Ju Jesús naulh ni calakꞌalhikꞌocanaꞌ ju kꞌai ixpujitatꞌan ju israelitanin
24
Pus ju Jesús taxtulh ju lacpujitat.
Chai acsni ixꞌamputun ju lacati pus ju ixꞌamamakaꞌui talakmilh chai tamalacasunilh ju kꞌai pujitat ni na cꞌus ixjunita.
2 Para ju Jesús ajunich:
―Alaktsꞌintꞌit ju ani ya kꞌexi chakaꞌ.
Slivasalh ju iclajunau.
Jantu tuꞌuꞌ catilaꞌucxtavi ju chiux ju ixtꞌachiux.
Si calakꞌalhikꞌocanaꞌ.
Chani ju lai pucꞌatsacan tavanan caꞌaclayaꞌ ju lacamunutpaꞌ
3 Astan ju Jesús chai ixꞌamamakaꞌui taꞌalh ju xaꞌakstijun junta ixlacya ju xaqꞌuiu olivos.
Chai acsni tolhcha ju Jesús pus vanin talakchilh ju ixꞌamamakaꞌui junta va isꞌakstuꞌan laich catalacchivinilh.
Chai tajuni ju Jesús:
―Aquilajuniuch.
Tas vananch ju catapasayaꞌ tachi ju xanaꞌun.
Chai tijuch ju catapasayaꞌ ju lai acpucꞌatsayau ni vanin atꞌampꞌutꞌunaꞌ chai caꞌaclayaꞌ ju lacamunutpaꞌ.
4 Pus ju acsnich ju Jesús chani alacjuni:
―Alaktsꞌintꞌit ni jantu xamatiꞌ cataꞌokxchokꞌon.
5 Pus na lhu cataminaꞌ chai catanonach ni yuꞌunch ju Cristo ju ixnoncan camalakachatachilh ju Dios.
Chai na pumalhu ju cataꞌokxchokꞌoyaꞌ.
6 Chai akꞌasmatꞌaꞌitꞌit ni alin ju lhilucut chai ni cakꞌostayachokochalh aliꞌ lhilucut alacatam.
Para tun tꞌilactꞌalhanantꞌit.
Pus aktsꞌiya tasqꞌuini ni catapasayaꞌ tachi chun ju ani taxtokni.
Para jantiyuꞌ ju ixꞌaclanti ju lacamunutpaꞌ.
7 Pus ju amachakꞌan lakatam kꞌai lacatꞌun catꞌalasachokoyaꞌ ju amachakꞌan alakatam kꞌai lacatꞌun.
Chai ju lapanacni ju tachꞌakꞌokꞌai tam kꞌai ucxtin catatꞌalasayaꞌ ju ixlapanacni ju apumatam kꞌai ucxtin.
Chai caꞌalinaꞌ ju kꞌai chavanti chai na lacalhu catataclhaꞌ ju tꞌun.
8 Para chux ju ani taxtokni va ixputaiꞌulacan ju makꞌalhkꞌajnat.
9 Ju acsnich amakꞌaxtꞌakcꞌanaꞌitꞌit ni amamakꞌalhkꞌajnicꞌanaꞌitꞌit.
Chai catamakniyan ju aliꞌin lamilhiꞌuxijnan.
Chai ju amachakꞌan tachi chun ju lacatꞌun cataxcayan va ixlacaꞌatalh ni quilachꞌakꞌokꞌayau.
10 Chai na lhu ju quintalhilaksita catacꞌapꞌach.
Chai catalaxcayaꞌ.
Chai ju yuꞌunch catamakꞌaxtꞌakꞌach ju vanach quintalhilaksi.
11 Chai na lhu caꞌalinaꞌ ju lapanacni ju aꞌokxchokꞌonin.
Ju yuꞌunch catalhitalacasuyach tachi ju lapanacni ju tanajun ixchivinti Dios mas jantu.
Chai na lhu cataꞌokxchokꞌoyaꞌ.
12 Chai ni na lhu catalhavayaꞌ ju alactuꞌunti pus na lhu lapanacni jantu vasalh catalamapainiyaꞌ.
13 Para va tichi chavaich ju aquilhilaksiyach tus laꞌixꞌaninti mas mamakꞌalhkꞌajnican pus ju yuchi catakꞌalhtaxtuyaꞌ chai laich caꞌanaꞌ ju lactꞌiyan.
