Jesús mavasalai ixlacata ju alamaconanta
19
Pus ju Jesús acsni nonkꞌo junima chivinti pus taxtulh ju xaꞌestado Galilea.
Alh ju xaꞌestado Judea lhimakꞌantacutni ju kꞌai xcan Jordán.
2 Chai na lhu lapanacni tachꞌakꞌokꞌalh chai ju Jesús palai anavicha ju takꞌankꞌanin.
3 Chai vachuꞌ talakchincha ju aliꞌin fariseonin.
Va ixtapuxconiputun ixtalakꞌalhin chai yuchi chani talhisacmilh:
―Ja lhijun ju lhamapꞌaksin ni calhimacaulh ju ixꞌamachakaꞌ tam lapanac va ixlacaꞌatalh tuꞌuꞌ lacatsꞌunin ju jantu kꞌox lhiulai.
4 Chai ju Jesús chani akꞌalhtailh:
―Ja va jantu laktsꞌintꞌatꞌit laꞌixchivinti Dios ju tsꞌokcanta junta najun ni yuchi ju Dios ju anavilh ju pꞌulhnan lapanacni.
Chai navilh pumatam tsꞌalh chai pumatam atsiꞌ.
5 Chai ju Jesús vachuꞌ alacjuni ni alacatam laꞌixchivinti Dios ju tsꞌokcanta najun ni yuchi calhimaconach ju tam lapanac ju ixpai chai ixnati chai catꞌatsucuyach ju ixꞌamachakaꞌ.
Chai ju anuꞌ ixpumatꞌuiꞌan tachi ju va pumatam catajunaꞌ.
6 Chai tailhiꞌalh ixchivinti ju Jesús.
Alacjuni:
―Pus jantuch vana pumatꞌui lapanacni tajunita.
Alai tachi va pumatam lapanac tajunita.
Pus ju malakxtokta ju Dios jantu catitalaclhvaklh ju lapanacni.
7 Pus ju acsnich chani tajuni ju fariseonin:
―Pus ni chunch ju lhilhcata ju Dios tajuch ni va naulh ju Moisés ni caxtaknicalh pumatam chakoꞌulh lakatam alhiqui ju pulamacau chai camacaulh.
8 Chai ju Jesús alacjuni:
―Va ixlacata ni na pꞌas ju miꞌalhunutꞌan yuchi lhinaulh ju Moisés ni laich amacꞌaꞌuntꞌit ju miꞌamachakaꞌan.
Para ju laꞌixputaiꞌulacan ju lacamunutpaꞌ jantu chun ixjunita.
9 Chai iclajunau ni va acsnich ju lai macꞌonatꞌit ju miꞌamachakaꞌan ni va tꞌatꞌajun apumatam jokꞌat.
Para ni va kꞌaya macꞌonatꞌit ju miꞌamachakaꞌan chai tꞌatsꞌucꞌuchꞌokꞌoyaꞌitꞌit apumatam pus alactuꞌunti ju naviyatꞌit.
Chai va tichi chavaich ju catꞌatsucuchokolh ju va maconcanta vachuꞌ alactuꞌununch.
10 Pus ju acsnich ju ixꞌamamakaꞌui tajuni:
―Pus ni chunchach lhiꞌucxꞌanta ixlacata ju jokꞌat chai ixꞌamachakaꞌ pus ca palai kꞌox ni jantu tavanan catamakꞌaxtoklh ju jokꞌat.
11 Para ju Jesús alacjuni:
―Para jantu si lai catitamuctaxtulh tachi ju xanonatꞌit.
Va yuꞌunch ju axtaknita ixtachaputꞌan ju Dios ni lai catamuctaxtulh.
12 Pus alin lapanacni ju takꞌalhinita ixlacatunaꞌan tus laꞌixpulakꞌauꞌan chai yuchi jantu lai catalhitamakꞌaxtꞌokꞌaꞌ.
Chai alin lapanacni ju alakꞌalhinita ixlacatunaꞌan ixtꞌalapanac ni jantu lai catitamakꞌaxtoklh.
