Ju Jesús najun tichi chavaich ju palai xakꞌai
18
Ju acs avilhchan talakchaꞌalh ju Jesús ixchuxꞌan ju ixꞌamamakaꞌui chai tajuni:
―Tis chavaich ju palai xakꞌai cajunaꞌ acsni calhinonaꞌ ju Dios.
―Slivasalh ju iclajunau.
Ni jantu amapꞌaxayaꞌitꞌit ju miꞌatsucuntiꞌan chai ni jantu ixlhichux ju miꞌalhunutꞌan aꞌuntꞌit tachi ju tam askꞌatꞌa ju jantu lhitakꞌayai ju tuꞌuꞌ pus jantu tavanan lai atꞌitꞌanutꞌit junta lhinajun ju Dios.
4 Pus va tichi chavaich ju jantu tuꞌuꞌ calhitakꞌayayaꞌ tachi ju lai ju ani ya askꞌatꞌa pus yuchach ju palai xakꞌai cajunaꞌ junta lhinajun ju Dios ju lactꞌiyan.
5 Chai va tichi chavaich ju lhikꞌach caꞌamaklhtayananaꞌ ju tam quilapanac ju jantu tuꞌuꞌ lhitakꞌayai tachi ju lai ju ani ya askꞌatꞌa pus tachi ju va jun quitꞌin ju quiꞌamaklhtayanan.
Jantu xcai ni alactuꞌununcan
6 Va tichi chavaich ju camakꞌalhkꞌosuyaꞌ tam xamatiꞌ ju jantucaꞌ kꞌox quilhilaksi pus palai kꞌox caꞌixva ni caꞌixpixtuchꞌimucꞌacalh ju tsasnatpuchꞌipi chai caꞌixmacaꞌancalh junta palai talhman lacaꞌalama acsni tucaꞌ ixmakꞌalhkꞌosui tam xamatiꞌ.
7 Painiꞌitnich ju lapanacni ju tatꞌajun ju ani lacamunutpaꞌ ni aktsꞌiya na alin ju pukꞌalhkꞌoscan.
Para painich ju anuꞌ lapanac ju camakꞌalhkꞌosu apumatam.
8 Pus ni pꞌalactꞌuꞌunumpꞌutꞌunatꞌit ju mimacaꞌan pus jantu anavitꞌit.
U ni anch ju pꞌimpꞌutꞌunatꞌit junta akꞌalhkꞌosaꞌitꞌit pus jantu apꞌitꞌit ju anch.
Alai alatꞌit tachi ju va chꞌakxpꞌuxtꞌatꞌit chai makꞌantꞌatꞌit ju mimacaꞌan u minchꞌajaꞌan.
Pus palai kꞌox cava ni atꞌanuyaꞌitꞌit ju lactꞌiyan mas va lakatamch ju mimacaꞌan u minchꞌajaꞌan.
Palai jantu kꞌox cava ni apꞌacxantꞌit chux lakatꞌui mimacaꞌan u minchꞌajaꞌan para va apꞌumacꞌapꞌincꞌantꞌit ju lacajipi.
9 U ni yuchi ju laktsꞌimpꞌutꞌunatꞌit ju tamalactuꞌuniyan pus jantu alaktsꞌintꞌit.
Alai alatꞌit tachi ju va maxtꞌutꞌatꞌit chai makꞌantꞌatꞌit ju milakchulhꞌan.
Pus palai kꞌox cava ni atꞌanuyaꞌitꞌit ju lactꞌiyan mas va lakatamch ju milakchulhꞌan.
Palai jantu kꞌox cava ni caꞌalilh chux lakatꞌui ju milakchulhꞌan para va apꞌumacꞌapꞌincꞌantꞌit ju lacajipi.
Ju borrego ju istsꞌankꞌata
10 Jantu tavanan ju va jantu tuꞌuꞌ alhiulatꞌit ju uxijnan tam xamatiꞌ ju jantu tuꞌuꞌ lhiulacan ju ani lacamunutpaꞌ.
Iclajunau chunch ni va tachi tayanancha lactꞌiyan ju anquilhnin ju taꞌalhistꞌacꞌa ju yuꞌunch.
