―Jantu alacꞌaꞌinitꞌit ju ixchivintiꞌan ju fariseonin ni va taꞌaꞌokxchokꞌonun ju yuꞌunch.

2 Para matiꞌ tuꞌuꞌ ju matankꞌanucanta ju jantu cacꞌatsacalh.

Nin yuchi ni lai sek acnavi ju tuꞌuꞌ ju jantu cacꞌatsacanaꞌ.

3 Pus tachi chun ju xanonatꞌit lacaꞌatatsꞌisni cakꞌasmatcanaꞌ lacaꞌatuncunuꞌ.

Chai ju tuchi va sekch xanonatꞌit laminchakaꞌan pus sich calaccꞌatsakꞌocanaꞌ.

Ju Jesús tailhiꞌalh ju ixchivinti chai chani ju ajuni ju ixꞌamamakaꞌui:

4 ―Pus chani iclajunau ji quiꞌamigojni.

Jantu atꞌalhonitꞌit ju mintꞌalapanacniꞌan ju lai catamaknin para astan jantuch lai tuꞌuꞌ aliꞌ catanaviyan.

5 Para aclajunau tichi chavaich ju atꞌalhonitꞌit.

Yuchi ju atꞌalhonitꞌit ju Dios ni yuchi ju lai catamakniyan chai alin ixtachaput ni lai catamacaꞌanan astan ju lacajipi.

Pus iclajunau ni yuchach ju atꞌalhonitꞌit.

6 Jantu tasqꞌuini ni atꞌalhonitꞌit ju tam mintꞌalapanacꞌan.

Alaktsꞌintꞌit ju lakaquis lactꞌicstꞌi tsꞌokꞌo ni lhistꞌacan lakatꞌui sentau.

Para ju Dios jantu lai cꞌapꞌa nin lakatam ju yuꞌunch.

7 Chai mas va miꞌaiꞌan ju uxijnan si putekꞌekꞌocanta.

Pus yuchi iclalhijunau ni jantu atꞌalhanantꞌit.

Palai laklhu ju mintapalhniꞌan ju uxijnan.

Palai jantu ju va tuꞌuꞌ tsꞌokꞌo mas na lhuch catava ju yuꞌunch.

Ju Jesús tailhiꞌalh ju ixchivinti chai ajuni ju ixꞌamamakaꞌui:

8 ―Va tichi chavaich ju canonaꞌ laꞌixꞌucxlacapuꞌan ju lapanacni ni quilhilaksi ju quitꞌin ju quimalakachatachilh ju Dios ni lapanac actsucuyaꞌ ju ani pus vachuꞌ ju quitꞌin acnonaꞌ laꞌixꞌucxlacapuꞌan ju ixꞌanquilhnin ju Dios ni quilapanac junita ju yuchi.

9 Para va tichi chavaich ju canonaꞌ laꞌixꞌucxlacapuꞌan ju lapanacni ni jantu quilhilaksich pus vachuꞌ acnonaꞌ laꞌixꞌucxlacapuꞌan ju ixꞌanquilhnin Dios ni jantu quilapanac junita.

10 Chai tachi chun ju macxcai aquintalhichivinaꞌ ju quitꞌin ju quimalakachatachilh ju Dios ni lapanac actsucuyaꞌ ju ani pus caꞌamacꞌacxanicanaꞌ.

Para va tichi chavaich ju macxcai calhichivinaꞌ ju Spiritu Santu pus ju yuchi jantu catimacꞌacxanicalh.

11 Acsni alhipꞌincꞌanaꞌitꞌit laꞌixꞌucxlacapuꞌan ju xalackꞌajin lacpujitat chai laꞌixꞌucxlacapuꞌan ju ucxtinin chai ju aliꞌin ju alin ixtachaputꞌan pus jantu alhamakꞌaninintꞌit ta yu laich alhakꞌalhtꞌayananaꞌitꞌit nin yuchi ju tuchꞌi laich anonaꞌitꞌit.

12 Pus isꞌakstu ju Spiritu Santu ju catamapastꞌacꞌaniyan ju acs pantsꞌiquis tuchꞌi laich anonaꞌitꞌit.

13 Chai pumatam lapanac ju ixmakminta lacatalhavat junilh ju Jesús:

―Aꞌunch ju quilakꞌau ni chach quilhvaknilh ju icmacontilanicantauch.

