3 Pus ju Judas ju ixꞌamakꞌaxtaknanta acsni cꞌatsalh ni tanaulh ju xalackꞌajin ni camaknicanaꞌ ju Jesús pus tam xapastacchokoi.

Chai alhiminichokolh ju lakpꞌuxamcau tumin ju xalackꞌajin palijni chai ju xapapaninch.

4 Chai alacjuni:

―Icnavilh alactuꞌunti ni iclamakꞌaxtaknitau ju lapanac ju matiꞌ ixtalakꞌalhin.

Para ju yuꞌunch tajuni:

―Ju yuchi jantu quincuenta quincꞌan.

Mincuenta miꞌakstu ju uxintꞌi.

5 Pus ju Judas makꞌalh ju anuꞌ tumin laꞌixpulacni lacpujitat chai taxtulh.

Alh.

Chai pixtuchꞌimaknichokocalh isꞌakstu.

6 Pus ju xalackꞌajin palijni tasaclh ju anuꞌ tumin chai talaclajuni:

―Jantu lhijun ni laich va calalhiyochoko ju ani tumin junta makꞌatau ju ixtalhavat tumin ju xtakcan lacpujitat.

Jantu lai chunch catilau ni ixtapalhch lapanac ju ani tumin.

7 Pus ixchuxꞌan tanaulh ni catalhitamoyaꞌ ju anuꞌ tumin lakatam lacatꞌun.

Chai anchach ju catataꞌacnuyach ju amachakꞌan makat ju tani ju anch lakꞌachakꞌan.

8 Pus yuchi lhijunicalh ju anuꞌ lacatꞌun ni xalacatꞌun ixtapalh lapanac.

Chai jonkꞌalhitach chun tus chavai.

9 Chai ni chunch ju talalh pus uctaxtulh tachi ju ixnajunta ju makꞌaniya ixlapanac Dios ju Jeremías ixjuncan.

Ju yuchi ma chani naulh:

“Ju israelitanin ma tachꞌapalh ju lakpꞌuxamcau tumin tachi ju ixtalhcaich ixtapalhch cava ju anuꞌ lapanac.

10 Chai ma talhitamaulh ju lacatꞌun junta catataꞌacnuyach ju amachakꞌan makat.

Ma tanavilh ju yuꞌunch tachi ju xaquijuni ju Dios ni catanaviyaꞌ”.

Chunch ju naulh ju makꞌaniya ixlapanac Dios.

11 Pus ju Jesús ixya laꞌixꞌucxlacapuꞌ ju ixgobernadorꞌan ju romanonin.

Chai ju yuchi sacmilh ju Jesús.

Junich:

―Ju uxintꞌi ja ixꞌucxtinꞌat ju israelitanin.

Chai ju Jesús juni:

―Chunch tachi ju naꞌun.

12 Chai acsni ixtachivimakꞌan ju yuchi ju xalackꞌajin palijni chai ju papaninch pus ju Jesús jantu tuꞌuꞌ akꞌalhtayanalh.

13 Pus ju acsnich ju gobernador Pilato junilh:

―Ja va jantu kꞌasmatꞌi tachi chun ju tachivimakꞌanan ju uxintꞌi.

14 Para ju Jesús jantu tuꞌuꞌ lhikꞌalhtailh nin tachi lakatam chivinti.

Pus ixlhiyuchi na lhamakꞌaninilh ju gobernador.

15 Pus ju israelitanin ixtalhismanita ni chux cꞌata ixꞌamaconi tam tachꞌin ju gobernador acsni ixchin ju ani cꞌatan.

Ixꞌamaconican va tichi chavaich ixtalacasqꞌuin.

16 Pus ju acsnich ixtꞌalhnucanta pumatam tachꞌin ju ismispakꞌocanta ni na kꞌai ixjunita.

Chai ju yuchi Barrabás ixjuncan.

17 Pus ju Pilato acsni amakꞌaixtoklh ju xalackꞌajin sia yuꞌunch ju israelitanin pus ajuni:

―Tis chavaich ju lacꞌasqꞌuinatꞌit ni aclamaconiyau.

Ja yuchi ju Barrabás u yuchi ju Jesús ju vachuꞌ Cristo juncan.

18 Pus ju Pilato ajuni chunch ni iscꞌatsai ni va ixtalhacchaꞌani ju Jesús.

Yuchi talhimakꞌaxtaklh.

19 Pus acsni ixvi ju Pilato lacapuꞌucxtin pus ixꞌamachakaꞌ malakachanilh chivinti.

Juni:

“Tun tuꞌuꞌ anavitꞌi ju ani soknicꞌa lapanac ni na lhu xacmakꞌalhkꞌajnan ju lhiyaxch tsꞌis ni icmacꞌatsanicalh ni kꞌai talakꞌalhin cava ni tuꞌuꞌ anaviyaꞌ ju yuchi”.

