Ju Jesús tamch atalacasunilh ju ixꞌamamakaꞌui
17
Pus ixlhilakachaxan avilhchan astan pus ju Jesús atꞌasanilh ju Pitaluꞌ chai ju Jacobo chai ju Xivan.
Ispꞌisekꞌe ju Jacobo.
Alhiꞌalh va isꞌakstuꞌan ju lactalhpa junta na putankꞌai ixjunita.
2 Chai ju anch na tamch ju atalacasunilh ju yuꞌunch.
Pus ju ixꞌucxpuꞌ slapꞌapꞌa ixmaktaji tachi ju avilhchan.
Chai ju ixpumpuꞌ lana na xnapapa va tachi ju tuꞌuꞌ atuncunuꞌ.
3 Chai vachuꞌ talacasucha ju Moisés chai ju Elías ju makꞌanchich ixtatꞌajun.
Ixtatꞌachivininch ju Jesús.
4 Pus ju acsnich chani juni ju Pitaluꞌ ju Jesús:
―Quiꞌucxtin slivasalh na kꞌox ni ani vilau.
Ni lacꞌasqꞌuinch acyoyau akꞌatꞌutu pacꞌatsꞌa.
Akꞌatam ju miꞌanuꞌ.
Akꞌatam ixꞌanu ju Moisés.
Chai ju akꞌatam ixꞌanuꞌ ju Elías.
5 Pus acsni ixtꞌajuncaꞌ chiviniꞌ ju Pitaluꞌ lana tamacatalh ju ataputsꞌi ju kꞌai slamnicꞌa ixjunita.
Aꞌakxtakmakꞌo ju yuꞌunch.
Chai takꞌasmatlh lakatam chivinti ju xaminacha lacaꞌataputsꞌi chai chani xanajun:
―Ju ani ya yuchi ju quintsꞌalh chai na icmapaini.
Slivasalh na iclhikꞌachan ju yuchi.
Yuchach ju akꞌasmatnitꞌit.
6 Pus acsni takꞌasmatlich ju ixꞌamamakaꞌui ju Jesús pus lana tataquilhputalh ni na ixtatalhanan.
7 Pus ju acsnich ju Jesús lana alakꞌalh.
Apicla chai chani alacjuni:
―Akꞌostꞌolatꞌit.
Jantu atꞌalhanantꞌit.
8 Pus ju yuꞌunch acsni taꞌalacꞌavanalh jantu xamatiꞌ talaktsꞌilh.
Va isꞌakstu ju Jesús.
9 Chai acsni ixtatꞌajun takꞌalhtajunin ju anuꞌ lactalhpa pus ju Jesús alhimapꞌaksilh ju ixꞌamamakaꞌui.
Chani ajuni:
―Tun xamatiꞌ tꞌiꞌunitꞌit ju tuchꞌi xalaktsꞌinatꞌit.
Va acsnich ju lai anonaꞌitꞌit acsni aclokꞌonchokoyaꞌ junta acmacnucanaꞌ.
Quitꞌin ju quimalakachatachilh ju Dios ni lapanac actsucuyaꞌ ju ani.
10 Pus ju acsnich ju ixꞌamamakaꞌui tasacmi ju Jesús.
Tajuni:
―Ju yuꞌunch ju na talhatalanininta ju quilhamapꞌaksinꞌan tajuch ni va tanajun ni tasqꞌuini ni pꞌulhnan camilh ju Elías.
Astan ju yuchi ju camalakachayachilh ju Dios.
11 Chai ju Jesús alacjuni:
―Slivasalh tachi ju tanajun ni pꞌulhnan caminaꞌ ju Elías chai calakꞌoxikꞌoyaꞌ tachi chun ju taxtokni.
12 Para iclajunau ni quilachilh ju Elías chai ju lapanacni jantu ixtamispai.
Alai va tanavilh tachi ju talacasqꞌuilh.
Chai vachuꞌ ju quitꞌin aquintamamakꞌalhkꞌajniyaꞌ ju yuꞌunch.
Quitꞌin ju quimalakachatachilh ju Dios ni lapanac actsucuyaꞌ ju ani.
13 Pus ju acsnich ju ixꞌamamakaꞌui tamachakxalh ni yuchi ju Xivan ju amakpaxanaꞌ ju ixꞌalhixakꞌalai tachi ju va Elías ixjunita.
Ju Jesús cꞌuchꞌu pumatam tsꞌalh ju ilhtucuni
14 Pus acsni tachaꞌalh ju Jesús chai ixpumatꞌutuꞌan ixꞌamamakaꞌui junta ixtayanancha ixtalhavat lapanacni pus lana lakmilh ju Jesús pumatam lapanac.
Taꞌaktsokotanilh chai junich:
15 ―Ji quiꞌucxtin lamapainin aꞌaktꞌaiꞌutꞌich ju quintsꞌalh.
Ju yuchi va lhtucuni chai na makꞌalhkꞌajnan.
Na paklhu ju xataꞌaktai ju lacajipi chai lacxcan.
