Ju lhacaticuru ixlacasqꞌuin ni caꞌixꞌalactuꞌunulh ju Jesús
4
Ju Spiritu Santu ixlhinonkꞌojui laꞌisꞌatsucunti ju Jesús.
Chai acsni mincha ju xakꞌai xcan Jordán ju Jesús pus ju Spiritu Santu juni ta anchach ju caꞌalhtanaꞌalh junta va aseknicꞌa.
2 Pus tꞌupꞌuxam avilhchan ju ixvilhcha junta aseknicꞌa chai ju lhacaticuru navilh talacmaskꞌatꞌinti ni tsꞌa ma laich caꞌixmalactuꞌuni ju Jesús.
Chai ju Jesús jantu vailh ju acs avilhchan tus acsni uctaxtulh ju tꞌupꞌuxam avilhchan.
Chai astan na ixchavanita.
3 Pus ju acsnich ju lhacaticuru junilh:
―Ni sala vasalh istsꞌalh Diosꞌat pus anauch ni chach junch xkapavati junima chiux.
4 Para ju Jesús kꞌalhtailh.
Junich:
―Jantu lai chun actinavi ni tsꞌokcanta laꞌixchivinti Dios ni jantu va yuchi ju xkapavati ju canaviyaꞌ cuenta ju tam lapanac.
Alai canaviyaꞌ cuenta tachi chun ju ixchivinti Dios.
5 Chai astan ju lhacaticuru alhiꞌananalh laꞌixꞌucxni lakatam talhpa ju na putankꞌai ixjunita.
Lhiꞌancalh ju Jesús.
Chai anch ju malacasunikꞌo va tam pantsꞌiquis tachi chun ju xalacpuꞌucxtin ju ani lacamunutpaꞌ.
6 Chai ju lhacaticuru chani ju junilh ju Jesús:
―Uxintꞌich ju acxtaknikꞌoyan chux ju ani tachaput chai vasalh xakꞌai aꞌunaꞌ.
Lai acxtakniyan ni quitꞌin ju icmakꞌaxtaknikꞌocanta chai va tichi chavaich ju icxtakniputun lai icxtaknich.
7 Pus sich miꞌanuꞌ cajunaꞌ va yuchi ni aqꞌuintꞌaꞌaktsꞌokꞌotꞌaniyaꞌich ju laquiꞌucxlacapuꞌ.
8 Para ju Jesús akꞌalhtayanalh.
Junich:
―Apꞌinchich ji Satanás ni tsꞌokcanta laꞌixchivinti Dios ni yuchi ju Dios ju calakꞌayacalh chai va yuchi ju caquiclacaꞌicalh.
9 Chai astan ju lhacaticuru alhiꞌanananchokolh.
Lhiꞌalh ju Jesús ju lakꞌachakꞌan Jerusalén chai anch ju yajucalh ju Jesús junta palai akstiꞌ putankꞌai junita ju ixpujitatꞌan ju israelitanin.
Chai junich:
―Ni sala vasalh istsꞌalhꞌat Dios pus amakꞌanlhtꞌujnuch ju ani.
10 Lai chunch alatꞌi ni chani ju tsꞌokcanta laꞌixchivinti Dios:
Ju Dios ma camapꞌaksiyaꞌ ju ixꞌanquilhnin ni catalhistꞌacꞌan.
11 Chai laꞌixmacaꞌan ju catachꞌixanch
ni jantu cachꞌanꞌuyan ju tuꞌuꞌ chiux.
12 Para ju Jesús chani lhikꞌalhtayanalh:
―Vachuꞌ tsꞌokcanta ju anch ni jantu alaktsꞌintꞌanutꞌi ju Dios ni camuctaxtuyaꞌ ju ixchivinti u jantu.
13 Pus acsni maskꞌatikꞌo tijpachux alactuꞌunti ju ixmanaviniputun ju Jesús pus ju lhacaticuru macoyaulh tus alakatam avilhchan.
Ju Jesús chꞌalhcatnalh ju xaꞌestado Galilea
14 Pus ju Jesús anchokopa ju xaꞌestado Galilea chai laꞌixtachaput ju Spiritu Santu ju xachꞌalhcatnan.
Chai laccꞌatsakꞌocalh ixlacata yuchi tachi ixlhilacaputsꞌun ju lacatꞌun anch.
Lucas 4.14-44
15 Chai ixꞌamalanininch laꞌixlacpujitatꞌan ju istꞌaꞌisraelitanin ju anch.
Chai ixchuxꞌan na ixtalakꞌayai ju yuchi.
Jesús ixvi ju lakꞌachakꞌan Nazaret
16 Ju Jesús minchokopa ju lakꞌachakꞌan Nazaret junta ixtakꞌayata.
Chai acsni chaꞌalh ju avilhchan paꞌastacni pus ju yuchi tanucha laꞌixpujitatꞌan ju istꞌaꞌisraelitanin tachi ju ixlhilanitach.
Chai taya ni catacꞌatsayaꞌ ju lapanacni ni ixꞌamakꞌasmatniputun ju ixchivinti Dios.
