―Quiꞌucxtin aquilamasuniuch ju ixtꞌachivininca ju Dios tachi ju lalh ju Xivan ni amasunilh ju ixꞌamamakaꞌui:

2 Chai ju Jesús ajuni:

―Pus acsni atꞌachꞌivinaꞌitꞌit ju Dios chanich anonaꞌitꞌit:

5 Pus ju Jesús tailhiꞌalh ixchivinti chai ajuni:

―Jantu xcai ni chani ju catapasalh laꞌisꞌatsucunti ju pumatam ju milhiꞌuxijnan.

Jantu xcai ni caꞌalilh ju miꞌamigo ju alakpꞌitꞌi ju paitat tsꞌis chai aꞌunaꞌ:

“Quiꞌamigo qꞌuimachꞌixtꞌaknin akxtꞌutu ju miniꞌ.

6 Pus chilh pumatam quiꞌamigo ju makat xaminacha para matich tuꞌuꞌ ju lai acxtaknilh”.

7 Chai jantu xcai ni tus pulacni caꞌakꞌalhtayanancha ju anuꞌ amachakaꞌ chai chani cajunin:

“Jantu jeks aqꞌuimavatꞌi.

Pus icmalacchajuta ju quimalhtich chai icꞌalactꞌalhtataich ju quiꞌaskꞌatꞌan.

Jantu lai actikꞌostavi ni laich tuꞌuꞌ acxtaknin”.

8 Pus mas jantu cakꞌostolaꞌ chai caxtakniyaꞌ tuꞌuꞌ va ixlacaꞌatalh ni ixꞌamigo junita para iclajunau ni aktsꞌiya cakꞌostolaꞌ chai caxtakniyach tachi tantsꞌun ju maktasqꞌuini va ixlacaꞌatalh ni jantu lai maxanan ju anuꞌ ju tꞌajun jeks mavanaꞌ.

9 Chai ju quitꞌin iclajunau:

Asqꞌuinitꞌit ju Dios chai ju yuchi cataxtakniyan.

Apꞌuxcꞌaꞌutꞌit laꞌixmacni Dios ju tuchꞌi maktꞌasqꞌuiniyatꞌit chai alhitꞌaꞌuyaꞌitꞌit.

Va tsa tsa asqꞌuinitꞌit ju Dios tachi acsni va tsa tsa sacan lacatuꞌuꞌ malhtich.

Chai ju Dios cataxtakniyan.

10 Chunch ju alatꞌit ni amaklhtayanan ju lapanac ju sqꞌuin.

Chai ju puxcajui tuꞌuꞌ lhitajui.

Chai ju sai ju malhtich malhtekꞌanican.

11 Jantu xamatiꞌ ju milhiꞌuxijnan ju laich caxtaknilh tam isꞌaskꞌatꞌa lakatam chiux acsni casqꞌuinilh ju xkapavati.

U ni casqꞌuinilh ju pamata jantu xamatiꞌ milhiꞌuxijnan ju laich caxtaknilh lakatam lu.

12 U ni casqꞌuinilh tuꞌuꞌ akꞌaxvati jantu xamatiꞌ milhiꞌuxijnan ju laich caxtaknilh lakatam statsucu.

13 Pus ju uxijnan mas na kꞌai untꞌatꞌit lai xtꞌakniyatꞌit ju kꞌox ju miꞌaskꞌatꞌanꞌan.

Pus ja va a ti yuchach ju quimpaiꞌan Dios ju vilhcha lactꞌiyan jantu catiꞌaxtaknilh ju Spiritu Santu ju yuꞌunch ju catasqꞌuiniyach.

14 Pus ju Jesús xcoxtulh ju lhacaticuru laꞌixlacatuna pumatam lapanac.

Pus ju anuꞌ lapanac jantu lai ixchivinin acsni ixtanun ju lhacaticuru laꞌixlacatuna.

Para acsni taxtulh ju anuꞌ lhacaticuru pus ju anuꞌ ju va nunuꞌ ixjunita chivinilh.

Pus na talhamakꞌaninilh ju ixtalhavat lapanacni.

15 Para ju aliꞌin ju sia lhiyuꞌunch tanaulh:

―Ju ani ya lapanac va xcoxtui ju lhacaticuru laꞌixlacatunaꞌan ju lapanacni laꞌixtachaput ju Satanás.

16 Chai ju aliꞌin ni va ixtalaktsꞌintanuputun ju Jesús pus tasqꞌuinilh ni canavi tuꞌuꞌ lhamakꞌan ju camincha lactꞌiyan ta yu laich catapucꞌatsayaꞌ ni vasalh Cristo junita.

