―Ju tokꞌoxai acsni slapulh tasui ju lactꞌiyan pus ju uxijnan nonatꞌit ni kꞌoxich caꞌavananaꞌ ju ani laquintꞌunꞌan.

3 Chai ju vatsꞌisin acsni na slapulh tasui ju ataputsꞌi pus ju uxijnan nonatꞌit ni calayach ju xcan ju ani laquintꞌunꞌan.

Pus ju uxijnan lai machꞌakxayatꞌit ta yu avanan ju lactꞌiyan.

Para va acxpꞌutꞌiyununatꞌit ni nonatꞌit ni jantu lai machꞌakxayatꞌit tuchi nomputun ju lhamakꞌan ju icnavitꞌajun ju chavai.

4 Pus ju lapanacni ju tatꞌajun ju chavai na kꞌai tajunita chai tamacajunta ju Dios.

Chai yuꞌunchach ju tasqꞌuin tuꞌuꞌ lhamakꞌan.

Para jantu catiꞌaxtaknicalh tuꞌuꞌ atumpa.

Va yuchi tachi ju tapasalh laꞌisꞌatsucunti ju Jonás.

Chai acsni naulh ju chunch ju Jesús pus lana amacaulh.

Alh.

5 Pus ju ixꞌamamakaꞌui ju Jesús tatapasalh ju lhimakꞌantacutni ju atantsꞌin chai acsnicaꞌ ju tapastacli ni va ixtacapta ju ixkapavatiꞌan.

6 Pus ju acsnich ju Jesús alacjuni:

―Alaccꞌatsꞌanantꞌit ixlacata ju ixlevaduraꞌan ju fariseonin chai ju saduceonin.

7 Pus ju ixꞌamamakaꞌui talaclajuni sia yuꞌunch:

―Quintajunan chunch ni jantu lhimintau ju tuꞌuꞌ xkapavati.

8 Para ju Jesús cꞌatsa ni chunch ixtalajuni isꞌakstuꞌan chai alacjuni:

―Tajuch ni va lhamakꞌanininatꞌit ni jantu lhitꞌantꞌatꞌit ju tuꞌuꞌ xkapavati.

Na lacatsꞌunin ju quilalhilaksiyau.

9 Ja va jantucaꞌ machꞌakxayatꞌit tuchi nomputun ju lhamakꞌan ju icnavita.

Ja va jantu pꞌastꞌactꞌit ju anuꞌ akxquis vati ju taꞌulh ju lakaquis milh jokꞌatni.

Ja va jantu pꞌastꞌactꞌit ta lakachux tankꞌalin ju sacchꞌokꞌotꞌit.

10 Chai ja va jantu pꞌastꞌactꞌit ju akxtujun vati ju taꞌulh ju lakatꞌatꞌi milh jokꞌatni.

Chai ja va jantu pꞌastꞌactꞌit ta lakachux tankꞌalin ju sacchꞌokꞌotꞌit.

11 Tajuch ni jantu lai machꞌakxayatꞌit ni jantu xaclhichivinin ju tuꞌuꞌ xkapavati acsni iclajunau ni alhicꞌatsꞌanantꞌit ixlacata ju ixlevaduraꞌan ju fariseonin chai ju saduceonin.

12 Pus acsnicaꞌ ju tamachakxa ni jantu va xalevadura ju xkapavati ju lhichivincalh.

Alai ajuni ni calaccꞌatsanalh ixlacata ju ixꞌamalaninti ju fariseonin chai ju saduceonin.

13 Ju Jesús acsni milh vanin ju lakꞌachakꞌan Cesarea Filipo pus asacmilh ju ixꞌamamakaꞌui.

Alacjuni:

―Tas tanajun ju lapanacni.

Tis chavaich quintalhiulai ju quitꞌin ju quimalakachatachilh Dios ni lapanac actsucuyaꞌ ju ani.

14 Chai ju yuꞌunch tajuni:

―Pus ju aliꞌin tanajun ni ma Xivanꞌat ju ixꞌamakpaxanan.

Chai ju aliꞌin tanajun ni ma Elíasꞌat.

Chai ju aliꞌin tanajun ni ma Jeremíasꞌat u akꞌantam makꞌaniya lapanac unitꞌa ju ixnajun ixchivinti Dios.

15 Pus ju acsnich ju Jesús ajunchokopa:

―Chai ju uxijnan tꞌas nonatꞌit.

Tis chavaich ju quilalhiulayau ju quitꞌin.

16 Pus ju Simón Pitaluꞌ naulh:

―Uxintꞌich ju Cristoꞌat ju ixnoncan camalakachatachilh ju Dios.

Istsꞌalhꞌat ju Dios ju lakꞌajunta.

17 Chai ju Jesús juni:

―Va paxcatchꞌat ji Simón istsꞌalh Jonás.

Jantu va xamatiꞌ mintꞌalapanac ju xamasuniyan ju chunch.

Va isꞌakstu quimpai ju vilhcha lactꞌiyan ju xamavasalaniyan chunch.

18 Chai ju quitꞌin icjunan ni lhijunch ni Pitaluꞌ uncꞌan ni vasalh chunch unitꞌa tachi ju tuꞌuꞌ chiux chai chunch ju nomputun ju mintapakaꞌut.

Pus jantu va tam tam naꞌun ju uxintꞌi.

