Ja senenhabekonti joi akonkin seneanoxon yoia
24
Jatianra Ibon Moisés yoia iki: —Aarón, Nadab, Abihú, jainoax kanchis chonka israelita joni koshibo betan, nato ea ikainko mapéwe; ikaxbi ochochaa ikax, jainbi chirankokanwe.2 Miabichoresa epatax joti iki; jatíribibaonra ea pataxtima iki, ja joniboribira mibé mapétima iki —akin.
3 Jatian jatíbi Ibon yoia joibo, itan jaskara ati yoiabora kaxon Moiséssen ja jonibo yoia iki, jatianra jatíxonbi yoikana iki: —¡Jatíbi ja Ibon ati yoiabora non akai! —akin.
4 Jatianra jatíbi Ibon yoia joibo Moiséssen wishaa iki, jatianra wetsa nete xabata yamékirishoko weníxon, ja manan tasenenain, jainxon yoina menoti makan tsamana iki. Jatianra chonka rabé iresama makan jain tsamana iki, ja makánbora Israelnin bakebotiibi iká iki.
5 Japekáora jaweti israelita bake ranonbo waka benebo reteti jato yoia iki, Ibo menikin yoinabo jatiobibo keyokin menoxonti itan já betan raeanankin yoinabo menotira jato yoia iki.
6 Moiséssenra naponbekon jimi bixon tasonbaon aká iki, jatian wetsa naponbekon texeatonra ja makan tsamana kachax aka iki.
7 Japekáora ja senenhabekonti joi kirika bixon, jonibo yoyo axona iki, jatianra jabaon yoia iki: —Jatíbi Ibon noa ati yoiara non shinanti iki —akin.
8 Jatianra jimi bixon jan jonibo kachax aki, Moisés neskata iki: —Ibon mato betan ja senenhabekonti aká joibo, akonkin senenhanoxon onantiakin yoia jimi riki nato —akin.
9 Aarón, Nadab, Abihú jainoax kanchis chonka Israel joni koshibo betanra Moisés mananman mapeta iki.
10 Jain kaxonra Israelbaon Dios oinkana iki: Jawen tae namanra iká iki westiora jaweki, zafiro makan tapoaka keská pené, jishtibires nai keska yankonshaman.
11 Ja Israelhainoa kikin jonibaonra Dios oinna iki, jabaonra jainxon pixon xeakana iki, jatianra Diossen jato ramiayamaa iki.
Sinaí mananman Moisés iká
12 Jatianra Ibon Moisés yoia iki: —Nato ea ja iká mananman mapéxon, ea manawe, israelitabo jaskara ikanti axeati, ja esé itan ja senenhati joibo en wishaa jaweti makan tablara en mia meniai —akin.
13 Jatianra Moisés wenitax jawen yonoti Josué betan Diossen mananman mapeta iki.
14 Ja joni koshibora jato yoia iki: —Nenonxonbi noa manakanwe, jakiribi noa joai kaman. Nenora Aarón betan Hur mato betan banetai, atikoma jawékia ixon jaabo yoikanwe —akin.
15 Jaskáakin jato yoitaananra, Moisés mananman mapeta iki, ja mapéketianra nai koinman mapoa iki.
16 Ja Sinaí mananmanra Ibon pené paketa iki, jatianra sokota nete kaman nai koinman mapoa iká iki. Ja kanchis nete itinra ja nai koinmeranxonbi Ibon Moisés kenaa iki.
17 Ja Ibon penéra israelitabaon oinna chii tiri keská jatíbi keyokin menoai iká iki, ja manan bebon keyá ikainra iká iki.
18 Moiséssa ja nai koin meran jikiax mananman mapeta iki, jainra chosko chonka nete itan chosko chonka yamé iká iki.