Palaich navicalh ixlapanac pumatam xakꞌai
7
Chai acsni ajunkꞌo ju ixchivinti ju lapanacni pus ju Jesús tanulh ju lakꞌachakꞌan Capernaum.
Lucas 7.1-50
2 Chai ju anch ixvi pumatam capitán ju romano ixjunita.
Chai ju yuchi ixꞌalin pumatam ixlapanac ju na ixmapaini.
Para na ixtakꞌankꞌai chai na ixniputun.
3 Pus ju anuꞌ capitán acsni kꞌasmatli ixlacata ju Jesús pus amalakachalh ju xapapanin israelitanin ni cataꞌalh tapaininin ju Jesús ni camilh cꞌuchꞌunuꞌ ju ixlapanac.
4 Pus ju yuꞌunch talakꞌalh ju Jesús chai slivasalh tatapaininilh.
Tajunich:
―Ju yuchi na kꞌox lapanac junita.
Lhijunch ni anaviniyaꞌ ju ani lamapainin.
5 Ju yuchi na tuꞌuꞌ quintalhiulayan ju quijnanꞌan ju israelitanin juntau.
Chai vachuꞌ isꞌakstu lhinaulh ixyajuca quimpujitat quincꞌan.
6 Pus ju Jesús alactꞌaꞌalh ju yuꞌunch.
Para acsni vanin ixꞌalactꞌachaꞌamputun laꞌixchakaꞌ ju anuꞌ capitán pus ju yuchi amalakachalh ju ixꞌamigojni.
Chai acsni talakchilh ju Jesús chani tajuni:
―Ji ucxtin ma va jantu jeks mavaputunan ju yuchi ju quintamalakachatachin.
Pus ju yuchi ma jantu tuꞌuꞌ ixtapalhni ni ma laich atꞌitꞌanuchiꞌ laꞌixchakaꞌ.
7 Pus ma yuchi jantu xalhimimputunan tꞌasaninin isꞌakstu ni ma va jantu tuꞌuꞌ lhiulachokocan isꞌakstu.
Para ma mas va anauch ju chivinti chai palai cajunaꞌ ju ixlapanac.
8 Pus ju yuchi ma cꞌatsai ni lai chunch catapasayaꞌ ni vachuꞌ alin ju talhijuni.
Chai ma vachuꞌ na lhu alin ju ixtaropajni ju alhijuni ju yuchi.
Chai acsni ma junich ju pumatam:
Aꞌinchich.
Pus ma an.
Chai ni ma juni apumatam:
Atꞌatꞌi.
Pus ma minch.
Chai acsni ma juni ju ixlapanac:
Anavitꞌich ju ani.
Pus ma navich.
Pus ju anuꞌ capitán ixꞌalhijunita ju ixꞌamigojni ni chunch ju catanaulh ni iscꞌatsai ni taquiclacaꞌini ju Jesús tachi chun ju taxtokni ni yuchi ju xakꞌai tucan junita.
9 Chai ju Jesús acsni akꞌasmatnilh ju ixchivintiꞌan na lhamakꞌaninilh.
Chai alaktsꞌilh ju lapanacni ju ixtachꞌakꞌokꞌata chai ajuni:
―Slivasalh ju iclajunau.
Jantu iclhitajuta nin pumatam quintꞌaꞌisraelita ju aquilhilaktsꞌilh tachi ju lai ju ani lapanac.
10 Pus ju yuꞌunch ju ixꞌamalakachacanta taꞌanchokolh laꞌixchakaꞌ ju capitán.
Chai acsni tachaꞌanchokolh talaktsꞌilh ju takꞌankꞌan ni tachapunch junchokota.
Ju Jesús malokꞌonichokolh pumatam tsꞌalh ju ixnita
11 Chai acsni tapasalh lakatam lakatꞌui avilhchan pus ju Jesús ixꞌamputun ju lakꞌachakꞌan Naín.
Ixtatꞌaꞌanta na lhu ixꞌamamakaꞌui chai na lhu aliꞌin lapanacni.
12 Chai acsni ixchaꞌamputun vanin junta putanucanacha ju lakꞌachakꞌan pus apakxtoklh lhu lapanacni.
Va ixlhiꞌancanta campusantu pumatam alasanin.
Yuchi ju lakatami istsꞌalh ixjunita ju ixnati chai ju yuchi ixnimacontilacanta.
Pus na lhu ixtatꞌaꞌanta ju chakoꞌulh ju ixtꞌaꞌamachakꞌanch.
13 Pus ju ucxtin Jesús acsni laktsꞌilh ju anuꞌ chakoꞌulh na mapaini chai junich:
―Jantu akꞌalhu.
14 Chai ju Jesús stalh lakꞌalh ju ixpꞌaklat ju tsꞌalh chai ucxchꞌapalh.
Pus tamastꞌacꞌa ju ixꞌakxkꞌokꞌanin.