Vanin tayanalh junta vi ju quimpai.
11 Chai ju quitꞌin yuchi iclhimilh ju ani ni laich acꞌamakꞌalhtaxtuyaꞌ ju istatsꞌankꞌata.
Quitꞌin ju quimalakachatachilh ju Dios ni lapanac actsucuyaꞌ ju ani.
12 Pus tꞌas nonatꞌit.
Ju tam xamatiꞌ ni capacxalh tachi tam cientos ixborregojni chai ni camakꞌatsꞌankꞌa lactalhpa lakatam ja jantu camacaulh ju noventa y nueve chai caꞌalh puxconaꞌ ju istsꞌankꞌata.
13 Pus slivasalh ju iclajunau.
Acsni calhitajuyach ju yuchi ju istsꞌankꞌata pus palai na calhikꞌachanaꞌ ju yuchi.
Palai jantu ju noventa y nueve ju jantu istatsꞌankꞌata.
14 Pus vana va chun ju mimpaiꞌan ju vilhcha lactꞌiyan.
Ju yuchi jantu lacasqꞌuin ni catsꞌankꞌa nin tachi pumatam ju sia yuꞌunch ju jantu tuꞌuꞌ lhiulacan ju ani lacamunutpaꞌ.
Amacꞌacxanitꞌit ju miꞌalakꞌavin
15 Ju tam milhilakꞌau ni calactuꞌuyan pus inchich juniniꞌ va isꞌakstu.
Chai ni calhilatolaꞌ chai catapaininiyan ni amacꞌacxaniyaꞌ pus aktꞌaiꞌutꞌach ju milakꞌau chai jantu camamakꞌalhkꞌajnicanaꞌ ixlacata ju anuꞌ xanavi.
16 Para ni jantu lhilatolai pus akꞌailhipꞌi tachi pumatam u pumatꞌui.
Ju chunch caꞌalinaꞌ pumatꞌui u pumatꞌutu ju catakꞌasmatniyaꞌ ju ixchivinti.
17 Para ni jantu calhilatolaꞌ laꞌixꞌucxlacapuꞌan ju yuꞌunch pus aꞌunch chux ju tatakꞌaixtꞌokꞌa ni talakꞌayai ju Dios.
Para ni jantu calhilatolaꞌ laꞌixꞌucxlacapuꞌan ju yuꞌunch pus alhimispꞌatꞌich tachi tam xamatiꞌ ju jantu mispai ju Dios.
18 Slivasalh ju iclajunau ju uxijnan ju quilapanacni untꞌatꞌit.
Tachi chun ju jantu alakꞌaꞌiyaꞌitꞌit ni catanavi ju yuꞌunch ju quintalhilaksi pus vachuꞌ jantu calakꞌaꞌiyaꞌ ju Dios.
Chai tachi chun ju alakꞌaꞌiyaꞌitꞌit ni catanavi ju yuꞌunch ju quintalhilaksi pus vachuꞌ calakꞌaꞌiyaꞌ ju Dios.
19 Vachuꞌ iclajunau ju ani.
Ni alin ixtꞌiyunꞌan ju milhiꞌuxijnan ju va lakatam catanaviyaꞌ ixꞌatalacpastꞌacꞌatꞌan ixlacata ju tuchi tasqꞌuiniputun ju Dios pus caꞌanaviniyaꞌ ju quimpai ju vilhcha lactꞌiyan.
20 Pus caꞌanavinicanaꞌ ni quitꞌin ju icꞌalactꞌavi ixpumatꞌui u ixpumatꞌutuꞌan ju tatakꞌaixtokta ni quintalakꞌayai.
21 Pus ju acsnich ju Pitaluꞌ lakꞌalh ju Jesús chai juni:
―Ta pakchux ju acmacꞌacxaniyaꞌ tam quilakꞌau ju quinavinitꞌajun tuꞌuꞌ macxcai.
Ja paktujun.
22 Para ju Jesús junich:
―Jantu icjunan ni va paktujun.
Para tus va ta pakchux.
