2 ―Ju fariseonin chai ju lapanacni ju na talhatalanininta ju milhamapꞌaksinꞌan tanajun ni va yuꞌunch ju lai tamavasalai ixlhamapꞌaksin ju Moisés.

3 Pus aqꞌuiclacꞌaꞌitꞌit tachi chun ju tajunan.

Para tun tꞌinavitꞌit tachi ju tanavi ju yuꞌunch.

Pus ju yuꞌunch sok taꞌamalaninin para jantu tamuctaxtui ju taꞌamalaninin.

4 Pus ju yuꞌunch na talalhavata ju ixlhamapꞌaksin ju Moisés tus chunch junita tachi ju tuꞌuꞌ tacꞌucꞌat ju na tsꞌinqꞌui.

Ju jantu lai lana malhtanacan.

Chai ju yuꞌunch chunch ju tamucꞌanita ju lapanacni para isꞌakstuꞌan nin lacatsꞌunin jantu tamuctaxtui.

5 Pus ju yuꞌunch acsni tanavi tuꞌuꞌ pus yuchi talhinavi ni laich catalaktsꞌinaꞌ ju lapanacni chai catanaulh ni slivasalh tamuctaxtui laꞌixlhamapꞌaksin ju Dios.

Pus palai akxakꞌai tanavi ju pumpuꞌ ju tachꞌimucꞌai laꞌismuntsanꞌan chai laꞌixmacaꞌan junta tamakꞌai lacatsꞌunin ixchivinti Dios ju tsꞌokcanta.

Chai palai lhman tanavi ju islistonꞌan ju taquilhtumucꞌai laꞌixtuchꞌitꞌan.

Palai jantu na chun talai ju aliꞌin quintꞌalapanacniꞌan.

6 Chai na takꞌachani ju putolan lacapuvai chai lacpujitat junta tatolai ju xalackꞌajin.

7 Chai na talacasqꞌuin ni caxakꞌalacalh laclhitamau tachi tam xakꞌai chai caꞌajunicalh ni amamakaꞌunin tajunita.

8 Para ju uxijnan tun alacꞌasqꞌuintꞌit ni aꞌuncꞌantꞌit amamakaꞌunuꞌ ni va pumatam ju miꞌamamakaꞌunuꞌan.

Va quitꞌin.

Chai minchuxꞌan ju uxijnan va lhiꞌalakꞌavin untꞌatꞌit.

9 Chai jantu alhixakꞌalatꞌit mimpaiꞌan tam xakꞌai ju ani lacamunutpaꞌ ni va pumatam mimpaiꞌan.

Yuchi ju Dios ju vilhcha lactꞌiyan.

10 Chai tun tꞌilakꞌaꞌitꞌit ni xamatiꞌ catalhilaksiyan ni va uxijnan ju cataquiclacaꞌiyan.

Jantu chun alatꞌit ni va pumatam ju lhinajun.

Va quitꞌin.

11 Chai ju lamilhiꞌuxijnan yuchach ju xakꞌai ju achꞌalhcatnani ju aliꞌin.

12 Pus va tichi chavaich ju calakꞌayachokocalh isꞌakstu camalacatꞌicstꞌicanaꞌ.

Para va tichi chavaich ju va lacatꞌicstꞌi cacꞌatsa pus yuchi ju calakꞌayacanaꞌ.

13 Painiꞌitnich ju uxijnan ji lapanacni ju na lhatꞌalaninintꞌatꞌit ju milhamapꞌaksinꞌan ju israelitanin untꞌatꞌit chai ju uxijnan ju fariseonin untꞌatꞌit.

Ju uxijnan na va acxpꞌutꞌiyununatꞌit.

Pus ju uxijnan apꞌusastꞌucꞌatꞌit lamilhamapꞌaksinꞌan ju lapanacni ju tatanuputun ju lactꞌiyan junta lhinajun ju Dios.

Pus ju uxijnan jantu tꞌanupꞌutꞌunatꞌit chai jantu alacꞌasqꞌuiniyatꞌit ni catatanu ju tatanuputunch.

14 Painiꞌitnich ju uxijnan ji lapanacni ju na lhatꞌalaninintꞌatꞌit ju milhamapꞌaksinꞌan ju israelitanin untꞌatꞌit chai ju uxijnan ju fariseonin untꞌatꞌit.

Ju uxijnan na va acxpꞌutꞌiyununatꞌit.