17 Chai xtaknicalh ju alhiqui ju istsꞌokta ju makꞌaniya lapanac ju ixnajun ixchivinti Dios.
Yuchi ju Isaías ixjuncan.
Pus ju Jesús acsni puxkꞌotlh ju alhiqui lhitajulh junta chani istsꞌokcanta:
18 Ju Spiritu Santu tꞌajun laquiꞌalhunut
ni quilhisacxtuta ni acꞌajunach ju quilhpatinin ta yu laich cataputakꞌalhtaxtuyaꞌ.
Chai quimacaminta ni acꞌamakꞌankꞌacha ju na taꞌamakꞌaninin.
Chai ni acꞌajunach ju tachꞌinin ni laich catataxtulh junta atꞌalhnucanta.
Chai ni acꞌamalacꞌavaniyaꞌ ju alakꞌachꞌixnin.
Chai ni acꞌaxkꞌotꞌach ju va alhimakchapucan.
19 Chai ni acnonaꞌ ni chilh ju avilhchan acsni caꞌanaviniyaꞌ lamapainin ju Dios ju lapanacni.
Pus chunch ju ajuni ju lapanacni ju Jesús.
20 Chai astan mapuxtokchokolh ju alhiqui.
Chai xtaknichokolh ju alhistacnaꞌ chai tavi ni caꞌamalanininaꞌ.
Chai tachi chun ju ixtavilanalh ju lacpujitat va taskꞌotutulh.
21 Pus ju yuchi tsuculh ajuniniꞌ:
―Chavai avilhchan uctaxtulh junima chivinti tachi ju tsꞌokcanta laꞌixchivinti Dios.
Uctaxtulh acsni xaquilakꞌasmatniyau ju chivinti ju xaclajunau.
―Chunch ju ajunilh ju lapanacni ju Jesús.
22 Chai ixchuxꞌan tanaulh ni vasalh na lai ixꞌamalaninin.
Chai na ixtalhamakꞌaninin ni na kꞌox ixjunita ju ixchivinti ju tuchi ixꞌajuni.
Para ixtanajun:
―Ja jantiyuꞌ ju ani istsꞌalh ju José.
23 Chai ju Jesús ajunchokopa:
―Ju uxijnan ca va quilajumputunau ju chivinti ju noncan:
“Acꞌuchꞌunuꞌ acꞌuchꞌuchꞌokꞌocꞌach miꞌakstu.
Ju chunch pucꞌatsacan ni vasalh lai acꞌuchꞌunun”.
Chai ca va quilajumputunau ni vasalh Cristo icjunita pus tasqꞌuini ni pꞌulhnan acnaviyaꞌ ju ani laquintꞌunꞌan ju tuchi ixnoncan ni xacnaviyacha ju lakꞌachakꞌan Capernaum chai ju chunch laich apꞌucꞌatsꞌayaꞌitꞌit ta yu aquilapulhilaksiyau.
24 Chai tailhiꞌalh ixchivinti.
Ajuni:
―Slivasalh ju iclajunau.
Jantu xamatiꞌ ju najun ixchivinti Dios ju lai tuꞌuꞌ calhiulacalh ju laꞌixtꞌun.
25 Alaktsꞌintꞌit ta yu tapasalh laꞌisꞌatsucunti ju Elías.
Acsni ixtꞌajuncaꞌ ju yuchi pus jantu lalh ju xcan lakatꞌutu cꞌata a lakachaxan malhquiyuꞌ.
Chai alilh ju kꞌai chavan ixlhilacaputsꞌun ju lacamunutpaꞌ.
Chai slivasalh ni na lhu ixtaꞌalin ju chakolun ju va ixꞌanimacontilacanta ju sia istꞌaꞌisraelitanin.
26 Para jantu xamatiꞌ ju sia yuꞌunch ju malakachanicalh ju Elías.
Alai malakachanicalh pumatam chakoꞌulh ju ixnimacontilacanta amachakaꞌ Sarepta laxatꞌun Sidón.
27 Chai acsni ixtꞌajun ju Eliseo ju ixnajun ixchivinti Dios pus na pumalhu istꞌaꞌisraelitanin ixtapacxanta ju na macxcai tsꞌitsꞌi ju puchꞌiꞌan.
Para jantu xamatiꞌ ju sia lhiyuꞌunch ju lai palai canavicalh.
Va yuchi ju ixjuncan Naamán amachakaꞌ xalacatꞌun Siria.
Chunch ju ajuni ju lapanacni ju Jesús.
Chai yuchi alhijunilh chunch ni va ixꞌamamachakxaniputun ni jantu tuꞌuꞌ ixtalhiulai ju ixtꞌaꞌamachakꞌan ju makꞌaniya lapanacni vachuꞌ.
Para ju amachakꞌan alacatam yuꞌunch ju talhilaksilh.
28 Pus ju acsnich tachi chun ju ixtavilanancha lacpujitat lana na tatalhkꞌamalh acsni takꞌasmatnilh ju ixchivinti.
29 Chai tataya.
Tatixcoxtulh ju Jesús ju lakꞌachakꞌan.
