―Junta lhinajun ju Dios chunch ju tapasai tachi ju tapasalh laꞌisꞌatsucuntiꞌan ixpumacauꞌan atsiꞌin.

Ju yuꞌunch tachꞌapalh ju ixmaclhcuꞌan chai taꞌalh pakxtoknin ju tsꞌalh ju catamakꞌaxtꞌokꞌaꞌ ni vachuꞌ va ixtamakꞌamputun.

2 Pus ixpumaquisꞌan ju yuꞌunch na ixtanavi cuenta tuchi ixtanavi.

Chai ju ixpumaquisꞌan jantu.

3 Pus ju yuꞌunch ju jantu ixtanavi cuenta ju tuchi ixtanavi pus tamujulh ju ixmaclhcuꞌan para jantu talhiꞌalh aliꞌ ju xapumaclhcu.

4 Para ju na ixtanavi cuenta tuchi ixtanavi pus talhiꞌalh ixmaclhcuꞌan para vachuꞌ talhiꞌalh aliꞌ ixpumaclhcuꞌan laꞌixlumetiꞌan.

5 Pus ni jantu sai ixchinacha ju tsꞌalh ju catamakꞌaxtꞌokꞌaꞌ pus na ixtalaclhtataputun ixchuxꞌan ixpumacauꞌan chai talaclhtatatavilh.

6 Para acsni chaꞌalh paitat tsꞌis takꞌasmatnilh ixchivinti ju pumatam ju pꞌas naulh:

“Mintach ju tsꞌalh ju catamakꞌaxtꞌokꞌaꞌ.

Aꞌinchitꞌit pakxtoknin”.

7 Pus ju acsnich tachi chun ju anuꞌ atsiꞌin tataya.

Tatsuculh lakꞌoxinin ju ixmaclhcuꞌan.

8 Chai ju yuꞌunch ju jantu ixtanavi cuenta tuchi ixtanavi chani tajuni ju yuꞌunch ju ixtalhiminta ju ixpumaclhcuꞌan:

“Aquilamachꞌixtakniucaꞌ lacatsꞌunin ju mimpumaclhcuꞌan.

Ju quimaclhcu quincꞌan ni va mixputun”.

9 Para ju yuꞌunch ju ixtanavi cuenta tuchi ixtanavi taꞌakꞌalhtayanalh.

Tajunich:

“Jantu.

Ca jantu catilhiva ju quilhichuxꞌan.

Alai inchitꞌit tamonin junta stꞌacan.

Atꞌamaꞌutꞌit vachuꞌ ju miꞌanuꞌan ju uxijnan”.

10 Para acsni ixtaꞌanta tamonin ju ixpumaclhcuꞌan ju anuꞌ ixpumaquisꞌan atsiꞌin pus lana chincha ju tsꞌalh ju catamakꞌaxtꞌokꞌaꞌ.

Pus ju ixpumaquisꞌan ju na ixtalakasivilanalh vachuꞌ maktanulh junta xatanui ju tsꞌalh ju calhimacꞌatanicanaꞌ ni catamakꞌaxtꞌokꞌaꞌ.

Chai lana malacchaucalh.

11 Astan tachinchalh vachuꞌ ju aliꞌin atsiꞌin.

Chai tajuni:

“Quiꞌamigo aquilamalhtekꞌaniuch”.

12 Para ju anuꞌ tsꞌalh akꞌalhtayanalh.

Alacjuni:

“Slivasalh ju iclajunau.

Jantu iclamispayau ju uxijnan”.

13 Pus acsni nonkꞌolh ju Jesús ju ani chivinti astan alacjuni ju anch ixtavilanalh:

―Vachuꞌ chunch alatꞌit tachi ju talalh ju anuch atsiꞌin ju ixtalakasivilanalh.

Vachuꞌ alakꞌasitsꞌucꞌutꞌit ni jantu cꞌatsꞌayatꞌit tuchi avilhchan u tuchi hora ju acminchokoyaꞌ.