Pus ju uxijnan alactꞌaiꞌiniyatꞌit ju ixlacchakaꞌan ju chakolun ju animacontilacanta.

Chai astan lapꞌalatꞌit tachi ju na va kꞌox panicni ju tꞌachꞌivinatꞌit ju Dios ni lai apꞌuꞌokxchꞌokꞌoyaꞌitꞌit ju lapanacni ni catanaulh ni na tꞌalhoniyatꞌit ju Dios.

Pus ixlhiyuchi palai kꞌai cajunaꞌ ju mimakꞌalhkꞌajnatꞌan.

Palai jantu ju aliꞌin lapanacni.

15 Painiꞌitnich ju uxijnan ji lapanacni ju na lhatꞌalaninintꞌatꞌit ju milhamapꞌaksinꞌan ju israelitanin untꞌatꞌit chai ju uxijnan ju fariseonin untꞌatꞌit.

Ju uxijnan na va acxpꞌutꞌiyununatꞌit.

Slivasalh malacꞌaꞌinipꞌutꞌunatꞌit mas anicꞌach va pumatam ju miꞌatalanintiꞌan.

Chai acsni malacꞌaꞌiniyatꞌit pus aktꞌaiꞌuyatꞌit ni palaich na caꞌalactuꞌunulh tus slivasalh na takꞌalhinita ju isꞌatsucunti.

Chai palai lhijun ni camamakꞌalhkꞌajnicalh ju yuchi ju lacajipi.

Palai jantu na chun ju uxijnan.

16 Painiꞌitnich ju uxijnan.

Chunch untꞌatꞌit tachi ju tam xamatiꞌ ju apꞌulanan para va alakꞌachꞌix junita.

Pus ju uxijnan nonatꞌit ni jantu tuꞌuꞌ nomputun acsni lhipastaccan ju lacpujitat ju ixpumavasalaca tuꞌuꞌ chivinti.

Para va tichi chavaich ju calhipastꞌacꞌaꞌ ju xaꞌoro ju alin lacpujitat ni capumavasalaputunaꞌ ju ixchivinti pus ma tapꞌastu camuctaxtuyaꞌ ixchivinti.

17 Ju uxijnan na tontojni untꞌatꞌit.

Va alakꞌachꞌixnin untꞌatꞌit.

Jantiyuꞌ ju oro ju palai tuꞌuꞌ junita.

Alai yuchi ju pujitat ju palai tuꞌuꞌ junita ni ixchakaꞌ Dios junita.

Chai ixlhiyuchi vachuꞌ ixꞌanuꞌ Dios junita ju oro ju tanun ju anch.

18 Chai vachuꞌ nonatꞌit ni jantu tuꞌuꞌ nomputun acsni xamatiꞌ lhipastꞌacꞌa junta makninican ju Dios ju tuꞌuꞌ atapacxat va ixpumavasalaca ju ixchivinti.

Para va tichi chavaich ju calhipastꞌacꞌaꞌ ju anuꞌ atapacxat ju mokslacanta anch pus ma tapꞌastu camuctaxtuyaꞌ ju ixchivinti.

19 Na tontojni untꞌatꞌit.

Va alakꞌachꞌixnin untꞌatꞌit.

Jantiyuꞌ ju atapacxat ju mokslacanta anch ju palai tuꞌuꞌ junita.

Alai anch junta mokslacanta.

Yuchach ju palai tuꞌuꞌ junita.

Pus tachi chun ju mokslacanta anch ixꞌanuꞌ Dios junita va ixlacaꞌatalh ni okslai ju anch.

20 Pus va tichi chavaich ju lhipastꞌacꞌa junta makninican ju Dios ju atapacxat pus tapꞌastu lhipastꞌacꞌa vachuꞌ tachi chun ju okslai laꞌixꞌucxni.

21 Chai va tichi chavaich ju lhipastꞌacꞌa ju pujitat pus tapꞌastu lhipastꞌacꞌa vachuꞌ ju Dios ju tꞌajun ju anch.

22 Chai ju lhipastꞌacꞌa ju lactꞌiyan va ixpumavasalaca ju ixchivinti pus tapꞌastu lhipastꞌacꞌa ju Dios ni yuchach ju lhinajun ju anch.

23 Ju Jesús tailhiꞌalh ju ixchivinti chai naulh:

―Painiꞌitnich ju uxijnan ji lapanacni ju na lhatꞌalaninintꞌatꞌit ju milhamapꞌaksinꞌan ju israelitanin untꞌatꞌit chai ju uxijnan ju fariseonin untꞌatꞌit.