14 Para ju Jesús junich:

―Ji lapanac jantu xamatiꞌ quiꞌulata lacatꞌicstꞌi miꞌucxtinꞌan.

Nin caꞌalilh ju quintachaput ni lai aclaclhvakaꞌ ju tuꞌuꞌ.

15 Vachuꞌ ajunilh ju lapanacni:

―Alaktsꞌintꞌit chai jantu va yuchi ju anavitꞌit cuenta ju ixmakꞌaixtꞌokꞌa lhu ju miꞌalintaꞌan.

Pus mas na lhu caꞌalilh ju ixꞌalinta tam xamatiꞌ para jantu anch ju i ju isꞌatsucunti.

16 Chai ajunilh ju lapanacni lakatam chivinti ju laich capumavasalaniyaꞌ tuchi ixꞌajumputun.

Ajunich:

―Ju ixlacatꞌun ju pumatam makꞌaliꞌ lapanac na lhu lana xaxtꞌakꞌa ju xatocꞌat.

17 Chai ju yuchi naulh laꞌixꞌalhunut:

“Tas aclayach ju chavai ni jantu jintaꞌ alin junta lai acmakꞌa ju xatocꞌat ju quilacatꞌun”.

18 Chai astan naulh:

“Iccꞌatsai tuchi acnaviyaꞌ.

Aclaclhvakach ju quimpacꞌatsꞌa chai acyochokoyaꞌ ju palai kꞌai.

Chai anchach ju acmakꞌayaꞌ ju xatocꞌat ju quilacatꞌun chai ju quintaxtokni.

19 Chai chani acjunchokocanaꞌ quiꞌakstu:

Ju uxintꞌi lapanac na lhuch makꞌata ju miꞌalinta.

Cachꞌixach lakalhu cꞌata.

Pus astꞌacnach.

Avaich.

Akꞌotnuch.

Akꞌachꞌach”.

Chunch ju naulh ju anuꞌ makꞌaliꞌ.

20 Para ju Dios ma junich:

“Ju uxintꞌi va tontoꞌat.

Lana chavai atatsꞌisni aniyaꞌ.

Chai tis ixꞌanuch cꞌuꞌu cajunaꞌ ju anuꞌ xamakꞌai”.

21 Pus chunch ju tapasai laꞌisꞌatsucunti tam lapanac ju lhilaksi ju ixtaxtokni ju makꞌaixtokta ixlacata isꞌakstu para jantu lhilaksi ju makꞌalit ju xtꞌakꞌa ju Dios chai ju jonkꞌalhita lactꞌiyan.

22 Astan ju Jesús axakꞌalachokopa ju ixꞌamamakaꞌui chai ajuni:

―Jantu alhamakꞌaninintꞌit ixlacata ju miꞌatsucuntiꞌan ju tuchꞌi aꞌuyaꞌitꞌit.

Nin ixlacata ju milacatunaꞌan ju tuchꞌi amalakchꞌininaꞌitꞌit.

23 Pus palai tuꞌuꞌ ju miꞌatsucuntiꞌan ju uxijnan.

Palai jantu ju va tuꞌuꞌ vaiti.

Chai palai tuꞌuꞌ ju milacatunaꞌan.

Palai jantu ju va tuꞌuꞌ malakchꞌinti.

24 Alaktsꞌintꞌit ju tuꞌuꞌ chꞌekni.

Ju yuꞌunch jantu taꞌachꞌananan chai jantu taxkꞌaꞌi ju catamakꞌayaꞌ ju xatocꞌat.

Chai matiꞌ junta lai catamakꞌa ju tuꞌuꞌ nin caꞌalilh ju ixpacꞌatsꞌaꞌan.

Para Dios ju amavai.

Chai ju yuchi palai tuꞌuꞌ talhiulayan ju uxijnan.

Palai jantu ju va tuꞌuꞌ tsꞌokꞌo.

25 Chai jantu xamatiꞌ ju milhiꞌuxijnan ju lai palai putankꞌai catijunlh mas na lhu capastaclh.

26 Pus ni jantu lai naviyatꞌit mas va yuchach ju anuꞌ pus tajuch ni na va lhamakꞌanininatꞌit ju tuꞌuꞌ aliꞌ.

27 Pus alaktsꞌintꞌit ju xanti.

Ju yuchi takꞌayai para jantu chꞌalhcatnan nin caꞌasiunilh.

