2 ―Ju uxijnan cꞌatsꞌayatꞌit ni va lakatꞌui avilhchan ticꞌacx tus caꞌalinach ju cꞌatan ju ixpupastaccan ju anuꞌ atatsꞌisni acsni tatakꞌalhtaxtulh laꞌixꞌanintiꞌan ju istsꞌalan ju makꞌaniya milacpaꞌitniꞌan.

Pus ju acsni cꞌatan acmakꞌaxtakcanaꞌ ni laich acmaquilhtacanaꞌ ju lacacurus.

Quitꞌin ju quimalakachatachilh Dios ni lapanac actsucuyaꞌ ju ani.

3 Pus lana acsni avilhchan vachuꞌ tatakꞌaixtoklich ju xalackꞌajin palijni chai ju xapapaninch ju anuꞌ lakꞌachakꞌan chai ju yuꞌunch ju na ixtalhatalanininta ju ixlhamapꞌaksinꞌan ju istꞌaꞌisraelitanin.

Tatakꞌaixtoklich ixpulacni kꞌex junta ixlakachakꞌaxnucanta ju ixchakaꞌ ju xakꞌai pali ju Caifás ixjuncan.

4 Tatsuculh lhilacchivinin ta yu laich catapuꞌokxchokꞌochꞌapayaꞌ ju Jesús chai catamakniyach.

5 Para ixtalaclajuni:

―Para jantu cachꞌapayau ju lacacꞌatan ni va lai tatalhkꞌamalh ju lapanacni.

6 Ju Jesús ixvilhcha lakꞌachakꞌan Betania laꞌixchakaꞌ ju Simón ju ixlacatsꞌitsꞌita para palaich ixnavita ju Jesús.

7 Chai pumatam chakoꞌulh lakmilh ju Jesús.

Ixlhiminta lakatam lumeti ju ixpumujuta ju perfume ju na laklhu ixtapalh ixjunita.

Chai ju yuchi tsuculh lacpaxtꞌekꞌemucꞌanaꞌ ju Jesús acsni ixvi lacamixa.

8 Para ju ixꞌamamakaꞌui ju Jesús acsni talaktsꞌilh na tatalhkꞌamalh.

Talaclajunich:

―Tajuch ni va xalhakꞌamanan ju ani.

9 Ju ani perfume lai laklhu ixlhistꞌacalh chai ju ixtapalh laich ixlhikꞌailaktsꞌilh ju quilhpatinin.

10 Para ju Jesús acsni machakxa tuchi ixtalaclajuni pus chani alacjuni:

―Tajuch ni va lhixcꞌayatꞌit ju ani ya chakoꞌulh.

Slivasalh na kꞌox ju xaquinavi ju yuchi.

11 Pus ju quilhpatinin aktsꞌiya caꞌalinach junta vilatꞌit.

Para ju quitꞌin jantu actilatꞌaꞌalhtanankꞌalhiu.

12 Chai ju ani perfume ju xaquixtꞌekꞌemucꞌani laquilacatuna quixtꞌekꞌemucꞌanilh ni chunch ju lhilanicantau ni xamatiꞌ taꞌacnui.

13 Slivasalh ju iclajunau.

Vanta lhiꞌanchach ju ani lacamunutpaꞌ junta canoncanaꞌ ju chivinti ju quilacata pus vachuꞌ canoncanaꞌ tuchi xanavich ju ani chakoꞌulh.

Ju chunch jantu tavanan cacapcanach ju yuchi.

14 Ju acsnich pumatam ju ixlhipumacautꞌuiꞌan ju ixꞌamamakaꞌui ju Jesús alakꞌalh ju xalackꞌajin palijni.

Pus ju yuchi Judas Iscariote ixjuncan.

15 Chai chani alacjuni:

―Tas chunchach ju aquilaxtakniyau ni aclamakꞌaxtakniyau ju Jesús.

Pus ju yuꞌunch talhitꞌatakꞌoxilh lakpꞌuxamcau plata tumin.

Chai amaklhtayanalh ju Judas.

16 Chai tus acsni ju Judas puxcaulh ta yu laich capumakꞌaxtꞌakꞌaꞌ ju Jesús.

17 Ju xapꞌulhnan avilhchan ju anuꞌ cꞌatan acsni jantu ixtalhiyajui ju xatꞌin ju ixkapavatiꞌan pus talakmilh ju Jesús ju ixꞌamamakaꞌui.

Chai tajuni:

―Tas anchach ju lacꞌasqꞌuin ni aclakꞌoxiu junta caꞌuyau ju borrego.

