Ju Jesús amalakacha ixpumacautꞌuiꞌan
9
Ju Jesús amakꞌaixtoklich ju ixpumacautꞌuiꞌan ixꞌamamakaꞌui chai axtaknilh ixtachaputꞌan chai ju ixpukꞌaiꞌan ni laich cataxcoxtuyaꞌ ju lhacaticurulhni laꞌixlacatunaꞌan ju lapanacni chai lai palaich catanaviyaꞌ tachi chun ju takꞌankꞌanin.
Lucas 9.1-22
2 Chai amalakacha ni cataꞌalh ajuninin ju lapanacni ni lhinomputun ju Dios laꞌisꞌatsucuntiꞌan chai ni palaich catanaviyaꞌ ju takꞌankꞌanin.
3 Chai ajuni:
―Jantu tuꞌuꞌ alhipꞌitꞌit ju ixlacata ju lacati.
Nin mimpalicꞌan nin mimpastiꞌan nin miniꞌan nin tumin nin yuchi ni lai alhipꞌitꞌit kꞌalhtꞌui ju mimpumpuꞌan.
4 Chai va tuchi chakach junta astꞌacnanaꞌitꞌit pus anch ju atꞌolhkꞌalhiyaꞌitꞌit tus acsni atꞌaxtꞌuchꞌokꞌoyaꞌitꞌit ju anuꞌ lakꞌachakꞌan.
5 Chai va tuchi lakꞌachakꞌan ju jantu cataꞌamaklhtayananan pus acsni atꞌaxtꞌuchꞌokꞌoyaꞌitꞌit ju anch achꞌancꞌalhapꞌuxcꞌantꞌit ju pokxni laminchꞌanxtꞌakꞌanꞌan ni catapucꞌatsayaꞌ ni jantu kꞌox tanavita.
6 Pus tataxtulh ju yuꞌunch chai taꞌalh chux ju lakꞌachakꞌanixni.
Chai ixlhilacaputsꞌun ju anuꞌ lacatꞌun ixtajuni ju lapanacni ta yu laich catatakꞌalhtaxtulh.
Chai palaich ixtanavi ju takꞌankꞌanin.
Maknicalh ju Xivan ju amakpaxanaꞌ
7 Pus ju gobernador Herodes kꞌasmatlh tachi chun ju taxtokni ju ixnavi ju Jesús.
Chai ju yuchi na ixlhamakꞌaninin ni ixtanajun ju aliꞌin ni va lokꞌonchokolh ju Xivan laꞌixꞌaninti.
8 Chai ju aliꞌ ixtanajun ni va minchokolh ju makꞌaniya ixlapanac Dios ju Elías ixjuncan.
Chai ju aliꞌin ixtanajun ni va lokꞌonchokolh apumatam makꞌaniya lapanac ju ixnajun ixchivinti Dios.
9 Para ju Herodes naulh:
―Quitꞌin quiꞌakstu iclhinaulh ixꞌacchꞌucꞌuca ju Xivan.
Pus ju ani tis chavaich nuꞌ ju lhichivinincan na lhu taxtokni.
Chai ju Herodes na ixlaktsꞌimputun ju Jesús.
Ju Jesús amava lhu lapanacni
10 Pus acsni tataspꞌitchokocha ju ixꞌalacmalakachata ju Jesús ni cataꞌalh pumatꞌiyun pumatꞌiyun amalaninin ju lapanacni pus talakminchokolh ju Jesús chai tajunkꞌo tachi chun ju taxtokni ju tanavichalhch.
Chai ju Jesús akꞌailhiꞌalh alacatam junta aseknicꞌa ixjunita.
Junta vanin ixjunita ju lakꞌachakꞌan Betsaida.
11 Para acsni tacꞌatsa ju lapanacni pus lana taꞌachꞌakꞌokꞌanalh.
Chai ju Jesús lhikꞌach amaklhtayanalh.
Chai tsuculh alacjuniniꞌ ni lhinomputun ju Dios laꞌisꞌatsucuntiꞌan.
Vachuꞌ acꞌuchꞌu ju takꞌankꞌanin.
12 Chai acsni ixtokꞌoxaputun pus ju ixpumacautꞌuiꞌan talakꞌalh ju Jesús chai tajuni:
―Amalakꞌachꞌatꞌi ju lapanacni.
Chach taꞌancha lakꞌachakꞌanixni junta vanin tasui chai chux ju lacchakaꞌ ju lacacuxtu tasui.
Chach taꞌancha sqꞌuininin ju chakaꞌ junta laich catalakacujlh chai junta laich catavailh.
Pus junta vilau ni matiꞌ tuꞌuꞌ.