16 Icꞌalhiminita ju mintamamakaꞌun para ju yuꞌunch jantu lai palai tanavi.
17 Chai ju Jesús akꞌalhtayanalh.
Ajunich:
―Tis va yuchach ji lapanacni ni lana jantu lai lacꞌaꞌiyatꞌit.
Lana jantu sok pꞌinatꞌit.
Ja tasqꞌuini ni lana na makꞌan aclatꞌatolau tus acsni amachꞌakxayaꞌitꞌit.
Ja tasqꞌuini ni lana na makꞌan aclachꞌixniu tus acsni alacꞌaꞌiyaꞌitꞌit.
Aquilalhiminiuch ju anuꞌ tsꞌalh.
18 Chai acsni talhiminilh pus ju Jesús kꞌailh ju lhacaticuru ju ixtanun laꞌixlacatuna ju tsꞌalh chai lana taxtulh.
Pus ju tsꞌalh palai va ju acs pantsꞌiquis.
19 Ju astan ju ixtamamakaꞌun talakꞌalh ju Jesús va isꞌakstuꞌan chai tajuni:
―Tajuch ni jantu lai xacxcoxtuyau ju lhacaticuru laꞌixlacatuna ju anuꞌ tsꞌalh.
20 Chai ju Jesús alacjuni:
―Ju uxijnan jantu lai xaxcꞌoxtꞌuyatꞌit ju lhacaticuru laꞌixlacatuna ni jantu vasalh quilalhilaksiyau.
Slivasalh ju iclajunau.
Ni aquilalhilaksiyau mas va lacatsꞌunin pus laich aꞌunaꞌitꞌit ju ani talhpa ni cakꞌoslh.
Caꞌalh alacatam.
Chai chunch ju catapasayaꞌ.
Ni vasalh aquilalhilaksiyau pus va tuchi ixtalakxtuch ju aquilasqꞌuiniyau pus anavinicꞌanaꞌitꞌit.
21 Para ju lhacaticurulhni tachi ju ixtanun laꞌixlacatuna ju anuꞌ tsꞌalh va acsni ju catataxtuyaꞌ acsni atꞌapꞌaininiyaꞌitꞌit ju Dios ju ixlacata chai atꞌascꞌaꞌayaꞌitꞌit.
Ju Jesús aktam nonchokopalai ni camaknicanaꞌ
22 Acsni ixꞌalactꞌaꞌucxuntꞌajun ju Jesús ju ixꞌamamakaꞌui ju xaꞌestado Galilea pus ju Jesús ajunchokopa ni camakꞌaxtakcanaꞌ laꞌixmacaꞌan ju lapanacni.
Yuchi ju malakachatachilh Dios ni lapanac catsucuyaꞌ ju ani.
23 Vachuꞌ ajunilh ni catamakniyaꞌ para ixlhilakatꞌutu avilhchan calokꞌonchokoyaꞌ.
Pus ju ixꞌamamakaꞌui slivasalh na taꞌamakꞌaninilh acsni takꞌasmatnilh ixchivinti ju Jesús.
Ju Jesús mapalalh ixlacata ixpujitatꞌan ju istꞌaꞌisraelitanin
24 Acsni alactꞌachaꞌalh ju Jesús ju ixꞌamamakaꞌui ju lakꞌachakꞌan Capernaum pus talakꞌalh ju Pitaluꞌ ju lapanacni ju ixtapusacꞌa ju tumin ixlacata ju ixpujitatꞌan ju istꞌaꞌisraelitanin.
Tajuni:
―Ju miꞌamamakaꞌunuꞌ ja amapalanan ju tamin cꞌata ixlacata ju quimpujitatꞌan.
25 Pus ju Pitaluꞌ junilh ni aktsꞌiya amapalanan.
Pus ju yuchi tanulh lacachakaꞌ chai ju Jesús lana xakꞌala.
Juni:
―Tꞌas naꞌunch ju uxintꞌi ji Simón.
Ju xalackꞌajin ju ani lacamunutpaꞌ tis chavaich ju tachꞌi junta astꞌanancan.
Ja amachakꞌan anch u yuꞌunch ju alacatam tamintacha.
26 Chai ju Pitaluꞌ juni:
―Pus yuꞌunch ju alacatam tamintacha.
Pus ju acsnich ju Jesús juni:
―Pus ju chunch jantu tasqꞌuini ni catiꞌamapalanalh ju amachakꞌan anch.
27 Para chani alatꞌi ni jantu catatalhkꞌamalh ju lapanacni chai catanaulh ni jantu tuꞌuꞌ lhiulayau ju quimpujitatꞌan.
Inchich lacaꞌatantsꞌin.
Amuyaꞌich ju mimpaklavaꞌin.
Chai amacꞌutꞌuch ju pamata ju pꞌulhnan caquilhtanuyaꞌ ju mimpaklavaꞌin.
Amakꞌalhkꞌayaꞌich chai alhitꞌaꞌuyaꞌich ju tumin.
Achꞌapꞌach.
Alhimapꞌalaꞌich ju quilacata chai ju milacata.