18 Pus ju Jesús alacjuni:

―Aꞌinchitꞌit ju lakꞌachakꞌan laꞌixchakaꞌ ju pumatam quiꞌamigo.

Chai chani aꞌunaꞌitꞌit:

“Ju amamakaꞌunuꞌ najun ni ma chinta ju ixꞌavilhchan chai ma laminchakach ju catꞌaꞌuyaꞌ ju borrego ju ixꞌamamakaꞌui”.

Chunch ju aꞌunaꞌitꞌit.

19 Pus ju ixꞌamamakaꞌui ju Jesús taꞌalh chai tanavilh tachi ju ixꞌajunita ju Jesús.

Chai talakꞌoxilh ju ixpucꞌatanitꞌan.

20 Chai ju anuꞌ avilhchan acsni tokꞌoxalh pus ju Jesús alactꞌatavilh lacamixa ixpumacautꞌuiꞌan ju ixꞌamamakaꞌui.

21 Chai acsni ixtatꞌajun venin pus ju Jesús chani alacjuni:

―Slivasalh ju iclajunau.

Pumatam ju milhiꞌuxijnan aquimakꞌaxtꞌakꞌach.

22 Pus ju acsnich na taꞌamakꞌaninilh ju yuꞌunch.

Chai kꞌantam kꞌantam tasacmich.

Tajunich:

―Para ja quitꞌin ji quiꞌucxtin.

23 Chai ju Jesús akꞌalhtailh.

Alacjuni:

―Yuchi ju va kꞌaixtam quintꞌatamackꞌoi laquincꞌaꞌulh.

Yuchi ju aquimakꞌaxtꞌakꞌach.

24 Pus aktsꞌiya acniyaꞌ tachi ju tsꞌokcanta laꞌixchivinti Dios ju quilacata.

Quitꞌin ju quimalakachatachilh Dios ni lapanac actsucuyaꞌ ju ani.

Para painich ju anuꞌ lapanac ju aquimakꞌaxtꞌakꞌaꞌ.

Palai kꞌox caꞌixva ni jantu caꞌistsuculh ju anuꞌ jokꞌat.

25 Pus ju acsnich chivinilh ju Judas.

Yuchi ju camakꞌaxtꞌakꞌaꞌ.

Junich:

―Para ja quitꞌin ji amamakaꞌunuꞌ.

Chai ju Jesús juni:

―Uxintꞌi.

26 Chai acsni ixtatꞌajun venin pus ju Jesús chꞌapalh ju xkapavati chai xtaknilh lakꞌailaktsꞌiuch ju Dios.

Chai astan lacchꞌekꞌelh.

Chai axtaknilh ju ixꞌamamakaꞌui.

Chai ajuni:

―Aꞌutꞌitch.

Ju ani yuchach ju quilacatuna.

27 Chai astan chꞌapalh tam vaso ju vino.

Xtaknilh lakꞌailaktsꞌiuch ju Dios.

Chai axtaknilh ju yuꞌunch.

Chai ajuni:

―Akꞌotꞌit minchuxꞌan.

28 Ju yuchi quiꞌacꞌalhni.

Chai acsni cataxtuyaꞌ ju yuchi pus capumavasalayaꞌ ju sastꞌi chivinti ju caꞌalactꞌatakꞌoxiyaꞌ ju Dios ju lapanacni ni laich caꞌamacꞌacxaniyaꞌ ixꞌalactuꞌuntiꞌan na lhu lapanacni.

29 Para iclajunau ni jantu actikꞌotchokolh ju vino tus acsni cachinaꞌ ju avilhchan acsni aclatꞌakꞌotchokoyau ju uxijnan ju sasastꞌi vino junta lhinajun ju quimpai.

30 Acsni nonkꞌo ju chunch ju Jesús pus tamilhpa lakatam milhpat.

Tataxtulh.

Taꞌalh laxaꞌakstijun junta ixya ju xaqꞌuiu olivos.

31 Chai acsni ixtaꞌanta ju lacati pus ju Jesús alacjuni ju ixꞌamamakaꞌui:

―Chux ju uxijnan aquilamacoꞌulayau ju chavai atatsꞌisni.

Iccꞌatsai ni chunch ju catapasayaꞌ ni chunch ju tsꞌokcanta laꞌixchivinti Dios junta chani najun ju yuchi:

“Acmakniyaꞌ ju xaꞌalhistacnaꞌ chai ju ixborregojni catataꞌakpitsiyach”.

Chunch ju najun laꞌixchivinti Dios.

