Ju Jesús alacjuni ju lapanacni tuchi ju amalhquiliqui ju lapanacni
15
Ju acsnich talakmilh ju Jesús ju aliꞌin fariseonin chai ju lapanacni ju na ixtalhatalanininta ju ixlhamapꞌaksinꞌan ju istꞌaꞌisraelitanin amachakꞌan Jerusalén.
Chai tasacmilh ju Jesús.
Tajuni:
2 ―Ju mintamamakaꞌun tajuch ni jantu tuꞌuꞌ talhiulai ju ixlhamapꞌaksinꞌan ju papaninch ni jantu chunch tamakchꞌakꞌai acsni tavajin tachi ju iclhilanitau ju quijnan.
3 Para ju Jesús chani akꞌalhtailh:
―Pus ju uxijnan tajuch ni jantu navipꞌalatꞌit tachi ju najun laꞌixlhamapꞌaksin ju Dios.
Alai va naviyatꞌit ju miꞌatalanintiꞌan miꞌakstuꞌan.
4 Pus ju Dios chani naulh:
“Atꞌalhonitꞌit ju mimpaiꞌan chai ju minatiꞌan”.
Vachuꞌ naulh ni camaknicalh va tichi chavaich ju cajunaꞌ macxcai chivinti ju ixpai u ixnati.
5 Para ju uxijnan lakꞌaꞌinitꞌit ni chani cajunilh ju ixpai u ixnati ju tam lapanac:
“Ju quitꞌin jantu lai actilaꞌaktaiju va ixlacaꞌatalh ni iclhikꞌailaktsꞌilh ju Dios ju tumin ju xaclapuꞌaktaiju ju uxijnan”.
6 Pus ju uxijnan lakꞌaꞌiyatꞌit ni jantu caꞌaktaiju ju ixpai u ixnati va tichi chavaich ju chunch canaulh.
Chai ni chunch ju layatꞌit pus samakꞌantꞌatꞌit ju ixlhamapꞌaksin Dios va ixlacaꞌatalh ni navipꞌutꞌunatꞌit ju miꞌatalanintiꞌan miꞌakstuꞌan.
7 Ju uxijnan va aꞌokxchokꞌonin untꞌatꞌit acsni chunch ju layatꞌit.
Pus slivasalh tachi ju naulh ju Isaías ju milacataꞌan acsni chani xatsꞌokꞌulai laꞌixchivinti Dios:
8 Ju ani lapanacni va laꞌixquilhniꞌan quintalakꞌayai.
Para ju laꞌixꞌalhunutꞌan tam tapastꞌacꞌa ju quilacata quitꞌin.
9 Jantu lhitapalai ni quintalakꞌayai
ni taꞌamalanininch va ixlhamapꞌaksinꞌan ju ixtꞌalapanacniꞌan.
10 Acsni nonkꞌolh ju chunch ju Jesús pus atꞌasanilh ju ixtalhavat lapanacni chai chani alacjuni:
―Aquilakꞌasmatniu chai amachꞌakxatꞌit ju aclajunau.
11 Jantiyuꞌ ju ui tam lapanac ju malhquiliquini ju isꞌatsucunti.
Alai yuchi ju chivinti ju taxtui laꞌixquilhni.
Yuchach ju malhquiliquini isꞌatsucunti ju tam lapanac.
12 Pus ju acsnich talakmilh ju Jesús ju ixꞌamamakaꞌui chai chani tajuni:
―Ja cꞌatsꞌaich ni talhitalhkꞌamalh ju fariseonin ju tuchꞌi xaꞌaꞌuni.
13 Para ju Jesús chani alacjuni:
―Tachi chun ju lapanacni ju jantu talacaꞌiputun ixchivinti ju quimpai ju vilhcha lactꞌiyan cataꞌaclayaꞌ.
Chunch ju caꞌaꞌulhtucanaꞌ tachi acsni tipulhucan ju tuꞌuꞌ qꞌuiu.
