13
Onan shinanya bakenra, jawen papan jakon inon ixon yoia ninkáxonai;ja yoiabi yoitimaitonra, notsinabi ninkáyamai.
2 Westíorabaonra ja yoyo iká keskáribiakin jaton kopí biai,
ikaxbi jakonhamisimabi, jakonhamis keskábora,
ishtonbires jato ramiati shinanyabores iki.
3 Yoyo itin koirameetira nonbix koirameeti jawéki iki;
ja icha yoyo ikaira janbix masatai iki.
4 Chikish joninra keenkinbi jawéki biamai;
jaweratoki teetai, jara jáyati bebonkaresti iki.
5 Ja atikeskabiakin jakon akai joninra, janso omisai;
jakonma jonira jaon rabintires iki, itan rabinhomabo iki.
6 Ja jawebi yoixonti yama jonira, jawen ponté shinanmanbi koiranmetai;
ochares jonira jawen ochanbi reteai.
7 Jarake jonibo, jawékia keskábo,
jawebioma ikaxbi,
itan jarake jonibo jawebiomabo keskábo,
jatíbi jawekia ikaxbi.
8 Ja icha jawékia joninra, jan retekasai ayamanon ixon kopiati iki;
jawékioma joninra jawetianbi ja ramiakanti onsá ninkáyamai.
9 Atikeskabiakin jakon akai jonibora, westíora joé pené keská iki;
jakonma jonibora, lámpara nokai keská iki.
10 Rabí jonira jaskatax ramiananti shinannaires iki;
naman shinanmeetai jonibora onan shinanya iki.
11 Jato paraanan jawéki biabora basiamai keyotai;
ichamabo tsinkiara kaiai.
12 Ja non shinanna keská iamaketianra, non masá shinanai,
non shinanna keská iketianra, noa ikonbiresi raroti iki.
13 Jaweratonki ja ati yoiabi ayamai, jara yoyo iananbi winiti iki;
ja ati yoia keská akaitonra jakon kopí biti iki.
14 Onan jonin noa axea joira, jaskatax jakon jati iki,
itan noa mawátima iki.
15 Jakonhakin min jato shinanmakin yoiara, jatíxonbi mia jakonhakanti iki,
ikaxbi jakonmamisibi jakonhamisai keskábora, jatonbinix mawataibo iki.
16 Jaweratoki jakon katóti onan iki, janra jawen ishton onanti shinanman akai,
ikaxbi ja onanmaninra, jawen onanma shinanman amaa keská akai.
17 Joi boai jakonma joninra, mia atikonma jawékiain imai iki,
ikaxbi senen joni joi boaitonra mia jainoa pikoai.
18 Ja jawebioma itan rabintibires ikaibo riki,
ja shinanmakin jato yoiabo iresabires akaibo;
ja jaskáyamanon ixon yoia jen ikaibora, anibires akin jakonman rabikanti iki.
19 Ja noa keenai jawéki non senenhara, raroti iki.
Ja onanma jonibaonara, jakonma jawéki ikonshaman jenetikoma iki.
20 Onan jonibo betan tsinkíwe, jatianra miaribi onan iti iki;
onanmabo betan tsinkitira, mia jakon itima iki.