꞌo chux ju yuꞌunch ju ixtalhilacaꞌanta Jesús chai ju Pablo chaich ju Bernabé alacjuni tachi chun ju taxtokni ju xaꞌalactꞌanavi ju Dios ju yuꞌunch.
Vachuꞌ ajuni ni xalakꞌaꞌini ju Dios ni vachuꞌ catalhilacaꞌanilh ju Jesús ju jantu israelitanin tajunita.
28 Pus ju Pablo chaich ju Bernabé na lhu avilhchan alactꞌatavi ju vachuꞌ ixtalhilacaꞌanta Jesús ju amachakꞌan anch.