Na lhu tachꞌapalh ju pamata
5
Pus ju Jesús ixyacha vanin laꞌixquilhtuꞌ ju atantsꞌin Genesaret.
Chai ju lapanacni ni na ilhuꞌan ixtajunita pus na istasamakꞌamputun ju Jesús ni vanin ixtatayaputun ni laich catakꞌasmatnilh ixchivinti Dios ju ixꞌajuni.
Lucas 5.1-39
2 Pus ju Jesús laktsꞌilh lakatꞌui barco ju vanin ixlacvi laꞌixquilhtuꞌ atantsꞌin.
Para ju ixchꞌapanin pamata ixtatacutꞌach ni ixtatꞌajun chakꞌanin ixchꞌokxniꞌan.
3 Chai ju Jesús putaju lakatam barco ju anchach ixlacvi.
Chai ju yuchi ixꞌanuꞌ Simón ixjunita.
Chai ju Jesús tapaininilh ju Simón ni cha taju lacatsꞌunin ju lacxcan ju ixbarco.
Chai acsni chunch ju navilh ju Simón pus ju Jesús tsuculh amalaniniꞌ ju lapanacni.
4 Chai acsni chivinkꞌolh pus junich ju Simón:
―Alhipꞌich ju mimbarco junta palai talaclhman chai amuꞌutꞌich ju minchꞌokxniꞌan ni lai achꞌapꞌayaꞌitꞌit ju pamata.
5 Para ju Simón akꞌalhtayanalh chai juni:
―Amamakaꞌunuꞌ tonta tsꞌisni ju xacmujuyau ju quinchꞌokxni quincꞌan.
Para jantu tuꞌuꞌ icchꞌapatau.
Para ni chunch ju naꞌun pus acmujuchokoyach ju quinchꞌokxni.
6 Pus acsni tamujulh ju ixchꞌokxniꞌan ju Simón chai ixtꞌachꞌalhcatnaꞌ pus na lhuch lana tanucha ju pamata.
Chai ixtakꞌexputun ju ixchꞌokxniꞌan.
7 Pus tatamacyonilh ju ixtꞌachꞌalhcatnin ju ixtatajumanalh lacalakatam barco.
Tajuni ni catamilh aꞌaktaijunin.
Pus tamilh chai talaktsama chux lakatꞌui barco.
Chai ixtaquitaꞌacnuputun ju lakatꞌui barco.
8 Pus ju Simón Pitaluꞌ acsni laktsꞌilh ni na lhu ixjunita ju pamata pus lana taꞌaktsokotanilh laꞌixꞌucxlacapuꞌ ju Jesús chai juni:
―Akꞌostꞌich ju laquiꞌucxlacapuꞌ ji quiꞌucxtin ni na icꞌalactuꞌunuꞌ lapanac ju quitꞌin.
9 Chunch ju naulh ju Pitaluꞌ ni na ixlhamakꞌaninin ju yuchi chai tachi chun ju ixꞌalactꞌatajun lacabarco.
Talhamakꞌaninilh ni na lhu ixtachꞌapata ju pamata.
10 Chai vachuꞌ na ixtalhamakꞌaninin ju Jacobo chai ju Xivan istsꞌalan ju Zebedeo.
Pus ju yuꞌunch ixtꞌalamaktainin ju Simón ixtajunita.
Pus ju Jesús junilh ju Simón:
―Jantu atꞌalhan.
Tus chavai amakꞌaixtꞌokꞌaꞌitꞌit ju lapanacni ju aquintalhilacaꞌanaꞌ tachi acsni ixmakꞌaixtꞌokꞌatꞌit ju pamata.
11 Pus ju acsnich tamacutulh ju ixbarcoꞌan.
Tamaconkꞌolh chux chai tachꞌakꞌokꞌalh ju Jesús.
Palaich navicalh pumatam ju ixꞌalin istsꞌitsꞌi
12 Acsni ixvi ju Jesús lacalakatam lakꞌachakꞌan pus lakmilh pumatam lapanac ju ixpacxanta ju macxcai istsꞌitsꞌi ju ixpuchꞌiꞌan.
Chai ju yuchi lana taquilhputanilh ju lacatꞌun laꞌixꞌucxlacapuꞌ ju Jesús.
Chai tapaininilh.
Junich:
―Quiꞌucxtin ni va xaqꞌuincꞌuchꞌupꞌutꞌuch cava pus laich xaqꞌuincꞌuchꞌutꞌi.
13 Pus ju acsnich ju Jesús mokslanilh ixmacaꞌ laꞌixlacatuna chai juni:
―Iclacasqꞌuin.
Palaichꞌat.
Chai acsni naulh ju chunch ju Jesús pus lana macaxnilh ju istsꞌitsꞌi ju anuꞌ lapanac.
14 Chai ju Jesús lhimapꞌaksilh ju anuꞌ lapanac ni jantu xamatiꞌ cajunilh tuꞌuꞌ.
Chani ju juni:
―Aꞌinchich tꞌalacꞌasuniniꞌ ju pali.