Chai ju Jesús junilh ju alasanin:
―Tsꞌalh uxintꞌi ju icjunan.
Akꞌostꞌaꞌulh.
15 Chai lana kꞌostavilh ju anuꞌ ixnita.
Chai tsuculh chiviniꞌ.
Pus ju Jesús xtaknichokolh ju ixnati.
16 Pus slivasalh na tatalhanalh ixchuxꞌan ju lapanacni.
Chai talakꞌayalh ju Dios.
Chai ixtanajun:
―Talacasulh laquilhiquijnanꞌan pumatam kꞌai lapanac ju najun ixchivinti Dios.
Vachuꞌ ixtanajun ni Dios xalakmin ju ixlapanacni.
17 Pus laccꞌatsakꞌocalh ixlhilacaputsꞌun ju xaꞌestado Judea chai ixlhilacaputsꞌun ju xalacatꞌun ju ixtꞌalachꞌapata.
Ju Xivan amalakachalh ju ixꞌamamakaꞌui
18 Chai junta ixtꞌalhnucanta ju Xivan pus ixtamamakaꞌun talhichaꞌanilh chivinti ixlacata tachi chun ju ani taxtokni ju ixnavi ju Jesús.
Pus ju Xivan atꞌasanilh pumatꞌui ixtamamakaꞌunti.
19 Chai amalakachanilh ju Jesús.
Chai ajuni:
―Chanich aꞌunaꞌitꞌit:
Ja ma uxintꞌi ju noncan ni caminaꞌ.
U ma acpacxanchokoyau apumatam.
20 Pus ju anuꞌ lapanacni talakmilh ju Jesús chai tajunilh tachi ju ixꞌajuncan.
Tajunilh ju Jesús:
―Quintamalakachachin ju Xivan ju amakpaxanaꞌ ni ma aclamiu sacminin ju uxintꞌi.
Ja ma uxintꞌi ju caminach noncan u ma acpacxanchokoyau apumatam.
21 Pus ju anuch pantsꞌiquis na lhu ju palai anavi ju Jesús ju ixtalactakꞌankꞌai chai ju na ixtamakꞌalhkꞌajnan.
Chai axcoxtulh ju lhacaticurulhni ju ixtatanun laꞌixlacatunaꞌan ju aliꞌin lapanacni.
Chai alacmalacꞌavani na lhu ju alakꞌachꞌixnin ixtajunita.
22 Tus acsnicaꞌ ju akꞌalhtayanalh ju Jesús.
Ajunilh ju ixtamalakachan ju Xivan:
―Aꞌinchꞌokꞌochitꞌitch juninin ju Xivan tuchꞌi ju xalaktsꞌinatꞌit chai ju tuchꞌi xakꞌasmatꞌatꞌit.
Aꞌunaꞌitꞌit ni taꞌalacꞌavanan ju alakꞌachꞌixnin ixtajunita.
Chai ju va ixtakꞌalhinita ixchꞌajaꞌan sok taꞌalhtanan.
Chai ju va ixtapacxanta ju tsꞌitsꞌi ju na puchꞌiꞌan talaclacamacaxlich.
Chai ju kꞌatapa ixtajunita laich takꞌasmatꞌa.
Chai ju tanita amalokꞌonichokocalh.
Chai ju quilhpatinin ajunicalh ta yu laich cataputakꞌalhtaxtulh.
23 Vachuꞌ aꞌunitꞌit ni lhikꞌach tꞌajun ju tam lapanac ju jantu astan najun ni jantu quinchꞌakꞌokꞌaputun.
―Chunch ju ajunicalh ju ixꞌamamakaꞌui ju Xivan.
24 Chai acsni taꞌanchokolh ju ixꞌalhtanin ju Xivan pus ju Jesús lana tsuculh alacsacminiꞌ ju lapanacni ixlacata ju Xivan.
Ajunich:
―Tis chavaich ju ixlaktsꞌimpꞌutꞌunatꞌit junta qꞌuilatꞌit lacamacni.
Cꞌatsꞌayatꞌit ni jantiyuꞌ qꞌuilatꞌit ju anch ni va alaktsꞌimpꞌutꞌutꞌit tam lapanac ju va tam tam najun tachi ju lai ju tuꞌuꞌ xaxkꞌoi actiyac acsni lacatam lacatam sun lhiꞌan ju un.
25 Pus tis chavaich ju ixlaktsꞌimpꞌutꞌunatꞌit junta qꞌuilatꞌit.
Cꞌatsꞌayatꞌit ni jantiyuꞌ ju lhiqꞌuilatꞌit ju anch ni va alaktsꞌimpꞌutꞌutꞌit tam lapanac ju na va kꞌox camalakchꞌinilh.