Chai alin lapanacni ju va isꞌakstuꞌan tanajun ni jantu catamakꞌaxtꞌokꞌaꞌ ni va jantu talacasqꞌuin ni tuꞌuꞌ caꞌasastuclh acsni taꞌajuni ju lapanacni ixlacata ju Jesús.
Pus ju laich camuctaxtulh ju chunch pus chach navi.
Ju Jesús sqꞌuinlh kꞌox isꞌatsucuntiꞌan ju askꞌatꞌan
13 Ju acsnich alhiminicalh ju Jesús ju askꞌatꞌan ni caꞌamokslanilh ixmacaꞌ laꞌixlacatunaꞌan chai catapaininilh ju Dios ixlacataꞌan ni laich kꞌox catatsucuyaꞌ.
Para ju ixꞌamamakaꞌui ju Jesús taꞌalackꞌaima ju ixtalhichaꞌan isꞌaskꞌatꞌan.
14 Para ju Jesús alacjuni:
―Amacꞌaꞌuntꞌit ju askꞌatꞌan.
Chach quintalakmilh.
Jantu asaspꞌitꞌit ni quintalhilaksich ju yuꞌunch.
Chai va tichi chavaich ju aquilhilaksiyaꞌ tachi ju quintalhilaksi ju ani tayanalh askꞌatꞌan yuchi ju laich catanuyanta ju lactꞌiyan.
15 Pus ju acsnich ju Jesús amokslanilh ixmacaꞌ laꞌixlacatunaꞌan ju askꞌatꞌan.
Astan taxtuchokolh ju anch.
Pumatam makꞌaliꞌ tꞌachivinilh ju Jesús
16 Chai chincha pumatam tsꞌalh chai chani juni ju Jesús:
―Amamakaꞌunuꞌ ju uxintꞌi na kꞌox lapanacꞌat.
Aqꞌuiꞌunch.
Tamalhch ju kꞌoxich ju acnavi ni caꞌalilh ju quiꞌatsucunti ju conkꞌalhiyanta ju lactꞌiyan.
17 Chai ju Jesús juni:
―Ju uxintꞌi ni naꞌun ni va iclapanac pus tajuch ni qꞌuiꞌunich ni ickꞌox.
Jantu xamatiꞌ ju kꞌox cava.
Va yuchi ju Dios.
Para ni pꞌacxampꞌutꞌun ju miꞌatsucunti ju conkꞌalhiyanta lactꞌiyan pus amuctꞌaxtꞌutꞌi tachi ju najun lacalhamapꞌaksin.
18 Chai ju anuꞌ tsꞌalh juni:
―Tamalhch.
Chai ju Jesús juni:
―Jantu amaknitꞌi xamatiꞌ.
Jantu atꞌatsꞌucꞌu ju jantu miꞌamachakaꞌ.
Jantu akꞌalhaun.
Jantu anauch taꞌaklhtamat chivinti ixlacata apumatam.
19 Atꞌalhonin ju mimpai chai minatich.
Chai amapꞌainitꞌi ju mintꞌalapanac tachi ju va jun miꞌakstu ju mapꞌainichꞌokꞌocꞌan.
20 Chai ju tsꞌalh juni:
―Tachi chun ju ani icmuctaxtukꞌota tus quilhitalacatꞌicstꞌin.
Tijuch aliꞌ ju quincꞌacxni.
21 Chai ju Jesús juni:
―Pus ni vasalh lacꞌasqꞌuin ni jantu tuꞌuꞌ camakꞌancꞌacxniyan ni laich amaklhtꞌayananaꞌ ju atsucunti ju jonkꞌalhita pus aꞌinchich.
Astꞌachich ju miꞌalinta chai axtꞌakniyaꞌich ju quilhpatinin tachi chun ju amakꞌaixtꞌokꞌaꞌ.
Ju chunch caꞌalinach ju mimakꞌalit ju lactꞌiyan.