32 Para aclokꞌonchokoyach chai quitꞌin ju pꞌulhnan acchaꞌanaꞌ ju laxaꞌestado Galilea.

Astan achꞌipꞌinaꞌitꞌit ju uxijnan.

33 Pus ju acsnich ju Pitaluꞌ chani juni ju Jesús:

―Mas chux ju aliꞌin catatalhananaꞌ ju milacata para ju quitꞌin jantu tavanan actitalhanalh.

34 Para ju Jesús juni:

―Slivasalh ju icjunan.

Acsni tucaꞌ tꞌasai ju puyux acsni tꞌajunch tuncuntilanaꞌ pus ju uxintꞌi paktꞌutu naꞌuntꞌa ni jantu qꞌuimispꞌaich.

35 Para ju Pitaluꞌ naulh:

―Mas tus actꞌaninch jantu lai tavanan actinaulh ni jantu icmispayan.

Chai vana va chun tanaulh chux ju aliꞌin ixꞌamamakaꞌui.

36 Pus ju acsnich ju Jesús alactꞌachaꞌalh ju ixꞌamamakaꞌui junta Getsemaní juncan.

Chai alacjuni ju yuꞌunch:

―Atꞌolatꞌitcaꞌ ju ani.

Chactiquitꞌachivinin ju Dios.

37 Chai akꞌailhiꞌalh ju Pitaluꞌ chai ixtꞌiyunꞌan istsꞌalan Zebedeo.

Chai tsuculh amakꞌaniniꞌ chai na xcanilh ju ixꞌalhunut.

38 Pus ju acsnich alacjuni ju ixpumatꞌutuꞌan:

―Slivasalh na icꞌamakꞌaninin.

Tachi ju va ictꞌajun niniꞌ ju chavai.

Atꞌolatꞌitcaꞌ ju ani.

Aquilatꞌakꞌalhcujvich lacatsꞌunin.

39 Pus ju acsnich ju Jesús alhtanampa lacatsꞌunin.

Chai lana taquilhputalh chai tsuculh tꞌachiviniꞌ ju Dios.

Junich:

―Quimpai chach jantu alilh ju makꞌalhkꞌajnat ju qꞌuilhcꞌanitꞌa.

Para jantu anavitꞌi tachi ju iclacasqꞌuinch ju quitꞌin.

Alai anavitꞌi chunch tachi ju lacꞌasqꞌuinch ju uxintꞌi.

40 Pus acsni nonkꞌo ju chunch ju Jesús pus alakchinchokolh ju ixpumatꞌutuꞌan ixꞌamamakaꞌui.

Chai alhitajulh ni na ixtalhtatanan.

Pus ju Jesús junilh ju Pitaluꞌ:

―Ja va jantu lai quilatꞌakꞌalhcujau mas va pantsꞌiquis.

41 Akꞌalhcꞌujtꞌit chai atꞌachꞌivinintꞌit ju Dios.

Ju chunch jantu cataꞌokxchokꞌoyan ju lhacaticuru.

Pus ju lamiꞌalhunutꞌan vasalh navipꞌutꞌunatꞌit ju kꞌox.

Para ju va lamiꞌakstuꞌan jantu lai naviyatꞌit.

42 Pus aktam anchokopa ju ixlhipaktꞌuich tꞌachiviniꞌ ju Dios.

Chai chani juni ju ixpai:

―Quimpai ni jantu lai aqꞌuintꞌimakꞌosunin ju ani kꞌai makꞌalhkꞌajnat pus anavitꞌich tuchꞌi lacꞌasqꞌuin ju uxintꞌi.

43 Pus acsni nonkꞌo ju ani chivinti pus taspꞌitchokocha chai aktam alhitajuchokopa ju ixpumatꞌutuꞌan ni aktam na ixtalhtatananchokopalai ni slivasalh na ixtalhtataputunch.

44 Pus amaconchokolh chai anchokopa aktam tꞌachiviniꞌ ju ixpai ixlhipaktꞌutuch.

Chai vana va yuꞌ ju junchokopa.

45 Ju acsnich alakminchokopa ju ixpumatꞌutuꞌan chai alacjuni:

―Ja lana va alhtꞌatꞌakꞌalhiyaꞌitꞌit chai astꞌacnankꞌalhiyaꞌitꞌit.

Chilh ju hora chai acmakꞌaxtakcanaꞌ laꞌixmacaꞌan ju alactuꞌunin.

Quitꞌin ju quimalakachatachilh Dios ni lapanac actsucuyaꞌ ju ani.

46 Akꞌostꞌolatꞌit.

Caꞌauch apakxtoknin.