Para iclajunau nin yuchi ju kꞌai ucxtin Salomón jantu xamalakchꞌinin tachi ju tuꞌuꞌ xanti mas na ixꞌalin ju ixmakꞌalit.

28 Pus Dios ju na cꞌus malakchꞌini ju achꞌitin ju alin mas va lacaqꞌuivin.

Chai ju yuchi jantu jonkꞌalhi.

Ju chavai na stakꞌaucaꞌ.

Para ju lhi calacxavacanaꞌ.

Pus ja va a ti uxijnan jantu cataxtakniyan ju mimpumpuꞌan.

Para ju uxijnan na lacatsꞌunin lhilaksiyatꞌit ju Dios ni vasalh cataxtakniyan ju tuchꞌi maktꞌasqꞌuiniyatꞌit.

29 Pus ni yuchi ju Dios ju cataxtakniyan ju tuchꞌi maktꞌasqꞌuiniyatꞌit pus jantu alhamakꞌaninintꞌit tuchꞌi aꞌuyaꞌitꞌit u tuchꞌi akꞌotꞌaꞌitꞌit.

30 Jantu chun alatꞌit ju uxijnan ni yuchach ju talhamakꞌaninin ju lapanacni ju jantucaꞌ talhilaksita ju Dios.

Para alin ju mimpaiꞌan Dios ju cꞌatsai ni maktꞌasqꞌuiniyatꞌit ju ani taxtokni.

31 Alai yuchi ju anavitꞌit cuenta ta yu palai lai calhinonaꞌ ju Dios lamiꞌatsucuntiꞌan chai amaklhtꞌayananaꞌitꞌit tachi chun ju ani taxtokni ju maktꞌasqꞌuiniyatꞌit.

Ju Jesús tailhiꞌalh ixchivinti chai chani ju ajuni ju ixꞌamamakaꞌui:

32 ―Jantu atꞌalhanantꞌit ju uxijnan ju tachi quimborregojni untꞌatꞌit mas jantu milhuꞌan.

Pus ju quimpai na kꞌox lhiulai ni atꞌatꞌaꞌucxtꞌiniyaꞌitꞌit ju yuchi astan.

33 Jantu na va amakꞌatꞌit ju miꞌalintaꞌan.

Alai apꞌuꞌaktꞌaiꞌutꞌit ju quilhpatinin.

Jantu amakꞌatꞌit ju mimakꞌalitꞌan ju ani lacatꞌun junta jantu jonkꞌalhi.

Alai anch ju lactꞌiyan ju amakꞌayaꞌitꞌit.

Pus ju anch ju mimakꞌalitꞌan jantu tavanan caꞌankꞌoyaꞌ.

Chai jantu lai catichaꞌalh ju akꞌalhonaꞌ.

Chai matiꞌ tuꞌuꞌ ju saꞌatsꞌacanaꞌ ju lai calakꞌalhiniyan.

34 Iclajunau chunch ni tapastactꞌajun ju ixtaxtokni ju lacamunutpaꞌ ju tamakꞌata ju ixmakꞌalitꞌan ju ani lacatꞌun.

Para ju tamakꞌai ju ixmakꞌalitꞌan ju lactꞌiyan pus anchach ju tapastactꞌajun.

Ju Jesús tailhiꞌalh ju ixchivinti chai chani ju ajuni ju ixꞌamamakaꞌui:

35 ―Alakꞌasitsꞌucꞌutꞌit chai chunch ju alatꞌit tachi ju lacan acsni pacxantaican xamatiꞌ ju tsꞌis.

Va xavacan ju maclhcu ni lai lhikꞌach caꞌamaklhtayanancanaꞌ ju cachinaꞌ.

36 Chai chunchach ju apꞌacxantꞌayaꞌitꞌit ju miꞌucxtinꞌan Dios tachi ju talai ju ixlapanacni tam xakꞌai ju ani lacamunutpaꞌ.

Pus ju yuꞌunch talakasivilanalh ni lana soko catamalhtekꞌaniyaꞌ ju malhtich acsni cataspꞌitchokoyanta ju ixꞌucxtinꞌan junta tamakꞌaxtokcan chai casayach ju malhtich.