14 Pus amacꞌaꞌuntꞌit ju yuꞌunch ni chunch tajunita tachi ju tuꞌuꞌ alakꞌachꞌixnin chai taꞌapꞌulhniputun ju ixtꞌaꞌalakꞌachꞌixnin.
Pus ju tam alakꞌachꞌix ni capꞌulhnilh ju ixtꞌaꞌalakꞌachꞌix pus ixtꞌiyunꞌan catintaꞌanaꞌ junta puculhucnicꞌa.
15 Pus ju acsnich ju Pitaluꞌ chani juni ju Jesús:
―Aquilamavasalaniuch ju chivinti ju xaꞌaꞌuni ju ixtalhavat lapanacni.
16 Chai ju Jesús ajuni:
―Ja vachuꞌ jantu lai amachꞌakxanantꞌit ju uxijnan.
17 Ja va jantu machꞌakxayatꞌit ni va lamimpajanꞌan ju tajui tachi chun ju qꞌuilhtꞌanuyatꞌit.
Chai astan va makꞌancanch.
18 Para tachi chun ju macxcai chivinti ju qꞌuilhtꞌaxtꞌuyatꞌit pus lamiꞌalhunutꞌan ju minacha.
Chai yuchach ju tamalhquiliquiniyan ju miꞌatsucuntiꞌan.
19 Pus lacaꞌalhunut ju taxtui ju macxcai atalacpastꞌacꞌat chai ju amakninti chai ju ixpuxcajuca apumatam chakoꞌulh u apumatam jokꞌat.
Vachuꞌ lacaꞌalhunut ju taxtui ju ixkꞌachanica ni va lacati tsucucan chai ju akꞌalhaꞌunti chai ju taꞌaklhtamat chai ju macxcai chivinti.
20 Yuchach ju ani ju malhquiliquini isꞌatsucunti ju tam lapanac.
Jantiyuꞌ ni va jantu chun camakchꞌakꞌalh acsni cavenaꞌ tachi ju talhilanita ju aliꞌin.
Pumatam chakoꞌulh lhilacaꞌalh ju Jesús
21 Pus ju acsnich ju Jesús taxtucha ju anch.
Alh ju xalacatꞌun junta ixꞌalin ju lakꞌachakꞌanixni Tiro chai Sidón.
22 Chai pumatam chakoꞌulh amachakaꞌ Canaán lakꞌalh ju Jesús chai va tsa tsa tapaininilh.
Chai na pꞌas ixchivinin acsni chani ixjuni:
―Quiꞌucxtin.
Istsꞌalhꞌat David.
Lamapainin aqꞌuiꞌaktꞌaiꞌutꞌich.
Alin ju lhacaticuru laꞌixlacatuna ju quintsiꞌ chai slivasalh na makꞌalhkꞌajnan.
23 Chunch ju ixjuni ju Jesús para ju yuchi jantu tsꞌi junilh.
Pus ju acsnich talakmilh ju Jesús ju ixꞌamamakaꞌui chai tatapaininilh.
Tajunich:
―Anavininch ju tuchi sqꞌuiniyan ni laich caꞌanchokolh laꞌixchakaꞌ ni na jeks quintamavayan.
24 Pus ju acsnich ju Jesús chani naulh:
―Ju Dios quimalakachatachilh ni va yuꞌunch acꞌaꞌaktaijuyaꞌ ju quintꞌaꞌisraelitanin ju catamakꞌalhkꞌajnankꞌalhi ni catatailhiꞌalh ixꞌalactuꞌuntiꞌan.
25 Para ju anuꞌ chakoꞌulh palai vanin milh junta ixya ju Jesús.
Taꞌaktsokotanilh.
Chai chani juni:
―Quiꞌucxtin aqꞌuiꞌaktꞌaiꞌutꞌich.
26 Para ju Jesús juni:
―Jantu lhijun ni acꞌaktaijun ju uxintꞌi.
Ni chunch aclalh pus va ixtꞌachun cava tachi ju va acꞌaquictaiꞌi ju ixvaitiꞌan ju quintꞌaꞌamachivinti chai acꞌaxtaknilh ju scꞌuyun.
