―Junta lhinajun ju Dios chunch ju tapasai tachi ju tapasalh laꞌisꞌatsucunti pumatam lapanac ju ixꞌalin ixpuꞌuvas.

Pus ju yuchi vatsꞌisin alh apuxconaꞌ ju catapꞌuxnilh ju ixꞌuvas.

2 Chai acsni atꞌatakꞌoxilh ju makchꞌalhcatnin ni caꞌamapalhniyaꞌ tachi ju aktsꞌiya talhajai ju tamin avilhchan pus amalakachalh laꞌixlhichꞌalhcat.

3 Pus ju amatꞌun taxtuchokolh tachi lakanajatsi hora vatsꞌisin chai alaktsꞌinchokolh ju aliꞌin ju va ixtavilanancha laclhitamau.

Matiꞌ ixjunita ixlhichꞌalhcatꞌan.

4 Chai alacjuni:

“Apꞌitꞌit vachuꞌ ju uxijnan laquilhichꞌalhcat.

Chai aclamapalauch tachi ju kꞌoxich cava”.

Pus ju yuꞌunch taꞌalh.

5 Chai ju anuꞌ amatꞌun aktam taxtuchokolh tachi ju kꞌatuncuj chai aktam tachi ju lakatꞌutu hora atokꞌoxanaꞌ.

Chai vana va chun amalakachalh ju lapanacni laꞌixlhichꞌalhcat.

6 Chai acsni taxtuchokopa tachi ju lakaquis hora atokꞌoxanaꞌ pus alhitajuchokopa ju aliꞌin ju matiꞌ ixjunita ju ixlhichꞌalhcatꞌan.

Chai alacjuni:

“Tajuch ni va anich ju vilatꞌit ju tontacuj ni jantu tuꞌuꞌ ju naviyatꞌit”.

7 Chai ju yuꞌunch tajuni:

“Pus jantu xamatiꞌ quintaxtaknitan ju lhichꞌalhcat”.

Pus ju acsnich ju anuꞌ amatꞌun alacjuni:

“Apꞌitꞌit vachuꞌ ju uxijnan laquilhichꞌalhcat.

Chai aclamapalau tachi ju kꞌox cava”.

8 Pus taꞌalh.

Chai astan acsni tokꞌoxalh pus ju amanavin lhichꞌalhcat chani junilh ju ixlapanac ju ixꞌamapalai ju ixtachꞌalhcatnan:

“Atꞌasaninch ju makchꞌalhcatni lapanacni.

Amapꞌalhtꞌich ixꞌavilhchanꞌan.

Apꞌutꞌaiꞌulatꞌi ju astan tachaꞌalh.

Apꞌumaclayaꞌich ju pꞌulhnan xatachaꞌan”.

9 Pus ju acsnich tachincha ju ixtachaꞌanta ju lakaquis hora atokꞌoxanaꞌ chai axtaknicalh tachi ju aktsꞌiya lhajacan acsni chꞌalhcatnancan tam avilhchan.

10 Chai astan acsni tamilh ju pꞌulhnan ixtachaꞌanta pus ju yuꞌunch ixtanajun ni ca palai laklhu camapalhcanaꞌ.

Para vana va chun axtaknicalh tachi ju aktsꞌiya lhajacan ju tamin avilhchan.

11 Pus acsni taꞌamaklhtayanalh ixtalhajaꞌan pus tatalhkꞌamnilh ju anuꞌ amanavin lhichꞌalhcat.

12 Tajuni:

“Ju ani ju astan xatachinacha va tam hora xatachꞌalhcatnan para ni vana va chun ju xaꞌamapꞌalhpꞌalai tachi ju xaquilamapalau ju quijnan ju tontacuj xacchꞌalhcatnanau chai xaquitanekꞌan ju ascꞌunuꞌ”.

13 Para ju amanavin lhichꞌalhcat chani junilh pumatam sia lhiyuꞌunchach.

“Amigo.