Chai acsni anavikꞌoyaꞌ ju chunch pus atꞌatꞌich.
Aqꞌuinchꞌakꞌokꞌayaꞌich.
22 Para ju anuꞌ tsꞌalh acsni kꞌasmatlh ju ani chivinti lana amakꞌaniniꞌalh ni na lhu ixꞌalin ju ixmakꞌalit.
23 Ju acsnich ju Jesús chani alacjuni ju ixꞌamamakaꞌui:
―Slivasalh ju iclajunau.
Na kꞌox lhixcai ni lai catanu ju lactꞌiyan junta lhinajun ju Dios tam makꞌaliꞌ.
24 Aktam iclajunchokopalau ni na xcai ni lai catanu lactꞌiyan tam makꞌaliꞌ.
Tachi ju tuꞌuꞌ camello ni jantu lai catitapasalh junta tilhucucu ju macscat pus vana va chun ju tam makꞌaliꞌ.
Ju yuchi jantu lai catiꞌalh ju lactꞌiyan.
25 Pus ju ixꞌamamakaꞌui acsni takꞌasmatlh ju ani chivinti slivasalh na talhamakꞌaninilh.
Chai tanaulh:
―Pus tis chavaich ju lai catakꞌalhtaxtulh.
26 Para ju Jesús alaktsꞌilh chai alacjuni:
―Pus ju va lapanac aktsꞌiya palai tuꞌuꞌ lhiulai ju ixmakꞌalit.
Palai jantu ixtaxtokni ju Dios.
Para ju Dios jantu tuꞌuꞌ xcai lhiulai.
Ju yuchi lai mapaxani ixꞌatalacpastꞌacꞌat tam lapanac.
27 Pus ju acsnich ju Pitaluꞌ chani juni ju Jesús:
―Pus ju quijnan icmaconkꞌotauch chux quintaxtokni quincꞌan chai iclachꞌakꞌokꞌatauch.
Ju chavai tijuch ju aclhajayau ju quijnan.
28 Chai ju Jesús juni:
―Pus acsni catasastꞌichokoyaꞌ chux ju lacamunutpaꞌ pus actolaꞌ laquimpuꞌucxtin ju slivasalh na kꞌox cajunaꞌ.
Quitꞌin ju quimalakachatachilh Dios ni lapanac actsucuyaꞌ ju ani.
Chai ju uxijnan ni quilachꞌakꞌokꞌayauch ju chavai pus ju acsnich vachuꞌ atꞌolaꞌitꞌit lacalakacautꞌui puꞌucxtin.
Chai alhiꞌunaꞌitꞌit ju ixquilhmaccautꞌuiꞌan ju mintꞌaꞌisraelitanin.
29 Pus va tichi chavaich ju calhimacaulh ju ixchakaꞌ u tam ixlakꞌau tsꞌalh u tam ixlakꞌau atsiꞌ u tam ixpai u tam ixnati u tam ixꞌamachakaꞌ u isꞌaskꞌatꞌan u ixlacatꞌun va ixlacata ni quinchꞌakꞌokꞌai pus palai lhu caxtaknicanaꞌ.
Jantu chun tachi ju macaulh ju quilacata.
Chai vachuꞌ caꞌalinaꞌ isꞌatsucunti ju conkꞌalhiyanta ju lactꞌiyan.
30 Para ju lactꞌiyan caꞌalinaꞌ lapanacni ju makꞌanch xaquintalhilaksi.
Para jantu lai actinaulh ni va ixlhiyuchi palai kꞌox caꞌalhilhiulacalh.
Palai jantu ju aliꞌin.
Chai vachuꞌ cataꞌalinaꞌ lapanacni ju jantucaꞌ makꞌan xaquintalhilaksi.
Para jantu lai actinaulh ni va ixlhiyuchi palai jantu kꞌox caꞌalhilhiulacalh.
Palai kꞌox caꞌalhiulacalh ju aliꞌin.