27 Para ju anuꞌ chakoꞌulh chani juni:
―Vasalh ji quiꞌucxtin.
Para mas yuꞌunch ju scꞌuyun tasacꞌui ju xataquicpuchin ju patajui lacamixa junta tavajin ju ixꞌucxtinꞌan.
28 Pus ju acsnich ju Jesús juni:
―Chakoꞌulh slivasalh na qꞌuilhilaksich.
Anavinicꞌanaꞌich ju tuchꞌi xaqꞌuisqꞌuinich.
Pus lana palai va ju istsiꞌ ju anuꞌ pantsꞌiquis.
Ju Jesús acꞌuchꞌu na lhu takꞌankꞌanin
29 Chai ju Jesús taxtucha chai milh vanin laxaꞌatantsꞌin Galilea.
Chai astan alh lakatam akstijun chai tolhcha ju anch.
30 Chai na lhu talakchaꞌalh ju lapanacni.
Alaclhichaꞌanicalh ju jantu lai ixtaꞌalhtanan chai ju alakꞌachꞌixnin chai ju nunuꞌ chai ju macmututu chai ju alich na lhu takꞌankꞌanin.
Vaninch amamacalh junta ixchꞌantai ju Jesús chai ju yuchi palai anavikꞌo.
31 Pus ju lapanacni na talhamakꞌaninilh acsni talaktsꞌilh ni ixtachivinin ju nunuꞌ ixtajunita.
Chai ju macmututu ixjunita palai tajunlh.
Chai ju va chꞌanlhkꞌavilh ixtajunita laich sok ixtaꞌalhtanan.
Chai ju alakꞌachꞌixnin ixtajunita laich ixtaꞌalacꞌavanan.
Pus chux ju lapanacni na talhamakꞌaninilh.
Chai na talakꞌayalh ju isDiosꞌan ju israelitanin.
Ju Jesús amava lakatꞌatꞌi milh jokꞌatni
32 Ju acsnich ju Jesús alactꞌasanilh ju ixꞌamamakaꞌui chai chani ajuni:
―Painiꞌitnich ju ani tavilanalh lapanacni ni lakatꞌutu avilhchan xaquintatꞌatolan chai ju chavai matich ju tuchi cataꞌulh.
Chai jantu icꞌamalakachaputun laꞌixchakaꞌan ni va catachavaꞌalh.
Jantu xcai ni va catataꞌaktalh ju lacati ixchavanꞌan.
33 Pus ju ixꞌamamakaꞌui tajuni:
―Para ju ani jantu xamatiꞌ tꞌajun.
Tas anchach ju lai acꞌiyau ju quijnan ju lhu vaiti ni laich acꞌamalhilanikꞌoju ju ixtalhavat lapanacni.
34 Chai ju Jesús asacmilh.
Alacjuni:
―Tas akxchux vati ju chꞌapꞌatꞌatꞌit.
Chai ju yuꞌunch tajuni:
―Va akxtujun vati chai lacatsꞌunin lactꞌicstꞌi pamata.
35 Pus ju acsnich ju Jesús ajuni ixtalhavat lapanacni ni catatavilhcaꞌ lacaꞌatsꞌinan.
36 Chai ju yuchi chꞌapalh ju akxtujun vati chai ju pamata.
Xtaknilh lhakꞌailaktsꞌin ju Dios.
Chai astan lacchꞌekꞌelh chai axtaknilh ju ixꞌamamakaꞌui.
Chai ju yuꞌunch taꞌalhilaktsakꞌo tachi chun ju lapanacni.
37 Pus tavenkꞌo ixchuxꞌan chai talhilalh.
Chai astan tasacchokolh ju jantu taꞌokꞌo.
Chaꞌalh lakatujun tankꞌalin.
38 Pus ju anuch ju tavailh ixchaꞌanta lakatꞌatꞌi milh jokꞌatni.
Ju chakolun chai ju askꞌatꞌan jantu aputekꞌecalh.
39 Pus ju Jesús amacꞌami ju lapanacni.
Taju lacabarco chai alh vanin ju lakꞌachakꞌan Magdala.