17 Para ju Jesús ni amispanilh ixꞌatalacpastꞌacꞌatꞌan ju yuꞌunch pus ajunich:

―Tachi chun ju kꞌai lacatꞌun junta lhinajun ju tam kꞌai ucxtin ni quilhmaclhu cajuncalh chai catalaclasayaꞌ ju sia isꞌakstuꞌan pus va caꞌaclayaꞌ.

Chai ju tatanumanalh lacachakaꞌ ni catalaclakꞌailh ju sia isꞌakstuꞌan pus catatalhvakaꞌ.

18 Pus vana va chun ju lhacaticuru.

Ni catꞌalasachokolh ju ixtꞌalhacaticuru pus tas laich calhilhinonkꞌalhi laꞌixpuꞌucxtin.

Pus iclajunau chunch ni va nonatꞌit ni laꞌixtachaput ju Satanás ju ictixcoxtui ju lhacaticurulhni.

19 Ju uxijnan nonatꞌit ni ictixcoxtui ju lhacaticurulhni laꞌixtachaput ju Satanás.

Para ju miꞌamamakaꞌunin vachuꞌ tamaktasqꞌuini ni xamatiꞌ caꞌaxtaknilh ixtachaputꞌan ni laich catatixcoxtuyaꞌ ju lhacaticurulhni laꞌixlacatunaꞌan ju lapanacni.

Pus yuꞌunch ju catajunan ni jantiyuꞌ ixtachaput ju Satanás ju pumaxtucan ju lhacaticuru laꞌixlacatuna tam xamatiꞌ tachi ju nonatꞌit ju uxijnan.

20 Alai laꞌixtachaput ju Dios ju ictixcoxtui ju lhacaticurulhni chai yuchi lana lhitasui ni yuchi ju Dios ju lhinajun lamilhiꞌuxijnan ju chavai.

21 Ju tam jokꞌat ju na tachapun chai ju alin ju ixpatꞌalan chai lhistꞌacꞌa ju laꞌismakspaꞌ ju ixchakaꞌ pus jantu tuꞌuꞌ lai tsꞌankꞌai ju ixtaxtokni.

22 Para acsni va camilh apumatam ju palai tachapun palai jantu ju yuchi pus catꞌalalhajayaꞌ.

Cataiꞌinikꞌoyaꞌ ju ixpatꞌalan ju na jokꞌat ixpunajun chai camakpitsikꞌoyaꞌ chux ju ixtaxtokni.

Ju Jesús chunch ju ajuni ju lapanacni ni va ixꞌamamachakxaniputun ni yuchi ju tꞌalalhajalh ju lhacaticuru.

Yuchi lai alhixcoxtui ju lhacaticurulhni laꞌixlacatunaꞌan ju lapanacni.

Pus tailhiꞌalh ixchivinti chai ajunilh ju lapanacni:

23 ―Pus ju jantu quintꞌaꞌanta yuchi ju quintꞌalaxcai junita.

Chai ju jantu quintꞌamakꞌaixtꞌokꞌa ju lapanacni ju aquintalhilacaꞌanach pus va asastucnun.

Ju Jesús tailhiꞌalh ixchivinti chai ajuni ju lapanacni:

24 ―Ju lhacaticuru acsni taxtui laꞌixlacatuna tam lapanac pus vaclhun ucxuntꞌajun junta na axixnita.

Va puxcolhitꞌajun ta anchach ju lai catavi.

Chai ni jantu lhitajui pus najun:

“Acꞌanchokoyaꞌ alai laquinchakaꞌ junta xactaxtuyacha”.

25 Chai acsni minchokoi pus lana tanuchokoi laꞌixlacatuna ju anuꞌ lapanac ni tachi lakatam chakaꞌ junita ju pulacpꞌalhcanta chai maxantilacanta.

26 Pus ju acsnich ju yuchi taxtuchokoi chai an iniꞌ aliꞌin chai akꞌailhimin apumatujun lhacaticurulhni ju palai kꞌai tajunita.

Palai jantu na chun ixjunita ju yuchi ju pꞌulhnan ixtanun.

Pus ixchuxꞌan tatanui laꞌixlacatuna ju anuꞌ lapanac chai tatsucui ju anch.

Pus ju isꞌatsucunti ju anuꞌ lapanac palai takꞌalhilh ju acsni.

Palai jantu na chun ixjunita ju pꞌulhnan.