14 Chai ju chivinti junta najun ni lhinomputun ju Dios laꞌixꞌalhunutꞌan ju lapanacni canonkꞌocanaꞌ ixlhilacaputsꞌun ju lacamunutpaꞌ ni laich catacꞌatsayaꞌ tachi chun ju lapanacni.
Chai acsnich ju caminach ixꞌaclanti ju lacamunutpaꞌ.
15 Pus ju makꞌaniya lapanac ju Daniel ixjuncan tsꞌokꞌula junta naulh ni caꞌalinaꞌ lamimpujitatꞌan ju tuꞌuꞌ ju na tsꞌisi ju Dios.
Chai ixlhiyuchi jantu xamatiꞌ ju milhiꞌuxijnan catanuyaꞌ ju anch.
Pus ju laktsꞌin ju ani chivinti chach machakxa tuchi nomputun.
16 Pus ju uxijnan acsni alaktsꞌinaꞌitꞌit ni uctaxtulh ju anuꞌ ju lhichivinilh ju Daniel pus tachi chun ju tavilanancha ju laxaꞌestado Judea chach taꞌatsꞌalalh.
Cataꞌalh ju lactalhpa.
17 Chai ju caꞌakstitavi lacasotea chakaꞌ va tsꞌalhti catakꞌalhtaju chai caꞌatsꞌalalh.
Para jantu catiꞌalilh ju ispantsꞌiquis ni lai catanu laꞌixchakaꞌ ni camaxtulh ju tuꞌuꞌ.
18 Chai ju chꞌalhcatnan laꞌixcuxtu vachuꞌ caꞌatsꞌalalh chai jantu catiꞌalilh ju ispantsꞌiquis ni lai catanuchokolh ju lakꞌachakꞌan va ixꞌica ju ixpumpuꞌ.
19 Chai painiꞌitnich catajunaꞌ ju yuꞌunch ju va takꞌakꞌainanta chai ju taꞌamatsꞌiquinin ju acsnich avilhchan.
20 Atꞌapꞌaininitꞌit ju Dios ni jantu chunch catapasayaꞌ va lacalhicꞌasnin nin lacaꞌavilhchan paꞌastacni acsni lhikꞌalhtsajui ju ixlhamapꞌaksin ju Moisés ni makat caꞌalhtanalh xamatiꞌ.
21 Iclajunau ni chunch ju alayaꞌitꞌit ni palai kꞌai caꞌalinaꞌ ju acsni ju makꞌalhkꞌajnat tachi ju jantu tavanan alinta tus laꞌixputaiꞌulacan ju lacamunutpaꞌ tus chavai.
Chai jantu tavanan caꞌalinchokoyaꞌ ju chunch.
22 Pus ju Dios ni jantu caꞌixnaulh ni palai va lacatsꞌunin caꞌixnavi ju anuch avilhchan pus jantu xamatiꞌ caꞌixtakꞌalhtaxtulh.
Para ni na amapaini ju lapanacni ju ixꞌalacsacxtuta ju Dios pus yuchi va lacatsꞌunin lhinavilh ju anuꞌ avilhchan.
23 Pus ju acsni avilhchan ni xamatiꞌ catajunan ni anich vi ju yuchi ju ixnoncan camalakachatachilh ju Dios u anuꞌ vilhcha pus jantu alacꞌaꞌitꞌit.
24 Pus ju acsnich na lhu cataꞌalinaꞌ ju okxchokꞌoni lapanacni ju catanonaꞌ ni yuꞌunch ju Cristo ju ixnoncan camalakachatachilh ju Dios.
Chai vachuꞌ cataꞌalinaꞌ ju aꞌokxchokꞌonin ju catalhitalacasuyaꞌ tachi ju lapanacni ju tanajun ixchivinti Dios.
Chai ju yuꞌunch catanaviyaꞌ ju kꞌai lhamakꞌan chai ju tuꞌuꞌ ju catapumavasalaniputunaꞌ ju lapanacni ni vasalh ixlapanacni Dios tajunita mas jantu.
Chunch catanaviyaꞌ ni va laich calalh catapuꞌokxchokꞌolh ju asacxtuta ju Dios.
25 Pus iclajuntau ni chunch ju catapasayaꞌ mas jantucaꞌ tapasai.
26 Pus ni xamatiꞌ catajunan ni anuꞌ vilhcha ju Cristo junta aseknicꞌa pus jantu apꞌitꞌit.
U ni catajunan ni anuꞌ sek tanun lacachakaꞌ pus jantu alacꞌaꞌitꞌit.