Pumatam lapanac jantu ixmacꞌacxaniputun ixtꞌalapanac
23 Iclajunau ni alamacꞌacxayaꞌitꞌit ni tamacꞌacxanitan ju Dios.
Pus chani tapasai junta lhinajun ju Dios tachi ju tapasalh laꞌisꞌatsucunti pumatam kꞌai ucxtin ju atꞌanavilh ju aputꞌekꞌenti ju ixtalhiꞌanich.
24 Pus acsni taiꞌulalh ju aputꞌekꞌenti pus lhiminicalh pumatam ju ixlhiꞌanich lakacau milh oro tumin.
25 Para ju yuchi ni jantu lai jintaꞌ ixꞌi ju ixlhimapalhcan pus ju ixꞌucxtin lhinaulh istꞌaca ju yuchi chai ju ixꞌamachakaꞌ chai isꞌaskꞌatꞌan chai tachi chun ju ixtaxtokni.
Chai caxtaknicanaꞌ ju ucxtin mas va yuchi ixtapalh tachi chun ju yuꞌunch.
26 Pus ju acsnich ju anuꞌ lapanac taꞌaktsokotanilh ju ixꞌucxtin chai tapaininilh.
Junich:
“Quiꞌucxtin aqꞌuimpꞌacxacaꞌ lacatsꞌunin chai acmapalhnikꞌoyan chux”.
27 Pus ju anuꞌ ucxtin mapainilh ju anuꞌ ixlapanac chai xacanilh ju ixꞌalhiꞌaninti chai junilh ni laich caꞌanchokolh laꞌixchakaꞌ.
28 Para ju yuchi acsni taxtulh lana tꞌalapakxtoklh apumatam ju vachuꞌ ixlapanac ixjunita ju kꞌai ucxtin.
Chai ju yuchi ixlhiꞌani ixtꞌaxalapanac tam cientos oro tumin.
Pus lana chꞌapalh chai tsuculh pixtupalhitni.
Juni:
“Aqꞌuixtꞌaknin ju qꞌuilhipꞌini”.
29 Pus ju acsnich ju ixtꞌaxalapanac taꞌaktsokotanilh vanin laꞌixchꞌajaꞌ chai tapaininilh.
Junich:
“Aqꞌuimpꞌacxacaꞌ lacatsꞌunin chai acmapalhnikꞌoyan chux”.
30 Para ju yuchi jantu ixpacxamputun.
Alai alh chivimakꞌanaꞌ chai lhinaulh ixtꞌalhnuca tus camapalach ixꞌalhiꞌaninti.
31 Pus ju ixtꞌaxalapanacni talaktsꞌilh tuchi ixnavican chai lana na taꞌamakꞌaninilh.
Pus taꞌalh juninin ju ixꞌucxtinꞌan tachi chun ju ixtalaktsꞌinta.
32 Pus ju acsnich ju ixꞌucxtin tꞌasanilh chai junilh:
“Tis va yuchach ji lapanac ni na va kꞌai unitꞌa.
Tachi chun ju anuꞌ ju xaqꞌuilhipꞌini icxacakꞌo acsni qꞌuintꞌapꞌainininch.
33 Ja jantu vachuꞌ ixlhijun ni ixꞌamapꞌainitꞌi ju mintꞌaxalapanac tachi ju icmapainin ju uxintꞌi ju quitꞌin”.
34 Pus ju acsnich ju ixꞌucxtin slivasalh na talhkꞌamalh.
Chai makꞌaxtaknilh ju lapanacni ju tamamakꞌalhkꞌajni tus acsni jantu mapalhkꞌojui ju ixꞌalhiꞌaninti.
35 Chai ju Jesús tailhiꞌalh ixchivinti.
Alacjuni ju lapanacni:
―Pus chunchach vachuꞌ ju uxijnan.
Ju quimpai ju vilhcha lactꞌiyan vana va chunch catanaviyan ju uxijnan ni jantu amacꞌacxaniyaꞌ ixlhichux miꞌalhunutꞌan ju tam milhilakꞌau ni tuꞌuꞌ catanaviniyan.