2 Chai ajunich ju ixꞌamamakaꞌui:

―Acsni na cꞌatꞌata ju tuꞌuꞌ xatocꞌat slivasalh na lhu chꞌalhcatnin ju maktasqꞌuinican ni laich soko camakꞌaixtokcalh.

Pus vana va chun ju lapanacni.

Slivasalh na lhu ju aquintalhilaksi ni xamatiꞌ caꞌajunilh.

Para jantu lhu alin ju taꞌamputun ajuninin.

Pus yuchi alhitꞌapꞌaininitꞌit ju Dios ju lhinajun laꞌixlhichꞌalhcat ni camacaꞌalh aliꞌ ju ixlapanacni laꞌixlhichꞌalhcat.

3 Pus aꞌinchitꞌit.

Iclamalakachayau tachi ju va borregojni junta na alin ju maktilin.

4 Jantu alhiꞌitꞌit ju mintuminꞌan nin mimpastiꞌan nin alakatam ju minchꞌanxtakꞌanꞌan.

Chai jantu xamatiꞌ panicni atꞌachꞌivinintꞌit acsni amacꞌamiyaꞌitꞌit ju lacati.

5 Chai va tuchi chakaꞌ junta astꞌacnanaꞌitꞌit pus acsni atꞌanuyaꞌitꞌit pꞌulhnan ma chani anaꞌuntꞌit:

“Lhikꞌach atsꞌucꞌuyaꞌitꞌit ju uxijnan ju tꞌanuyatꞌit ju ani lacachakaꞌ”.

6 Chai ni tꞌajun ju anch pumatam ju caꞌamaklhtayanamputulh ju kꞌox atsucunti ju xtꞌakꞌa ju Dios pus vasalh chunch cajunaꞌ tachi ju xasqꞌuin ixlacata.

Para ni matiꞌ xamatiꞌ ju chunch ju anch lacachakaꞌ pus jantu tuꞌuꞌ ixtapalhni cajunaꞌ ju minchivintiꞌan.

7 Chai va lakatam chakaꞌ ju atꞌolaꞌitꞌit.

Chai aꞌuyaꞌitꞌit va tuchi cataxtakniyanch.

Chunch ju alatꞌit ni lhijunch ni caxtaknicalh ju ixtalhaja ju makchꞌalhcatnaꞌ.

Jantu lakatam lakatam chakaꞌ atꞌanuyaꞌitꞌit.

8 Chai va tuchi lakꞌachakꞌan junta apꞌinaꞌitꞌit chai ni cataꞌamaklhtayananan pus aꞌuyaꞌitꞌit va tuchi ju cataxtakniyan.

9 Acꞌuchꞌutꞌit ju takꞌankꞌanin ju anch tatꞌajun.

Chai aꞌunaꞌitꞌit ni chavaich laich calhinaulh ju Dios laꞌisꞌatsucuntiꞌan ni va catalacasqꞌuilh ju yuꞌunch.

10 Para vanta lhiꞌanchach lakꞌachakꞌan junta atꞌanuyaꞌitꞌit chai ni jantu cataꞌamaklhtayananan pus atꞌayatꞌit ju lacati chai chanich anaꞌuntꞌit:

11 “Mas yuchi ju xapokxni ju milakꞌachakꞌanꞌan ju quintachꞌanjucan laquinchꞌajaꞌ quincꞌan icchꞌancꞌalhapꞌuxcanau ni jantu xaquilaꞌamaklhtayananau.

Chai ju chunch apꞌucꞌatsꞌayaꞌitꞌit ni talakꞌalhin ju xanaviyatꞌit.

Chai mas jantu xaquilaꞌamaklhtayananau para acꞌatsꞌatꞌit ni chavai avilhchan laich ixlhinaulh ju Dios lamiꞌatsucuntiꞌan ni va ixlacꞌasqꞌuintꞌit cava”.

Chunch ju aꞌunaꞌitꞌit ju amachakꞌan anch.

