Marere Ibaihauna
IOANE
Ererena Hauna
Banamo ꞌAbina.
1
Au,
Ioane,
Tirama ena marea ekia kiro hauꞌu,
marere narerena niwahi eꞌu hau Gaio kiꞌamu heremu,
au hanona naraonaꞌauai tohaniꞌo.
2 Eꞌu hau kiꞌamu e,
au aꞌiobina aubamu ena mauri hanona enamo,
ba nabahubaꞌari weiana ihobonai taba ikoikiai hanona katenamo oi heremuai,
haeamona oi hanona mai taburamu komiaho harai.
3 Uahoꞌabaka baika temai oi Tirama ena ꞌabi tohana nuaꞌi taeana mai taearanai nukaꞌa hauna pouna tehina benaꞌu raninai aoꞌu enamo kiꞌa baha.
4 Au nahaꞌu Tirama ena ꞌabi tohana taearanai tikaꞌa poukia naoꞌo hanona eꞌu aonamo niapaꞌua kiꞌa baha haeamona aonamo weiana hanona eꞌu aonamo ikoinai etara haonakia.
Gaio Hoahoa Namona Ebabaina.
5 Eꞌu hau kiꞌamu e,
uahoꞌabaka weiakia aꞌi oꞌiobi harai haukiaa baika obarainakia hanona enamo,
weiana hanona emu aꞌikakauma ai aka namona obabaina.
6 Ia tehore emu raonaꞌau pouna tehinana Tirama ena marea maearimakia neia haukia herekiai hoahoa namona obabaina.
Kobarai harainakia ekia harima kateao aonai Tirama aona ibanamona taearanai.
7 Pokina maearima weiakia hanona Keriso ena aka paunai ekia harima teaꞌiramana tikaꞌa,
iamo aꞌi tiaꞌikakauma haukia herekiai hanona taba ha aꞌi titabu ahina.
8 Ua buonai aika abomo ia kahabarainakia,
weiana kahababaina aonai,
aika hanona Tirama ena ꞌabi tohana akana aba ia kipokia nahababaina.
Diotrefe Hoahoa Kiꞌa Obona Ebabaina.
9 Au aka neianai ꞌabi baika marere ha ai arerena ewahi Tirama ena marea maearimakia weiakia herekia,
iamo Diotrefe,
ia hanona nenuatae kiꞌa baha Tirama ena marea maearimakia ekia ꞌuai haunai keao,
ai aiamai aꞌi niaꞌi taeana.
10 Ua buonai au kawahi raninai,
Diotrefe naia taba nibabaina hauna robana kahuna,
heremai ai niꞌabi kiꞌa mai nibaiꞌoi.
Ia weiana mo ahaꞌi ia nihore uahoꞌabaka tiwahi hanona aꞌi niaꞌi taeanakia,
abomo weiakia ṯenuatae uahoꞌabaka kateaꞌi taeanakia hanona nibaꞌoronakia mai Tirama ena mareai nibakarahinakia.
Demeterio Aka Namona Ebabaina.
11 Eꞌu hau kiꞌamu e,
babai kiꞌa obokia ua homakia aꞌi kobabai,
ia babai namokiamo kobabai.
Babai namokia nibabai hauna hanona Tirama ꞌeuna.
Ia weiana babai kiꞌa obokia nibabai hauna hanona Tirama aꞌi eꞌiobi ꞌapuana.
12 Maearima ikoikiai Demeterio ena babai harai pouna tehinana haeamona Tirama ena ꞌabi tohana nihore ia ena babai harai weiana nibatohana.
Ai abomo ia ena babai harai poukia ṯahina,
wai toꞌiobina ai emai ꞌabi hanona tohakia.
Banamo ꞌAbina Orena.
13 Kahina beniꞌo ꞌabikia hanona teboꞌo,
ia marere hamonai karerena hanona aꞌi anuatae.
14 Eꞌu buabeni hanona rani aꞌi kehomaꞌa hanona kawahi kaihaniꞌo ba hararua kahabaiwaira kahaꞌabiꞌabi.
15 Nabahubaꞌari baibua heremuai kemiaho.
Eka hau neia haukia ekia banamo ꞌabikia ṯeuhunakia heremu.
Eka hau naia haukia emai banamo ꞌabikia ha ha kobenakia.