37 Pus lhikꞌach cajunaꞌ ju isꞌatsucuntiꞌan ju anuꞌ xalapanacni ju caꞌalhitajucanaꞌ ni talakꞌasitꞌajun acsni caminaꞌ ju ixꞌucxtinꞌan.

Pus islivasalh ju iclajunau.

Ju ixꞌucxtinꞌan ni lakchꞌita ju ixcutun pus calhichꞌicanaꞌ iscinturon chai caꞌalacjunach ni catatavi lacamixa chai isꞌakstu ju caꞌalacxtakniyach ju ixvaitiꞌan.

38 Pus na lhikꞌach ju isꞌatsucuntiꞌan ju anuch xalapanacni ju caꞌalhitajucanaꞌ ni talakꞌasitꞌajun mas camilh ju ixꞌucxtinꞌan ju paitat tsꞌis u mas camilh acsni paktꞌutu tꞌasata ju chilaꞌ.

39 Pus acꞌatsꞌatꞌitch ju ani.

Ju amachakaꞌ ni iscꞌatsa cava tuchi hora ixmilh ju akꞌalhonaꞌ pus ixlhistaclh chai jantu ixlacasqꞌuinilh ni ixtamalhtekꞌa chai ixtanu laꞌixchakaꞌ.

40 Pus vachuꞌ alakꞌasitsꞌucꞌutꞌit ju uxijnan ni acsnich ju acminchokoyaꞌ ju quitꞌin acsni nonatꞌit ni ca jantu lai actimilh ju acs pantsꞌiquis.

Quitꞌin ju quimalakachatachilh ju Dios ni lapanac actsucuyaꞌ ju ani.

41 Pus ju acsnich ju Pitaluꞌ junilh ju Jesús:

―Quiꞌucxtin ja va quijnan ju quilajunau ju ani chivinti ju ixpꞌumavasalapꞌutꞌun ju minchivinti u vachuꞌ ixlacataꞌan chux ju lapanacni.

42 Chai ju Jesús juni:

―Alin ju xakꞌai xalapanac ju lai lhilaksican chai ju na acꞌatsananta chai lai caꞌamalhistacni ju ixꞌucxtin ju aliꞌin ixtꞌaxalapanacni ni laich caꞌalhcaniyaꞌ ju ixvaitiꞌan acsni cachinaꞌ ju hora ni catavenaꞌ.

43 Pus slivasalh lhikꞌach ju isꞌatsucunti ju anuꞌ xalapanac ju calhitajucanaꞌ ni chunchach ju tꞌajun naviniꞌ acsni caminchokoyaꞌ ju ixꞌucxtin.

44 Pus slivasalh ju iclajunau.

Ju ixꞌucxtin camalhistacnikꞌoyaꞌ tachi chun ju ixꞌalinta.

45 Para ju anuꞌ xalapanac jantu xcai ni canaulh laꞌixꞌalhunut ni ca jantu sai catiminchokolh ju ixꞌucxtin chai catsucuyaꞌ aꞌulaniniꞌ ju ixtꞌaxalapanacni chai ju maksquitininch.

Chai cavenach chai caꞌakꞌotnanach chai catꞌakꞌapꞌayach.

46 Pus ni chunch ju canaviyaꞌ ju anuꞌ xalapanac pus acsnich ju cachinaꞌ ju ixꞌucxtin acsni jantu pacxantajita.

Cachinaꞌ ju acs pantsꞌiquis acsni jantu iscꞌatsai ni lai cachilh.

Chai slivasalh camamakꞌalhkꞌajniyaꞌ ju anuꞌ xalapanac.

Chunch caꞌulhtunicanaꞌ tachi ju caꞌulhtunicanaꞌ ju yuꞌunch ju jantu lai lhilaksican.

47 Pus ju anuꞌ xalapanac ju machakxanilh ixkꞌachat ju ixꞌucxtin para jantu ixlakasivi ni xaminchokoi ju ixꞌucxtin nin canavi ju ixkꞌachat pus ju yuchi na paklhu canekcanaꞌ.