13 Para ju Jesús alacjuni:
―Amavatꞌitch ju uxijnan.
Chai ju yuꞌunch tajuni:
―Para va akxquisich vati ju xaclhitajuyau chai lakatꞌui lactꞌicstꞌi pamata.
U ni jantu pus ca acꞌanauch tamonin ju vaiti ixlacata chux ju ani lapanacni.
14 Pus ixchaꞌanta tachi lakaquis milh jokꞌatni.
Pus ju acsnich ju Jesús alacjunilh ju ixꞌamamakaꞌui:
―Chach tatolhcha chai alhcꞌaꞌulachich cincuenta ju quilhmaktamin.
15 Pus chunch ju tanavi.
Chai tatolhcha ixchuxꞌan.
16 Pus ju acsnich ju Jesús chꞌapalh ju akxquis vati chai ju lakatꞌui pamata chai talakstꞌalh ju lactꞌiyan.
Xtaklh lhakꞌailaktsꞌin chai chꞌekꞌelh chai axtaknilh ju ixꞌamamakaꞌui ni cataxtaknilh ju ixtalhavat lapanacni.
17 Pus taꞌokꞌo ixchuxꞌan chai talhilalh.
Chai tasacchokolh ju tamaxajnicha chai talaktsama lakacautꞌui tankꞌalin.
Ju Pitaluꞌ naulh tichi chavaich ju Jesús
18 Lakatam avilhchan acsni va isꞌakstu ixvi ju Jesús pus tsuculh tꞌachiviniꞌ ju Dios.
Va yuꞌunch ju ixꞌamamakaꞌunti ju ixꞌalactꞌavi.
Chai acsni tꞌachivinkꞌo pus alacsacmilh ju ixꞌamamakaꞌui.
Ajunich:
―Tas tanajun ju lapanacni.
Tis chavaich quintalhiulai ju quitꞌin.
19 Chai ju yuꞌunch takꞌalhtayanalh.
Tajuni:
―Ju aliꞌin tanajun ni ma Xivanꞌat ju amakpaxanaꞌ.
Chai ju aliꞌin tanajun ni ma Elíasꞌat.
Chai ju aliꞌin tanajun ni ma uxintꞌich pumatam makꞌaniya lapanac ju ixnajun ixchivinti Dios.
Ma va lokꞌonchꞌokꞌoch.
20 Chai ju Jesús ajuni:
―Chai ju uxijnan tis chavaich quilalhiulayau ju quitꞌin.
Chai ju Pitaluꞌ junich:
―Uxintꞌich ju Cristoꞌat ju ixnoncan camalakachatachilh ju Dios.
Ju Jesús naulh ni camaknicanaꞌ
21 Pus ju Jesús slivasalh alhimapꞌaksi ju ixꞌamamakaꞌui ni jantu xamatiꞌ catajunilh ni Cristo junita.
22 Chai ajuni:
―Aktsꞌiya tasqꞌuini ni aclhimakꞌalhkꞌajnalh na lhu taxtokni ju quitꞌin ju quimalakachatachilh ju Dios ni lapanac actsucuyaꞌ ju ani.
Chai jantu tuꞌuꞌ aquintalhiulayaꞌ ju xapapanin ju quintꞌaꞌisraelitaninꞌan chai ju xalackꞌajin palijni chai ju yuꞌunch ju na talhatalanininta ju milhamapꞌaksinꞌan.
Chai aquintamakniyaꞌ.
Para aclokꞌonchokoyaꞌ ju ixlhilakatꞌutu avilhchan.
23 Chai astan ju Jesús ajuni ixchuxꞌan ju anch ixtavilanalh:
―Ni xamatiꞌ quilapanac jumputun pus jantu lai catinavi ixkꞌachat isꞌakstu.
Chai chux tuncujun cachꞌixlh ju makꞌalhkꞌajnat ju caꞌalinaꞌ va ixlacaꞌatalh ni quilhilacaꞌanta ju quitꞌin.
Chai va tachi aquinchꞌakꞌokꞌalh.
Lucas 9.23-62
24 Pus va tichi chavaich ju najun ni jantu quinchꞌakꞌokꞌaputun va ixlacaꞌatalh ni va lai maknicalh pus ju yuchi camakꞌatsꞌankꞌayaꞌ ju saꞌatsucunti ju lactꞌiyan.
Para va tichi chavaich ju camakꞌatsꞌankꞌayaꞌ ju isꞌatsucunti va ixlacaꞌatalh ni quinchꞌakꞌokꞌai ju quitꞌin pus caꞌalinaꞌ ju isꞌatsucunti ju lactꞌiyan.