20 Para ju xalackꞌajin palijni chai ju papaninch tamalacaꞌini ju ixtalhavat lapanacni ni catasqꞌuinlich ni Barrabás ju camacajuncalh.

Chai yuchach ju camaknicalh ju Jesús.

21 Pus ju gobernador ajunchokopalai aktam ju lapanacni:

―Ju anuꞌ ixtꞌiyunꞌan tis chavaich ju lacꞌasqꞌuinatꞌit ni aclamacaulh.

Chai ju yuꞌunch tajuni ni yuchi ju Barrabás.

22 Pus ju Pilato ajuni:

―Pus tas actꞌalayach ju Jesús ju vachuꞌ Cristo juncan.

Chai ju ixtalhavat lapanacni tanaulh:

―Alhinauch ixmaquilhtaca ju lacacurus.

23 Pus ju acsnich ju Pilato alacjuni:

―Para tajuch ni jantu tuꞌuꞌ talakꞌalhin ju xanavi.

Para va apalai talhilactꞌasalh.

Ixtanajun:

―Alhinauch ixmaquilhtaca ju lacacurus.

24 Pus ju Pilato laktsꞌilh ni jantu lai tuꞌuꞌ xanavi.

Alai va palai ixtalhilactꞌasai.

Pus lhinaulh ixꞌica ju xcan.

Chai tsuculh makchꞌakꞌanaꞌ laꞌixꞌucxlacapuꞌan ju lapanacni.

Chai alacjuni:

―Ju quitꞌin jantu actimaktanu laꞌixmaknica ju ani lapanac ju vasalh soknicꞌa junita.

Ni alhinonaꞌitꞌit ixmaknica pus mincuentaꞌan ju uxijnan.

25 Pus chux ju lapanacni tanaulh:

―Kꞌoxich.

Ju quijnan chai ju quiꞌaskꞌatꞌan accꞌucꞌayau ju talakꞌalhin ixlacata ju ixmaknica.

26 Pus ju acsnich ju Pilato lhinaulh ixmaxtuca ju Barrabás.

Astan lhinaulh ixkꞌainekmaca ju Jesús.

Chai makꞌaxtaknilh ju taropajni ni catamaquilhta lacacurus.

27 Pus ju acsnich ju ixtaropajni ju gobernador talhiꞌalh ju Jesús junta lakachakꞌaxnucanta lacapuꞌucxtin.

Chai amakꞌaixtokkꞌo chux ju aliꞌin ixtꞌataropajni.

28 Chai tamalakaxtuni ju Jesús.

Tamalakchꞌinilh slapulh pumpuꞌ tachi ju ixtamalakchꞌinin ju lackꞌai ucxtinin.

29 Chai tanavilh lakatam corona si alhtucunuꞌ chai tamaktanulh.

Vachuꞌ machꞌapacalh ju snivenkꞌe qꞌuiu laꞌixlhicana ni catasu tachi tam xakꞌai.

Chai ju acsni tataꞌaktsokotani.

Para va ixtalhitsꞌiꞌin.

Ixtajunich:

―Atsꞌucꞌukꞌalhitꞌi ji xaꞌucxtin ju israelitanin.

30 Vachuꞌ talakachujva.

Chai tataiꞌinilh ju snivenkꞌe qꞌuiu chai tatsuculh pulakpaneknin.

31 Astan acsni talhitsꞌiꞌinkꞌo pus tamaxtunichokolh ju slapulh pumpuꞌ.

Chai tamalakchꞌinichokolh ju aktsꞌiya ixpumpuꞌ.

Chai talhiꞌalh.

Taꞌalh maquilhtanin lacacurus.

32 Chai acsni ixtatꞌajun taxtunin ju lakꞌachakꞌan pus tapakxtoklh pumatam lapanac amachakaꞌ Cirene.

Ju yuchi Simón ixjuncan.

Pus ju taropajni tapꞌastu tamakxkꞌokꞌalh ju yuchi ju iscurus ju Jesús.

33 Chai tachaꞌalh junta Gólgota juncan.

Pus ju chunch va nomputun ni chunch istasui tachi lakatam aktsulh.

34 Acsni tachaꞌalh ju anch ixtaxtakniputun ju Jesús ju pinquin ju ixlhiya ju tuꞌuꞌ ju na sun ni va catalhimatontolanilh ju ixlacatuna.

Para ju Jesús acsni quilhcꞌatsa jantu kꞌotlh.

35 Chai acsni tamaquilhtakꞌo ju Jesús pus ju taropajni talhilaslajlh ju ixpumpuꞌ ju Jesús ni laich catacꞌatsa tamalhch ju calhiꞌalh kꞌantam kꞌantam.

