He haka ꞌite iŋa o Pauro o ruŋa i te Kiritō
2
E te taina,
hora oho vānaŋa atu era ōꞌoku o ruŋa i te meꞌe manaꞌu e te ꞌAtua mo aŋa taꞌe haka ꞌite mai era e ia ꞌi muꞌa ꞌā,
taꞌe hai vānaŋa nehe-nehe mo haka takeꞌa atu ꞌō i tōꞌoku mārama-rama a au i haka ꞌite atu ai.
2 E noho atu era a au ꞌi muri i a kōrua te meꞌe mau nō ꞌāꞌaku i manaꞌu he hāpī atu o ruŋa i a Ietū Kiritō ꞌe o ruŋa i tōꞌona mate iŋa ꞌi ruŋa i te tātaurō.
3 I māroa atu ai a au ꞌi muꞌa o kōrua ꞌina e tahi ōꞌoku pūai e ŋaroꞌa era e au ꞌe e rurū rō ꞌā ꞌi te riꞌa-riꞌa,
ꞌo taꞌe haka tano au i te meꞌe haŋa o te ꞌAtua.
4 E vānaŋa atu era a au o ruŋa i te roŋo o te ꞌAtua,
taꞌe hai vānaŋa mārama-rama e haka ꞌite atu era;
o te Vārua Maitai te haka ꞌite atu he parautiꞌa rā vānaŋa era ꞌāꞌaku,
5 ꞌo ai hai mārama-rama o te taŋata te haka moe iŋa ena o kōrua i te manaꞌu ꞌi ruŋa i a Ietū ꞌe taꞌe ꞌō hai pūai o te ꞌAtua.
Te meꞌe o te ꞌAtua e ꞌite ena hai Vārua Maitai
6 Te parautiꞌa,
ꞌi roto i te nuꞌu e hio-hio rō ꞌā te rāua haka moe iŋa i te manaꞌu ꞌi ruŋa i a Ietū e hāpī nei a mātou hai vānaŋa mārama-rama,
ꞌe rā mārama-rama taꞌe he mārama-rama o te taŋata ꞌo he mārama-rama o te nuꞌu pūꞌoko haka tere o te ao nei.
Te pūai,
paꞌi,
o te rāua mārama-rama pe te ŋaro pe te oho nō.
7 Te meꞌe nei o mātou e vānaŋa nei:
o ruŋa i te mārama-rama o te ꞌAtua taꞌe ꞌite e te taŋata:
he meꞌe i manaꞌu e ia mo aŋa mo te tātou riva-riva pe muꞌa ka oho ena taꞌe haka ꞌite mai e ia ꞌi muꞌa ꞌā.
Te meꞌe nei i manaꞌu ai mai te hora era kai aŋa ꞌā i te ao.
8 Rā meꞌe manaꞌu era e te ꞌAtua mo aŋa ꞌina kai aŋi-aŋi e te nuꞌu pūꞌoko haka tere o te ao nei.
ꞌĀhani,
paꞌi,
a rāua i aŋi-aŋi,
e ko veo ꞌi ruŋa i te tātaurō i te tātou Pūꞌoko Haka Tere,
kope i a ia te parau o te meꞌe taꞌatoꞌa.
9 E kī rō ꞌana,
paꞌi,
ꞌi ruŋa i te Pāpaꞌi Moꞌa:
«Te ꞌAtua ko haka riva-riva ꞌā mo te nuꞌu haŋa ki a ia
i te meꞌe ꞌina he kope raꞌe i takeꞌa,
i ŋaroꞌa ꞌe korohaŋa i manaꞌu».
10 Rā meꞌe taꞌe haka ꞌite mai era ꞌi muꞌa ꞌā ko haka aŋi-aŋi mai ꞌā e te ꞌAtua hai Vārua Maitai ꞌi te hora nei;
a ia,
paꞌi,
e ꞌite rō ꞌā i te meꞌe taꞌatoꞌa,
ꞌātā i te manaꞌu hopeꞌa o te ꞌAtua.
11 ¿Ko ai te kope ꞌite i te manaꞌu o te taŋata mo taꞌe ai ko rā taŋata mau ꞌā?
Pē ira takoꞌa te manaꞌu o te ꞌAtua,
he Vārua Maitai mau nō te meꞌe ꞌite.
12 ꞌIna i a tātou i te nuꞌu haka moe i te manaꞌu ꞌi ruŋa i a Ietū,
te manaꞌu iŋa ena o te taŋata o te ao.
Te meꞌe i a tātou he Vārua Maitai vaꞌai mai e te ꞌAtua,
mo aŋi-aŋi he aha te meꞌe taꞌatoꞌa vaꞌai mai e ia ꞌi tōꞌona riva rahi.
13 ꞌO ira,
hora ena o mātou e hāpī ena o ruŋa i te ꞌAtua,
e vānaŋa nei hai vānaŋa haka ꞌite mai e te Vārua Maitai,
taꞌe hai vānaŋa mārama-rama hāpī mai e te taŋata.
Pē ira e haꞌaauraꞌa nei i te meꞌe o te ꞌAtua hai vānaŋa vaꞌai mai e te Vārua Maitai.
14 Te kope taꞌe haka moe i te manaꞌu ꞌi ruŋa i a Ietū ꞌe kore o te Vārua Maitai o roto i a ia ꞌina he toꞌo mōꞌona i te hāpī haka ꞌite e te Vārua Maitai;
te hāpī nei he meꞌe maꞌa-maꞌa e tahi mōꞌona.
ꞌE ꞌina e ko aŋi-aŋi,
ꞌi te meꞌe era o te Vārua Maitai mau nō te haka aŋi-aŋi i te auraꞌa parautiꞌa o rā hāpī.
15 Te kope ꞌi roto i a ia te Vārua Maitai e aŋi-aŋi rō ꞌana i te meꞌe taꞌatoꞌa haka ꞌite e te Vārua Maitai.
ꞌE te kope ꞌina he Vārua Maitai o roto i a ia,
ꞌina he aŋi-aŋi i te manaꞌu o te nuꞌu e ai rō ꞌā ꞌi roto i a rāua te Vārua Maitai.
16 E kī rō ꞌana,
paꞌi,
ꞌi ruŋa i te Pāpaꞌi Moꞌa:
«¿Ko ai te kope ꞌite i te manaꞌu o te ꞌAtua?
¿Ko ai te kope mo hāpī i a ia?».
ꞌE,
he manaꞌu o te Kiritō te meꞌe i a tātou.