12 Pus iclajunau ni palai na caꞌalinaꞌ ju ixmakꞌalhkꞌajnatꞌan ju amachakꞌan ju anuꞌ lakꞌachakꞌan ju anuꞌ avilhchan acsni camakꞌosaspitcanach ju lapanacni.

Palai jantu ju amachakꞌan Sodoma mas na alactuꞌunin ixtajunita ju yuꞌunch.

Ju Jesús tailhiꞌalh ju ixchivinti chai chani ju ajuni ju lapanacni:

13 ―Painiꞌitnich ju uxijnan ji amachakꞌan Corazín.

Painiꞌitnich ju uxijnan ji amachakꞌan Betsaida.

Pus ni caꞌixnavicancha ju lakꞌachakꞌan Tiro chai ju lakꞌachakꞌan Sidón ju lhamakꞌan ju ixnavinicꞌantꞌatꞌit pus makꞌanch ixtamacaulh ixꞌalactuꞌuntiꞌan chai ixtalakchꞌilh ju smalaka ixpumpuꞌan chai ixtatavi lacalhcꞌacꞌa ni cacꞌatsacalh ni vasalh ixtamacomputun ixꞌalactuꞌuntiꞌan.

14 Pus ixlhiyuchach acsni camucꞌanicanaꞌ ju ixtalakꞌalhinꞌan ju lapanacni pus ju amachakꞌan Tiro chai ju amachakꞌan Sidón palai jantu lhu caꞌalinaꞌ ju ixmakꞌalhkꞌajnatꞌan.

Palai lhu ju amamakꞌalhkꞌajnicꞌanaꞌitꞌit ju uxijnan.

15 Chai ju uxijnan ji quintꞌaꞌamachakꞌan ju lakꞌachakꞌan Capernaum na va tꞌakꞌayayatꞌit.

Para amamaxanicꞌanaꞌitꞌit.

16 Chai tailhiꞌalh ju chivinti ju ixtꞌajun ajuniniꞌ ju ixꞌamamakaꞌunti.

Ajuni:

―Ju catakꞌasmatniyan ju uxijnan pus tachi ju va jun quitꞌin ju quintakꞌasmatni.

Chai ju jantu tuꞌuꞌ catalhiulayan ju uxijnan pus tachi ju va jun quitꞌin ju jantu tuꞌuꞌ quintalhiulai.

Chai ju jantu tuꞌuꞌ quilhiulai pus va nomputun ni jantu tuꞌuꞌ talhiulai ju quimpai ju quimacaminta.

17 Acsni tataspꞌitcha ju isetentaꞌan ixꞌamamakaꞌui ju Jesús pus na ixtakꞌachan.

Tajunilh ju Jesús:

―Quiꞌucxtin mas yuꞌunch ju lhacaticurulhni xaquintaquiclacaꞌiyan acsni xackꞌayau lamintapakaꞌut.

18 Chai ju Jesús ajuni:

―Chunchach ni iclaktsꞌilh ju Satanás ni xacaxtucalh ju lactꞌiyan chai vatsꞌalhti patajulh tus lacatꞌun tachi ju tuꞌuꞌ makꞌalipniꞌ.

19 Chai iclaxtaknitau ju tachaput ni laich apꞌutꞌayayaꞌitꞌit ju lu chai ju statsucu chai laich atꞌalalhaꞌayaꞌitꞌit tachi chun ju ixtachaput ju lhacaticuru chai jantu tuꞌuꞌ catanaviniyan macxcai.

20 Para jantiyuꞌ ju alhikꞌachꞌantꞌit ni laich taquiclacaꞌiyan ju lhacaticuru.

Alai yuchi ju alhikꞌachꞌantꞌit ni tsꞌokꞌulacantacha lactꞌiyan ju mintapakaꞌutꞌan.