25 Pus jantu tuꞌuꞌ lhajai tam lapanac mas calhajakꞌo chux ju xataxtokni ju ani lacamunutpaꞌ ni va calhimakꞌatsꞌankꞌa ju isꞌatsucunti chai jantu lai catiꞌalh ju lactꞌiyan.
26 Pus va tichi chavaich ju aquintꞌamaxananaꞌ ju quitꞌin chai catꞌamaxananaꞌ ju quinchivinti pus vachuꞌ ju quitꞌin actꞌamaxananaꞌ ju yuchi.
Quitꞌin ju quimalakachatachilh ju Dios ni lapanac actsucuyaꞌ ju ani.
Actꞌamaxananaꞌ ju yuchi acsni acminchokoyaꞌ chai kꞌai ucxtin acjunaꞌ.
Acminaꞌ laꞌixtachaput ju quimpai chai laꞌixtachaputꞌan ju anquilhnin ju tavilanancha lactꞌiyan.
27 Chai iclajunau ju stavasalanti.
Alin ju lamilhiꞌuxijnan ju vilatꞌit ju ani ju jantu cataniyaꞌ tus acsni catalaktsꞌinaꞌ ta yu tasui acsni vi ju Dios laꞌixpuꞌucxtin.
Ju Jesús tam atalacasunilh ju ixꞌamamakaꞌui
28 Pus tachi ixlhilakatsajin avilhchan ixtapasata acsni ixꞌajunita ju lapanacni ju ani chivinti.
Pus ju acsnich ju Jesús alactꞌasanilh ju Pitaluꞌ chai ju Xivan chai ju Jacobo.
Chai alactꞌaꞌalhꞌ ju lakatam kꞌai talhpa.
Alh tꞌachiviniꞌ ju Dios.
29 Chai acsni ixtꞌajun tꞌachiviniꞌ ju Dios pus lana tapaxalh ju ixꞌucxpuꞌ ju Jesús.
Chai ju ixpumpuꞌ lana na xlapꞌapꞌa ixmaktajita chai na xnapapa ixjunita.
30 Chai vachuꞌ tatalacasucha ixpumatꞌuiꞌan lapanacni ju ixtatꞌachivinin ju Jesús.
Yuꞌunch ju Moisés chai ju Elías ju makꞌanch ixtatꞌajun.
31 Chai ju yuꞌunch vachuꞌ tatalacasulh laꞌixꞌamatuncunit ju Dios.
Chai ixtalhichivinin ju ixꞌaninti ju Jesús ju catapasayaꞌ ju lakꞌachakꞌan Jerusalén.
32 Para ju Pitaluꞌ chai ju ixꞌalactꞌavi slivasalh na ixtalaclhtatai.
Chai acsni xcaya tacujlh pus talaktsꞌilh ni xlapꞌapꞌa ixmaktajita ju anch.
Vachuꞌ talaktsꞌilh ju ixtꞌiyunꞌan lapanacni ju ixꞌalactꞌaya ju Jesús.
33 Chai acsni tatsꞌankꞌa laꞌixꞌalacꞌavantiꞌan ju anuꞌ ixtꞌiyunꞌan pus ju Pitaluꞌ junich ju Jesús:
―Amamakaꞌunuꞌ na kꞌoxich iclhiulayau ni anich icvilau.
Acnaviyauch akꞌatꞌutu pacꞌatsꞌa.
Akꞌatamch ju miꞌanuꞌ.
Chai akꞌatamch ju ixꞌanuꞌ ju Moisés.
Chai ju akꞌatamch ixꞌanuꞌ ju Elías.
Chunch ju naulh ju Pitaluꞌ para jantu iscꞌatsai tuchi ixnajunch.
34 Pus acsni ixtꞌajun nonaꞌ ju ani pus milh lakatam ataputsꞌi chai aꞌakxtakmakꞌo.
Chai ju yuꞌunch lana na tatalhanalh acsni tatanulh ju lacaꞌataputsꞌi.
35 Chai takꞌasmatlh lakatam chivinti ju xaminacha lacaꞌataputsꞌi chai ixnajun:
―Ju ani yuchi ju quintsꞌalh chai na icmapaini.
Yuchach ju akꞌasmatnitꞌit.
36 Chai acsni chivinkꞌo pus ju ixtamamakaꞌun ju Jesús talaktsꞌilh ni va isꞌakstu ixya ju Jesús.
Para astan jantu xamatiꞌ tuꞌuꞌ tajuni tuchi ju ixtalaktsꞌinta.
