Ixꞌalin ju chakolun ju ixtaꞌaktaijui ju Jesús
8
Chai astan ju Jesús ucsuntsuculh chux ju kꞌai lakꞌachakꞌanixni chai ju lactꞌicstꞌi lakꞌachakꞌanixni.
Ixꞌamalaninin chai ixꞌajuni ju lapanacni ni ixlhinomputun ju Dios laꞌixꞌalhunutꞌan.
Chai ju ixpumacautꞌuiꞌan ixꞌamamakaꞌui ixtatꞌaꞌanta.
2 Chai vachuꞌ ixꞌalactꞌaꞌanta ju aliꞌin chakolun ju ixꞌacꞌuchꞌuta acsni ixtalactakꞌankꞌai chai ju aliꞌin axcoxtunicalh ju lhacaticurulhni ju ixtatanun laꞌixlacatunaꞌan.
Pus sia yuꞌunch ju ixtatꞌaꞌan ju Jesús yuchi ju Malia amachakaꞌ Magdala.
Yuchi ju maxtunicalh pumatujun lhacaticurulhni laꞌixlacatuna.
3 Vachuꞌ ixtꞌaꞌanta ju Juana ixꞌamachakaꞌ ju Chuza ju ixlapanac ixjunita ju Herodes ju gobernador ixjunita.
Vachuꞌ tꞌaꞌalh ju Susana chai na pumalhu aliꞌin chakolun ju ixtalhiꞌaktaijui ixꞌalintaꞌan laꞌixmaktasqꞌuinitꞌan ju Jesús chai ixꞌamamakaꞌui.
Pumatam achꞌananaꞌ
4 Pus na lhu lapanacni ixtalakmin ju Jesús ju ixtamintacha lakatamin lakꞌachakꞌan.
Chai acsni na lhu ixtatakꞌaixtokta pus ju Jesús ajuni lakatam chivinti ju ixꞌalaktsꞌipaxcavaich ju tuꞌuꞌ.
Pus chani ju ajuni:
5 ―Pumatam achꞌananaꞌ alh lhavanaꞌ ju ixꞌachꞌananti.
Chai acsni lhavanalh ju ixꞌachꞌananti pus ju aliꞌ ju xatꞌin va laꞌixquilhtuꞌ ti tama.
Chai ju aliꞌ putayacalh chai ju aliꞌ tasacꞌulh ju tsꞌokꞌo.
6 Chai ju aliꞌ ju xatꞌin tamacha laꞌixꞌucxni chiux junta va lacatsꞌunin ixꞌalin ju tꞌun.
Pus acsni pꞌunlh pus lana xixlh ni jantu ixkꞌajuta ju tꞌun ju anch.
7 Chai ju aliꞌ ju xatꞌin tamacha junta vachuꞌ ixma ju xatꞌin alhtucunuꞌ.
Pus pꞌulhnan takꞌaya ju alhtucunuꞌ chai akxtakma ju anuꞌ achꞌananti.
8 Chai ju aliꞌ ju xatꞌin tamacha lacakꞌoxi tꞌun.
Pꞌunlh.
Chai acsni takꞌaya pus na kꞌoxich xtaklh ju xatocꞌat.
Chai tachi ju chꞌancalh pus talhava tam cientos.
Pus acsni nonkꞌo ju ani chivinti pus ju Jesús na pꞌas chivinilh.
Ajuni ju lapanacni:
―Tichi chavaich ju alin ixpakꞌasmatni cakꞌasmatlh.
Lucas 8.1-56
Ju Jesús jantu vas xaꞌajuni ju lapanacni ju tuꞌuꞌ
9 Pus ju acsnich ju ixꞌamamakaꞌui tasacmilh ju Jesús.
Tajuni:
―Tijuch ju nomputun ju chivinti ju xanaꞌun.
10 Chai ju Jesús alacjuni:
―Ju Dios lakꞌaꞌi ni amachꞌakxayaꞌitꞌit ju chivinti ju najun ni lhinomputun ju Dios laꞌisꞌatsucuntiꞌan ju lapanacni.
Para ju aliꞌin icꞌalhixakꞌalai lacatuꞌuꞌ chivinti ju ixtꞌalaktsꞌipaxcavaich ju tuꞌuꞌ.
Chunch iclai ni jantu catitamispa tuchi nomputun mas talaktsꞌin tuchi icnavi.