Chai talhiꞌalh akstijun junta va kꞌankꞌapukꞌaitajunta junta vanin ixtꞌavi ju ixlakꞌachakꞌanꞌan.
Anchach ju ixtamacaꞌamputun ju Jesús.
30 Para ju Jesús tapasalh laꞌixlacaitat junta ixtayanalh ju yuꞌunch.
Chai alh.
Ju lhacaticuru ixchꞌapanita ixtanquilhacni pumatam
31 Ju Jesús alh ju lakꞌachakꞌan Capernaum laxaꞌestado Galilea.
Chai ju savat tsuculh amalaninin ju lapanacni ju lacpujitat.
32 Pus chux ju lapanacni na ixtalhamakꞌaninin ta yu ixꞌamalaninin ni istasui laꞌixchivinti ni vasalh ismispai ju atalaninti.
33 Chai ixtanumacha lacpujitat pumatam lapanac ju ixpacxanta ju lhacaticuru laꞌixtanquilhacni.
Chai ju anuꞌ lhacaticuru lana tsꞌau tꞌasalh.
Puchivinilh ixquilhni ju anuꞌ lapanac.
Junich ju Jesús:
34 ―Ai.
Tijuch ju quilamintau lhilaktsꞌinin ji Jesús amachakaꞌ Nazaret.
Ja va quilamintau mamakꞌalhkꞌajninin ju quijnan.
Pus iclamispayau tichi chavaichꞌat.
Pus ju uxintꞌi salaka ixlapanac Diosꞌat.
35 Para ju Jesús kꞌailh ju lhacaticuru.
Junich:
―Va sekch.
Atꞌaxtꞌuch ju laꞌixlacatuna ju ani lapanac.
Pus ju acsnich ju lhacaticuru tin samakꞌalh ju lapanac junta ixtayanalh ixtalhavat lapanacni.
Chai lana taxtulh laꞌixlacatuna.
Para jantu xamacꞌatsani.
36 Chai lana na talhamakꞌaninilh ju lapanacni.
Chai ixtalaclajuni ju sia lhiyuꞌunch:
―Tis chivinti nuꞌ ju ani.
Pus ju yuchi slivasalh lai lhinajun chai lacatachaput ju ajuni ju lhacaticurulhni ni catataxtulh chai tataxtui.
37 Pus ixtacꞌatsakꞌojui ju ixlacata yuchi vanta lhiꞌanchach junta vanin ixlhiꞌalin ju lakꞌachakꞌan.
Palaich navicalh ixputꞌichakoꞌulh ju Pitaluꞌ
38 Pus ju Jesús taxtulh ju lacpujitat chai alh laꞌixchakaꞌ ju Simón.
Pus ju ixputꞌichakoꞌulh ju Simón na ixchꞌapata ju iscacat.
Pus tapaininicalh ju Jesús ixlacata ju anuꞌ takꞌankꞌan.
39 Pus ju yuchi taya vanin junta ixma ju takꞌankꞌan.
Chai kꞌailh ju scacat.
Pus lana macaulh ju iscacat ju takꞌankꞌan.
Chai kꞌostavi chai tsuculh alacmavanaꞌ ju Jesús chai ixꞌamamakaꞌui.
Palaich anavicalh lhu takꞌankꞌanin
40 Chai acsni anchalh ju avilhchan pus ixꞌalhiminicanch ju Jesús tachi chun ju takꞌankꞌanin ju na tijlhu takꞌankꞌat ixtachꞌapata.
Chai ju Jesús ixꞌamokslanich ju ixmacaꞌ laꞌixlacatunaꞌan ju pumatamin takꞌankꞌanin chai palaich ixꞌanavi.
41 Chai vachuꞌ na lhu lhacaticurulhni ixtataxtui laꞌixlacatunaꞌan ju lapanacni.
Chai pꞌas ixtajuni ju Jesús:
―Vasalh istsꞌalh Diosꞌat.
Para ju Jesús ixꞌalackꞌaji.
Chai jantu ixꞌalacasqꞌuini ni catachivinilh ni ixtacꞌatsai ni yuchach ju Cristo ju ixnoncan camalakachatachilh ju Dios.
Ju Jesús amalaninin lhiGalilea
42 Chai acsni tuncunchokolh pus ju Jesús lana taxtuchokochalhch.
Alh junta va aseknicꞌa.
Para ju lapanacni na ixtapuxcajui.
Chai tachincha junta ixvilhcha.
Chai na ixtachꞌapaꞌulaputun ni jantu caꞌalacmacaulh ju yuꞌunch.
43 Para ju yuchi ajuni:
―Para tasqꞌuini ni vachuꞌ acꞌalh ju aliꞌ lakꞌachakꞌanixni.
Acꞌalh ajuniniꞌ ju lapanacni ni Dios lhinomputun laꞌisꞌatsucuntiꞌan.
Tasqꞌuini ni chunch aclayaꞌ ni yuchi iclhimalakachacantachilh.
44 Pus ju Jesús ixꞌamalani ju lapanacni laxalacpujitat ju laxaꞌestado Judea.