Ju Jesús tanu ju lakꞌachakꞌan Jerusalén
21
Vanin ju lakꞌachakꞌan Jerusalén ixꞌalin lakatam lakꞌachakꞌan ju Betfagé ixjuncan.
Chai ju anch ixvi ju akstijun junta na lhu ixlacya ju xaqꞌuiu olivos.
Pus ju Jesús acsni alactꞌachaꞌalh ju anch ju ixtalhavat lapanacni amalakachalh ixtꞌiyunꞌan ixꞌamamakaꞌui.
2 Chai alacjuni:
―Aꞌinchitꞌit ju anuꞌ tasui lakꞌachakꞌan.
Chai acsni atꞌanutꞌachitꞌit pus alhitꞌaꞌuyaꞌitꞌit lakatam xanati puru chꞌiyocanta.
Chai vachuꞌ anch ya ju isꞌaskꞌatꞌa.
Axkꞌotꞌayaꞌitꞌit chai alhitꞌanaꞌitꞌit.
3 Chai ni xamatiꞌ catalhikꞌaiputunan va aꞌunaꞌitꞌit ni ma maktasqꞌuini ju miꞌucxtinꞌan chai ma vatsꞌalhti camalakachachokotachilh.
4 Pus chunch ju navilh ju Jesús ni lai caꞌuctaxtuyaꞌ ju chivinti ju xanajun ju makꞌaniya lapanac ju ixnajun ixchivinti Dios.
Ju yuchi ma chani xanajun:
5 Chani aꞌunaꞌitꞌit ju amachakꞌan Jerusalén:
“Alaktsꞌintꞌit.
Talakmintan ju miꞌucxtinꞌan.
Ju yuchi jantu makꞌaliꞌ junita.
Va puminta lakatam puru”.
Chunch ju ixnajunta ju makꞌaniya lapanac.
6 Pus ju ixꞌamamakaꞌui ju Jesús taꞌalh.
Chai chunch ju tanavilh tachi ju ixꞌajunita ju Jesús.
7 Talhimilh ju xanati puru chai ju saꞌaskꞌatꞌa chai taꞌakxchꞌamucꞌalh ixcutunꞌan.
Chai lana putocꞌalh ju Jesús ju saꞌaskꞌatꞌa.
Chai alh.
8 Chai ju ixtamakachꞌakꞌokꞌananta na ilhuꞌan ixtajunita.
Pus ixtamamalhiꞌanta ixpumpuꞌan ju lacati junta capuminaꞌ ju Jesús.
Chai ju aliꞌin ixtatꞌekꞌeꞌich ju ixꞌacatan qꞌuiu chai ixtamamalhiꞌanta ju lacati.
9 Chai ju lapanacni ju ixtapꞌulanan chai ju ixtakꞌaixunun na pꞌas ixtalacchivinin.
Ixtanajun:
―Chach lakꞌayacalh ju ani istsꞌalh ju kꞌai ucxtin David.
Paxcat ju ani minta ju malakachatachilh ju Dios.
Chach lakꞌayacalh ju Dios ju vilhcha talaclhman.
―Chunch ixtanajun ixtalhavat lapanacni.
10 Chai acsni tanucha ju Jesús ju lakꞌachakꞌan Jerusalén pus chux ju lapanacni tꞌilhi tꞌilhi ixtalaich.
Chai ixtalaclajuni:
―Tis nuꞌ chavaich ju xachin.
11 Chai ju lapanacni ju ixtatꞌaꞌanta ju Jesús alacjuni:
―Ju ani yuchi ju Jesús ju najun ixchivinti Dios.
Yuchi ju amachakaꞌ Nazaret laxaꞌestado Galilea.
Axcauxtulh ju lapanacni ju lacpujitat
12 Chai astan ju Jesús tanucha lacakꞌai ixpujitatꞌan ju istꞌaꞌisraelitanin.
Chai atixcoxtukꞌo tachi chun ju ixtaꞌulata ixlhistꞌatꞌan chai ju ixtaꞌatamonan ju anch.
Chai amatistanilh ju ixmixaꞌan ju ixmapaxanin tumin chai ju ixputolanꞌan ju istastꞌai ju lakꞌaxkꞌavan.