27 Pus ju uxijnan cꞌatsꞌayatꞌit ni vanta anchach tasui ju makꞌalipniꞌ.
Pus vana va chunch cajunaꞌ acsni acminchokoyaꞌ ju quitꞌin ju quimalakachatachilh Dios ni lapanac actsucuyaꞌ ju ani.
Pus lana va tam pantsꞌiquis acminaꞌ chai lana aquintalaktsꞌinkꞌoyaꞌ tachi chun ju lapanacni.
28 Pus acsni na lhu caꞌalinaꞌ ju alactuꞌunti pus acsnich ju caꞌalinaꞌ ju ixmakꞌalhkꞌajnatꞌan ju lapanacni.
Chani ju capuminaꞌ ju Jesús
29 Ju Jesús tailhiꞌalh ju ixchivinti chai naulh:
―Pus acsni catapasayach ju anuꞌ avilhchan acsni na lhu caꞌalinaꞌ ju makꞌalhkꞌajnat pus ju avilhchan chai ju malhquiyuꞌ jantu catamapulhcuyaꞌ chai ju stꞌacu catapatajuyaꞌ ju lactꞌiyan.
Chai tachi chun ju ani taxtokni catalaclucununach.
30 Chai ju acsnich catalacasuyach ju tuꞌuꞌ ju lactꞌiyan ju catapucꞌatsayaꞌ ju lapanacni ni acminaꞌ ju quitꞌin ju quimalakachatachilh ju Dios ni lapanac actsucuyaꞌ ju ani lacamunutpaꞌ.
Chai catalackꞌalhunach ju lapanacni ju ani lacatꞌun.
Chai aquintalaktsꞌinach ju quitꞌin ju quimalakachatachilh ju Dios ni lapanac actsucuyaꞌ ju ani.
Acminaꞌ laxaꞌataputsꞌi ju lactꞌiyan chai catacꞌatsayaꞌ ju lapanacni ni na alin ju quintachaput chai ni icxakꞌai.
31 Chai na pꞌas catꞌasayaꞌ ju skꞌolh.
Chai ju quitꞌin acmalakachayach ju quiꞌanquilhnin chai ju yuꞌunch catamakꞌaixtꞌokꞌach ju icsacxtuta ixlhilacaputsꞌun ju lacamunutpaꞌ mas palai makat amachakꞌan catava.
32 Alaktsꞌintꞌit tachi ju takꞌayai ju tuꞌuꞌ xaqꞌuiu higuera.
Acsni catsucutachilh xajnichiniꞌ ju sastꞌi xaxkꞌoi pus pꞌucꞌatsꞌayatꞌit ni vaninch minta ju lacapꞌasni.
33 Pus vana va chun acsni alaktsꞌinaꞌitꞌit ni tꞌajun tapasanaꞌ tachi chun ju ani ju iclajuntau pus apꞌucꞌatsꞌayaꞌitꞌit ni vaninch minta ju ixꞌaclanti ju lacamunutpaꞌ.
34 Slivasalh ju iclajunau.
Jantucaꞌ catitanikꞌo ju chavai tatꞌajun lapanacni acsni tucaꞌ tapasakꞌojui chux ju ani taxtokni.
35 Pus ju lactꞌiyan chai ju lacatꞌun catalaclakꞌoyaꞌ.
Para ju quinchivinti aktsꞌiya caꞌuctaxtuyaꞌ.
36 Para jantu xamatiꞌ cꞌatsai tavanan cachinaꞌ ju anuꞌ avilhchan chai ju anuꞌ hora.
Nin yuꞌunch ju anquilhnin ju tavilanancha ju lactꞌiyan nin quitꞌin ju istsꞌalh Dios icjunita.
Va yuchi ju quimpai.
Va isꞌakstu cꞌatsai.
37 Pus tachi ju ixjunita ju isꞌatsucuntiꞌan ju lapanacni acsni ixtꞌajun ju Noé pus vana va chun ju cajunaꞌ isꞌatsucuntiꞌan ju lapanacni ju catatsucuyaꞌ acsni acminchokoyaꞌ ju quitꞌin ju quimalakachatachilh ju Dios ni lapanac actsucuyaꞌ ju ani.
