Te meꞌe hauhaꞌa he māhani i a Ietū
3
Te meꞌe hopeꞌa,
e te taina ē,
e koa ꞌo te ai o kōrua ꞌa Ietū Kiritō.
Te kī te oho nō atu i te meꞌe ko kī atu era ꞌana e au taꞌe he ꞌati mōꞌoku;
ko ꞌite ꞌana,
paꞌi,
e au he meꞌe mo hāꞌūꞌū atu i a kōrua.
2 E hāpaꞌo kōrua e te nuꞌu kī:
mo eꞌa mai roto i te ūtuꞌa o te hara ꞌe mo ravaꞌa i te ora ꞌāpī ꞌina he hopeꞌa raꞌa e hore te kiri o te kinoŋa.
Te nuꞌu ena pa he paiheŋa taehae haŋa mo aŋa atu i te meꞌe taꞌe tano.
3 Pē nei e manaꞌu ena:
a rāua he nuꞌu o te ꞌAtua ꞌo te hore i te kiri o te kinoŋa.
ꞌE ki te mata o te ꞌAtua,
te nuꞌu parautiꞌa hore i te kiri o te kinoŋa,
te auraꞌa,
te nuꞌu parautiꞌa ꞌāꞌana,
ko tātou,
he nuꞌu koa ꞌo te ai ꞌa Ietū Kiritō ꞌe he nuꞌu haꞌamuri ki a ia hai pūai o te Vārua Maitai.
Ko ꞌite ꞌana,
paꞌi,
e tātou taꞌe hai hore i te kiri o te kinoŋa ꞌe hai haka tano ki te tētahi atu haka tere iŋa ana tano te taŋata ki te mata o te ꞌAtua.
4 ꞌĀhani te taŋata e tano rō ꞌana ki te mata o te ꞌAtua hai ŋā meꞌe ena,
ko au ia te kope raꞌe mo tano ki tōꞌona mata.
5 He hūrio,
paꞌi,
a au ꞌe e vaꞌu mahana o tōꞌoku poreko i hore ai i te kiri o tōꞌoku hua tano ki te mātou haka tere iŋa.
ꞌE,
takoꞌa,
he hakaara a au o Mēhāmina,
poki o te mātou tupuna ko Hākovo,
kī takoꞌa ko Itaraera.
Te kī ꞌāꞌaku:
he ꞌevereo a au,
poki o te nuꞌu ꞌevereo.
ꞌE,
ꞌi raꞌe ki te haka moe ōꞌoku i te manaꞌu ꞌi ruŋa i a Ietū,
he fariseo a au,
taŋata ꞌata haꞌatura ki te haka tere iŋa o te ꞌAtua haka pāpaꞌi ki a Mōtē
6 ki te roa,
ꞌina e tahi nuꞌu mo kī e hape rō ꞌana a au,
ꞌe ꞌātā he kimi nō tāꞌaku aŋa i te nuꞌu haka moe i te manaꞌu ꞌi ruŋa i a Ietū mo tōtōā.
7 Te meꞌe taꞌatoꞌa ena,
meꞌe manaꞌu era e au e hauhaꞌa rō ꞌā mo tano ōꞌoku ki te mata o te ꞌAtua,
hora nei,
ꞌo te ai ōꞌoku ꞌa Ietū Kiritō,
e ꞌite nei a au meꞌe hauhaꞌa-ꞌore.
8 ꞌE taꞌe nō pē ira.
Mōꞌoku,
ꞌina e tahi meꞌe mo hāhine ki te meꞌe ena he māhani ki a Ietū Kiritō,
Pūꞌoko Haka Tere ōꞌoku.
Ko hoa tahi ꞌana e au i rā ŋā meꞌe mo koa ōꞌona;
mōꞌoku,
paꞌi,
rā ŋā meꞌe taꞌatoꞌa he tūtaꞌe nō atu e tahi o te ao nei.
Tāꞌaku meꞌe haŋa nō ko ia
9 ꞌe he ai ōꞌoku ꞌāꞌana.
Hai ia,
paꞌi,
a au e tano nei ki te mata o te ꞌAtua,
taꞌe ꞌō hai haꞌatura ki te haka tere iŋa ꞌa Mōtē.
He haka moe ōꞌoku i te manaꞌu ꞌi ruŋa i a Ietū i kī ai e te ꞌAtua e tano rō ꞌana a au ki tōꞌona mata.
