2 Para ju aliꞌin fariseonin chani tajuni:

―Tajuch ni va naviyatꞌit ju chunch ni jantu lai chꞌalhcatnancan ju chavai ni avilhchan paꞌastacni.

3 Chai ju Jesús akꞌalhtayanalh.

Ajunich:

―Ja lana jantu pꞌastꞌacꞌatꞌit tuchi navilh ju David acsni chavanilh ju yuchi chai ju ixtatꞌaꞌanta.

4 Ja jantu pꞌastꞌacꞌatꞌit ni lai tanu junta ixlakꞌayacan ju Dios chai chꞌapalh ju xkapavati ju ismokslanicanta ju Dios.

Chai ulh chai axtaknilh vachuꞌ ju ixtatꞌaꞌanta.

Chai ju anuꞌ xkapavati jantu lai va kꞌaya ixꞌucan.

Va yuꞌunch ju palijni ju lai ixtaꞌui.

5 Chai vachuꞌ chani ajuni:

―Ju Dios quimalakachatachilh ni lapanac actsucuyaꞌ ju ani.

Chai quitꞌin ju lai icnajun tuchi lai navican ju avilhchan paꞌastacni.

6 Chai alakatam avilhchan paꞌastacni ju Jesús tanulh laꞌixpujitatꞌan ju istꞌaꞌisraelitanin chai tsuculh amalaniniꞌ.

Chai ju anch ixtanumacha pumatam lapanac ju va ixixnita ju ixmacaꞌ laꞌixlhicana.

7 Chai ju fariseonin chai ju yuꞌunch ju na ixtalhatalanininta ju ixlhamapꞌaksinꞌan ju istꞌaꞌisraelitanin va ixtalhistactꞌajun ju Jesús.

Va ixtalaktsꞌimputun ni lai caꞌacꞌuchꞌunulh ju avilhchan paꞌastacni.

Va ixtapuxconi ta yu laich catapumucꞌanilh ixtalakꞌalhin.

8 Para ju Jesús iscꞌatsai tuchi ixtapastꞌacꞌa.

Chai junich ju anuꞌ lapanac ju ixixnita ju ixmacaꞌ:

―Akꞌostꞌaꞌulh.

Atꞌaich ju ani junta laich catalaktsꞌinan ju lapanacni.

Pus ju yuchi kꞌostaya chai tayalh ju anch.

9 Pus ju acsnich ju Jesús ajunich ju lapanacni:

―Tꞌas nonatꞌit.

Ja lhijun ju lhamapꞌaksin ni canavicalh ju kꞌox ju avilhchan paꞌastacni u canavicalh ju talakꞌalhin ni jantu caꞌaktaiju tam xamatiꞌ.

Ja lhijun ni acmakꞌalhtaxtulh ju atsucunti ju avilhchan paꞌastacni u aclaktsꞌimakni.

10 Pus ju acsnich ju Jesús alaktsꞌinkꞌo ju ixtayanalh ixlhitalakachoko chai chani ju juni ju anuꞌ lapanac:

―Alhitꞌach ju mimacaꞌ.

Chai chunch ju navilh ju lapanac chai lana tachapun va ju ixmacaꞌ.

11 Para ju fariseonin chai ju aliꞌin na kꞌox talakachapulh laꞌixtalhkꞌamtiꞌan.

Chai ixtalaclajunich ju sia lhiyuꞌunch ta yu catatꞌalayaꞌ ju Jesús.

12 Pus ju acsnich ju Jesús alh junta ixvilhcha lakatam akstijun.

Alh tꞌachiviniꞌ ju Dios.

Chai tontatsꞌis ju tꞌachivinilh ju Dios.

13 Chai acsni tuncunchokolh atꞌasanilh ju ixꞌamamakaꞌui chai asacxtulh ixpumacautꞌuiꞌan.

Chai alaclhilhcaꞌula ixtamalakachan.

14 Pus sacxtulh ju Simón ju lhimapakaꞌulh vachuꞌ Pitaluꞌ chai ju Tilix ixlakꞌau.

Chai ju Jacobo.

Chai ju Xivan.

Chai ju Pilipe.

Chai ju Bartolomé.

15 Chai ju Mateo.

Chai ju Tumax.

Chai apumatam Jacobo ju istsꞌalh Alfeo ixjunita.

Chai apumatam Simón ju makyuꞌunch ixjunita ju cananistanin.

16 Chai ju Judas ixlakꞌau ju Jacobo.

Chai ju Judas Iscariote ju astan amakꞌaxtaknalh.