Pus ju na kꞌox tamalakchꞌininta chai ju jantu tuꞌuꞌ cꞌacxni tatanumanalh laꞌixchakaꞌan ju xalackꞌajin ucxtinin.
26 Pus tis chavaich ju ixlaktsꞌimpꞌutꞌunatꞌit junta qꞌuilatꞌit.
Cꞌatsꞌayatꞌit ni va ixlaktsꞌimpꞌutꞌunatꞌit ju lapanac ju najun ixchivinti Dios.
Chai iclajunau ni vasalh chunch junita ju Xivan.
Para palai kꞌai lhichꞌalhcat ju xtaknicanta ju yuchi.
Palai jantu va tichi lapanac ju najun ixchivinti Dios.
27 Ju Xivan yuchi ju pastaccan acsni chani xatsꞌokꞌulacan laꞌixchivinti Dios junta chani najun:
Acmalakachayaꞌ ju quilapanac ju pꞌulhnan caꞌanaꞌ.
Astan ju uxintꞌi.
Yuchach ju caꞌalakꞌoxiniyaꞌ ixꞌalhunutꞌan ju lapanacni ni cataꞌamaklhtayananan acsni achꞌipꞌinaꞌ.
28 Para iclajunau ni tus chavai jantu alinta tam xamatiꞌ ju palai xakꞌai cava.
Va yuchi ju Xivan ju amakpaxanaꞌ.
Para va tichi chavaich ju jantu tuꞌuꞌ lhiulacan laꞌixmacniꞌan ixtꞌalapanacni yuchach ju palai kꞌai cajunaꞌ ju lactꞌiyan junta lhinajun ju Dios.
Palai jantu na chun junita ju Xivan ju chavai.
29 Pus tachi chun ju lapanacni chai ju achꞌinin acsni takꞌasmatnilh ixchivinti ju Xivan taꞌakpaxlh.
Pus chunch ju taputalacasulh ni sok ixtalhiulai tachi ju ixnavi ju Dios acsni ixnajun ni catamacaulh ixꞌalactuꞌuntiꞌan chai cataꞌakpaxlh.
30 Para ju fariseonin chai ju na ixtalhatalaninin ju ixlhamapꞌaksinꞌan ju istꞌaꞌisraelitanin jantu ixtalacasqꞌuin ni caꞌamakpaxalh ju Xivan.
Pus ju chunch tasamakꞌalh tuchi ispastacta ju Dios ixlacata ju yuꞌunch.
31 Pus ju Jesús ajuni ju lapanacni:
―Tis chavaich nuꞌ ju va ixtꞌachunch lai aclanaviniyau ju uxijnan ju tꞌonatꞌit ju chavai.
Tijuch nuꞌ ju va mintꞌachunch cava.
32 Pus ca laich acnaulh ni ixtꞌachunch untꞌatꞌit tachi ju askꞌatꞌan ju takꞌamanan laclhitamau.
Pus ju quilhmactam chani talajuni ju aquilhmactam:
“Ju quijnan xacskꞌolau para jantu xaꞌatꞌininatꞌit ju uxijnan.
Chai icmilhpauch ju amakꞌaniti para sin chunch jantu xakꞌachꞌaniyatꞌit ni jantu xalackꞌalhunatꞌit”.
Chunch talaclajuni ju askꞌatꞌan.
Chai vana va chun ju layatꞌit ju uxijnan ju tꞌonatꞌit ju chavai.
33 Pus acsni tavanan milh ju Xivan ju amakpaxanaꞌ pus ju yuchi jantu ixvajin tachi ju venatꞌit chai jantu ixkꞌotꞌa ju vino.
Chai ju uxijnan ixnonatꞌit ni va ixpacxanta ju lhacaticuru.
34 Chai icminta ju quitꞌin ju quimalakachatachilh ju Dios ni lapanac actsucuyaꞌ ju ani.
Chai ju quitꞌin icvajin tachi ju venatꞌit chai ickꞌotꞌa ju vino chai ju uxijnan nonatꞌit ni va chavani lapanac chai va akꞌotnu lapanac icjunita.
Nonatꞌit ni va ixꞌamigo ju achꞌinin chai ju alactuꞌunin icjunita.
35 Para ju vasalh taꞌacꞌatsananta tanajun ni aktsꞌiya kꞌox tuchi navi ju Dios.
Ju Jesús ixvi laꞌixchakaꞌ pumatam fariseo
36 Pus pumatam fariseo tapaininilh ju Jesús ni catꞌavailh.
Chai ju Jesús tꞌatanulh laꞌixchakaꞌ chai tꞌatapakstitama ni chunch ju ixtalhilanitach acsni ixtavajin.
