15
Jakonhakin yoiara siná tantiai;ikaxbi jakonmakin yoiara, bebonbires sináti iki.
2 Onan jonibo yoyo ikinra, jaton onanbo yoiai;
onanma jonibaonra onanma shinanboresibi yoikanai.
3 Ibora jatíbiain iki,
jakon joni itan jakonma jonibo akinhananbi jato koirannai.
4 Jakon joira, jan kikinni raroti iki;
jakonmabires shinanxon yoia joira, shinan ramiaires iki.
5 Onanma joninra jawen papan jakon inon ixon yoia, iresabires shinanai;
ja jakon inon ixon yoia ninkatai joninra, jawen ishton jaweki onanti shinan oinmai.
6 Jakon jonin xobora, icha jawékia iki,
ikaxbi jakonma jonira jawebi bebonyamai.
7 Onan shinanya jonibaonra jaton yoyo ikatoninbi jato onanmai,
onanmabaonra jaton shinanman ja atimabo akai.
8 Jakonma jonibaon, Ibo jawéki meniara bikashamai,
ikaxbi atikeskabiakin jakon akai jonibaon
oranaitianra, keenshamankin jato ninkáxonai.
9 Jakonma jonibaon ikábora Ibon keenma iki,
ikaxbi jakonni jaabora jato noike.