Quitꞌin ju quimalakachatachilh Dios ni lapanac actsucuyaꞌ ju ani.

14 Alakꞌasitsꞌucꞌutꞌit ni chunch ju tapasai junta lhinajun ju Dios tachi ju tapasalh laꞌisꞌatsucuntiꞌan ixlapanacni pumatam makꞌaliꞌ.

Pus ju anuꞌ lapanac ixꞌamputun makat.

Chai acsni jantucaꞌ an pus atꞌasanilh ju ixlapanacni chai amachꞌixtaknilh tachi chun ju ixꞌalinta.

15 Pus ju pumatam xtaknilh lakaquis milh.

Ju apumatam lakatꞌui milh.

Chai ju apumatam tam milh.

Xtaknilh pumatamin tachi ju laich catapuchꞌalhcatnalh.

Chai astan ju yuchi alh makat.

16 Pus ju anuꞌ xalapanac ju ixmachꞌixtaknita lakaquis milh alh puchꞌalhcatnaꞌ chai lhajachokolh alakaquis milh.

17 Vachuꞌ chunch lalh ju ixmachꞌixtaknita lakatꞌui milh.

Ju yuchi puchꞌalhcatnalh ju lakatꞌui chai lhajachokolh alakatꞌui milh.

18 Para ju anuꞌ xalapanac ju machꞌixtaknicalh va tam milh lhiꞌalh ju tumin chai quimacnulh ju lacatꞌun ni jantu catsꞌankꞌalh.

19 Chai acsni na makꞌanch va pus minchokolh ju ixꞌucxtinꞌan ju anuꞌ xalapanacni.

Chai ju yuchi tsuculh alactꞌaputꞌekꞌeniꞌ.

20 Pus ju anuꞌ ju ixmachꞌixtaknicanta lakaquis milh lakmilh ju ixꞌucxtin.

Vachuꞌ lhiminilh ju alakaquis milh ju ixlhajatach.

Chai juni:

“Quiꞌucxtin ju uxintꞌi qꞌuimachꞌixtꞌaknitꞌa lakaquis milh.

Pus ju chavai acxtakniyan ju alakaquis milh ju icpulhajalh”.

21 Chai ju ixꞌucxtin juni:

“Na kꞌox xanavi.

Ju uxintꞌi na kꞌox lapanac unitꞌa chai na lai lhilaksicꞌan.

Laich xalhistꞌacꞌa lacatsꞌunin.

Pus ju chavai palai lhu acxtakniyan ju alhistꞌacꞌaꞌ.

Atꞌanutꞌich junta icvi ni laich kꞌaixtam cakꞌachanau”.

22 Chai astan chinchalh ju ixmachꞌixtaknicanta ju lakatꞌui milh.

Chai ju yuchi junilh ju ixꞌucxtin:

“Ju uxintꞌi lakatꞌui milh xaqꞌuimachꞌixtꞌaknitꞌa.

Pus ju chavai iclhiminitan vachuꞌ alakatꞌui milh ju iclhajata”.

23 Chai ju ixꞌucxtin juni:

“Na kꞌox xanavi.

Ju uxintꞌi na kꞌox lapanac unitꞌa chai na lai lhilaksicꞌan.

Laich xalhistꞌacꞌa lacatsꞌunin.

Pus ju chavai palai lhu acxtakniyan ju alhistꞌacꞌaꞌ.

Atꞌanutꞌich junta icvi ni laich kꞌaixtam cakꞌachanau”.

24 Chai vachuꞌ chinchalh ju ixmachꞌixtaknicanta ju tam milh.

Chai ju yuchi junilh ju ixꞌucxtin:

“Xaccꞌatsai ni na pꞌas ju miꞌalhunut ju uxintꞌi.

Pus alaktsꞌich.

Yuꞌunch ju milapanacni ju tachꞌalhcatnan ni laich na lhu cajunaꞌ ju micebada.

Chai yuꞌunch ju talacsununiyan ju micebada ni laich lhu amakꞌaixtꞌokꞌaꞌ ju uxintꞌi mas jantuch tuꞌuꞌ talhajai ju yuꞌunch.