21 Pus ju acsni pantsꞌiquis ju Spiritu Santu xtaknilh ju Jesús lhu ju ixkꞌachat.

Chai ju Jesús chani junilh ju ixpai:

―Ju uxintꞌi ji quimpai xaꞌucxtinꞌat ju lactꞌiyan chai ju lacatꞌun.

Chai icjunan lakꞌailaktsꞌiuch ni jantu amavasalanitꞌa ju ani taxtokni ju na talhilaksi ixtacꞌatsanꞌan chai ixꞌatalanintiꞌan isꞌakstuꞌan.

Alai amavasalanitꞌa ju yuꞌunch ju talhilaksiyan tachi ju lai tam askꞌatꞌa ju lhilaksi ixꞌamamakaꞌunuꞌ ni yuchi ju camalaniyaꞌ tuꞌuꞌ.

Pus chunchach ji quimpai.

Chunchach ju kꞌox xalhiulai ju uxintꞌi.

Chai ju acsnich ju Jesús chani ajuni ju lapanacni:

22 ―Ju quimpai quixtaknikꞌota tachi chun ju taxtokni.

Chai jantu xamatiꞌ vasalh quimispai.

Va yuchi ju quimpai.

Chai jantu xamatiꞌ vasalh mispai ju quimpai.

Va quitꞌin ju istsꞌalh icjunita chai tachi chun ju iclacasqꞌuin ni catamispa.

23 Chai ju acsnich ju Jesús lacaꞌanchokopa junta ixtavilanancha ju ixꞌamamakaꞌunti chai va yuꞌunchach ju axakꞌala.

Ajuni:

―Slivasalh na lhikꞌach ju miꞌatsucuntiꞌan ju uxijnan ni laktsꞌinatꞌit tachi chun ju ani taxtokni ju tꞌajun tapasanaꞌ.

24 Pus iclapujunau chunch ni na lhu ju lapanacni ju ixtanajun ixchivinti Dios chai ju ucxtinin ju makꞌanchich ixtatꞌajun na ixtalaktsꞌimputun ju tuchꞌi laktsꞌinatꞌit ju uxijnan.

Para jantu talaktsꞌilh.

Chai na ixtakꞌasmatputun tuchꞌi kꞌasmatꞌatꞌit.

Para jantu tavanan takꞌasmatlh.

25 Chai pumatam ju na ixlhatalanininta ju ixlhamapꞌaksinꞌan ju istꞌaꞌisraelitanin taya.

Va ixlaktsꞌintanuputun ju Jesús.

Chai chani ju junilh:

―Amamakaꞌunuꞌ tijuch ju acnavilh ni laich caꞌalilh ju quiꞌatsucunti ju cajonkꞌalhi.

26 Chai ju Jesús juni:

―Pus tas tsꞌokcanta ju lamilhamapꞌaksin.

Tas lhimachꞌakxaich.

27 Chai ju yuchi akꞌalhtayanalh.

Junich:

―Pus ju lhamapꞌaksin najun ni ma acmapaini ju quiꞌucxtin Dios ixlhichux quiꞌalhunut chai ixlhichux ju quintacꞌatsan chai ixlhichux ju quintachaput chai ixlhichux ju quiꞌatalacpastꞌacꞌat.

Chai vachuꞌ najun ni ma acmapaini ju quintꞌalapanac tachi ju va jun quiꞌakstu.

28 Pus ju acsnich ju Jesús junich:

―Kꞌoxich ju xaqꞌuilhikꞌalhtꞌaich.

Anavitꞌi ju chunch chai caꞌalinaꞌ ju miꞌatsucunti ju conkꞌalhiyaꞌ.

29 Para ju yuchi ni jantu ixlacasqꞌuin ni camucꞌanicalh ixtalakꞌalhin pus junilh ju Jesús:

―Para tis quintꞌalapanac ju acmapainiyaꞌ.

30 Pus ju acsnich ju Jesús chani juni:

―Pumatam israelita ixtaxtutacha ju lakꞌachakꞌan Jerusalén.