17 Chai ju Jesús alactꞌamilh ixpumacautꞌuiꞌan chai alactꞌataya junta na acpujun.

Chai vachuꞌ ixtayanalh anch na lhu aliꞌin ixꞌamamakaꞌui chai na lhu amachakꞌan ju xaꞌestado Judea chai ju amachakꞌan lakꞌachakꞌan Jerusalén chai ju lakꞌachakꞌanixni Tiro chai Sidón ju ixvilhcha laꞌixquilhtuꞌ alama.

Ju yuꞌunch va ixtaminta kꞌasmatnin ixchivinti ju Jesús.

Vachuꞌ palai ixtajumputun ju ixtalactakꞌankꞌai.

18 Chai ju na ixtamakꞌalhkꞌajnan ni ixtapacxanta ju lhacaticuru vachuꞌ palai anavi ju Jesús.

19 Pus na lhu lana ixjunita ju takꞌankꞌanin chai tachi chun ju yuꞌunch ixtalacachꞌapaputun ju Jesús ni ixꞌalin ju ixtachaput chai palai ixtapujun ju chunch.

20 Pus ju acsnich ju Jesús laktsꞌilh ju ixꞌamamakaꞌui chai ajuni:

―Va paxcat untꞌatꞌit ju uxijnan acsni cꞌatsꞌayatꞌit ni na maktꞌasqꞌuiniyatꞌit ju Dios.

Pus apꞌinaꞌitꞌit ju lactꞌiyan junta lhinajun ju Dios.

21 Va paxcat untꞌatꞌit ju uxijnan ju na lacꞌasqꞌuinatꞌit ju soknicꞌa atsucunti.

Pus chunch cajunaꞌ ju miꞌatsucuntiꞌan.

Va paxcat untꞌatꞌit ju uxijnan ju na taꞌamakꞌaninin.

Pus ju Dios catamakꞌankꞌachayan.

22 Va paxcat untꞌatꞌit ju uxijnan acsni cataxcayan ju lapanacni chai acsni jantu catatꞌaꞌalhtanamputunan chai acsni catajunan macxcai chivinti chai acsni catanonaꞌ ni jantu lackꞌoxin lapanacni untꞌatꞌit va ixlacaꞌatalh ni quilalhilaksiyau ju quitꞌin ju quimalakachatachilh ju Dios ni lapanac actsucuyaꞌ ju ani.

23 Pus alhikꞌachꞌantꞌit acsni chunch cataꞌulhtuyan.

Slivasalh na kꞌox alhiulatꞌit.

Pus chunch alatꞌit ni slivasalh na kꞌox ju axtꞌaknicꞌanaꞌitꞌit ju lactꞌiyan.

Pus ju makꞌaniya ixlacpaꞌitniꞌan ju lapanacni ju chunch taꞌulhtuyan vana va chun ixtaꞌulhtui ju makꞌaniya ixlapanacni Dios.

24 Para painiꞌitnich ju uxijnan ju nonatꞌit ni jantu maktꞌasqꞌuiniyatꞌit ju Dios.

Pus va ani lacamunutpaꞌ ju caꞌalinaꞌ ju minkꞌachatꞌan.

Ju astan jantu.

25 Painiꞌitnich ju uxijnan ju nonatꞌit ni na kꞌox ju chavai ju miꞌatsucuntiꞌan.

Pus ju astan acꞌatsꞌayaꞌitꞌit ni makꞌancꞌacxnitan ju ixtakꞌoxinti ju miꞌatsucuntiꞌan.

Painiꞌitnich ju uxijnan ju na kꞌachꞌanatꞌit ju chavai.

Ju astan na akꞌalhunaꞌitꞌit chai amakꞌanininaꞌitꞌit.

26 Painiꞌitnich ju uxijnan acsni chux ju lapanacni catanonaꞌ ni na lackꞌoxin lapanacni untꞌatꞌit.

Pus ju makꞌaniya ixlacpaꞌitniꞌan ju lapanacni ju chunch tajunan vana va chun ixtajuni ju makꞌaniya lapanacni ju ixtalhitalacasui tachi ju ixlapanacni Dios mas jantu.

Pus ni vana va chun tajunan ju uxijnan pus tasui ni jantu slivasalh ixlapanacni Dios untꞌatꞌit vachuꞌ.

27 Para ju uxijnan ju quilakꞌasmatniyau iclajunau ni amapꞌainitꞌit ju mintꞌalaxcaiꞌan.

Chai anavinitꞌit kꞌox ju na taxcayan.

28 Asqꞌuintꞌit ju kꞌox isꞌatsucuntiꞌan ju macxcai tajunan.

Chai atꞌapꞌaininitꞌit ju Dios ixlacataꞌan ju talhimacchapuyan.