13 Chai alacjuni:
―Ju laꞌixchivinti Dios chani ju tsꞌokcanta:
“Ju quinchakaꞌ calhimispacanaꞌ ni anch ju tꞌachivincan ju Dios”.
Chunch ju najun laꞌixchivinti Dios.
Para ju uxijnan va tachi ixchakaꞌ ju akꞌalhaunin lhimalacxtꞌutꞌatꞌit.
14 Chai ju anch lacpujitat tachincha ju alakꞌachꞌixnin chai ju jantu lai ixtaꞌalhtanan.
Chai ju Jesús palai anavikꞌo.
15 Para na tatalhkꞌamalh ju xalackꞌajin palijni chai ju yuꞌunch ju na ixtalhatalanininta ju ixlhamapꞌaksinꞌan ju istꞌaꞌisraelitanin acsni talaktsꞌilh ju lhamakꞌan ju ixnavi ju Jesús chai acsni takꞌasmatlh ni na pꞌas ixtachivinin ju tsꞌalan ju anch lacpujitat chai ixtalakꞌayai ju Jesús istsꞌalh ju kꞌai ucxtin David.
16 Chai tajunilh ju Jesús:
―Ja va jantu kꞌasmatꞌa tuchi tanajun ju yuꞌunch.
Chai ju Jesús alacjuni:
―Ickꞌasmatꞌa.
Para ju uxijnan chunch ju layatꞌit tachi ju jantu tavanan laktsꞌintꞌatꞌit ixchivinti Dios junta chani juncan ju Dios:
Ju uxintꞌi lacꞌasqꞌuin ji Dios ni lakꞌayacꞌan laꞌixchivintiꞌan ju askꞌatꞌan chai ju va tatsꞌiquicaꞌ.
Chai ju yuꞌunch talakꞌayayan tachi ju lhijun ni alakꞌayacꞌa ju uxintꞌi.
17 Chai acsni nonkꞌo ju chunch ju Jesús pus lana alacmacaulh.
Taxtulh ju lakꞌachakꞌan Jerusalén.
Alh ju lakꞌachakꞌan Betania chai anch ju lakacujcha.
Ju Jesús maxixi akꞌatam xaqꞌuiu higo
18 Chai ju vatsꞌisin acsni anchokolh ju Jesús ju lakꞌachakꞌan Jerusalén pus na chavanilh.
19 Chai laktsꞌilh akꞌatam higo ju ixya vanin lacati.
Pus ju Jesús lakꞌalh para jantu tuꞌuꞌ lhitajunilh xalhiꞌut.
Va si xaxkꞌoi ixꞌalinta.
Pus chani juni:
―Jantu tavanan lai atꞌixtꞌakchꞌokꞌo ju milhiꞌut.
Pus lana xixlh ju anuꞌ higo.
20 Pus ju ixꞌamamakaꞌui ju Jesús acsni talaktsꞌilh na talhamakꞌaninilh.
Chai tajuni:
―Tas laich va tsꞌalhti xalhixix ju higo.
21 Chai ju Jesús alackꞌalhtailh.
Alacjuni:
―Slivasalh ju iclajunau.
Ni vasalh quilalhilaksiyau chai ni jantu va tam tam nonatꞌit pus laich anaviyaꞌitꞌit vachuꞌ tachi ju xacꞌulhtui ju anuꞌ xaqꞌuiu higo.
Para jantu va yuchi.
Vachuꞌ lai aꞌunitꞌit ju ani talhpa:
“Akꞌostꞌich.
Apꞌinchich lacaꞌalama”.
Chai ni chunch ju aꞌunitꞌit pus chunch ju calalh.
22 Pus tachi chun ju asqꞌuiniyaꞌitꞌit ju Dios acsni atꞌachꞌivininaꞌitꞌit pus amaklhtꞌayananaꞌitꞌit.
Va yuchi ni slivasalh alhilacꞌapꞌitꞌit ju yuchi.
Alin ixtachaput ju Jesús
23 Chai astan ju Jesús tanucha lacakꞌai ixpujitatꞌan ju istꞌaꞌisraelitanin chai tsuculh amalaniniꞌ ju lapanacni.
Pus ju acsnich talakmilh ju xalackꞌajin palijni chai ju papaninch chai tajuni:
―Tis chavaich ju xajunan ni laich anaviyaꞌ ju ani taxtokni.
