Israelnin apo ramapari iti
9
9 ¡Kikinni rarokanwe, Jerusalén jemamea jonibó!¡Raroi bewakanwe, Jerusalén jemamea jonibó!
Matoibara maton apo joai,
atikeskabiakin jakon akai itan jatoaresai,
ikaxbi rabíma, westíora burron peyakaxa joai,
burro bake benen,
jara burro awinin bake iki.
10 Janra Efraín mainmea carrobo ras ati iki,
Jerusalénhainoa kabayobora keyoti iki,
jan reteananti kanótibora seketi iki.
Maibotiibi ikainoa jonibora jakonax jati jato yoiti iki,
jaton koshi ixonra aniparonkoxon peoxon wetsa aniparo kaman jato ikinti iki,
Éufrates paronkoxon peoxonra, nato nete senenain kaman jato ikinti iki.
Israel jakiribi moa jakonna
11 Ibora neskatai:
“Jerusalén jonibó, yoinabo maton retea jimi kopíres mato betan joi senenhaa ixonra,
jeneoma pozo meran mato xeponankana keskábo ikenbira,
jainoa en mato pikoti iki.
12 ¡Mato wetsanko bokanabi manati jenetamabo,
jain ikax jawékibi rakétimain jakiribi banékanwe!
En mato yoiai riki, jakon menikinra maton masá tenea kopí, ja winoa
bebon ichabires en mato meniti iki.
13 Jan reteananti kanóti esteakin wakeai keskáakinra, en Judá jonibo ake,
jatian Efraín jonibora nokon pia keská en imake.
Mato Jerusalén jonibora, nokon espada keská en mato imati iki,
jatian maton bakebora Grecia jonibaon bakebo betan en jato reteananmati iki”.
14 Ibo, jawen jonibo akinni joáira ratéti jawéki jato manaon jishti iti iki;
ja joíra kaná biriai keská iti iki.
Ibo Diossenra jato keshankin trompeta xoon ati iki,
surhorikeax niweaba beai meranxonra jato ati iki.
15 Jatíbi atipana Ibonra, jawen jonibo koiranti iki,
ja jonibaonra tsakamisbaon makan jaton taen janbis akanankanti iki,
jaskáxonra jaton rawibo keyokanti iki;
jatoarestaananra, icha xeax paena keskábo ikanti iki,
janxon yoina menoti rachíti, machanbaon jimi bochoati keskáakin,
jaton tazónman vino bochoaxa rarokanti iki.
16 Ja nete nokoketianra,
jato koiranaiton jawen carnerobo akai keskáakin
Ibo Diossen jawen jonibo xabakaamati iki,
jatianra maitinin metsá makanbo ikai keskati,
jaton mainmeax jawen jonibo penékanti iki.
17 ¡Kikin jakon, kikin metsára ja mai iti iki!
Trigo itan uva xeati icha iketianra,
non benbo bakebo itan non ainbo bakebo, metsáshamanbo anikanti iki.