Ixꞌamputun ju lakꞌachakꞌan Jericó.

Para tachꞌapayaulh ju akꞌalhonin.

Chai ju yuꞌunch talhiꞌanilh ju ixpumpuꞌ chai talakanekma.

Chai paitat xanin tamacoma.

Chai taꞌalh.

31 Chai chanich ju tapasalh.

Pus pumatam quimpaliꞌan ju israelitanin juntau ixꞌanta ju anuꞌ lacati.

Chai acsni laktsꞌilh ju anuꞌ probe lapanac pus na makat puꞌinilh.

32 Chai vachuꞌ pumatam lapanac ju ixchꞌalhcatnan lacpujitat ixꞌanta ju anuꞌ lacati.

Chai acsni ixchaꞌamputun vanin junta ixma ju anuꞌ lapanac pus laktsꞌilh para vachuꞌ na makat ju puꞌinilh.

33 Para pumatam amachakaꞌ ju xaꞌestado Samaria vachuꞌ ixꞌanta ju lacati.

Chai vanin milh junta ixma ju anuꞌ lapanac.

Chai acsni laktsꞌilh pus na mapaini.

34 Chai lakꞌalh.

Chai tsuculh lacchꞌininiꞌ junta ixlacacꞌatsani.

Mucꞌanilh ju aceite chai ju vino.

Chai chꞌixmucꞌalh laꞌixpuru.

Chai lhiꞌalh junta machꞌixtakcan chakaꞌ.

Chai lhistaclh ju yuchi.

35 Chai acsni tuncunchokopa chai ixꞌanchokoputun ju lacati ju anuꞌ amachakaꞌ Samaria pus maxtulh lakatꞌui denarius tumin.

Chai xtaknilh ju amachakaꞌ chai junilh:

“Alhistꞌactꞌi ju anuꞌ lapanac.

Chai ni tuꞌuꞌ aliꞌ ju amacꞌapꞌinaꞌ ju mintumin pus acmapalhniyanch acsni actaspꞌitchokoyanta”.

36 Pus tꞌas naꞌunch.

Tis chavaich ju ixpumatꞌutuꞌan ju talacasulh ni vasalh mapainilh ju anuꞌ tachꞌapayaulh ju akꞌalhonin.

37 Chai ju anuꞌ ju na ixlhatalanininta ju ixlhamapꞌaksinꞌan ju istꞌaꞌisraelitanin naulh:

―Pus yuchi ju navilh lamapainin.

Pus ju acsnich ju Jesús junilh:

―Aꞌinchich chai chunchach vachuꞌ ju anavitꞌi.

38 Pus ju Jesús alhtanampa ju lacati chai tanuchalh lakatam lakꞌachakꞌan.

Chai pumatam chakoꞌulh ju Marta ixjuncan amaklhtayanalh laꞌixchakaꞌ.

39 Chai ixꞌalin pumatam ispꞌisekꞌe ju Marta ju Malia ixjuncan.

Pus ju yuchi tavi vanin laꞌixchꞌajaꞌ ju Jesús ni va ixkꞌasmatniputun ju ixchivinti.

40 Para ju Marta na ixlhamakꞌaninin ju ixlhichꞌalhcat ni ixtꞌajun lakꞌoxiniꞌ ju vaiti.

Pus lakꞌalh ju Jesús chai juni:

―Amamakaꞌunuꞌ ja va jantu qꞌuilaktsꞌin ni va quiꞌakstu quimacaunuta ju quimpꞌisekꞌe ju lacalhichꞌalhcat.

Aꞌunch ni chach quimilh aktaijunuꞌ.

41 Para ju Jesús juni:

―Marta slivasalh na lhu alin ju miꞌatalacpastꞌacꞌat ju navipꞌutꞌun.

42 Para va lakatam taxtokni ju maktasqꞌuinican.

Chai ju Malia sacxtuta ju taxtokni ju palai kꞌox chai jantu lai xamatiꞌ catitaiꞌinilh.