3 Te meꞌe mo haka nehe-nehe i a kōrua ꞌina ko ai hai meꞌe o te haho nō,

pa he ha-hari huru kē i te rauꞌoho,

pa he meꞌe piru,

ꞌe pa he kahu hopeꞌa o te nehe-nehe.

4 E ai hai meꞌe o roto i te māhatu,

pa he huru riva ꞌe haumārū,

he nehe-nehe taꞌe ŋaro ki te hora hopeꞌa.

Te nehe-nehe tuꞌu pē nei e hauhaꞌa rahi rō ꞌā ki te ꞌAtua.

5 Pē ira te ŋā viꞌe moꞌa ꞌe haꞌatura ki te ꞌAtua o muꞌa ꞌā e haka nehe-nehe era.

A rāua e haka noho rō ꞌana i te manaꞌu ꞌi ruŋa i te ꞌAtua ꞌe e haꞌatura rō ꞌana ki te rāua kenu.

6 Pē ira te viꞌe era ko Tara,

viꞌe haꞌatura ki tāꞌana kenu ko ꞌAparahama kī mōꞌona:

«e te pūꞌoko ōꞌoku ē».

ꞌE a kōrua,

e te ŋā viꞌe hāipo-ipo ē,

mo aŋa i te meꞌe riva-riva ꞌe mo taꞌe riꞌa-riꞌa e tahi meꞌe,

pē Tara ꞌā ia a kōrua.

7 ꞌE a kōrua,

e te kenu hāipo-ipo ē,

e haŋa e hāpaꞌo riva-riva i te kōrua ŋā viꞌe.

Ka ai atu ꞌata hau rō atu te kōrua pūai ki a rāua,

e moꞌa ꞌi te ꞌite pē nei ē:

mo rāua takoꞌa te hauhaꞌa ka vaꞌai ena e te ꞌAtua,

he ora ꞌāpī ꞌina he hopeꞌa raꞌa.

Mo taꞌe aŋa o kōrua pē ira he hihi-hihi te kōrua pure.

8 Te meꞌe haŋa:

e noho kōrua taꞌatoꞌa ꞌi roto i te haumārū ꞌe e tahi mau nō manaꞌu.

E here ꞌi roto i a kōrua pa he taina.

E riva kōrua,

ꞌe ꞌina ko manaꞌu pē nei ē:

i hau rō atu kōrua ki te rua.

9 ꞌIna ko aŋa hai meꞌe rake-rake ki te nuꞌu aŋa atu i te meꞌe rake-rake,

ꞌe ꞌina ko parauꞌino ki te nuꞌu parauꞌino atu.

Te meꞌe o kōrua mo aŋa he ani ki te ꞌAtua mo haꞌamaitai i rā nuꞌu.

Te ꞌAtua,

paꞌi,

i haꞌataꞌa ai i a kōrua māꞌana mo haꞌamaitai atu e ia.

10 Pē nei e kī ena ꞌi ruŋa i te Pāpaꞌi Moꞌa:

13 Mo aŋa mo oho nō o kōrua i te meꞌe riva-riva,

¿ko ai ia te meꞌe mo aŋa atu i te meꞌe rake-rake?

14 ꞌE mo topa atu o te ꞌati ꞌi ruŋa i a kōrua,

ka ai atu e aŋa ꞌana i te meꞌe tī-tika,

he haꞌamaitai atu kōrua e te ꞌAtua.

ꞌO ira,

ꞌina ko riꞌa-riꞌa ꞌi te nuꞌu tōtōā atu.

15 Te meꞌe o kōrua mo aŋa:

he haꞌamuri ki a Ietū Kiritō ꞌi roto i te māhatu pa he Pūꞌoko Haka Tere o kōrua i a ia te kī iŋa hopeꞌa o te meꞌe mo topa atu ki a kōrua.

ꞌE ꞌi te hora taꞌatoꞌa e ꞌite pē hē kōrua ka pāhono ena ki te nuꞌu ꞌui atu he aha kōrua e haka moe ena i te manaꞌu ꞌi ruŋa i a Ietū.

16 ꞌE ana pāhono,

hai haumārū ꞌe hai moꞌa.

ꞌIna kōrua ko aŋa i te meꞌe taꞌe tano.

Pē ira te nuꞌu vānaŋa taꞌe tano o ruŋa i a kōrua ka haꞌamā ena ꞌi te rāua vānaŋa ꞌi te takeꞌa i te kōrua noho iŋa tano ꞌo te ai o kōrua he nuꞌu haka moe i te manaꞌu ꞌi ruŋa i te Kiritō.

17 ꞌAta hau rō atu ꞌi te tano mo ꞌamo i te ꞌati topa ꞌi ruŋa i a kōrua ꞌo te aŋa i te meꞌe riva-riva,

ana haŋa te ꞌAtua,

ki te ꞌamo i te ꞌati ꞌo te aŋa i te meꞌe taꞌe tano.

18 ꞌI te hara,

paꞌi,

o tātou i mate ai te Kiritō,

ꞌe tōꞌona mate era mo te hora taꞌatoꞌa.

ꞌIna e tahi ꞌāꞌana meꞌe taꞌe tano i aŋa ꞌe,

mo haka riva-riva i a tātou ki te ꞌAtua,

i ꞌamo ai i te ūtuꞌa o te mate mo tātou,

nuꞌu aŋa i te meꞌe taꞌe tano.

Ka ai atu i mate rō tōꞌona hakari taŋata,

he vārua ōꞌona te meꞌe i taꞌe mate.

19 Hai vārua era ōꞌona i oho i tātara ai ki te vārua e puru rō ꞌā,

20 vārua o te nuꞌu o te noho iŋa era o Nōē taꞌe haꞌatura ki te ꞌAtua,

nuꞌu tiaki ꞌe haꞌaoromaꞌi e te ꞌAtua,

ꞌi te matahiti taꞌatoꞌa aŋa era e Nōē i te pahī,

mo hārui o te rāua manaꞌu ki ruŋa i a ia.

ꞌE ꞌi rā hora,

hoko vaꞌu nō i uru ai ki roto i te pahī ꞌe i ora ai ꞌi te ꞌati era o te vai.

21 ꞌE nei meꞌe e tuꞌu rō ꞌā pa he eꞌa iŋa o tātou mai roto i te ūtuꞌa o te hara he mate,

meꞌe e haꞌaauraꞌa nei hai papatito.

ꞌE nei papatito taꞌe e haka maꞌitaki ꞌā i te hakari;

e kī ꞌā ki te ꞌAtua pē nei ē:

e ko haka rē a tātou i a ia ki te hora hopeꞌa ꞌi te ꞌite e tātou ko haka kore ꞌana e ia i te tātou hara hai ora iŋa era o Ietū Kiritō mai te mate.

22 ꞌE hora nei,

ꞌai te raŋi ꞌi te pāꞌiŋa mataꞌu o te ꞌAtua,

kona mo te kope hopeꞌa o te hōnui,

e noho ena ꞌe e haka tere ena i te merahi taꞌatoꞌa ꞌe i te ŋā vārua taꞌatoꞌa ena e ai rō ꞌana te rāua tōroꞌa ꞌe pūai.