25 Pus yuchi na xaclhitalhoniyan chai jantu xacpuchꞌalhcatnamputun ju mintumin.

Pus icꞌalh.

Icmacnulh ju mintumin lacatꞌun.

Anich iclhiminichokotan ju miꞌanuch”.

26 Pus ju acsnich ju ixꞌucxtin chani juni:

“Ju uxintꞌi na alactꞌuꞌunun chai na malheknin.

Naꞌunch ni cꞌatsꞌaich ni aliꞌin ju tachꞌalhcatnan ni laich lhu caꞌalilh ju quicebada.

Chai aliꞌin ju quintalacsununi ju quicebada ni laich lhu acmakꞌaixtꞌokꞌaꞌ.

Chai jantu tuꞌuꞌ icꞌaxtakni ju yuꞌunch.

27 Pus ni vasalh chunch qꞌuilaktsꞌin pus palai kꞌox ixva ni ixtꞌaknin ju quintumin ju lai tapuchꞌalhcatnan tumin.

Ju chunch acsni xacmilh xacꞌamaklhtayananchokolh ju quintumin chai chux ju isꞌaskꞌatꞌa”.

28 Pus ju acsnich ju yuchi ajunilh ju aliꞌin ju ixtayanancha:

“Atꞌaiꞌinitꞌit ju tam milh.

Chai axtꞌaknitꞌit ju pacxanta lakacau milh.

29 Chunch ju alatꞌit ni palai lhu caxtaknicanaꞌ ju pacxanta tuꞌuꞌ.

Chai ju chunch palai lhu caꞌalinaꞌ ju ixꞌalinta.

Para ju matiꞌ tuꞌuꞌ pus cataiꞌinicanaꞌ ju tuchi najun ni pacxanta.

30 Chai ju ani lapanac ju jantu tuꞌuꞌ ixtapalhni junita amacꞌapꞌitꞌit lacaꞌatatsꞌisni lhimakspaꞌ.

Ju anch na lackꞌalhuncan chai na malatankꞌatsican ju istatsalatꞌan ni na tamakꞌalhkꞌajnan”.

31 Ju Jesús tailhiꞌalh ju ixchivinti chai naulh:

―Ju quitꞌin quimalakachatachilh ju Dios ni lapanac actsucuyaꞌ ju ani.

Chai acsni acminchokoyaꞌ laquintachaput acꞌalactꞌaminaꞌ tachi chun ju quiꞌanquilhnin chai ju acsnich acꞌamaklhtayananaꞌ ju quimpuꞌucxtin chai slivasalh xakꞌai acjunaꞌ.

32 Chai catakꞌaixtꞌokꞌach laquiꞌucxlacapuꞌ tachi chun ju amachakꞌan ixlhilacaputsꞌun ju ani lacatꞌun.

Chai ju quitꞌin acꞌalhvakpitsiyaꞌ ju yuꞌunch tachi ju navi tam alhistacnaꞌ acsni alhvakpitsi ju ixborregojni chai ju ixchivojni.

33 Pus ju lapanacni ju soknicꞌa alaktsꞌin ju Dios catatayayaꞌ laquilhicana.

Chai ju lapanacni ju alactuꞌunun catatayayaꞌ laquilhimacx.

34 Chai ju acsnich ni kꞌai ucxtin acjunaꞌ pus acꞌalacjunaꞌ ju yuꞌunch ju tayanalh laquilhicana:

“Atꞌatꞌit ju uxijnan ju taxtaknitan ju kꞌox miꞌatsucuntiꞌan ju quimpai.

Atꞌanutꞌit ju lactꞌiyan junta lhinajun ju yuchi ni anch ju talakꞌoxinitan tus acsni tavanan navicantacha ju lacamunutpaꞌ.

35 Pus iclajunau ni apꞌinaꞌitꞌit ju anch ni quilaxtakniu ju quivaiti acsni na xacchavanita.

Chai quilaxtakniu ju ickꞌotlh acsni na xacquicxixta.