27 Pus acsni ixtꞌajun nonaꞌ ju ani chivinti ju Jesús pus pumatam chakoꞌulh ju ixmakya lacatalhavat lana chivincha.

Junilh ju Jesús:

―Na lhikꞌach ju isꞌatsucunti ju xamaklokꞌoyan chai ju xamatsꞌiquiyan.

28 Para ju Jesús juni:

―Alai palai takꞌachan ju takꞌasmatꞌa ju ixchivinti Dios chai tamuctaxtui.

29 Pus slivasalh na lhu ju tatakꞌaixtoklh ju lapanacni junta ixvi ju Jesús.

Chai ju yuchi tsuculh ajuniniꞌ:

―Ju uxijnan ju chavai tꞌonatꞌit na kꞌai untꞌatꞌit.

Va lacꞌasqꞌuinatꞌit ju tuꞌuꞌ lhamakꞌan ju apꞌucꞌatsꞌayaꞌitꞌit ni vasalh Cristo icjunita.

Yuchi ju ixnoncan camalakachatachilh ju Dios.

Para jantu tuꞌuꞌ atumpa ju amasunicꞌanaꞌitꞌit.

Va yuchi ni amapꞌastꞌacꞌanicꞌanaꞌitꞌit tuchi ju tapasalh laꞌisꞌatsucunti ju makꞌaniya lapanac ju Jonás ixjuncan.

Yuchi ju ixnajun ixchivinti Dios.

30 Pus alin tuchi tapasalh laꞌisꞌatsucunti chai ixlhiyuchi tacꞌatsa ju amachakꞌan Nínive ni vasalh Dios ju xamalakachai ju Jonás ju anch.

Chai vana va chun ju quitꞌin.

Caꞌalinaꞌ ju tuchi catapasayaꞌ laquiꞌatsucunti chai ixlhiyuchi laich apꞌucꞌatsꞌayaꞌitꞌit ju uxijnan ju chavai tꞌonatꞌit tichi chavaich ju quitꞌin ju quimalakachatachilh ju Dios ni lapanac actsucuyaꞌ ju ani.

31 Acsni camakꞌosaspitcanaꞌ ju lapanacni pus ju anuꞌ makꞌaniya chakoꞌulh ju xaꞌucxtin ixjunita ju ixlhisur ju lacamunutpaꞌ catayayaꞌ chai va ixlacata yuchi pus aꞌulanicꞌanaꞌitꞌit ju miꞌalactuꞌuntiꞌan ju uxijnan ju chavai tꞌonatꞌit.

Pus chunch ju aꞌulhtꞌunicꞌanaꞌitꞌit ju uxijnan ni slivasalh na makat ju xaminacha ju yuchi ni ixkꞌasmatniputun ju ixꞌatalaninti ju Salomón.

Chai ju ani icya ju palai xakꞌai icjunita.

Palai jantu ju Salomón.

Para ju uxijnan jantu quilakꞌasmatniputunau ju quinchivinti.

32 Chai ju amachakꞌan ixtajunita ju Nínive catatayayaꞌ acsni camakꞌosaspitcanaꞌ ju lapanacni.

Chai ixlacata tuchi tanavilh ju yuꞌunch pus amucꞌanicꞌanaꞌitꞌit ju mintalakꞌalhinꞌan ju uxijnan.

Chai chunch ju aꞌulhtꞌunicꞌanaꞌitꞌit va ixlacata ni tamacaulh ixꞌalactuꞌuntiꞌan ju yuꞌunch acsni takꞌasmatnilh ixchivinti ju Jonás.

Chai ani icya ju palai xakꞌai icjunita.

Palai jantu ju Jonás.

Para ju uxijnan jantu macꞌompꞌutꞌunatꞌit ju miꞌalactuꞌuntiꞌan mas kꞌasmatꞌatꞌit ju quinchivinti.

Ju Jesús tailhiꞌalh ju ixchivinti chai chani ju ajuni ju lapanacni:

33 ―Jantu xamatiꞌ caxava ju ixmaclhcu chai astan va camatankꞌanu u caꞌakxtakꞌula lacacajon.

Alai aktsꞌiya ulai junta mucꞌacan ju maclhcu.

Ju chunch va tichi chavaich ju catanuyach laich cataꞌalacꞌavananaꞌ.

34 Pus vana va chun ju milakchulhꞌan.

Pus ni na kꞌox ju milakchulhꞌan pus laich alacꞌavananatꞌit.

Para ni jantu kꞌox ju milakchulhꞌan pus tachi ju va tꞌonatꞌit lacaꞌatatsꞌisni.

Chai vana va chun ju miꞌatalacpastꞌacꞌatꞌan.