29 Acsni xamatiꞌ cataꞌulaniyan ju lamilakxtanꞌan axtꞌaknichꞌokꞌotꞌit ju mintalakxtantamꞌan.

Chai ni xamatiꞌ catachivimakꞌanan chai catataiꞌiniyan ju mincutunꞌan pus vachuꞌ jantu alhikꞌaꞌitꞌit ju mimpumpuꞌan.

30 Ni xamatiꞌ catasqꞌuiniyan ju tuꞌuꞌ pus jantiyuꞌ ju jantu axtꞌaknipꞌutꞌutꞌit ni va makꞌapꞌutꞌunatꞌit miꞌakstuꞌan.

Chai ju catalhiꞌaniyan ju tuꞌuꞌ ju miꞌanuꞌan junita pus jantu va tachi asqꞌuinichꞌokꞌotꞌit.

31 Pus ni lacꞌasqꞌuinatꞌit ni kꞌox cataꞌulhtuyan ju mintꞌalapanacni pus vachuꞌ kꞌox aꞌulhtꞌutꞌit ju yuꞌunch.

32 Pus ni va yuꞌunch ju amapꞌainiyaꞌitꞌit ju tamapainiyan pus ja navitꞌatꞌit tuꞌuꞌ ju kꞌox.

Pus mas yuꞌunch ju na taꞌalactuꞌunun vachuꞌ tamapaini ixꞌamigojniꞌan.

33 Chai ni va yuꞌunch ju anavinitꞌit kꞌox ju tanaviniyan kꞌox pus ja navitꞌatꞌit tuꞌuꞌ kꞌox.

Pus mas yuꞌunch ju alactuꞌunin vana va chun tanavi.

34 Chai ni va yuchi ju alhimachꞌixtꞌaktꞌit ju mintuminꞌan ni va apꞌulhaꞌatꞌit pus ja kꞌox calhiulayaꞌ ju Dios ju chunch.

Pus mas yuꞌunch ju alactuꞌunin tamachꞌixtakni ju ixtuminꞌan ju ixtꞌaꞌalactuꞌunin ni va tapulhajaputun.

35 Alai amapꞌainitꞌit ju mintꞌalaxcaiꞌan.

Anavinitꞌit ju kꞌox chai amachꞌixtꞌaknitꞌit ju mintuminꞌan chai jantu alhamakꞌaninintꞌit u ni axtꞌaknichꞌokꞌocꞌanaꞌitꞌit u jantu.

Chai ni chunch ju anaviyaꞌitꞌit pus na lhu cajunaꞌ ju mintalhajaꞌan chai catasuyaꞌ ni vasalh isꞌaskꞌatꞌan Dios untꞌatꞌit.

Pus ju yuchi anavini ju kꞌox ju jantu tavanan tajuni lakꞌailaktsꞌiuch chai ju na kꞌai tajunita.

36 Pus anavitꞌit ju lamapainin tachi ju mimpaiꞌan Dios ni vachuꞌ navi ju lamapainin.

37 Jantu anaꞌuntꞌit ni talakꞌalhin ju xanavi ju akꞌantam.

Ni chunch ju alatꞌit pus ju Dios canonaꞌ ni vachuꞌ navitꞌatꞌit talakꞌalhin ju uxijnan.

Jantu aꞌulanitꞌit ixtalakꞌalhin ju akꞌantam chai ju chunch jantu vachuꞌ aꞌulanicꞌanaꞌitꞌit ju mintalakꞌalhinꞌan.

Amacꞌacxanitꞌit ju akꞌantam chai vachuꞌ ju Dios catamacꞌacxaniyan ju uxijnan.

38 Axtꞌaknitꞌit ju tamaktasqꞌuini ju tuꞌuꞌ chai ju Dios vachuꞌ cataxtakniyan ju uxijnan.

Chai lacakꞌox alhcanti ju axtꞌaknicꞌanaꞌitꞌit chai kꞌox casajucanaꞌ chai cacꞌalhajucanaꞌ chai caꞌalhpaxach.

Pus tuchꞌi anaviyaꞌitꞌit ju akꞌantam pus vana va chun ju anavicꞌanaꞌitꞌit.

39 Chai ju Jesús ajuni alakatam chivinti ju ixtꞌalaktsꞌipaxcavaich ju tuꞌuꞌ.

Chani ju ajuni:

―Ju tam alakꞌachꞌix jantu lai catipꞌulhni ju ixtꞌaꞌalakꞌachꞌix.

Ni chunch canavi pus va kꞌaixtam catintꞌaꞌalh junta puculhucnicꞌa.

40 Ju tam amamakaꞌunti jantiyuꞌ ju palai kꞌai.

Yuchi ju palai kꞌai ju tam amamakaꞌunuꞌ.