Chai jantu catitamachakxa mas takꞌasmatꞌa ju quinchivinti.
Ju Jesús mavasalai ju chivinti ixlacata ju achꞌananaꞌ
11 Pus ju chivinti ju xacnajun chani ju nomputun.
Ju xatꞌin yuchi ju ixchivinti Dios.
12 Chai ju tꞌin ju tamacha lacati yuꞌunch ju takꞌasmatꞌa ju ixchivinti Dios para lana min ju lhacaticuru chai amacꞌapꞌani ju chivinti ju ixꞌachꞌananicanta laꞌixꞌalhunutꞌan ni jantu catalacaꞌiyaꞌ chai jantu catatakꞌalhtaxtuyaꞌ.
13 Chai ju tꞌin ju tamacha laꞌixꞌucxni chiux yuꞌunch ju takꞌasmatꞌa ixchivinti Dios chai lana soko takꞌachani.
Para chunch tajunita tachi ju anuꞌ xapꞌun laꞌixꞌucxni chiux.
Jantu laꞌixlhichux ixꞌalhunutꞌan ju taꞌamaklhtayanan.
Va pantsꞌiquis ju talacaꞌi.
Para acsni tamakꞌalhkꞌajnan ixlacata ju chivinti pus lana tamacajun ixti Dios.
14 Chai ju tꞌin ju tamacha junta ixꞌalin ju xatꞌin alhtucunuꞌ pus yuꞌunch ju takꞌasmatꞌa ju ixchivinti Dios.
Para lacsni lacsni tacꞌapꞌa va ixlacaꞌatalh ni na lhu alin ju xataxtokni ju ani lacamunutpaꞌ ju talhamakꞌaninin.
Chai na takꞌachani ju ixmakꞌalitꞌan chai na kꞌox talhiulai ju ixkꞌachat ju ani lacamunutpaꞌ.
Pus jantu tavanan vasalh tasui ixtachaput ju Dios laꞌisꞌatsucuntiꞌan.
15 Para ju tꞌin ju tamacha lacakꞌoxi tꞌun yuꞌunch ju takꞌasmatꞌa ju ixchivinti Dios chai ixlhichux ixꞌalhunutꞌan talacaꞌikꞌalhi.
Chunch talai ni na kꞌox ju ixꞌalhunutꞌan tachi ju kꞌachani ju Dios.
Chai tachꞌixa va tuchi min laꞌisꞌatsucuntiꞌan chai slivasalh tasui ixtachaput ju Dios laꞌisꞌatsucuntiꞌan.
Ju chivinti ixlacata ju tuꞌuꞌ maclhcu
16 Acsni xamatiꞌ xavai ju ixmaclhcu jantu va puꞌakxtakꞌulai tuꞌuꞌ xalu.
Nin yuchi ni lai caꞌula laꞌixtankꞌapuꞌ putaman.
Alai anch ju mucꞌai junta aktsꞌiya mucꞌacan ju maclhcu.
Chai ju chunch tachi chun ju catatanuyach cataꞌalacꞌavananaꞌ.
17 Pus chunchach vachuꞌ ju quinchivinti.
Mas va miꞌakstuꞌan xaclamavasalaniyau ju chivinti para astan amacꞌatsꞌaniyaꞌitꞌit ju lapanacni.
Chai ju tuchi chivinti ju jantu amamachakxanican ju ixtalhavatꞌan lapanacni pus uxijnan ju amacꞌatsꞌaniyaꞌitꞌit chai catamachakxayaꞌ.
Chai ni chunch ju alayaꞌitꞌit pus tachi ju va calhcuyaꞌ ju maclhcu laꞌixꞌalhunutꞌan ni laich catamachakxayaꞌ ixchivinti Dios.
18 Para ni lai chunch ju alayaꞌitꞌit astan pus tasqꞌuini ni pꞌulhnan kꞌoxich akꞌasmatꞌaꞌitꞌit.
Pus va tichi chavaich ju kꞌasmatꞌa chai navi tachi ju najun laꞌixchivinti Dios pus palai lhu camamachakxanicanaꞌ.
Para va tichi chavaich ju cakꞌasmattsuculh para ni jantu canaviyaꞌ ju tuchi najun laꞌixchivinti Dios pus camacꞌapꞌanikꞌoyach tuchi na mispaich najun.