24 Chai ju Jesús chani alhikꞌalhtailh:
―Ju quitꞌin vachuꞌ aclasacmiyau lakatam chivinti.
Chai ni aquilajunau pus ju acsnich vachuꞌ aclajunau tichi chavaich ju xaquijuni ni acnaviyaꞌ ju ani taxtokni.
25 Pus tis chavaich ju xamalakachayachilh ju Xivan amakpaxanaꞌ.
Ja yuchi ju Dios u yuꞌunch ju lapanacni.
Pus ju acsnich ju anuch lapanacni talaclajuni ixlhiꞌakstuꞌan:
―Pus ni canaju ni Dios ju xamalakachayachilh pus laich aquintajunin tajuch ni jantu xalacaꞌiniyau.
26 Chai jantu lai catinaju ni yuꞌunch ju lapanacni ju xatamalakachayachilh ni na atalhoniyau ju lapanacni ni ixchuxꞌan talhimispai ju Xivan ni ixnajun ixchivinti Dios.
27 Pus yuchi chani talhijuni ju Jesús:
―Jantu iccꞌatsayau.
Pus ju acsnich ju Jesús alacjuni:
―Pus nin quitꞌin jantu actilajuniu tichi chavaich ju xaquijuni ni acnavi tachi chun ju ani taxtokni.
Ixtꞌiyunꞌan tsꞌalan axakꞌalai ju ixpaiꞌan
28 Chai ju Jesús vachuꞌ alacjuni:
―Tꞌas nonatꞌit.
Ju pumatam lapanac ixꞌalin ixtꞌiyunꞌan istsꞌalan.
Pus ju yuchi lakꞌalh ju xakꞌai istsꞌalh chai juni:
“Quintsꞌalh.
Apꞌinchich ju chavai chꞌalhcatnaꞌ laquimpuꞌuvas”.
29 Para ju anuꞌ tsꞌalh juni ni jantu catiꞌalh.
Para astan tamch xapastꞌacꞌa chai alh.
30 Chai astan ju xapai lakꞌalh ju salacatꞌicstꞌi chai vana va chun ju juni ju yuchi.
Chai ju yuchi junilh ju ixpai ni canach.
Para jantu alh.
31 Pus aquilajunau.
Ju anuꞌ ixtꞌiyunꞌan tsꞌalan tis chavaich ju xanavini ixkꞌachat ju ixpai.
Pus ju xalackꞌajin palijni chai ju papanin tajuni:
―Yuchi ju xakꞌai.
Pus ju acsnich ju Jesús alacjuni:
―Slivasalh ju iclajunau.
Ju achꞌinin chai ju tꞌacunin ju va lacati ixtatꞌajun palai lai catatanuyaꞌ junta lhinajun ju Dios.
Palai jantu ju uxijnan.
32 Iclajunau chunch ni quilachilh ju Xivan amakpaxanaꞌ.
Chai ju yuchi naulh ta yu laich sok catatsuculh ju lapanacni para jantu xaqꞌuiclacꞌaꞌiyatꞌit ju uxijnan.
Alai yuꞌunch ju talacaꞌinilh ju achꞌinin chai ju tꞌacunin ju va lacati ixtatꞌajun.
Chai ju uxijnan laktsꞌintꞌatꞌit ni tam xajun isꞌatsucuntiꞌan para ixlaquilhtu jantu xamacꞌonatꞌit ju miꞌalactuꞌuntiꞌan ni laich ixlacꞌaꞌitꞌit vachuꞌ.
Ju Jesús puꞌamalani ju lapanacni ju makchꞌalhcatni lapanacni
33 Akꞌasmatꞌit vachuꞌ ju ani chivinti ju iclajumputunau.
Ixꞌalin pumatam lapanac ju ixꞌalin ixlacatꞌun.
Chai ju yuchi chꞌanlh ju xaqꞌuiu uvas.
Chai coralhnu lacakꞌex.
Chai pokꞌajꞌula junta camaxtunicanaꞌ ju xaxcan uvas.