Axtꞌakchich ju milhakꞌailaktsꞌin ni cacꞌatsacanaꞌ ni salaka ju milacatuna tachi ju najun laꞌixlhamapꞌaksin ju Moisés.
15 Para jantu sek va ju anuꞌ lapanac chai palai lhu tacꞌatsa ixlacata ju Jesús.
Chai na lhu ju ixtalhitakꞌaixtꞌokꞌa ni va ixtakꞌasmatniputun ju ixchivinti ju Jesús chai palaich ixtajumputun ju va ixtalactakꞌankꞌaich.
16 Para ju Jesús ixꞌan junta aseknicꞌa.
Ixꞌan tꞌachiviniꞌ ju Dios.
Palai navicalh pumatam ju va ixlacalhtuculunta
17 Chai milh avilhchan acsni ixtꞌajun amalaniniꞌ ju Jesús lacachakaꞌ.
Chai vachuꞌ anch ixtavilanalh ju fariseonin chai ju na ixtalhatalanininta ju ixlhamapꞌaksinꞌan ju istꞌaꞌisraelitanin.
Ju yuꞌunch ixtamintacha ixlhilacaputsꞌun ju xalakꞌachakꞌanixni ju xaꞌestado Galilea chai ju xaꞌestado Judea chai ju lakꞌachakꞌan Jerusalén.
Chai ju Dios ixtaknita ju Jesús ixtachaput ni laich palai caꞌanavi ju takꞌankꞌanin.
18 Chai ju aliꞌin lapanacni talhimincha pumatam lapanac lacalona.
Ju yuchi va ixlacalhtuculunta.
Chai ju yuꞌunch ixtapuxcajui ta anchach ju laich catapumanu lacachakaꞌ ni laich catamamanilh laꞌixꞌucxlacapuꞌ ju Jesús.
19 Para jantu jintaꞌ talhitaju junta laich catapumanu ni na isꞌaktsamcanta lacachakaꞌ.
Pus tamucꞌalh laꞌixꞌucxni chakaꞌ.
Taꞌucxmakꞌalh chai anch ju tapumakꞌalhtaju lacalona ju anuꞌ takꞌankꞌan.
Tamama vanin junta ixvi ju Jesús.
20 Chai ju Jesús acsni alaktsꞌilh ni na ixtalhilacaꞌan ju yuchi pus junich ju takꞌankꞌan:
―Ji lapanac ju miꞌalactuꞌunti macꞌacxanicanta.
21 Pus ju acsnich ju fariseonin chai ju yuꞌunch ju na ixtalhatalanininta ju ixlhamapꞌaksinꞌan ju istꞌaꞌisraelitanin tanaulh laꞌixꞌalhunutꞌan:
“Tis chavaich nuꞌ ju ani lapanac ni va macxcai ju najun ni tachi ju Dios ju jumputun.
Tis chavaich apumatam ju lai macꞌacxai ju alactuꞌunti.
Ni va yuchi jumpalaꞌ ju Dios”.
22 Para ju acsnich ju Jesús amachakxanilh tuchi ixtapastꞌacꞌach ju yuꞌunch chai axakꞌala.
Ajunich:
―Tajuch ni va chunch ju pꞌastꞌacꞌatꞌit ju lamiꞌalhunutꞌan.
23 Ni acjunilh ni macꞌacxanicalh ju ixꞌalactuꞌunti pus jantu lai pꞌucꞌatsꞌayatꞌit ni vasalh alin ju quintachaput u jantu.
Para ni acjunilh ni cakꞌostavi chai caꞌalhtanalh pus ju chunch lai apꞌucꞌatsꞌayaꞌitꞌit ni alin ju quintachaput u jantu.
24 Pus ju chavai aclamasuniyau ni alin ju quintachaput ju ani lacamunutpaꞌ ni lai icmacꞌacxai ju alactuꞌunti.
Quitꞌin ju quimalakachatachilh ju Dios ni lapanac actsucuyaꞌ ju ani.
Pus ju acsnich ju Jesús junilh ju anuꞌ ju ixlacalhtuculunta:
―Uxintꞌi ju icjunan.
Akꞌostꞌaꞌulhch.
Asactꞌich ju mimputaman.
Aꞌinchich ju laminchakaꞌ.
25 Chai lana taya ju anuꞌ lapanac laꞌixꞌalacꞌavantiꞌan ju yuꞌunch.
Chai saclh ju ixputaman.
Chai alh laꞌixchakaꞌ.
Chai na ixlakꞌayaꞌanta ju Dios ju lacati.
26 Chai lana na talhamakꞌaninilh ixchuxꞌan.
Chai talakꞌaya ju Dios.
Chai na tatalhanalh.
Tanaulh:
―Iclaktsꞌiu lakatam lhamakꞌan ju chavai.
Ju Jesús tꞌasanilh ju Leví
27 Chai astan acsni tapasalh ju ani taxtokni pus ju Jesús taxtulh.
Chai laktsꞌilh pumatam achꞌiniꞌ ju Leví ixjuncan.