Talakmilh ju Jesús ixnati chai ixꞌapꞌisekꞌen
19 Pus astan talakmilh ju Jesús ju ixnati chai ixꞌapꞌisekꞌen.
Para jantu lai stalh ixtalakꞌan ni na lhu ixjunita ju lapanacni.
20 Chai pumatam chani juni ju Jesús:
―Ju minati chai ju miꞌapꞌisekꞌen tayanancha makspaꞌ.
Va talaktsꞌimputunan.
21 Para ju Jesús alacjuni:
―Ju vasalh quinati tajunita chai vasalh quiꞌapꞌisekꞌen tajunita yuꞌunch ju takꞌasmatꞌa ju ixchivinti Dios chai tamuctaxtui tachi ju najun ju anch.
Ju Jesús kꞌailh ju un chai ju xcan
22 Chai milh avilhchan acsni tatꞌataju ju Jesús ju ixꞌamamakaꞌui lacabarco.
Chai ju yuchi ajuni:
―Catapasauch ju lhimakꞌantacutni atantsꞌin.
Chai taꞌalh.
23 Para acsni ixtaꞌantacaꞌ ju lacxcan pus ju Jesús lana lhtatalh.
Chai kꞌostaya ju kꞌai un chai na pꞌas tanekꞌalh ju xcan chai ixquiꞌakpaxputun ju barco.
Chai na ixtamuxtuputunch.
24 Pus ju ixꞌamamakaꞌui talakꞌalh ju Jesús chai tamaklokꞌo.
Tajunich:
―Amamakaꞌunuꞌ na muxtuputunauch.
Pus ju Jesús kꞌostavi.
Kꞌailh ju un chai ju xcan.
Chai lana va sek tavi ju xcan chai na sekch avanalh.
25 Chai ju Jesús ajunich ju ixꞌamamakaꞌui:
―Tajuch ni jantu quilalhilacaꞌanau.
Para ju yuꞌunch na ixtatalhanan chai na ixtalhamakꞌaninin.
Chai talaclajunich ju sia yuꞌunch:
―Tis chavaich nuꞌ ju ani.
Mas yuchi ju un chai ju xcan ni akꞌaji si taquiclacaꞌi.
Pumatam ixpacxanta ju lhacaticuru
26 Ju Jesús chai ixꞌamamakaꞌui tatacutcha laꞌixtꞌunꞌan ju amachakꞌan Gadara.
Ju anch ixtꞌalalacaꞌanita ju xaꞌestado Galilea ju lhilakꞌantacutni lacaꞌatantsꞌin.
27 Chai acsni tayacha ju lacatꞌun ju Jesús pus lana quipakxtokchilh pumatam amachakaꞌ ju anuꞌ lakꞌachakꞌan.
Ju yuchi ixpacxanta ju lhacaticurulhni.
Chai na makꞌan jantu ixmalakchꞌininta.
Chai jantu ixvi laꞌixchakaꞌ.
Va campusantu ixꞌucxuntꞌajun.
28 Pus ju yuchi acsni laktsꞌilh ju Jesús tsꞌau tꞌasalh.
Chai lana taquilhputanilh ju laꞌixꞌucxlacapuꞌ.
Chai ju lhacaticurulhni na pꞌas tachivinilh laꞌixquilhni ju anuꞌ lapanac acsni chani tajuni ju Jesús:
―Tijuch ju quilamintau lhilaktsꞌinin ju uxintꞌi ji Jesús.
Ju uxintꞌi istsꞌalhꞌat Dios ju vilhcha lactꞌiyan.
Iclatapaininiyau ni jantu aquilamamakꞌalhkꞌajniu.
29 Pus chunch ju tanaulh ju lhacaticurulhni ni ixꞌalackꞌaimatach ju Jesús.
Ixꞌajunita ju yuꞌunch ni catataxtulh laꞌixlacatuna ju lapanac.
Pus acsni tucaꞌ ixꞌakꞌajita ju Jesús ju lhacaticurulhni pus na paklhu ixtachꞌapata ju anuꞌ lapanac.
Chai mas ixlacachꞌimacanta lacacadena chai ixchꞌantꞌalhmacanta para acsni ixtatanui ju lhacaticurulhni laꞌixlacatuna pus ixlackꞌexꞌulakꞌojui ju ixpulacachꞌimacan.
Chai ju lhacaticurulhni ixtakꞌailhiꞌan junta va aseknicꞌa junita.