Jantu talakꞌalhin ju icnaviyan.

Ja jantu chun iclalhitꞌakꞌoxiu ni alhaꞌayaꞌ tachi ju aktsꞌiya lhajacan ju tamin avilhchan.

14 Achꞌapꞌach ju mintalhaja chai apꞌinchich.

Vachuꞌ chun icmapalhputun ju astan xatachinacha tachi ju xacmapalanch ju uxintꞌi.

15 Ja jantu lai acpunavi ju quiꞌanuꞌ tachi ju iclacasqꞌuinch.

Pus ju uxintꞌi ca va lhacchꞌipꞌin ju aliꞌin ni kꞌox xacꞌamapalai”.

Chunch ju junilh ju amatꞌun.

16 Pus vana va chunch cajunaꞌ ju lactꞌiyan.

Caꞌalinaꞌ lapanacni ju makꞌanch quintalhilaksita.

Para jantu lai actinaulh ni ixlhiyuchi palai kꞌox caꞌalhilhiulacanaꞌ.

Chai caꞌalinaꞌ lapanacni ju jantucaꞌ makꞌan quintalhilaksita.

Para jantu lai actinaulh ni ixlhiyuchi palai jantu kꞌox caꞌalhilhiulacanaꞌ.

Pus tachi chun ju atꞌasanilh ju Dios ni laich catatakꞌalhtaxtuyaꞌ na lacatsꞌunin sia yuꞌunch ju asacxtucalh ni xalackꞌajin catajunaꞌ ju anch.

17 Ju Jesús acsni ixꞌanta ju xati ju lakꞌachakꞌan Jerusalén pus na lhu lapanacni ju ixtatꞌaꞌanta.

Para ju Jesús atꞌasanilh ixpumacautꞌuiꞌan ju ixꞌamamakaꞌui chai akꞌailhiꞌalh alacatam.

Chai chani ju ajuni:

18 ―Alaktsꞌintꞌit.

Ju chavai cachaꞌanau ju Jerusalén.

Chai ju anch acmakꞌaxtakcanaꞌ laꞌixmacaꞌan ju xalackꞌajin palijni chai ju yuꞌunch ju na talhatalanininta ju milhamapꞌaksinꞌan.

Quitꞌin ju quimalakachatachilh Dios ni lapanac actsucuyaꞌ ju ani.

Chai ju yuꞌunch aquintalhinonaꞌ quimaknica.

19 Chai ju yuꞌunch aquintamakꞌaxtꞌakꞌaꞌ laꞌixmacaꞌan ju jantu quintꞌaꞌisraelitanin tajunita.

Chai ju yuꞌunch aquintalhitsꞌiꞌinaꞌ.

Chai aquintalakanekmayaꞌ.

Chai aquintamaquilhtayaꞌ.

Para ju ixlhilakatꞌutu avilhchan aclokꞌonchokoyaꞌ.

20 Ju acsnich lakchincha ju Jesús ixnatiꞌan ju istsꞌalan ju Zebedeo.

Yuꞌunch ju Jacobo chai ju Xivan.

Alactꞌachaꞌalh ju istsꞌalan.

Chai ju ixnatiꞌan taꞌaktsokotanilh ju Jesús chai tapaininilh.

21 Chai ju Jesús junich:

―Tijuch ju lacꞌasqꞌuin.

Chai ju yuchi juni:

―Acsni alhinonaꞌ ju uxintꞌi anauch ni catatavi vachuꞌ anch ju ani ixtꞌiyunꞌan quiꞌaskꞌatꞌan.

Ju pumatam catolaꞌ lamilhicana chai ju pumatam lamilhimacx.

Ju chunch ni cacꞌatsacanaꞌ ni xalackꞌajin tajunita.

22 Para ju Jesús alacjuni:

―Ju uxijnan jantu cꞌatsꞌayatꞌit tuchꞌi quilasqꞌuiniyau.