Ju yuchi ixvi junta ixꞌachꞌinin ixlacata ju tuꞌuꞌ ju ixlhimincanta ju anuꞌ lakꞌachakꞌan.
Pus ju Jesús juni:
―Aqꞌuinchꞌakꞌokꞌach.
28 Pus ju anuꞌ achꞌiniꞌ lana taya chai macaulh ju ixlhichꞌalhcat chai tꞌaꞌalh ju Jesús.
29 Chai astan ju Leví navinilh ju Jesús lakatam lacvaiti ju laꞌixchakaꞌ.
Chai na lhu ixtamakvilanalh lacamixa ju ixtꞌaꞌachꞌinin ju Leví chai vachuꞌ na lhu aliꞌin lapanacni.
30 Para ju fariseonin chai ju na ixtalhatalanininta ju lhamapꞌaksin ju vachuꞌ fariseonin ixtajunita va ixtaꞌalhichivinin ju ixꞌamamakaꞌui ju Jesús.
Talacjuni:
―Tꞌas ni va alactꞌavainatꞌit chai alactꞌakꞌotꞌatꞌit ju vino ju achꞌinin chai ju alactuꞌunin.
31 Chai akꞌalhtayanalh ju Jesús.
Ajunich:
―Ju lactachapunin jantu tamaktasqꞌuini ju acꞌuchꞌunuꞌ.
Va yuꞌunch ju takꞌankꞌanin.
32 Jantiyuꞌ iclhiminta ni acꞌalactꞌasanilh ju tanajun ni na lackꞌoxin lapanacni tajunita.
Alai icminta alactꞌasaniniꞌ ju alactuꞌunin ni catamacaulh ju ixꞌalactuꞌuntiꞌan.
Ju Jesús sacmicanta ixlacata ju tascajat
33 Pus ju fariseonin chai ju na ixtalhatalanininta ju lhamapꞌaksin ju vachuꞌ fariseonin ixtajunita tajunilh ju Jesús:
―Tajuch ni na paklhu ju tatascajai chai tatꞌachivinin ju Dios ju ixtamamakaꞌun ju Xivan.
Chai ju quilapanacni quincꞌan ju fariseonin icjuntau vachuꞌ chunch talai.
Para ju mintamamakaꞌun ju uxintꞌi jantu chunch talai.
Ju yuꞌunch tavajin chai takꞌotꞌa ju vino.
34 Chai ju Jesús ajunich:
―Jantu lai amatꞌascꞌaꞌayaꞌitꞌit ju tamakvilanalh junta catamakꞌaxtokcanaꞌ acsni makvilhcaꞌ ju anuꞌ tsꞌalh ju catamakꞌaxtꞌokꞌaꞌ.
35 Pus vana va chunch ju quintamamakaꞌun.
Ju chavai jantu tatascajai ni icꞌalactꞌavilhcaꞌ.
Para cachinaꞌ avilhchan acsni acmakꞌosucanaꞌ ju ani lacamunutpaꞌ.
Chai acsnich ju catatascajayaꞌ ni aquintalhamakꞌanininach.
36 Chai vachuꞌ ajunilh lakatam chivinti ju ixꞌapumavasalaniputun tuꞌuꞌ.
Ajuni:
―Jantu lai xamatiꞌ kꞌexꞌi ju lacasastꞌi ixcujuꞌ chai calhilakyaulh ju lacakꞌatꞌili ixcujuꞌ.
Ni va chunch calalh pus lakꞌalhi ju sastꞌi ixcujuꞌ chai va na jantu kꞌox jun ju kꞌatꞌilh ni jantu ixtꞌachunch junita ju pumpuꞌ ju xalhilakyajui.
37 Chai jantu lai xamatiꞌ pumujui ju sastꞌi vino lacakꞌatꞌili axtꞌakꞌan ni na kꞌalhpꞌasnicaꞌ.
Ni chunch canavi pus ju sastꞌi vino cakꞌexlh ju axtꞌakꞌan chai ju vino capukꞌankꞌolh.
Chai ju axtꞌakꞌan catsꞌankꞌalh.
38 Alai pumucan ju sastꞌi vino lacasastꞌi axtꞌakꞌan.
Ju chunch lai pumakꞌacan ju sastꞌi vino ju axtꞌakꞌan.
39 Chai jantu xamatiꞌ ju kꞌotꞌa ju makꞌaniya vino ju lai cakꞌotputulh ju sastꞌi.
Va najun ni palai can ju makꞌaniya vino.
Chunch ju ajuni ju lapanacni ju Jesús.
Va ixꞌamamachakxaniputun ni jantu lai catilhiyaulh ju makꞌaniya ixlhamapꞌaksin ju Moisés ju sastꞌi ixlhamapꞌaksin ju yuchi.
Chai ju na lanita ju makꞌaniya lhamapꞌaksin na xcai macomputun ni laich caꞌamaklhtayanalh ju sastꞌi lhamapꞌaksin.