Ju Jesús palai navi pumatam tsꞌalh
37 Acsni tuncunchokopa pus ju Jesús chai ixpumatꞌutuꞌan ixtamamakaꞌui taminchokocha ju anuꞌ lactalhpa.
Chai na lhu lapanacni ju taquiꞌapakxtoknulh.
38 Chai pumatam lapanac ju ixmakminta lana xakꞌala ju Jesús.
Chai na pꞌas ju chivinilh acsni chani juni:
―Amamakaꞌunuꞌ ictapaininiyan ni aꞌaktꞌaiꞌutꞌich ju quintsꞌalh ni va lakatamch.
39 Pus va tanui ju lhacaticuru laꞌixlacatuna chai lana va tam pantsꞌiquis tsꞌau tꞌasai.
Chai tin lhinek chai na akpupui.
Chai acsni xcaya macajunch pus na talacacꞌatsanita ju yuchi.
40 Chai ictapaininilh ju mintamamakaꞌun ni cataxcoxtulh ju lhacaticuru para jantu lai ixtaxcoxtui.
41 Pus ju acsnich ju Jesús ajunich:
―Tis va yuchach ji lapanacni ni lana jantu lai lacꞌaꞌiyatꞌit.
Ja tasqꞌuini ni lana na makꞌan aclatꞌatolau chai aclachꞌixniu tus acsni alacꞌaꞌiyaꞌitꞌit.
Alhitꞌach ju mintsꞌalh.
42 Para acsni ixminta ju anuꞌ askꞌatꞌa pus ju lhacaticuru lana tin lhinekchokolh chai lhtucu lhtucu ucxuntama.
Para ju Jesús kꞌailh ju lhacaticuru chai junilh ni cataxtulh laꞌixlacatuna ju anuꞌ askꞌatꞌa.
Chai lana palaich va ju anuꞌ tsꞌalh.
Chai makꞌaxtaknichokolh ju ixpai.
43 Chai chux ju lapanacni na ixtalhamakꞌanininch ixtachaput ju Dios.
Ju Jesús nonchokopalai ni camaknicanaꞌ
Chai acsni ixtalhamakꞌaninin ixchuxꞌan tachi chun ju taxtokni ju ixnavich ju Jesús pus ju yuchi ajunilh ju ixꞌamamakaꞌui:
44 ―Anavitꞌit cuenta ju ani ju iclajunau chai jantu tavanan acꞌapꞌaꞌitꞌit.
Ju quitꞌin acmakꞌaxtakcanaꞌ laꞌixmacaꞌan ju lapanacni.
Quitꞌin ju quimalakachatachilh ju Dios ni lapanac actsucuyaꞌ ju ani.
―Chunch ju ajunilh ju Jesús.
45 Para ju ixꞌamamakaꞌui jantu lai ixtamachakxai tuchi ixnomputun junima chivinti chai jantu ixꞌalakꞌaꞌinican ni laich catamachakxa ju acsnich.
Chai ju yuꞌunch ni va ixtatalhoni ju Jesús pus jantu istasacmiputun tuchi ixnomputun.
Tis chavaich ju palai xakꞌai
46 Pus ju ixꞌamamakaꞌui ju Jesús tatsuculh lhilakꞌainin tichi chavaich ju palai xakꞌai ixjunita.
47 Para ju Jesús acsni cꞌatsalh tuchi ixtapastꞌacꞌa laꞌixꞌalhunutꞌan pus xakꞌatailh pumatam askꞌatꞌa chai yaulh vanin junta ixvi ju yuchi.
48 Chai ajuni ju ixꞌamamakaꞌui:
―Va tichi chavaich ju caꞌamaklhtayananaꞌ tam askꞌatꞌa tachi ju ani ya va ixlacata ni quilhilacaꞌanta ju quitꞌin pus tachi ju va jun quitꞌin ju quiꞌamaklhtayanan.
Chai va tichi chavaich ju quiꞌamaklhtayanan ju quitꞌin pus vachuꞌ amaklhtayanan ju quimpai ju quimacaminta.
Pus va tichi chavaich ju lamilhiꞌuxijnan ju jantu tuꞌuꞌ calhitakꞌaya yuchach ju palai xakꞌai.
Ju jantu quintꞌalaxcaiꞌan pus quilakꞌauꞌan
49 Pus ju acsnich ju Xivan junilh ju Jesús:
―Amamakaꞌunuꞌ iclaktsꞌiu pumatam ju ixcoxtui ju lhacaticuru laꞌixlacatunaꞌan ju lapanacni lamintapakaꞌut.
Chai ickꞌajiuch ni jantu chꞌakꞌokꞌayan tachi ju quijnan.