Chai quilaxtakniu junta ictavi acsni makat xacmintacha.

36 Chai acsni matiꞌ ixjunita ju quimpumpuꞌ pus quilaxtakniu.

Chai acsni na xactakꞌankꞌai pus quilaquilaktsꞌiu.

Chai acsni xactꞌalhnucanta quilaquilaktsꞌiu”.

37 Pus ju acsnich ju yuꞌunch ju alaktsꞌincan ni soknicꞌa isꞌatsucuntiꞌan catajunach:

“Para ji quiꞌucxtin tas vananch ju iclalaktsꞌiu ni va ixchꞌavanitꞌa chai iclaxtakniu ju mivaiti.

U ni ixqꞌuicxixtꞌa chai iclaxtakniu ju xakꞌotꞌa.

38 Tas vananch ju makat ixtꞌantꞌachiꞌ chai iclaxtakniu junta xatolai.

U va matiꞌ ixjunita ju mimpumpuꞌ chai iclaxtakniu.

39 Tas vananch ju icquilalaktsꞌiu acsni va ixtꞌakꞌankꞌai u ixtꞌalhnucꞌantꞌa”.

40 Pus ju acsnich ju quitꞌin ju kꞌai ucxtin acjunaꞌ chani acꞌalacjunach:

“Slivasalh ju iclajunau.

Ni chunch ju xanaviniyatꞌit ju tam quilhilakꞌau mas yuchi ju noncan ni jantu tuꞌuꞌ ixtapalhni pus va jun quitꞌinch ju chunch xaquilanaviyau”.

41 Chai ju acsnich ni kꞌai ucxtin acjunaꞌ pus acꞌalacjunaꞌ ju yuꞌunch ju tayanalh laquilhimacx:

“Akꞌostꞌit laquimacni ju uxijnan ju ulanicꞌantꞌatꞌit ju mintalakꞌalhinꞌan.

Aꞌinchitꞌit ju lacajipi ju jantu tavanan mix.

Anch junta lakꞌoxinicanta ju lhacaticuru chai ju ixꞌanquilhnin.

42 Pus ju quitꞌin acsni na xacchavanita jantu xaquilaxtakniyau ju quivaiti.

Chai acsni na xacquicxixta jantu xaquilaxtakniyau ju ackꞌotlh.

43 Chai acsni na makat ju xacminacha jantu xaquilaxtakniyau junta lai actavi.

Chai acsni matiꞌ ixjunita ju quimpumpuꞌ jantu xaquilaxtakniyau.

Chai acsni na xactakꞌankꞌai chai acsni xactꞌalhnucanta jantu xaquilaquilaktsꞌinau”.

44 Pus ju acsnich ju yuꞌunch chani aquintajunaꞌ:

“Ucxtin tas vananch iclalaktsꞌiu ni na ixchꞌavanitꞌa u ixqꞌuicxixtꞌa u makat ixtꞌantꞌachiꞌ u matiꞌ ixjunita ju mimpumpuꞌ u va ixtꞌakꞌankꞌai u ixtꞌalhnucꞌantꞌa chai jantu tuꞌuꞌ xaclanaviniyau”.

45 Chai ju quitꞌin ju kꞌai ucxtin acjunaꞌ pus chani acꞌajunaꞌ:

“Slivasalh ju iclajunau.

Ni jantu xanaviniyatꞌit tuꞌuꞌ lamapainin ju ani ju quintalhilaksi ni va ixnonatꞌit ni jantu tuꞌuꞌ ixtapalhniꞌan ju yuꞌunch pus tachi ju va jun quitꞌin ju jantu tuꞌuꞌ xaquilanaviniyau”.

46 Pus ju acsnich ju yuꞌunch cataꞌanach lacamakꞌalhkꞌajnat ju jonkꞌalhita.

Para ju alaktsꞌincan ni soknicꞌa ju isꞌatsucuntiꞌan cataꞌanaꞌ junta alin ju atsucunti ju jonkꞌalhita.