Chai vachuꞌ chux ju quilapanacni catalacaꞌiyaꞌ ju chivinti ju xanaꞌun ju quilacata.

Chai nin yuchi ju Satanás jantu lai catiꞌamacꞌapꞌani ju quilacata quitꞌin mas na tachapun junita ju yuchi.

19 Chai acxtakniyan ju uxintꞌi ju mintachaput ni xakꞌai aꞌunaꞌ sia yuꞌunch ju talakꞌaꞌita ni calhinaulh ju Dios laꞌisꞌatsucuntiꞌan.

Chai tachi chun ju jantu alakꞌaꞌiyaꞌ ju uxintꞌi ni catanavi ju yuꞌunch pus vachuꞌ jantu calakꞌaꞌiyaꞌ ju Dios ju vilhcha lactꞌiyan.

Chai tachi chun ju alakꞌaꞌiyaꞌ ni catanavi pus vachuꞌ chunch calakꞌaꞌiyaꞌ ju Dios ju vilhcha lactꞌiyan.

20 Pus ju acsnich ju Jesús alhimapꞌaksilh ju ixꞌamamakaꞌui ni jantu xamatiꞌ catamacꞌatsani ni yuchach ju Cristo junita.

Yuchi ju ixnoncan camalakachatachilh ju Dios.

21 Pus tus acsni ju Jesús taiꞌula ixꞌajunica ju ixꞌamamakaꞌui ni tasqꞌuini ni caꞌalh ju lakꞌachakꞌan Jerusalén.

Chai ju anch ma slivasalh na catamamakꞌalhkꞌajniyaꞌ ju papaninch chai ju xalackꞌajin palijni chai ju na talhatalanininta ju ixlhamapꞌaksinꞌan ju istꞌaꞌisraelitanin.

Chai ju anch ma camaknicanaꞌ.

Para ma calokꞌonchokoyaꞌ ixlhilakatꞌutu avilhchan.

22 Pus ju acsnich ju Pitaluꞌ tꞌasanilh va isꞌakstu ju Jesús.

Lhiꞌalh alacatam chai tsuculh mapꞌaksiniꞌ.

Chani ju juncan ju Jesús:

―Ju Dios caꞌaktaijuyan lacaꞌamapaininti chai jantu tavanan chunch atꞌapꞌasayaꞌ ju uxintꞌi.

23 Para ju Jesús talakaspꞌitlh chai chani ju junilh ju Pitaluꞌ:

―Akꞌostꞌich ju laquiꞌucxlacapuꞌ ji lhacaticuru.

Ju uxintꞌi va quimakꞌalhkꞌosupꞌutꞌun.

Ju uxintꞌi jantu chun alacpꞌastꞌacnan tachi ju Dios.

Ju uxintꞌi va alacpꞌastꞌacnan tachi ju mintꞌalapanacni.

24 Ju acsnich ju Jesús alacjuni ixchuxꞌan ixꞌamamakaꞌui:

―Ni xamatiꞌ quinchꞌakꞌokꞌaputun pus jantu lai canavilh ixkꞌachat isꞌakstu.

Chai cachꞌixaꞌ ju makꞌalhkꞌajnat ju caꞌalinaꞌ va ixlacaꞌatalh ni quinchꞌakꞌokꞌai ju quitꞌin.

Chai aquinchꞌakꞌokꞌakꞌalhi.

25 Pus va tichi chavaich ju najun ni jantu quinchꞌakꞌokꞌaputun va ixlacaꞌatalh ni va lai maknicalh pus ju yuchi camakꞌatsꞌankꞌayaꞌ ju xaꞌatsucunti ju lactꞌiyan.

Para va tichi chavaich ju camakꞌatsꞌankꞌayaꞌ ju isꞌatsucunti va ixlacaꞌatalh ni quinchꞌakꞌokꞌai ju quitꞌin pus caꞌalinaꞌ ju isꞌatsucunti ju lactꞌiyan.

26 Pus jantu tuꞌuꞌ lhajai tam lapanac mas calhajakꞌo chux ju xataxtokni ju alin ju ani lacamunutpaꞌ para ni va calhimakꞌatsꞌankꞌa ju isꞌatsucunti ju caꞌixꞌalilh ju lactꞌiyan.

Pus ni va chunch ju calalh pus jantu lai catiꞌalh ju anch mas camapalalh lacatumin.

27 Pus vasalh chani ju catapasayaꞌ ni acminchokoyaꞌ ju quitꞌin ju quimalakachatachilh Dios ni lapanac actsucuyaꞌ ju ani.

Acminaꞌ laꞌixtachaput ju quimpai.

Chai acꞌalactꞌaminaꞌ ju quiꞌanquilhnin.

Chai ju acsnich acꞌaxtakniyaꞌ ju pumatamin tachi ju lhijunch ixlacata tuchi tanavita laꞌisꞌatsucuntiꞌan.

28 Slivasalh ju iclajunau.

Alin ju lamilhiꞌuxijnan ju ani vilatꞌit ju jantu cataniyaꞌ tus acsni aquilalaktsꞌinau ju quitꞌin acsni acminchokoyaꞌ chai aclhinonaꞌ.

Quitꞌin ju quimalakachatachilh Dios ni lapanac actsucuyaꞌ ju ani.