50 Para ju Jesús ajunilhch:
―Jantu akꞌaꞌitꞌit.
Pus ju jantu quintꞌalaxcaiꞌan quilakꞌauchꞌan.
Akꞌaicalh ju Jacobo chai ju Xivan
51 Chai acsni ixchimputun ju avilhchan acsni caꞌamaklhtayananchokocanaꞌ ju Jesús ju lactꞌiyan pus ju yuchi naulh ni jantu tuꞌuꞌ catisastuclh ni caꞌanaꞌ ju Jerusalén.
52 Pus acsni tucaꞌ ixchaꞌan pus ju Jesús amalakacha ju ixlapanacni ni cataꞌalh ju alakatam lakꞌachakꞌan puxconin ju vaiti chai ju chakaꞌ junta lai cataꞌastacnalh.
Pus ju yuꞌunch taꞌalh chai tatanuchalh laꞌixlakꞌachakꞌanꞌan ju samaritanonin.
53 Para ju amachakꞌan anch jantu taꞌamaklhtayanamputulh ju Jesús ni ixtacꞌatsai ni ixꞌamputun ju lakꞌachakꞌan Jerusalén chai ju yuꞌunch lana jantu ixtalaktsꞌimputun ju amachakꞌan Jerusalén.
54 Pus ixtꞌiyunꞌan ju ixꞌamamakaꞌui ju Jesús yuꞌunch ju Jacobo chai ju Xivan acsni talaktsꞌilh ju ani pus tajunilh ju Jesús:
―Quiꞌucxtin ja lacꞌasqꞌuin ni acsqꞌuinvich ju jipi ju camilh lactꞌiyan tachi ju navilh ju makꞌaniya milapanac ju Elías ixjuncan.
Chach lacxavakꞌo ju ani amachakꞌan.
55 Para ju Jesús talakaspꞌitlh chai akꞌailh.
Ajunich:
―Ju uxijnan lana jantu machꞌakxayatꞌit ta yu junita ju ixlhamapꞌaksin ju Spiritu Santu ju tꞌajun lamiꞌalhunutꞌan.
56 Pus ju quitꞌin jantiyuꞌ ju iclhiminta ni va acmilh makꞌatsꞌankꞌanaꞌ ju isꞌatsucuntiꞌan ju lapanacni.
Va icminta amakꞌalhtaxtunuꞌ.
Pus ju acsnich taꞌalh alakatam lakꞌachakꞌan.
Ixꞌalin ju ixtachꞌakꞌokꞌaputun ju Jesús
57 Chai acsni ixtaꞌanta ju lacati pus pumatam lapanac junilh ju Jesús:
―Quiꞌucxtin acchꞌakꞌokꞌayan vanta anchach ju apꞌinaꞌ.
58 Para ju Jesús junich:
―Ju zorra alin junta tanui.
Chai ju tsꞌokꞌo alin junta tatocꞌai.
Para ju quitꞌin matiꞌ ju quinchakaꞌ junta lai acꞌastacnalh.
Quitꞌin ju quimalakachatachilh ju Dios ni lapanac actsucuyaꞌ ju ani.
59 Chai ju Jesús junilh apumatam:
―Aqꞌuinchꞌakꞌokꞌach.
Para ju yuchi juni:
―Quiꞌucxtin yauch aqꞌuiꞌun ni actꞌatꞌolacaꞌ ju quimpai.
Ni caniyaꞌ ju yuchi pus acmacnuyaꞌ chai acsnich ju acchꞌakꞌokꞌayan.
60 Para ju Jesús junich:
―Chach tamacnu ju mimpai ju yuꞌunch ju taꞌamacnunun ju tanita.
Para ju uxintꞌi aꞌinchich ajuniniꞌ ju lapanacni ni Dios lhinomputun laꞌisꞌatsucuntiꞌan.
61 Pus ju acsnich apumatam xakꞌalachokopa ju Jesús.
Juni:
―Acchꞌakꞌokꞌayan para chach ictiquiꞌamacꞌami ju tavilanancha laquinchakaꞌ.
62 Para ju Jesús junich:
―Tachi chun ju lapanacni ju catachꞌapayaꞌ ju ixtiqꞌuiu ju pucuxtu para jantu vasalh catanaviyaꞌ cuenta para catalacaꞌanchokoyaꞌ laꞌixlhipulacanꞌan pus jantu sok catalhoknunaꞌ.
Pus vana va chun ju lakatꞌui junita ju ixꞌatalacpastꞌacꞌat.
Ju yuchi jantu lai kꞌox caꞌamalaniyaꞌ ju lapanacni ixlacata ju Dios ni jantu va yuchi ju navi cuenta.