Anich minta ju aquimakꞌaxtꞌakꞌach.

47 Ju Jesús tucaꞌ ixchivinkꞌojui acsni chincha ju Judas ju ixlhipumacautꞌuiꞌan ixjunita.

Chai alactꞌamilh ixtalhavat lapanacni ju ixꞌamalakachata ju xalackꞌajin palijni chai ju xapapaninch ju anuch lakꞌachakꞌan.

Ixtalhiminta ixmachitaꞌan chai ixqꞌuiuꞌan.

48 Pus ju Judas ju amakꞌaxtaknaꞌ ixꞌajunita ju aliꞌin ta yu catapumispayach.

Ixꞌajunita:

―Ju acmacchꞌuchꞌuyach yuchach.

Achꞌapꞌayaꞌitꞌit.

49 Pus ju acsnich ju Judas lana lakchaꞌalh ju Jesús chai juni:

―Xanchi quiꞌamamakaꞌunuꞌ.

Chai lana macchꞌuchꞌulh.

50 Pus ju Jesús juni:

―Quiꞌamigo tijuch ju laktꞌantꞌa.

Pus ju acsnich lana tachincha ju aliꞌin.

Tachꞌapalh ju Jesús chai tachꞌin tanavi.

51 Para ju pumatam ixꞌamamakaꞌui ju Jesús maxtulh ju ixmachita chai chakxpꞌuxnilh ju ixꞌakꞌaxkꞌolh ixlapanac ju xakꞌai pali.

52 Pus ju acsnich ju Jesús juni:

―Amakꞌachꞌokꞌoch ju mimachita laxapajina.

Icjunan chunch ni tachi chun ju catapulasayaꞌ lacamachita pus lacamachita caꞌamaknicanach.

53 Ja va jantu cꞌatsꞌai ni lai actitapaininilh ju quimpai chai ju yuchi lai aquixtaknilh ixtalhavatꞌan ju anquilhnin.

54 Para ni chunch ju aclalh tas laich calhiꞌuctaxtulh tachi chun ju tsꞌokcanta laꞌixchivinti Dios ju quilacata.

55 Pus ju acsnich ju Jesús alacjuni ju ixtalhavatꞌan lapanacni:

―Tajuch ni va quilanaviyau tachi ju tam akꞌalhonaꞌ ju chꞌapꞌapꞌutꞌunatꞌit ni lhitꞌantꞌatꞌit ju mimachitaꞌan chai ju minqꞌuiuꞌan.

Pus chux avilhchan xaclatꞌavilau ju uxijnan acsni xacꞌamalaninin ju lacpujitat chai jantu xaquilachꞌapayau ju acsnich.

56 Para chunch ju tꞌajun tapasanaꞌ ni laich capuꞌuctaxtuyaꞌ tachi chun ju tatsꞌoklh laꞌixchivinti Dios ju ixlapanacni ju quilacata.

Pus acsni nonkꞌo ju chunch ju Jesús pus tachi chun ju ixꞌamamakaꞌui taꞌatsꞌalalh.

Tamacoyaulh isꞌakstu ju Jesús.

57 Pus ju yuꞌunch ju taquichꞌapalh ju Jesús talhiꞌanilh ju Caifás ju xakꞌai pali ixjunita.

Chai vachuꞌ anch tatakꞌaixtoklh ju papaninch chai ju na ixtalhatalanininta ju ixlhamapꞌaksinꞌan ju istꞌaꞌisraelitanin.

58 Pus ju Pitaluꞌ va ixlhimakat ixꞌachꞌakꞌokꞌata ju yuꞌunch.

Jantu va kꞌaixtam xaꞌalactꞌatanui acsni talhichaꞌalh ju Jesús laꞌixpulacni ta ixlakachakꞌaxnucanta ju ixchakaꞌ ju xakꞌai pali.

Tus astan tanulh vachuꞌ ju Pitaluꞌ pulacni chai alactꞌatavi ju xapulasiyajni.

Va ixlaktsꞌimputun tuchi catapasayach.

59 Pus ju xalackꞌajin palijni chai ju papaninch chai chux ju xalackꞌajin na ixtapuxcajui tichi chavaich ju laich canaulh tuꞌuꞌ taꞌaklhtamat ta yu laich catapulhinaulh ixmaknica ju Jesús.

60 Para jantu tavanan talhitajunilh tuꞌuꞌ talakꞌalhin mas na lhuch lapanacni ixtanajun taꞌaklhtamat chivinti.

Para astan xcayama talhitajulh ixtꞌiyunꞌan ju vaklhtam chun ixtanajun lakatam taꞌaklhtamat chivinti.