30 Pus ju Jesús sacmilh ju anuꞌ lapanac.
Junich:
―Tꞌis uncꞌanch.
Chai ju yuchi juni:
―Legión icjuncan.
Pus lhinaulh chunch ni na lhu ixpacxanta ju lhacaticurulhni chai ju Legión ixtapakaꞌut junita lhu ju taropajni.
31 Pus ju lhacaticurulhni tatapaininilh ju Jesús ni jantu caꞌamacaꞌalh ju lacajipi.
32 Pus ju anuch akstijun ixtayanalh ixtalhavat pꞌaxnin ju ixtatꞌajun kꞌexvenin.
Chai ju lhacaticurulhni talhitapaininilh ju Jesús ni laich catatanu laꞌixlacatunaꞌan ju pꞌaxnin.
Chai ju yuchi yauch ajunilh.
33 Pus ju lhacaticurulhni tataxtulh laꞌixlacatuna ju anuꞌ lapanac chai lana tatanu laꞌixlacatunaꞌan ju pꞌaxnin.
Chai ixtalhavat pꞌaxnin pꞌas taꞌatsꞌalaꞌalh junta vak anta.
Chai tatajucha lacaꞌatantsꞌin.
Chai anch ju tanitajukꞌo.
34 Pus ju xaꞌalhistacnin pꞌaxnin acsni talaktsꞌilh tuchi tapasalh pus tatalhanalh chai taꞌatsꞌalaꞌalh.
Taꞌalh nonin ju anuꞌ lakꞌachakꞌan chai ju lacacuxtun tuchi ixtapasata.
35 Pus ju lapanacni lana taꞌatsꞌalamilh laktsꞌinin tuchi ixtapasata.
Chai talakmilh ju Jesús chai talhitajulh ju anuꞌ lapanac ju ixtaxtunitach ju lhacaticurulhni laꞌixlacatuna.
Pus ju yuchi vanin ixvi junta ixya ju Jesús chai ixmalakchꞌininta chai ixtakꞌoxita ju isꞌaktsulh.
Pus ju yuꞌunch acsni talaktsꞌilh na tatalhanalh.
36 Chai tachi chun ju lapanacni ju ixtalaktsꞌinta tuchi tapasalh tanonkꞌo ta yu palaich puva ju anuꞌ lapanac ju ixpacxanta ju lhacaticurulhni.
37 Pus ju acsnich tachi chun ju ixtalhavat lapanacni ju amachakꞌan xalacatꞌun ju ixtalakachoko ju lakꞌachakꞌan Gadara tatapaininilh ju Jesús ni cataxtulh laꞌixtꞌunꞌan.
Chunch ju tanavi ni na va ixtatalhananch.
Pus ju Jesús tajuchokopa lacabarco.
Chai minchokocha.
38 Para acsni tucaꞌ ixtaxtui ju Jesús pus ju anuꞌ lapanac ju ixꞌamaxtunicanta ju lhacaticurulhni tapaininilh ju Jesús ni caꞌixtꞌaꞌalh ju yuchi.
Para ju Jesús va malakacha laꞌixchakaꞌ.
Junich:
39 ―Apꞌinchꞌokꞌochich ju laminchakaꞌ chai aꞌunch ju lapanacni tuchi kꞌai lhamakꞌan ju xanaviniyan ju Dios.
Pus ju anuꞌ lapanac alh chai quilhuntsuculh ixlhilacaputsꞌun ju lakꞌachakꞌan tuchi kꞌai lhamakꞌan ju ixnavinita ju Jesús ju ixlacata.
Palaich anavicalh pumatam atsiꞌ chai pumatam chakoꞌulh
40 Pus acsni minchokolh ju Jesús junta ixtaxtutacha pus ju ixtalhavat lapanacni lhikꞌach taꞌamaklhtayanalh ni ixchuxꞌan ixtapacxantaji.
41 Chai lakmilh pumatam lapanac ju ixjuncan Jairo.
Pus ju yuchi pumatam xakꞌai ixjunita sia yuꞌunch ju ixtachꞌalhcatnan laꞌixpujitatꞌan ju istꞌaꞌisraelitanin.
Pus ju yuchi taquilhputanilh ju lacatꞌun vanin laꞌixchꞌajaꞌ ju Jesús.
