2 ―Junta lhinajun ju Dios lai chunch tapasai tachi ju tapasalh laꞌisꞌatsucunti pumatam kꞌai ucxtin.

Ju yuchi ixlhicꞌataniputun pumatam istsꞌalh ni catamakꞌaxtꞌokꞌaꞌ.

3 Pus amalakachalh ixlapanacni ni cataꞌalh alactꞌasaninin ju ixꞌamacꞌatsanicanta ni caꞌalinaꞌ ju lacvaiti.

Para jantu xamatiꞌ mimputulh.

4 Pus amalakachachokopa ju aliꞌin ixlapanacni chai alacjuni:

“Aꞌinchitꞌit ajuninin ju catalacvenach ni ma alin ju vaiti ni iclhinaulh ixmaknica ju quivacax chai ju aliꞌ atapacxat ju na ixtalackꞌonta.

Chai takꞌoxikꞌotach ju chavai.

Ma atꞌatꞌit makvenin”.

Chunch ju xaꞌajuni ju ixlapanacni.

5 Pus taꞌalh.

Para ju lapanacni mas chunch ixꞌajuncan jantu tuꞌuꞌ talhiula.

Alai alh pumatam laꞌixcuxtu.

Apumatam alh astꞌanaꞌ.

6 Chai ju aliꞌin tachꞌapalh ju anuꞌ alhtanin.

Tamamakꞌalhkꞌajni tus tamakni.

7 Pus ju anuꞌ kꞌai ucxtin acsni kꞌasmatlich ta ixtalai ju anuch lapanacni pus na talhkꞌamalh.

Lana amalakacha ju ixtaropajni.

Amaknikꞌo ju anuꞌ amakninin.

Chai ju laꞌixlakꞌachakꞌanꞌan manulh jipi.

8 Chai astan alacjuni ju ixlapanacni:

“Takꞌoxikꞌota ju vaiti para jantu ixlhijun ni lai ixtamilh venin ju pꞌulhnan ixꞌaquitꞌasanican ni va kꞌai ixtajunita.

9 Palai kꞌox cajunaꞌ ni va apꞌitꞌit lacatijixni junta tapumin ju lapanacni ju lakꞌachakꞌan chai akꞌailhitꞌanaꞌitꞌit ju lacvaiti va tichi alhitꞌaꞌuyaꞌitꞌit”.

10 Pus tataxtulh ju anuꞌ xalapanacni.

Taꞌalhtanatsuculh ju lacatijixni.

Chai tachi chun ju talhitajulh takꞌailhiminkꞌolh.

Chux ju lackꞌoxin lapanacni chai ju kꞌai tajunita.

Chai ju chunch na aktsamcalh ju anuꞌ lacvaiti.

11 Pus ju acsnich tanucha ju kꞌai ucxtin.

Va ixlaktsꞌimputun ju makvenin.

Pus laktsꞌilh pumatam lapanac ju jantu ixlhimalakchꞌinin ixlacata ju lacvaiti.

Jantu ixlakchꞌita ju pumpuꞌ ju ixtaknicanta.

12 Pus juni:

“Quiꞌamigo.

Tꞌas xalhitꞌanch ju ani ni jantu lhimalakchꞌininta ixlacata ju lacvaiti”.

Pus ju yuchi jantu tuꞌuꞌ lai kꞌalhtailh.

13 Pus ju acsnich ju kꞌai ucxtin ajunich ju ixlapanacni ju ixtaxtꞌakꞌa vaiti:

“Achꞌanchꞌitꞌit chai amakchꞌitꞌit chai amacꞌapꞌitꞌit junta putsꞌis lhimakspaꞌ.

Ju anch lackꞌalhuncan chai laclamatantsacacan ju istatsalatꞌan ni na tamakꞌalhkꞌajnan”.

14 Pus ju acsnich ju Jesús tailhiꞌalh ixchivinti.

Alacjuni ju lapanacni:

―Na lhu atꞌasanicanta ni cataꞌalh ju lactꞌiyan.

Para na lacatsꞌunin ju vasalh catachaꞌanaꞌ.

15 Pus ju acsnich taꞌalh ju fariseonin.

Tapastaclh ta yu laich catapuxcolakxtunilh ju tuꞌuꞌ chivinti ju Jesús ni laich catapumucꞌanilh ixtalakꞌalhin.