48 Para ju anuꞌ xalapanac ju jantu xamachakxai ju ixkꞌachat ju ixꞌucxtin chai navilh ju tuꞌuꞌ ju lhijunch ni calhinekcalh pus na lacatsꞌunin calakanekmacanaꞌ.

Pus va tichi chavaich ju na lhu xtaknicanta pus na lhu casqꞌuinichokocanaꞌ.

Chai ju na lhu xtaknicanta ni calhistaclh pus palai lhu casqꞌuinichokocanaꞌ.

Palai jantu na chun ju jantu lhu ixtaknicanta ni calhistaclh.

Ju Jesús tailhiꞌalh ju ixchivinti chai chani ju ajuni ju ixꞌamamakaꞌui:

49 ―Tachi ju va icminta maquilhnunuꞌ ju jipi ju ani lacatꞌun.

Chai slivasalh na kꞌox cava ni lana chavai ju cataiꞌulayaꞌ.

50 Na lhu lana acmakꞌalhkꞌajnanaꞌ chai slivasalh na icꞌamakꞌaninin tus acsni caꞌuctaxtuyach.

51 Jantu anaꞌuntꞌit ni va icminta naviniꞌ ju akꞌoxamixnit ju ani lacatꞌun.

Iclajunau ni jantu.

Alai va ixlacaꞌatalh ni icminta caꞌalinaꞌ ju lakꞌaiti.

Caxcaicanaꞌ ju yuꞌunch ju quintalhilaksi.

52 Pus ju chavai atipuꞌanta junta tatꞌajun pumaquis lapanacni lacalakatam chakaꞌ pus jantu kꞌox catalalhiꞌanaꞌ.

Pus ixtꞌutunꞌan cataxcayaꞌ ju pumatꞌuiꞌan.

Chai ju ixtꞌiyunꞌan cataxcayaꞌ ju ixtꞌutunꞌan va ixlacata ni quintalhilaksi ju quitꞌin ju aliꞌin chai ju aliꞌin jantu.

53 Ju tam xapai catꞌalaxcayaꞌ ju istsꞌalh.

Chai ju tam istsꞌalh catꞌalaxcayaꞌ ju ixpai.

Ju tam xanati catꞌalaxcayaꞌ ju istsiꞌ.

Chai ju tam istsiꞌ catꞌalaxcayaꞌ ju ixnati.

Chai ju tam xaputꞌichakoꞌulh catꞌalaxcayaꞌ ju ixputꞌi.

Chai ju tam xaputꞌi catꞌalaxcayaꞌ ju ixputꞌichakoꞌulh ni quilhilaksi ju quitꞌin.

54 Ju Jesús vachuꞌ chani ajuni ju lapanacni:

―Ju uxijnan acsni laktsꞌinatꞌit ju ataputsꞌi acsni min ju lhitsꞌastꞌai pus lana nonatꞌit ni caminach ju xcan ju ani laquintꞌunꞌan.

Chai vasalh chunch ju tapasai.

55 Chai acsni min ju un ju lhisur pus nonatꞌit ni lhiꞌich cajunaꞌ ju ani laquintꞌunꞌan.

Chai vasalh chunch ju tapasai.

56 Pus ju uxijnan lai machꞌakxayatꞌit ta yu avanan ju lactꞌiyan chai ju lacatꞌun.

Para va acxpꞌutꞌiyununatꞌit acsni nonatꞌit ni jantu lai machꞌakxayatꞌit tuchi tꞌajun tapasanaꞌ ju chavai acsni tꞌonatꞌit.

57 Tajuch ni jantu lai sacxtꞌuyatꞌit miꞌakstuꞌan ju kꞌox.

58 Ni catachivimakꞌanan tam xamatiꞌ chai catakꞌailhiꞌanan lacapuꞌucxtin pus amaskꞌatꞌitꞌitch ju lacati ixtꞌatakꞌoxica ju yuchi.

U ni jantu pus jantu xcai ni catalhichaꞌanan lacaꞌucxtin.

Chai ju ucxtin catamakꞌaxtakꞌan laꞌixmacaꞌan ju pulasiyajni.

Chai ju pulasiyajni cataꞌanan tꞌalhnunun.

59 Chai iclajunau ni jantu atꞌitꞌaxtꞌutꞌit ju anch tus acsni amapꞌalaꞌitꞌit chux lana ju mimulhtaꞌan.