Chai yaulh lakatam chakaꞌ ju na putankꞌai ni laich capulhistaccalh ju ixpuꞌuvas.
Chai acsni navikꞌolh pus amachꞌixtaknilh ju makchꞌalhcatnin.
Chai ju yuchi alh makat.
34 Chai acsni chaꞌalh ju avilhchan ni chalh ju uvas pus ju anuꞌ amatꞌun amalakachanilh ju ixlapanacni ju anuꞌ makchꞌalhcatnin ni cataꞌalh amaklhtayanin ju xalhiꞌut tachi ju ixꞌalhitꞌatakꞌoxitach.
35 Para ju anuch makchꞌalhcatnin tachꞌapalh ju xalapanacni.
Ju pumatam talakanekma.
Ju apumatam tamakni.
Chai ju apumatam talacatꞌalhma.
36 Chai aktam ju amatꞌun amalakachachokopa ju aliꞌin.
Palai ilhuꞌan.
Para vana va chun ju tatꞌalapa.
37 Chai ju ixpuꞌaclanch malakachalhch ju istsꞌalh.
Va ixnajun ni catatalhoniyaꞌ ju istsꞌalh.
38 Para ju anuch makchꞌalhcatnin acsni talaktsꞌilh ju istsꞌalh ju amatꞌun talaclajuni sia yuꞌunch:
“Yuchach ju ani ju amanavin cajunaꞌ acsni caniyaꞌ ju ixpai.
Atꞌatꞌitch.
Camakniuch chai quiꞌanuchꞌan cajunaꞌ ju ani puꞌachꞌananti”.
39 Pus tachꞌapalh.
Tatantamacxtulh lacapuꞌuvas.
Chai tamaknilh.
40 Chai ju Jesús acsni nonkꞌo ju ani chivinti chani ajuni ju xalackꞌajin palijni chai ju papanin:
―Tꞌas nonatꞌit.
Acsni caminchokoyaꞌ isꞌakstu ju amatꞌun tas catꞌalayach ju anuch makchꞌalhcatnin.
41 Chai ju yuꞌunch tajuni ju Jesús:
―Pus nin lacatsꞌunin jantu catiꞌamapaini.
Alai caꞌamaknikꞌoyaꞌ chai aliꞌin ju caꞌamachꞌixtaknichokoyaꞌ ju anuꞌ puꞌuvas.
Caꞌamachꞌixtakniyaꞌ ju lapanacni ju cataxtakniyaꞌ ju xalhiꞌut tachi ju caꞌalhitꞌatakꞌoxiyach.
42 Pus ju acsnich ju Jesús alacjuni:
―Ja va jantu tavanan laktsꞌintꞌatꞌit ixchivinti Dios ju tsꞌokcanta junta ma chani najun:
Ju anuꞌ chiux ju tasacmakꞌalh ju ixyonin chakaꞌ
yuchach ju valhch ju chiux ju makꞌastumucꞌacanta chakaꞌ junta tsꞌokcanta tuchi cꞌatach ju yocanta.
Yuchi ju Dios ju navilh ju chunch.
Chai acsni iclaktsꞌinau pus na kꞌai lhamakꞌan iclhiulayau.
Chun ju najun laꞌixchivinti Dios.
43 Chai ju uxijnan ni quilasamakꞌantauch tachi ju talalh ju anuꞌ akꞌexinin pus yuchi jantu lai vana catilhilhinaulh ju Dios lamilhiꞌuxijnan.
Alai caꞌalhijunaꞌ ju aliꞌin lapanacni ju vasalh catasuyaꞌ laꞌisꞌatsucuntiꞌan ni talhilaksi ju Dios.
44 Acsni quintasamakꞌan ju lapanacni pus va ixtꞌachunch junita tachi acsni pukꞌalhkꞌoscan ju tuꞌuꞌ chiux chai tacꞌatsanican.
Chai acsni icꞌaꞌulani ju lapanacni ju ixtalakꞌalhinꞌan pus va ixtꞌachunch junita tachi acsni catantꞌalhma ju tuꞌuꞌ kꞌai chiux chai jantu tavanan lai kꞌostolai.