Ni alacpꞌastꞌacnantꞌit kꞌox pus laich amachꞌakxayaꞌitꞌit ixchivinti Dios.

Para ni asamakꞌanaꞌitꞌit ixchivinti Dios pus jantu kꞌox ju miꞌatalacpastꞌacꞌatꞌan.

Chai va ixtꞌachunch jun ju miꞌatsucuntiꞌan tachi ju va tꞌonatꞌit lacaꞌatatsꞌisni.

35 Pus alaktsꞌintꞌit ta yu alacpꞌastꞌacnantꞌit.

Jantu xcai ni tachi ju va tsꞌista cava lamiꞌatsucuntiꞌan ni va asamakꞌanaꞌitꞌit ju ixchivinti Dios.

36 Pus ni alacꞌaꞌiyaꞌitꞌit chux ixchivinti Dios chai jantu tuꞌuꞌ asamakꞌanatꞌit pus na kꞌoxich lai amachꞌakxayaꞌitꞌit tachi acsni tamapulhcuniyan ju lamintiꞌan ju tuꞌuꞌ maclhcu.

37 Pus acsni chivinkꞌo ju Jesús pus pumatam fariseo kꞌailhiꞌalh ju Jesús laꞌixchakaꞌ ni caꞌalh tꞌavenaꞌ.

Pus ju Jesús tꞌaꞌalh.

Tanulh laꞌixchakaꞌ chai tapakstitama lacamixa ni chunch ju ixtalai.

38 Para ju anuꞌ fariseo na lhamakꞌaninilh acsni laktsꞌilh ju Jesús ni jantu pꞌulhnan na paklhu xamakchakꞌai tachi ju aktsꞌiya ixtalhilanita ju israelitanin.

39 Para ju Jesús junich:

―Ju uxijnan ju fariseonin untꞌatꞌit slivasalh na kꞌox chꞌakꞌayatꞌit mas va ixmacan ju tuꞌuꞌ tasa chai ju tuꞌuꞌ cꞌaꞌulh tachi ju lhilanitꞌatꞌit.

Para jantu navipꞌalatꞌit cuenta ixpulacni miꞌalhunutꞌan junta na alin ju akꞌalhaꞌunti chai ju amacxcai.

40 Va tontojni untꞌatꞌit.

Ju Dios ni navilh ixmacan ju tuꞌuꞌ ja jantu yuchi ju vachuꞌ navilh ju ixpulacni.

41 Pus alhiꞌaktꞌaiꞌutꞌit ju quilhpatinin ju tuchꞌi pꞌacxantꞌatꞌit.

Ju chunch salaka cajunaꞌ ju miꞌalhunutꞌan.

42 Painiꞌitnich ju uxijnan ju fariseonin untꞌatꞌit.

Ju uxijnan vasalh muctꞌaxtꞌuyatꞌit ju lhamapꞌaksin acsni xtꞌakniyatꞌit ju palijni lactsꞌunin ju alhmujinu chai tachi chun ju aliꞌ achꞌitin ju pulakꞌoxiyatꞌit ju mivaitiꞌan chai ju ruda.

Para jantu naviyatꞌit cuenta ni sok ju tsꞌucꞌuyatꞌit u jantu.

Chai jantu naviyatꞌit cuenta ni mapꞌainiyatꞌit ju Dios u jantu.

Para palai tasqꞌuini ni anavitꞌit ju ani taxtokni mas atꞌailhipꞌitꞌit ju ixtaknica lactsꞌunin ju achꞌitin vachuꞌ.

43 Painiꞌitnich ju uxijnan ju fariseonin untꞌatꞌit.

Ju uxijnan kꞌachꞌaniyatꞌit ju putolan ju alin ju lacpujitat junta tatolai ju xalackꞌajin.

Chai kꞌachꞌaniyatꞌit ni catamacꞌamin ju lapanacni ju lacati tachi ju tamacꞌami tam xakꞌai.

44 Painiꞌitnich ju uxijnan ju fariseonin untꞌatꞌit.

Ju uxijnan na acxpꞌutꞌiyununatꞌit.

Pus ju uxijnan chunch untꞌatꞌit tachi ju tuꞌuꞌ panteon ju jantu manicanta chai jantu lai cꞌatsacan ni yuchi cava.

Chai ixlhiyuchi ju lapanacni taputayai ju anch.

Pus vana va chun ju uxijnan.

Ju lapanacni mas tatꞌaꞌucxuntꞌonan chai talaktsꞌinan ni tachi ju na va lackꞌoxin untꞌatꞌit para jantu tacꞌatsai ni na lhquiliqui ju lamimpulacniꞌan.

