Jaskáxon onan shinan biti yoia
3
5 Jatíbi min shinanyanixbi Iboki koshiwe,jan min ishton jawéki onanai shinanki koshiamawe.
6 Jatíbi jawéki akin, Ibo shinanyaxonres awé,
jatianra jan mia jakonhakin akinti iki.
7 Eara jato bebon onan iki ikax, shinanmeeyamawe;
Ibo jakon ixonti shinanwe, itan jakonma jaweki ayamawe:
8 ¡Jakayara jakon rao xeaa keská iki,
jaskataxa min yora koshi iti iki!
9 Ibo jakon ixonkin, ja min kopí jakon jawékibaon
itan min yobinbo, ja reken bimia tsekaxon meniwe;
10 jatianra, ja min bimi berobo,
itan uva xeatibo min jain benxoai xobo bochoax ras itires iti iki.
11 Nokon baké, mia Ibon jaskáayamawe akin aká, omisshamawe,
mia notsín yoia keenyamai sináyamawe;
12 Ibonra já noiabo, jaskáayamawe akin yoiai,
westíora papán jawen keen bake, jaskáayamawe akin notsinnai keskáakin.
13 Ja onan shinan betan ja ishton jawéki onanti shinan,
nokoxon biabora raroshaman ikanti iki;
14 jara plata winoa jakon itan,
ja noa oroyata winoa bebonbires jakon iki.
15 Ja onan shinanra, metsá makanbobi winoa jan keenti iki;
¡ja noa ikonbiresi jan keenai jawéki betan, non kexkeaabira jabé senenma iki!
16 Jawen mekayaora basi jati meniti yoiai,
itan jawen mexkaora kopí jawéki betan jan jakon ninkakaati iki.
17 Jaskara iti yoia chibantira, kikínbires jakon iki;
jan yoiai keskati jatira jakonhain jati iki.
18 Tsoaki onan iki, jara jati neteya iki;
¡Jaskara benxoati onanbora raroti iki!