61 Tanaulh:

―Ju ani ya lapanac naulh ni ma lai calakꞌalhiyaꞌ ju ixpujitat Dios chai ma va lakatꞌutu avilhchan ma capunavichokoyaꞌ.

62 Pus tayalh ju xakꞌai pali chai junilh ju Jesús:

―Ja jantu tuꞌuꞌ akꞌalhtꞌayananaꞌ.

Tijuch ju talhichivimakꞌanan ju ani.

63 Para ju Jesús jantu tuꞌuꞌ lhikꞌalhtailh.

Pus ju acsnich ju xakꞌai pali juni:

―Alhipꞌastꞌactꞌi ju Dios ju tꞌajun chai aquilajuniu ni vasalh Cristoꞌat ju ixnoncan camalakachatachilh ju Dios.

Ja vasalh istsꞌalhꞌat.

64 Chai ju Jesús juni:

―Vasalh tachi ju naꞌun.

Chai vachuꞌ aclajunau ni astan aquilalaktsꞌinau acsni actolaꞌ vanin junta vi ju Dios chai acminaꞌ laxaꞌataputsꞌi lactꞌiyan.

Quitꞌin ju quimalakachatachilh Dios ni lapanac actsucuyaꞌ ju ani.

65 Pus ju acsnich ju xakꞌai pali lana lhtꞌit kꞌexlh ju ixpumpuꞌ ju va ixtalhkꞌamtich.

Chai ajuni ju aliꞌin:

―Na macxcai chivinti xanajun ni tachi ju Dios ju jumputun.

Tis aliꞌ asacminti tasqꞌuini ni canaviu ju chavai ni kꞌasmatniyatꞌit ju macxcai ixchivinti.

66 Tꞌas nonatꞌit ju uxijnan.

Pus ju yuꞌunch tanaulh:

―Na kaꞌi ixtalakꞌalhin.

Tasqꞌuini ni canilh.

67 Chai ju acsnich talacpuchujva.

Chai talacpusama.

Chai talakpuchꞌi.

Chai ju aliꞌin taquincatisamalh.

68 Tajuni:

―Ju uxintꞌi ni sala Cristoꞌat pus aquilajuniuch tichi chavaich ju xaꞌulaniyan.

69 Pus ju Pitaluꞌ lhimakspaꞌ ixvilhcha.

Laꞌixpulacni kꞌex.

Chai lakmilh pumatam atsiꞌ chai juni:

―Ju uxintꞌi vachuꞌ ixtꞌaꞌucxuntꞌaꞌun ju Jesús amachakaꞌ xaꞌestado Galilea.

70 Para ju Pitaluꞌ naulh laꞌixꞌucxlacapuꞌan ju ixtavilanalh anch ni jantu mispai ju Jesús.

Junich ju atsiꞌ:

―Jantu iccꞌatsai tuchꞌi naꞌun.

71 Pus ju Pitaluꞌ taxtulh.

Chai acsni talacxtutaya pus apumatam atsiꞌ laktsꞌimpa chai ajuni ju ixtavilanalh:

―Ju ani vachuꞌ ixtꞌaꞌucxuntꞌajun ju Jesús amachakaꞌ Nazaret.

72 Chai ju Pitaluꞌ nonchokopa aktam ni jantu mispai.

Tus lhipastackꞌo ju Dios acsni chani alacjuni:

―Jantu lana icmispai ju anuꞌ lapanac.

73 Chai ni pantsꞌiquis jumpa pus talakꞌampa ju Pitaluꞌ ju lapanacni ju ixtavilanalh anch.

Chai tajuni:

―Slivasalh vachuꞌ makꞌuxintꞌi ni vachuꞌ chunch ju chꞌivinin.

74 Pus ju acsnich ju Pitaluꞌ tsuculh nonaꞌ macxcai chivinti chai lhipastacchokolh ju Dios chai alacjuni:

―Jantu icmispai ju anuꞌ lapanac.

Pus lana tꞌasalh ju puyux ju acs pantsꞌiquis.

75 Chai lana pastaclh ju Pitaluꞌ ju chivinti ju ixjunita ju Jesús acsni junilh ni ma paktꞌutu canonaꞌ ni jantu mispai ju yuchi.

Chai ma chunch canonaꞌ acsni tucaꞌ tꞌasai ju puyux acsni tꞌajun tuncuntilanaꞌ.

Chai acsni pastaclich ju chunch ju Pitaluꞌ pus lana taxtulh makspaꞌ.

Chai slivasalh na kꞌalhulh.