Para va tichi chavaich ju na kꞌox masunicanta pus va ixtꞌachunchach cajunaꞌ tachi ju ixꞌamamakaꞌunuꞌ.

41 Tajuch ni na naviyatꞌit cuenta ju tuꞌuꞌ lacatꞌicstꞌi talakꞌalhin ju navi pumatam milhilakꞌau para lana jantu naviyatꞌit cuenta ju kꞌai talakꞌalhin ju naviyatꞌit miꞌakstuꞌan.

Ni chunch ju layatꞌit pus ixtꞌachunch untꞌatꞌit tachi tam lapanac ju cajunilh akꞌantam ni tanun ju lacatꞌicstꞌi amacxtalh laꞌixlakchulh mas tanun ju palai kꞌai amacxtalh laꞌixlakchulh isꞌakstu.

42 Chai tas laich aꞌunitꞌit ju tam milhilakꞌau:

“Alakꞌaꞌitꞌich ni acꞌaktaijuyan ni amaconaꞌ ju talakꞌalhin ju navi”.

Tas laich chunch aꞌunitꞌit ni jantu naviyatꞌit cuenta ju kꞌai talakꞌalhin ju naviyatꞌit ju uxijnan.

Pus acsni chunch ju layatꞌit pus ixtꞌachunch untꞌatꞌit tachi tam lapanac ju cajunilh akꞌantam:

“Acmaxtuniyanch ju lacatꞌicstꞌi amacxtalh ju tanun lamilakchulh”.

Laich chunch juni mas palai kꞌai amacxtalh ju tanun laꞌixlakchulh isꞌakstu.

Para ju uxijnan acsni chunch ju layatꞌit pus va acxpꞌutꞌiyununatꞌit.

Pus pꞌulhnan amacꞌaꞌuntꞌit ju kꞌai talakꞌalhin ju naviyatꞌit.

Chai ju chunch lai aꞌaktꞌaiꞌuyaꞌitꞌit ju milakꞌauꞌan ni camacaulh ju lacatꞌicstꞌi talakꞌalhin ju navi ju yuchi.

43 Ju tuꞌuꞌ kꞌoxi qꞌuiu jantu lai catixtaklh ju xalhiꞌut ju jantu kꞌox.

Chai ju tuꞌuꞌ qꞌuiu ju jantu kꞌox jantu lai catixtaklh ju kꞌoxi xalhiꞌut.

44 Pus tachi chun ju qꞌuiu lhimispacan ju xalhiꞌut.

Jantu lai tocꞌai ju capen lacaꞌalhtucunan.

Nin lai catitocꞌalh ju uvas lacaꞌachꞌitinan.

45 Pus vana va chun tam lapanac.

Laꞌixchivinti putasui tichi lapanac junita.

Pus tam xamatiꞌ ju na kꞌox lapanac junita na kꞌox cachivinaꞌ ni yuchi ju kꞌox ju alin laꞌixꞌalhunut.

Para tam lapanac ju na kꞌai junita pus na macxcai cachivinaꞌ ni va yuchi ju jantu kꞌox ju alin laꞌixꞌalhunut.

Pus tuchi alin laꞌixꞌalhunut ju pumatamin pus chunchach ju chivinin.

46 Tajuch ni va quilalhixakꞌalayau ucxtin para jantu naviyatꞌit tuchi iclalhijunau.

47 Pus tachi chun ju quintalakmin chai quintakꞌasmatni ju quinchivinti chai tanavi tachi ju icnajun pus chani tajunita.

48 Pus va ixtꞌachunchach tajunita tachi ju tam lapanac ju yaulh ixchakaꞌ.

Pus talhman lana ju pucutulh tus lhitajulh ju chiux chai laꞌixꞌucxni ju anuꞌ chiux ju yaulh ju xatantun ixchakaꞌ.

Chai acsni navikꞌolh ju ixchakaꞌ pus astan milh lakatam akmuxtut.

Chai na pꞌas ju neklh ju ani chakaꞌ.

Para jantu lai lacchiquixlh ni laꞌixꞌucxni chiux ixchꞌantai.

49 Para va tichi chavaich ju kꞌasmatꞌa ju quinchivinti para jantu muctaxtui pus ju yuchi chunch junita tachi ju apumatam lapanac ju vachuꞌ yaulh ixchakaꞌ.

Para ju yuchi jantu talhman pucutulh junta xayajui ju xatantun ixchakaꞌ.

Pus acsni na pꞌas neklh ju xcan pus lana maktalh.

Lana takꞌalhikꞌo ju anuꞌ chakaꞌ.