Te parau nei i pāpaꞌi ai e Pauro ki te taŋata kiritiano e tahi te ꞌīŋoa ko Firemono. Hai parau nei e takeꞌa ena pē nei ē: ko ꞌite riva-riva ꞌana a Pauro i te pāpaꞌi i te parau ꞌe pē hē te haka koni iŋa.

ꞌA Firemono e ai rō ꞌā te ꞌekaravo e tahi te ꞌīŋoa ko Onetimoro. I tuꞌu era te mahana, he eꞌa he tere te ꞌekaravo nei. I oho era he māhani i a Pauro ꞌi roto i te hare maꞌuꞌaurī. He haka ꞌite e Pauro o ruŋa i a Ietū Kiritō, ꞌe he haka moe a Onetimoro i tōꞌona manaꞌu ꞌi ruŋa i a Ietū (10). He riro ia a Onetimoro he hokorua riva-riva mo te ꞌāpōtoro nei ko Pauro (11). Ka ai atu pē ira, te meꞌe tano mo aŋa o Onetimoro, pa he kiritiano, he hoki ki a Firemono. Te ꞌati nō, ko ꞌite ꞌā a Pauro he haka ūtuꞌa i a Onetimoro ka hoki era. ꞌO ira i pāpaꞌi i ani ai a Pauro ki a Firemono mo haka ꞌaroha i a Onetimoro ꞌe mo toꞌo hai haŋa ꞌe hai koa. He haka ꞌite ki a Firemono pē nei ē: a Onetimoro, ꞌi te hora nei, taꞌe nō he ꞌekaravo ꞌāꞌana, he taina kiritiano takoꞌa ōꞌona ꞌo te haka moe i tōꞌona manaꞌu ꞌi ruŋa i a Ietū (15–16).

Te parau nei i pāpaꞌi ai i haka topa riva-riva i te manaꞌu. E tano nō, paꞌi, a Pauro mo kī ki a Firemono hai ꞌīŋoa o Ietū Kiritō, mo toꞌo i a Onetimoro hai haŋa, ꞌe, ka ai atu pē ira, ꞌata hau te haŋa o Pauro mo ani hai māhatu. He no-noꞌi ia ki a Firemono mo toꞌo i a Onetimoro hai haŋa mau ena ꞌā ōꞌona ki te ꞌAtua (20).