45 Pus ju acsnich pumatam ju na ixlhatalanininta ju ixlhamapꞌaksinꞌan ju istꞌaꞌisraelitanin xakꞌala ju Jesús chai juni:

―Amamakaꞌunuꞌ acsni naꞌun ju chunch pus vachuꞌ macxcai quilalhichivinau ju quijnan.

46 Para ju Jesús junich:

―Painiꞌitnich vachuꞌ ju uxijnan ju mavasalayatꞌit ju lhamapꞌaksin.

Ju uxijnan naviyatꞌit tachi ju tam lapanac ju na tsꞌinqꞌui macꞌucꞌai ju ixpuru.

Ju uxijnan na lhu chai na tsꞌinqꞌui lhamapꞌaksin ju amucꞌaniyatꞌit ju lapanacni tachi ju jantu lai catanavi.

Para ju uxijnan nin lacatsꞌunin jantu muctꞌaxtꞌupꞌalatꞌit tachi ju najun ju anch.

47 Painiꞌitnich ju uxijnan.

Pus ju makꞌaniya milacpaꞌitniꞌan tamaknilh ju lapanacni ju ixtanajun ixchivinti Dios.

Chai ju uxijnan ju isꞌaskꞌatꞌan untꞌatꞌit lakꞌoxiniyatꞌit ju ixpanteonꞌan ju xatamakni ju mimpaiꞌan.

48 Chai ni chunch ju naviyatꞌit pus va putasui ni cꞌatsꞌayatꞌit tuchi tanavilh ju milacpaꞌitniꞌan chai kꞌoxich lhiulayatꞌit.

Pus ju yuꞌunch taꞌamakninilh chai ju uxijnan lakꞌoxiniyatꞌit ju ixpanteonꞌan ju amaknicanta.

49 Chai ni chunch ju navipꞌalatꞌit pus yuchi chani lhinaulh ju Dios ju na kꞌox acꞌatsananta:

“Acꞌamalakachaniyaꞌ ju quilapanacni ju catanonaꞌ ju quinchivinti.

Vachuꞌ acꞌamalakachaniyaꞌ ju quiꞌalhtanin.

Chai sia yuꞌunch ju acꞌamalakachayaꞌ ju aliꞌin caꞌamaknicanaꞌ.

Chai ju aliꞌin caꞌamamakꞌalhkꞌajniyaꞌ ju anuꞌ lapanacni”.

Chunch ju ma naulh ju Dios.

50 Pus uxijnan ju tꞌonatꞌit ju chavai ju amapꞌalaꞌitꞌit ixꞌacꞌalhniꞌan tachi chun ju lapanacni ju ixtanajun ixchivinti Dios ju amaknicalh tus laꞌixputaiꞌulacan ju lacamunutpaꞌ.

51 Chux ju yuꞌunch ju amaknicalh tus acsni tavanan maknicancha ju Abel ju pꞌulhnan tucan ju maknicalh tus acsni maknicanchalh ju Zacarías ju tamakni laꞌixputsin pujitat junta ixtꞌalakxtokya junta ixmaknican ju atapacxat ju ixlhakꞌailaktsꞌincan ju Dios.

Yuchi ju saꞌastan va tachi chun ju lhitsꞌokcanta laꞌixchivinti Dios mas na lhu aliꞌin ju amaknicalh ju palai astan.

Pus uxijnan ju amapꞌalaꞌitꞌit ixꞌacꞌalhniꞌan chux ju yuꞌunch.

52 Painiꞌitnich ju uxijnan ju mavasalayatꞌit ju milhamapꞌaksinꞌan ju israelitanin untꞌatꞌit.

Ju uxijnan jantu sok xaꞌamavasalaniyatꞌit ju lapanacni ixchivinti Dios ni laich catacꞌatsayaꞌ ta yu laich catatakꞌalhtaxtulh.

Ju uxijnan miꞌakstuꞌan jantu lacꞌaꞌiyatꞌit ju stavasalanti chai asastꞌucꞌatꞌit ju talacaꞌiputun.

53 Pus acsni ixꞌajuni ju ani taxtokni ju Jesús pus ju yuꞌunch ju na ixtalhatalanininta ju ixlhamapꞌaksinꞌan ju istꞌaꞌisraelitanin chai ju fariseonin slivasalh na tatalhkꞌamalh chai tatsuculh jeks amavanin.

Chai ixtaquilhasacmich na lhu taxtokni.

54 Va ixtalhistꞌacꞌa chai ixtapuxconi tuꞌuꞌ chivinti ju canaulh ta yu laich catapuchivimakꞌalh.