Ja lai amakꞌalhkꞌajnanaꞌitꞌit tachi ju acmakꞌalhkꞌajnanaꞌ ju quitꞌin.

Pus ju yuꞌunch tajuni ni calayach.

23 Chai ju Jesús alacjuni:

―Slivasalh chunch ju amakꞌalhkꞌajnanaꞌitꞌit tachi ju acmakꞌalhkꞌajnanaꞌ ju quitꞌin.

Para jantu quitꞌin ju acnonaꞌ tichi chavaich ju catolaꞌ laquilhicana chai laquilhimacx.

Yuꞌunch ju catatolaꞌ anch ju asacxtuta ju quimpai.

24 Pus ju ixpumacauꞌan ixꞌamamakaꞌui ju Jesús acsni takꞌasmatlh tuchi ixtajunita ju Jesús ju ixtꞌiyunꞌan alakꞌavin pus na talhitalhkꞌamalh.

25 Para ju Jesús alactꞌasanilh chai alacjuni:

―Ju uxijnan cꞌatsꞌayatꞌit ni slivasalh na pꞌas talhinajun ju xaꞌucxtin lakatamin kꞌai lacatꞌun.

Chai vachuꞌ na alhimakchapui ju lapanacni ju salactꞌicstꞌi ucxtinin ju amalakachacan.

26-27 Para jantu chun ju alatꞌit ju uxijnan.

Alai yuchi ju palai xakꞌai jumputun lamilhiꞌuxijnan tasqꞌuini ni calhitalacasu tachi ju tam xalapanac.

28 Chunch ju alatꞌit tachi ju iclai ju quitꞌin ju quimalakachatachilh Dios ni lapanac actsucuyaꞌ ju ani.

Ju quitꞌin jantiyuꞌ iclhiminta ni va aquintachꞌalhcatnanilh ju lapanacni.

Alai iclhiminta ni laich acꞌalacchꞌalhcatnaniyaꞌ ju lapanacni chai laich acxtꞌakꞌaꞌ ju quiꞌatsucunti ixꞌamalakxtuca lhu ju lapanacni.

29 Acsni alactꞌataxtucha ju Jesús ju lakꞌachakꞌan Jericó ju ixꞌamamakaꞌui pus na lhu lapanacni tachꞌakꞌokꞌalh vachuꞌ.

30 Chai ixtavilanalh laꞌixquilhtuꞌ ti ixtꞌiyunꞌan alakꞌachꞌixnin.

Chai ju yuꞌunch acsni takꞌasmatlich ni antachalh ju Jesús pus lana pꞌas tachivinilh.

Tajuni:

―Jesús.

Istsꞌalhꞌat ju kꞌai ucxtin David.

Aquilaꞌaktaijuch lamapainin.

31 Para ju lapanacni ju ixtatꞌaminta ju Jesús ju lacati takꞌailh.

Tajunilh ni va sek catatavi.

Para va apalai pꞌas ixtalacchivinin ju yuꞌunch.

Tajuni ju Jesús:

―Jesús.

Istsꞌalhꞌat ju kꞌai ucxtin David.

Aquilaꞌaktaijuch lamapainin.

32 Pus ju acsnich ju Jesús taya chai alactꞌasanilh ju anuꞌ ixtꞌiyunꞌan alakꞌachꞌixnin chai alacjuni:

―Tijuch ju lacꞌasqꞌuinatꞌit ju aclanaviniu ju uxijnan.

33 Chai ju yuꞌunch tajuni:

―Quiꞌucxtin chach icꞌalacꞌavanau.

34 Pus ju acsnich ju Jesús amapaini ju yuꞌunch.

Chai alacchꞌapanilh ixlakchulhꞌan.

Pus lana tapuꞌalacꞌavanalh chai tachꞌakꞌokꞌalh ju Jesús.