38 Pus ju anuꞌ avilhchan acsni tucaꞌ ixꞌakmuxtucan pus ju lapanacni ixtavajin chai ixtaꞌakꞌotnun chai ixtatamakꞌaxtꞌokꞌach chai ixlaꞌican.
Va chunch ju tatailhiꞌalh tachi ju aktsꞌiya ixtalai tus ju anuꞌ avilhchan acsni tanulh ju Noé lacabarco.
39 Chai lana jantu talacaꞌilh tus acsni milh ju akmuxtut chai tamuxtukꞌo ixchuxꞌan.
Pus vana va chun cajunaꞌ acsni acminchokoyaꞌ ju quitꞌin ju quimalakachatachilh ju Dios ni lapanac actsucuyaꞌ ju ani.
40 Ju acsnich caꞌalinach ixtꞌiyunꞌan ju kꞌaixtam catachꞌalhcatnanaꞌ lacacuxtu.
Chai ju pumatam calhiꞌancanaꞌ ju lactꞌiyan.
Chai ju pumatam catamaconach ju ani lacamunutpaꞌ.
41 Caꞌalinaꞌ ixtꞌiyunꞌan chakolun ju kꞌaixtam catasquitiyach.
Ju pumatam calhiꞌancanaꞌ ju lactꞌiyan.
Chai ju pumatam catamaconach ju ani lacamunutpaꞌ.
42 Pus skꞌala atsꞌucꞌutꞌit ni jantu cꞌatsꞌayatꞌit tavanan ju acminchokoyaꞌ.
Quitꞌin ju miꞌucxtinꞌan icjunita.
43 Pus acꞌatsꞌatꞌit ju ani.
Ju tam lapanac ni va cacꞌatsa cava tavanan ju caminaꞌ ju akꞌalhonaꞌ pus calhistaclh ju ixchakaꞌ.
Jantu catilacasqꞌuinilh ni catanu ni cakꞌalhaunilh tuꞌuꞌ.
44 Pus chunchach vachuꞌ ju uxijnan.
Alhistꞌaccꞌantꞌit.
Chunch ju alayaꞌitꞌit ni acsnich ju acminaꞌ acsni jantu pꞌastꞌacꞌatꞌit ni laich acmilh ju acs pantsꞌiquis.
Quitꞌin ju quimalakachatachilh Dios ni lapanac actsucuyaꞌ ju ani.
Tijtꞌui alin ju xalapanacni
45 Akꞌasmatꞌit ju ani chivinti.
Ixꞌalin pumatam xalapanac ju lai ixlhilaksican chai ju na ixꞌacꞌatsananta.
Chai ju ixꞌucxtin ula ju laꞌixchakaꞌ ni caꞌaxtakniyach ixvaitiꞌan ju aliꞌin acsni chaꞌan ju hora.
46 Pus acsni caminchokoyaꞌ ju ixꞌucxtin pus na cakꞌachanach ju anuꞌ xalapanac ni calhitajucanaꞌ ni chunch ju tꞌajun naviniꞌ.
47 Pus slivasalh ju iclajunau.
Ni camuctaxtuyaꞌ ju anuꞌ xalapanac pus ju ixꞌucxtin lana calhilaksiyaꞌ ni laich calhistacniyaꞌ tachi chun ju ixꞌalinta.
48 Para ju anuꞌ xalapanac ni va kꞌai junita cajunlh pus laich canaulh laꞌixꞌalhunut ni ca jantu sai catiminchokolh ju ixꞌucxtin.
49 Chai catsucuyach lhimakchapunuꞌ ju ixtꞌaxalapanacni chai va catꞌavenaꞌ chai catꞌakꞌotꞌach ju tꞌakꞌapꞌanin.
50 Chai ni chunch ju calalh pus ju ixꞌucxtin ju anuꞌ xalapanac laich acs cachilh acsni jantu pacxantaji ju yuchi.
Cachilh acsni ixnajunta ni jantu catimilh ju acs pantsꞌiquis.
51 Pus ju ixꞌucxtin lana camamakꞌalhkꞌajniyaꞌ.
Caxtakniyaꞌ ju makꞌalhkꞌajnat ju caꞌaxtaknicanaꞌ ju aꞌokxchokꞌonin.
Chai ju anch junta camacaꞌancanaꞌ na lackꞌalhuncan chai na mapakꞌatsican ju istatsalatꞌan ni na tamakꞌalhkꞌajnan.