37 Chai ixꞌalin ju anuꞌ lakꞌachakꞌan pumatam chakoꞌulh ju na ixꞌalactuꞌunun.
Pus ju yuchi acsni cꞌatsa ni anchach ixtapakstitamai ju Jesús laꞌixchakaꞌ ju anuꞌ fariseo pus vachuꞌ tanucha lacachakaꞌ.
Chai lhimilh lakatam lumeti ju ixlhinavicanta chiux ju ixputajun ju cꞌuchꞌu ju na cꞌus acamin.
38 Chai taya laꞌixpulacan ju Jesús junta ixchꞌanꞌanta.
Chai tsuculh kꞌalhunuꞌ.
Chai ju ixlakpukꞌalhut ixtocꞌaniyacha laꞌixchꞌajaꞌ ju Jesús.
Chai ixpuchꞌanxacai ju ixꞌai.
Chai ixchꞌanchꞌuchꞌui chai ixchꞌanmucꞌai ju ixcꞌuchꞌu ju na cꞌus acamin.
39 Para acsni laktsꞌilh ju anuꞌ fariseo ju ixkꞌailhiminta ju Jesús laꞌixchakaꞌ pus chani ju pastaclh laꞌixꞌalhunut:
“Ju ani ni vasalh cava ju lapanac ju najun ixchivinti Dios pus caꞌismispa tichi chavaich chai ta junita ju isꞌatsucunti ju anuꞌ chakoꞌulh ju tꞌajun lacachꞌapanaꞌ.
Caꞌiscꞌatsa ni va alactuꞌunuꞌ junita”.
40 Pus ju acsnich ju Jesús chani junilh ju anuꞌ fariseo:
―Simón va icjumputunan lakatam chivinti.
Chai ju anuꞌ fariseo junich:
―Aqꞌuinꞌunch ji amamakaꞌunuꞌ.
41 Chai ju Jesús juni:
―Pumatam lapanac ju ixmachꞌixtꞌakꞌa tumin ixꞌamachꞌixtaknita pumatꞌui lapanacni.
Ju pumatam ixlhiꞌani lakaquis cientos.
Chai ju pumatam ixlhiꞌani cincuenta pexu.
42 Para ni jantu tuꞌuꞌ ixtamakꞌata ju lai catalhimapalhnichokolh pus ju ixꞌamachꞌixtaknita ju tumin va amacꞌacxanilh ju ixtꞌiyunꞌan.
Pus aqꞌuinꞌunch.
Tis chavaich ju palai camapainiyaꞌ ju ixtꞌiyunꞌan ju anuꞌ xamachꞌixtakni ixtumin.
43 Chai ju Simón juni:
―Pus ca yuchi ju palai laklhu ixlhiꞌani.
Chai ju Jesús juni:
―Stavasalanti ju xakꞌalhtꞌayanan.
44 Ju acsnich ju Jesús laktsꞌilh ju chakoꞌulh chai junich ju Simón:
―Alaktsꞌich ju ani chakoꞌulh.
Uxintꞌi ju xaqꞌuinkꞌailhitꞌantꞌa ju ani laminchakaꞌ para jantu xaqꞌuixtꞌakni ju xcan ju xaclhichꞌanchakꞌalh.
Para ju ani chakoꞌulh quinchꞌanchakꞌalh laꞌixlakpukꞌalhut chai quinchꞌanxacalh ju laꞌixꞌai.
45 Chai ju uxintꞌi jantu xaqꞌuimacchꞌuchꞌui.
Para ju yuchi tus acsni xactanuyacha laminchakaꞌ va tachi quinchꞌanchꞌuchꞌuich.
46 Ju uxintꞌi jantu xaqꞌuilacpamucꞌai ju aceite.
Para ju yuchi quinchꞌanmucꞌalh ju cꞌuchꞌu ju na cꞌus acamin.
47 Pus yuchi iclhijunan ni slivasalh na quimapaini ju yuchi ni icmacꞌacxanilh ju ixꞌalactuꞌunti mas na lhu ixjunita.
Para na lacatsꞌunin amapaininin ju va lacatsꞌunin macꞌacxanicanta.
48 Pus ju acsnich ju Jesús chani junilh ju chakoꞌulh:
―Icmacꞌacxanin ju miꞌalactuꞌunti ju ixnavitꞌa.
49 Pus ju acsnich ju va kꞌaixtam ixꞌalactꞌavajin ju Jesús tanaulh laꞌixꞌalhunutꞌan:
―Tis chavaich nuꞌ ju ani ni vachuꞌ lai macꞌacxai ju alactuꞌunti.
50 Para ju Jesús junilh ju chakoꞌulh:
―Ni xaqꞌuilhilaksi pus chavai tꞌakꞌalhtꞌaxtꞌutꞌach.
Inchich chai lhikꞌach atsꞌucꞌu.