Tapaininilh ni catꞌaꞌalh laꞌixchakaꞌ.
42 Pus ixꞌalin lakatami istsiꞌ ju ixpacxanta tachi lakacautꞌui cꞌata.
Chai ju yuchi ixtꞌajun niniꞌ.
Pus ju Jesús tꞌaꞌalh.
Para acsni ixꞌanta ju lacati pus va ixtalatankꞌasiꞌanta ju ixtalhavat lapanacni.
43 Chai vachuꞌ ixmakꞌanta pumatam chakoꞌulh ju na makꞌanch jantu ixlakxixta.
Pus lakacautꞌui cꞌata ju ixpacxanta ju ixtakꞌankꞌat chai ixꞌaxtaknikꞌojutach ju acꞌuchꞌunin chux ju ixꞌalinta para nin chun jantu xamatiꞌ lai palai xanavi.
44 Pus ju yuchi chincha laꞌixlhipulacan ju Jesús chai lakchaꞌanilh ixquilhtuꞌ ixpumpuꞌ.
Chai lana astacnanilh ju ixtakꞌankꞌat.
45 Pus ju acsnich ju Jesús naulh:
―Tis chavaich ju xaquilakchaꞌan.
Chai vaklhtam chun ixtanajun ju ixtalhavatꞌan ni jantu yuꞌunch.
Pus ju acsnich ju Pitaluꞌ chai ju ixꞌalactꞌaꞌanta tajunilh ju Jesús:
―Amamakaꞌunuꞌ tꞌas laich sacmitꞌi tis chavaich ju xalakchaꞌanan ni na tatankꞌasiyan chai tapalhitꞌanch ju lapanacni.
46 Para ju Jesús naulh:
―Aktsꞌiya quilakchaꞌalh xamatiꞌ ni iccꞌatsalh ni iccꞌuchꞌulh pumatam.
47 Pus ju anuꞌ chakoꞌulh acsni cꞌatsalh ni jantu lai va sek xanavi pus vanin lakꞌanchokolh ju Jesús.
Na ixꞌaxqꞌuipꞌipꞌitninta.
Chai taquilhputanilh ju lacatꞌun laꞌixꞌucxlacapuꞌ chai junilh ju stavasalanti laꞌixꞌucxlacapuꞌan ju lapanacni tuchi ixlacaꞌatalh ju lhilakchaꞌalh chai ni vatsꞌalhti palaich va.
48 Pus ju Jesús junich:
―Quintsiꞌ ni qꞌuilhilacꞌapꞌinch pus yuchi palaich xalhiꞌun.
Aꞌinchich.
Cakꞌachanach ju miꞌalhunut.
49 Chai acsni ixtꞌajuncaꞌ tꞌachiviniꞌ ju chakoꞌulh ju Jesús ju lacati pus minchalh pumatam lapanac ju ixtaxtutacha laꞌixchakaꞌ ju anuꞌ xakꞌai chai junicalh ju Jairo:
―Ju mintsiꞌ nitach.
Jantu palai jeks amavatꞌi ju amamakaꞌunuꞌ.
50 Para acsni kꞌasmatlh ju Jesús pus junilh ju lapanac:
―Jantu atꞌalhan.
Va aqꞌuilhilacꞌapꞌich.
Chai palaich cajunaꞌ ju mintsiꞌ.
51 Chai acsni tanucha lacachakaꞌ ju Jesús pus jantu lacasqꞌuinilh ni xamatiꞌ catꞌatanu ju pulactam junta ixma ju lijunto askꞌatꞌa.
Va yuchi ju Pitaluꞌ ju tꞌatanu chai ju Jacobo chai ju Xivan chai ju ixpaich chai ixnatich ju anuꞌ atsiꞌ.
52 Pus chux ju lapanacni na ixtalackꞌalhun chai na pꞌas ixtalactꞌasai.
Para ju Jesús alacjunich:
―Jantu akꞌalhuntꞌit.
Jantu nita ju atsiꞌ.
Va lhtataich.
53 Para ju yuꞌunch va talhitsꞌiꞌilh ju Jesús ni ixtacꞌatsaich ni vasalh ixnita ju atsiꞌ.
54 Para ju Jesús chꞌapanilh ixmacaꞌ ju atsiꞌ chai pꞌas xakꞌalalh.
Junich:
―Akꞌostꞌaꞌulhch ji atsiꞌ.