Chai acsni chunch ju talalh pus puꞌuctaxtulh tuchi ixnajunta ju makꞌaniya ixlapanac Dios.

Pus ju yuchi ma chani naulh:

“Catalhilaslajaꞌ ju quimpumpuꞌ ni catasuyaꞌ tichi chavaich ju catalhiꞌanaꞌ”.

Chunch ju naulh ju makꞌaniya ixlapanac Dios.

36 Chai astan tatavi ju anch ju taropajni ni laich catalhistꞌacꞌaꞌ.

37 Pus ju laꞌisꞌaktsulh ju iscurus ju Jesús taꞌulanilh lakatam atsꞌoknut junta ixnajun tuchi talakꞌalhin ixtamucꞌanita.

Pus chani ixnajun:

“Ju ani yuchi ju Jesús.

Ixꞌucxtinꞌan ju israelitanin”.

38 Vachuꞌ atꞌamaquilhtacalh ixtꞌiyunꞌan akꞌalhonin.

Ju pumatam maquilhtacalh laꞌiscurus laꞌixlhicana iscurus ju Jesús.

Ju apumatam laꞌixlhimacx.

39 Chai tachi chun ju ixtatapasai ixtajuni macxcai chivinti.

Chai ixtamamaxani.

40 Ixtajuni:

―Uxintꞌi ju lai maktꞌai ju pujitat chai va ixlhilakatꞌutu avilhchan yochꞌokꞌoi.

Amakꞌalhtꞌaxtꞌucꞌach miꞌakstu.

Pus ni vasalh istsꞌalhꞌat Dios pus atꞌakꞌalhtꞌaꞌutꞌich ju lacacurus.

41 Chai vana va chun ixtalhitsꞌiꞌin ju xalackꞌajin palijni chai ju papaninch chai ju na ixtalhatalanininta ju ixlhamapꞌaksinꞌan ju istꞌaꞌisraelitanin.

Ixtanajun:

42 ―Ju yuchi ixꞌamakꞌalhtaxtui ju aliꞌin para jantu lai makꞌalhtaxtuchokocan isꞌakstu.

Ni vasalh ixꞌucxtin ju israelitanin junita pus chach takꞌalhtaju lacacurus chai acsnich ju aclhilacaꞌanauch ju quijnan.

43 Ju yuchi lhilaksi ju Dios.

Pus ni vasalh tuꞌuꞌ lhiulai pus chach makꞌalhtaxtulh ju chavai.

Ju yuchi ni naulh ni istsꞌalh Dios junita.

44 Chai mas yuꞌunch ju akꞌalhonin ju ixꞌatꞌamaquilhtacanta vachuꞌ macxcai chivinti tajunilh ju Jesús.

45 Pus acsni kꞌatunculh pus lana tsꞌislh tachi ixlhilacaputsꞌun ju lacamunutpaꞌ.

Tus lakatꞌutu hora atokꞌoxanaꞌ na istsꞌista.

46 Chai tachi ju lakatꞌutu hora atokꞌoxanaꞌ pus ju Jesús tsꞌau tꞌasalh.

Naulh:

―Elí,

Elí,

lama sabactani.

Ju chunch va nomputun:

QuiDios tajuch ni va xaqꞌuimacꞌaꞌun.

47 Pus ju aliꞌin ju anch ixtayanalh acsni takꞌasmatlh tuchi ixnajun ju Jesús talaclajuni:

―Elías ju tꞌasani.

Yuchi ju ixlapanac Dios ixjunita ju makꞌanchich.

48 Pus lana atsꞌalaꞌalh pumatam sia lhiyuꞌunch ju taropajni.

Chꞌapalh ju tuꞌuꞌ pꞌuchꞌulh tachi panimac.

Chai malaktanunilh ju suniya pinquin.

Mucꞌanilh ixꞌacatan qꞌuiu.

Chai lhiꞌanilh ju laꞌixquilhni ju Jesús.

Va ixmavaputun.

49 Para ju aliꞌin tajuni:

―Amacꞌauch.

Calaktsꞌinauch ni vasalh camilh ju Elías pꞌuxnuꞌ.

50 Pus ju Jesús aktam tsꞌau tꞌasachokopa chai lana nilh.

51 Pus ju acsni pantsꞌiquis ju xapumpuꞌ lacpujitat lana pumakatꞌui va.

Yuchi ju pumpuꞌ ju ixpulhvakpitsicanta ju ixlhipulactꞌui junta ixlhiꞌanican ju Dios ju acꞌalhni paktamin tamin cꞌata.

Pus takꞌexcha tus talaclhman tus lacatꞌun.

Chai vachuꞌ tataclh ju lacatꞌun.