16 Pus ni tanaulh ta yu catalayaꞌ pus tamalakachalh ju aliꞌin ixꞌamamakaꞌui ju fariseonin.

Alactꞌaꞌalh ju aliꞌin ju ixtachꞌakꞌokꞌai ju gobernador Herodes.

Talakꞌalh ju Jesús chai tajuni:

―Amamakaꞌunuꞌ iccꞌatsayau ni naꞌun ju stavasalanti ju uxintꞌi.

Chai sok masui ju ixti ju Dios.

Chai jantu xamatiꞌ tꞌalhoni ni vaklhtam chun ju alaktsꞌin ju lapanacni.

17 Pus aquilajuniuch.

Tꞌas naꞌunch ju uxintꞌi.

Ja lhijun ni acꞌamapalanau laꞌixmacni ju xaꞌucxtin ju romanonin u jantu.

18 Para ju Jesús lana amachakxanilh ni va ixtaꞌokxchokꞌoputun.

Chai chani alacjuni:

―Tajuch ni va quilapuxconiyau ju talakꞌalhin.

Ju uxijnan va acxpꞌutꞌiyununatꞌit.

19 Aquilamasuniu ju tumin ju lhiꞌamapꞌalananatꞌit.

Pus ju yuꞌunch tamalacasunilh ju anuꞌ sentau.

20 Pus ju Jesús acsni laktsꞌilh alacsacmi:

―Tis ixꞌucxpuꞌ ju ani okslai.

Tis ixtapakaꞌut ju tsꞌokcanta ju ani.

21 Pus ju yuꞌunch tajuni ni ixꞌanuch ju César.

Yuchi ju xakꞌai tucan ju ixlhinonkꞌojui chux ju xalacatꞌun Roma.

Pus ju acsnich ju Jesús alacjuni:

―Pus axtꞌaknitꞌit ju César ju ixꞌanuch.

Chai axtꞌaknitꞌit ju Dios ju ixꞌanuch Dios.

22 Pus ju yuꞌunch acsni takꞌasmatlh ju ixchivinti ju Jesús na talhamakꞌaninilh ni na kꞌox xalhakꞌalhtayanan.

Pus tamacaulich chai taꞌalh.

23 Pus vana ju acs avilhchan talakchimpalhcha ju saduceonin junta ixvi ju Jesús.

Pus ju yuꞌunch tanajun ni jantu lai lokꞌonchokocan acsni va nicanch.

Pus yuchi chani talhijuni ju Jesús:

24 ―Amamakaꞌunuꞌ ju Moisés naulh ni canilh tam lapanac chai camacontilalh ixꞌamachakaꞌ para ni jantu catꞌamacontilalh tam isꞌaskꞌatꞌa pus ju ispꞌisekꞌe ju anuꞌ xani ma catꞌatsucuchokolh ju ixꞌamachakaꞌ ixjunita ju xani.

Chai acsni caꞌalilh tam istsꞌalh pus ju yuchi ma casacnilh ixtapakaꞌut ju anuꞌ xani.

25 Pus sia lhiquijnan ixꞌalin pumatujun lhiꞌalakꞌavin.

Chai ju xakꞌai tamakꞌaxtoklich para astan nilh.

Chai ni jantu tuꞌuꞌ macontilalh isꞌaskꞌatꞌa pus maconilh ju ispꞌisekꞌe ju ixꞌamachakaꞌ ixjunita.

Para vachuꞌ nipa chai vana jantu tuꞌuꞌ macontilalh isꞌaskꞌatꞌa.

26 Pus vana va chun tapasapa ju ixlhipumatꞌuich chai ju ixlhipumatꞌutuch.

Tus talaktsa ixlhipumatujunꞌan lhiꞌalakꞌavin.

27 Chai astanch pus nilh vachuꞌ ju anuꞌ chakoꞌulh.

28 Pus acsni catalokꞌonchokoyanta ju tanita pus tis chavaich ju ixpumatujunꞌan lhiꞌalakꞌavin ju lai canaulh ni yuchi ixꞌamachakach junita ni ixpumatujunꞌan atꞌatsucukꞌo ju anuꞌ chakoꞌulh.