Ju uxijnan na va acxpꞌutꞌiyununatꞌit.

Ju uxijnan vasalh muctꞌaxtꞌuyatꞌit ju lhamapꞌaksin acsni xtꞌakniyatꞌit ju palijni lactsꞌunin ju miꞌalhmujinuꞌan ju chꞌantꞌatꞌit chai lactsꞌunin ju miꞌanisꞌan chai lactsꞌunin ju mincominoꞌan ju chꞌantꞌatꞌit.

Para jantu sok ju tsꞌucꞌuyatꞌit.

Jantu aktꞌaiꞌuyatꞌit xamatiꞌ lacaꞌamapaininti.

Chai jantu lhilacꞌapꞌinatꞌit ju Dios.

Jantu chun ju layatꞌit mas yuchi ju palai tasqꞌuini ni anavitꞌit tachi chun ju najun laꞌixlhamapꞌaksin ju Moisés mas vachuꞌ atꞌailhipꞌitꞌit ixtaknica ju lactsꞌunin ju tuꞌuꞌ achꞌitin.

24 Ju uxijnan chunch untꞌatꞌit tachi tam xamatiꞌ ju apꞌulanan para va alakꞌachꞌix junita.

Ju uxijnan slivasalh muctꞌaxtꞌupꞌutꞌunatꞌit ju lhamapꞌaksin ju palai jantu tuꞌuꞌ lhitapalai.

Para ju lhamapꞌaksin ju na tasqꞌuini ni anavitꞌit alai jantu naviyatꞌit cuenta.

25 Painiꞌitnich ju uxijnan ju na lhatꞌalaninintꞌatꞌit ju milhamapꞌaksinꞌan ju israelitanin untꞌatꞌit chai ju uxijnan ju fariseonin untꞌatꞌit.

Ju uxijnan va acxpꞌutꞌiyununatꞌit.

Ju uxijnan jantu vasalh lackꞌoxin lapanacni untꞌatꞌit.

Va lhitꞌalacꞌasuyatꞌit tachi ju na kꞌox lapanacni untꞌatꞌit para ju lamiꞌalhunutꞌan va pꞌastꞌactꞌonatꞌit ju miꞌakꞌalhajuntiꞌan.

Chai va lhimucꞌuntꞌonatꞌit ju miꞌalhacchaꞌantiꞌan.

26 Ju uxijnan ji fariseonin va alakꞌachꞌixnin untꞌatꞌit.

Pꞌulhnan salaka atsꞌucꞌutꞌit.

Jantu vana alackꞌalhaꞌutꞌit tuꞌuꞌ u alhacchꞌipꞌitꞌit tuꞌuꞌ.

Chai ju chunch vasalh ni salaka cajunaꞌ ju miꞌatsucuntiꞌan.

27 Painiꞌitnich ju uxijnan ju na lhatꞌalaninintꞌatꞌit ju milhamapꞌaksinꞌan ju israelitanin untꞌatꞌit chai ju uxijnan ju fariseonin untꞌatꞌit.

Ju uxijnan va acxpꞌutꞌiyununatꞌit.

Ju uxijnan chunch untꞌatꞌit tachi ju tuꞌuꞌ panteon ju na xnapapa lakꞌoxicanta.

Ju laꞌixmacan islivasalh na cꞌusich tasui.

Para laꞌixpulacni na lhuch tanun ju xapꞌuchꞌin alucutni chai na lhquiliqui.

28 Pus vana va chun ju uxijnan.

Na soknicꞌa ju lhitꞌalacꞌasuniyatꞌit ju mintꞌalapanacniꞌan para ju lamiꞌalhunutꞌan na aktsamanta ju miꞌaꞌokxchokꞌontiꞌan chai aliꞌ miꞌalactuꞌuntiꞌan.

29 Painiꞌitnich ju uxijnan ju na lhatꞌalaninintꞌatꞌit ju milhamapꞌaksinꞌan ju israelitanin untꞌatꞌit chai ju uxijnan ju fariseonin untꞌatꞌit.

Ju uxijnan na va acxpꞌutꞌiyununatꞌit.

Ju uxijnan naviyatꞌit ju ixpanteonꞌan ju makꞌaniya lapanacni ju ixtanajun ixchivinti Dios.