Chai ju aliꞌ kꞌai chiux tapꞌakxlh.

52 Chai tapꞌakxlh ju aliꞌ panteonin.

Chai na lhu ju ixtalhilacaꞌanta ju Dios acsni ixtatꞌajuncaꞌ pus talokꞌonchokolh.

53 Pus tataxtulh junta ixtaꞌacnunun.

Chai astan acsni lokꞌonchokolh ju Jesús pus tatanulh ju lakꞌachakꞌan Jerusalén.

Chai ju anch na lhu ju atalacꞌasunilh.

54 Pus ju xacapitán taropajni chai ju aliꞌin ixtꞌataropajni ju ixtatꞌajun lhistacnin ju Jesús acsni talaktsꞌilh ni tataclh ju lacatꞌun chai ju aliꞌ taxtokni ju tapasalh pus na tatalhanalh chai talaclajuni:

―Ju ani lapanac islivasalh istsꞌalh Dios ixjunita.

55 Vachuꞌ na lhu ixtayanalh ju chakolun.

Va ixtalaktsꞌin ju Jesús ixlhimakat.

Ju yuꞌunch aktsꞌiya ixtatꞌaꞌucxuntꞌajun ju Jesús acsni ixvilhcha ju xaꞌestado Galilea chai tatꞌamilh acsni milh ju yuchi ju Jerusalén.

Chai ju yuꞌunch ixtaꞌaktaijui ju Jesús lacatumin.

56 Ju aliꞌin sia yuꞌunch yuchi ju Malia amachakaꞌ Magdala.

Chai ju Malia ixnatiꞌan ju Jacobo chai ju José.

Chai ixnati ju istsꞌalan ju Zebedeo.

57 Acsni tokꞌoxalh pus milh pumatam makꞌaliꞌ amachakaꞌ Arimatea.

Ju yuchi José ixjuncan.

Chai vachuꞌ ixlhilaksi ju Jesús.

58 Pus ju yuchi lakꞌalh ju Pilato chai sqꞌuinilh ixlacatuna ju lijunto Jesús.

Chai ju Pilato lhinaulh ixtaknica.

59 Chai ju José lhiꞌalh ixlacatuna ju lijunto.

Pachꞌi lacasnakꞌankꞌa pumpuꞌ.

60 Chai quimacnulh junta ixlhucucunicanta lactalhpa junta jantucaꞌ tavanan xamatiꞌ ixtaꞌacnui.

Astan lhimalacchonilh kꞌai chiux ju laxamalhtich junta tamacnu.

Chai lana anchokolh ju José.

61 Vachuꞌ taquilalh anch ju Malia amachakaꞌ Magdala chai ju akꞌantam Malia.

Tatavilh pantsꞌiquis vanin junta macnucalh.

62 Ni viernes ixjunita pus ju lapanacni ixtalakꞌoxikꞌota ju ixvaitiꞌan ixlacata ju kꞌai cꞌatan.

Chunch ixtalai ni jantu lai catitachꞌalhcatnalh ni catuncunaꞌ.

Pus ni tuncunchokolh mas na kꞌai cꞌatan ixjunita para tatakꞌaixtokli ju xalackꞌajin palijni chai ju fariseonin.

Talakꞌalh ju Pilato.

63 Chai tajuni:

―Ji quiꞌucxtin icpastacvi ni ixnajun ju anuꞌ aꞌokxchokꞌonuꞌ acsni ixtꞌajuncaꞌ ni ixlhilakatꞌutu avilhchan ma calokꞌonchokoyaꞌ.

64 Pus lamapainin alhinauch ixlhistꞌacꞌa tachi lakatꞌutu avilhchan junta acnui.

Jantu xcai ni va catamilh tsꞌis ju ixꞌamamakaꞌui chai catakꞌalhaulh ju ixlacatuna chai catajunilh ju lapanacni ni lokꞌonchokolh laꞌixꞌaninti ju ixꞌamamakaꞌunuꞌan.

Chai ni chunch ju catalalh pus palai cataꞌokxchokꞌolh ju lapanacni.

Palai jantu na chun tachi acsni ixtꞌajuncaꞌ ju yuchi.

65 Chai ju Pilato alacjuni:

―Alhipꞌinchitꞌit ju taropajni.

Kꞌoxich alakꞌoxitꞌit junta acnuich tachi ju anicꞌach lai catilalh ni jantu lai cataxtulh.

66 Pus taꞌalh ju yuꞌunch.

Chai talakꞌoxilh junta acnuich ju Jesús.

Tachꞌilh ju chiux ju xamalhtich ixnavicanta chai tatꞌalamlakxtoklh ju talhpa.

Vachuꞌ taꞌula ju taropajni ju catalhistaclich ju malhtich.