29 Chai ju Jesús alacjuni:

―Ju uxijnan jantu sok alacpꞌastꞌacnanatꞌit.

Ju uxijnan jantu machꞌakxayatꞌit ni na lacalhu ju tsꞌokcanta laꞌixchivinti Dios junta najun ni calokꞌonchokoyaꞌ ju tanita.

Vachuꞌ jantu cꞌatsꞌayatꞌit tuchi lai navi ju Dios.

30 Pus acsni calokꞌonchokoyaꞌ jantu catamakꞌaxtokcanaꞌ nin calaꞌicalh.

Va ixtꞌachunch catatsucuyaꞌ tachi ju anquilhnin ju tavilanancha lactꞌiyan.

31 Chai ni va asacmininatꞌit ni laich catalokꞌonchokoyaꞌ ju tanita pus ja lana jantu pꞌastꞌacꞌatꞌit tuchi naulh ju Dios ixlacata ju tanita ni catalokꞌonchokoyaꞌ.

Pus ju yuchi ma chani naulh:

32 Ju yuchi ma isDiosꞌan junita ju Abraham chai ju Isaac chai ju Jacob.

Chunch ma naulh ju Dios.

Pus ju yuchi ni isDios junita ju lapanacni ju tatꞌajun pus nomputun ni tatꞌajun ju anuch lapanacni mas noncan ni makꞌanch tanita.

33 Pus ixtalhavat lapanacni acsni takꞌasmatli ixchivinti ju Jesús slivasalh na talhamakꞌaninilh ju ixꞌatalaninti ni na kꞌox xachivinin.

34 Ju saduceonin ni jantu lai tuꞌuꞌ talhikꞌalhtailh ju Jesús pus tacꞌatsa ju fariseonin.

Pus a yuꞌunch talakmimpa ju Jesús.

35 Chai sia yuꞌunch ixꞌalin pumatam ju na ixlhatalanininta ju ixlhamapꞌaksinꞌan ju istꞌaꞌisraelitanin.

Chai ju yuchi sacmilh ju Jesús lakatam chivinti.

Va ixpupuxconiputun ixtalakꞌalhin.

Chai chani ju junilh:

36 ―Amamakaꞌunuꞌ tachi chun ju ixlhamapꞌaksin ju Moisés tas malhch ju palai tasqꞌuini ni canavicalh.

37 Chai ju Jesús juni:

―Amapꞌainitꞌich ju miꞌucxtin Dios laꞌixlhichux miꞌalhunut chai laꞌixlhichux ju miꞌatsucunti chai laꞌixlhichux ju mintacꞌatsan.

38 Yuchach ju lhamapꞌaksin ju palai tasqꞌuini ni canavicalh.

39 Chai ju ixlhilakatꞌui va ixtꞌachunch junita.

Ju yuchi najun ni amapꞌainitꞌi ju vanin alactꞌavilhtꞌi tachi ju va jun miꞌakstu ju mapꞌainichꞌokꞌocꞌan.

40 Pus tachi chun ju tsꞌoklh ju Moisés chai tachi chun ju tatsꞌoklh ju makꞌaniya ixlapanacni Dios vaklhtam chun tanomputun.

Tanajun ta yu acpumapainilh ju Dios chai ta yu acpumapaini ju quintꞌalapanac.

41 Acsni ixtavilanalhcaꞌ ju fariseonin pus ju Jesús alacsacmi:

42 ―Tꞌas nonatꞌit ju uxijnan.

Tis istsꞌalh lhiulayatꞌit ju Cristo ju ixnoncan camalakachatachilh ju Dios.

Chai ju yuꞌunch tajuni:

―Pus istsꞌalh ju kꞌai ucxtin David.

43 Pus ju acsnich ju Jesús asacmichokolh.

Alacjuni:

―Pus ju David yuchi ju Spiritu Santu ju mapastꞌacꞌani ni lhixakꞌala ixꞌucxtin ju Cristo.

Pus tꞌas lhimachꞌakxayatꞌit ni lai chunch lalh.

Pus ju yuchi ju David ma chani naulh:

46 Pus ju acsnich jantu lai xamatiꞌ tuꞌuꞌ ixlhikꞌalhtaji.

Chai tus acsnich avilhchan jantu lana xamatiꞌ isacmiputun tuꞌuꞌ ju Jesús.