Chai na maxantꞌilayatꞌit ju ixpanteonꞌan ju anuꞌ soknicꞌa lapanacni ju makꞌanch ixtatꞌajun.

30 Chai nonatꞌit ni laich acs cava istsꞌucꞌuchitꞌit acsni ixtatꞌajun ju makꞌaniya milacpaꞌitniꞌan pus jantu ixmaktꞌanutꞌit ju ixꞌamaknicaꞌan ju ixlapanacni Dios.

31 Pus ni nonatꞌit ni mimpaiꞌan ixtajunita pus va nomputun ni vana va chun ju miꞌalhunutꞌan tachi ju yuꞌunch ju tamaknilh ju lapanacni ju ixtanajun ixchivinti Dios.

32 Pus alaktsꞌamatꞌit ju uxijnan ixtalakꞌalhinꞌan ju makꞌaniya milacpaꞌitniꞌan.

33 Ju uxijnan chunch untꞌatꞌit tachi ju tuꞌuꞌ lu ju makni ju tam lapanac.

Ju uxijnan amalaniyatꞌit ju lapanacni ju chivinti ju jantu soknicꞌa.

Chai ni talacaꞌiniyan pus cataꞌanaꞌ junta jonkꞌalhita makꞌalhkꞌajnat.

Chai ju uxijnan vachuꞌ jantu lai atꞌitꞌakꞌalhtꞌaxtꞌutꞌit lacamakꞌalhkꞌajnat ju jonkꞌalhita.

34 Pus ju quitꞌin aclamalakachanitachiu ju lapanacni ju tanajun ixchivinti Dios chai ju lapanacni ju na taꞌacꞌatsananta chai ju lapanacni ju na lai taꞌamalaninin ixchivinti Dios.

Pus ju aliꞌin sia yuꞌunch amakniyaꞌitꞌit chai amaqꞌuilhtꞌayaꞌitꞌit lacacurus.

Ju aliꞌin alakꞌanekmayaꞌitꞌit lamilacpujitatꞌan chai achꞌakꞌokꞌaxmayaꞌitꞌit acsni cataꞌatsꞌalhniyan ju lakatamin lakꞌachakꞌan.

35 Pus ju chunch caꞌalinach ju mintalakꞌalhinꞌan ju uxijnan ixlacata ixꞌacꞌalhniꞌan tachi chun ju lackꞌoxin lapanacni ju amaknicalh tus acsni maknicanchalh ju Abel tus acsni maknicanchalh ju Zacarías istsꞌalh ju Berequías.

Pus ju Abel na soknicꞌa lapanac ixjunita chai yuchi ju pꞌulhnan tucan maknicalh.

Chai ju Zacarías xaꞌastan va tachi chun ju lhitsꞌokcanta laꞌixchivinti Dios.

Ju yuchi maknicalh laꞌixputsin pujitat junta ixtꞌalakxtokya junta ixmaknican ju atapacxat ju ixlhikꞌailaktsꞌincan ju Dios.

36 Slivasalh ju iclajunau.

Tachi chun ju ani taxtokni si yuꞌ ju alhimakꞌalhkꞌajnanaꞌitꞌit ju uxijnan ju chavai tꞌonatꞌit.

37 Ji amachakꞌan Jerusalén.

Ju uxijnan makniyatꞌit ju lapanacni ju tajunan ixchivinti Dios chai lacꞌatꞌalhmatꞌit ju tamalakachanichin ju Dios.

Na paklhu xaclanaviputunau ju uxijnan tachi ju navi isꞌaskꞌatꞌan ju tuꞌuꞌ chilaꞌ acsni amakꞌatai laꞌixpakꞌachu ni laich caꞌalhistꞌacꞌaꞌ.

Vachuꞌ xaclamakꞌaixtokputunau ju uxijnan tachi ju quiꞌaskꞌatꞌan ni laich xaclalhistacvi vachuꞌ.

Para ju uxijnan jantu xalacꞌasqꞌuinatꞌit.

38 Pus ju chavai ju Dios macoꞌulata ju milakꞌachakꞌan.

39 Chai iclajunau ni jantu lai aquintilalaktsꞌinchoko ju chavai.

Va acsni ju aquilalaktsꞌinchokoyau acsni cachinaꞌ ju avilhchan ni acminchokoyaꞌ chai chani aquilajunau:

“Paxcat ju ani minta laꞌixtapakaꞌut ju Dios”.