10 ꞌE hora nei,
tāꞌaku meꞌe haŋa he māhani riva-riva he oho ōꞌoku i te Kiritō ꞌe he ŋaroꞌa ꞌi roto i a au tōꞌona aŋa iŋa mai hai pūai,
pa he aŋa iŋa era o te ꞌAtua hai pūai hora haka ora era i a Ietū mai te mate.
ꞌE,
takoꞌa,
he ꞌite ōꞌoku mo haꞌaoromaꞌi,
pē ia,
i te ꞌati mo aŋa i te meꞌe haŋa o te ꞌAtua,
ꞌe ꞌātā mo mate ꞌo te ai ōꞌoku ꞌa Ietū Kiritō,
ana haŋa te ꞌAtua.
11 Te tumu e haŋa nei a au ki te ŋā meꞌe nei:
mo haka ora i a au e te ꞌAtua mai te mate pe muꞌa ka oho ena.
Te roa hopeꞌa
12 ꞌIna a au he kī:
ko tuꞌu ꞌana ꞌō a au ki te roa hopeꞌa:
he taŋata ꞌina e tahi hape pē Ietū.
Te meꞌe nō ꞌāꞌaku mo kī atu:
ꞌī a au e aŋa e oho nō ꞌā mo tuꞌu pē ia;
hora haꞌataꞌa era,
paꞌi,
i a au māꞌana,
he meꞌe ena te meꞌe haŋa mōꞌoku.
13 E te taina,
ꞌina a au he kī:
ko ravaꞌa mau ꞌana ꞌō e au i rā roa.
Tāꞌaku meꞌe aŋa he haka rehu atu i te meꞌe o tuꞌa,
ꞌe he aŋa he oho i te meꞌe haŋa e te ꞌAtua mo aŋa e au,
14 mo tuꞌu ki te roa hopeꞌa ꞌe mo ravaꞌa e au i te meꞌe mo vaꞌai mai e te ꞌAtua ꞌi te raŋi ꞌo te ai ōꞌoku ꞌa Ietū Kiritō,
pa he kope ꞌāꞌati e tahuti ena mo ravaꞌa i te meꞌe mo haka koa i a ia ka tuꞌu ena ki te roa hopeꞌa.
15 Pē nei a tātou,
te nuꞌu manaꞌu paꞌari o ruŋa i te meꞌe o te ꞌAtua,
ana manaꞌu.
ꞌE mo ai tāꞌue e manaꞌu kē rō ꞌana kōrua o ruŋa i te ŋā meꞌe nei,
he haka aŋi-aŋi atu e te ꞌAtua he aha te meꞌe tano.
16 Te meꞌe haŋa nō:
he riro o te tātou noho iŋa noho iŋa tano ki te meꞌe ko haka aŋi-aŋi mai era ꞌā e ia.
O te raŋi tātou
17 E te taina,
e haka tano te kōrua noho iŋa pa he noho iŋa ōꞌoku ꞌe o te nuꞌu te rāua noho iŋa pa he noho iŋa takeꞌa e kōrua ꞌi ruŋa i a au.
18 Ko kī atu era ꞌā e au ꞌe hai taŋi ka kī haka ꞌou atu ena:
nuꞌu rahi te nuꞌu kī:
ꞌa Ietū a rāua,
ꞌe te parautiꞌa mau,
e riri rō ꞌana mōꞌona.
O te rāua noho iŋa taꞌe tano,
paꞌi,
te haka takeꞌa mai pē nei ē:
te mate era o Ietū ꞌi ruŋa i te tātaurō ꞌina e tahi hauhaꞌa mo rāua.
19 Te meꞌe hopeꞌa ka topa era ki te nuꞌu era he ūtuꞌa o te ꞌAtua.
He meꞌe pohe nō o te hakari te rāua ꞌatua.
Te meꞌe haꞌamā he meꞌe teꞌo-teꞌo e tahi o rāua,
ꞌe te rāua manaꞌu ꞌi ruŋa i te meꞌe o te ao mau nō nei.
20 ꞌE a tātou,
te nuꞌu haka moe i te manaꞌu ꞌi ruŋa i a Ietū,
o te raŋi;
ꞌe e tiaki ꞌana ki te topa iŋa mai o Ietū Kiritō,
Pūꞌoko Haka Tere o tātou,
he kope haka eꞌa i te taŋata mai roto i te ūtuꞌa o te hara ꞌe vaꞌai i te ora ꞌāpī ꞌina he hopeꞌa raꞌa,
21 ꞌe he kope haka riro i te hakari mate nei o tātou pa he hakari era ꞌā ōꞌona,
hakari pūai ꞌina e ko mate;
i a ia,
paꞌi,
te pūai mo aŋa i te meꞌe taꞌatoꞌa.