Ki te kope taiꞌo
Nā ꞌi tuꞌu rima te Vānaŋa o te ꞌAtua hai ꞌarero rapa nui. Te huri ki te ꞌarero rapa nui i te ꞌapa nei o te Vānaŋa o te ꞌAtua aŋa riꞌa-riꞌa mo te nuꞌu era o rāua i huri ꞌe ꞌi ruŋa ꞌā he meꞌe e tahi mo rāua mo koa.
Te huri riva-riva i te Vānaŋa o te ꞌAtua taꞌe he meꞌe ana ravaꞌa e veve-veve. E hāpī, e haka topa te manaꞌu, ꞌe e haka tano-tano e oho. Te puka nei e piti ꞌahuru tūmaꞌa nō atu matahiti i pāpaꞌi ai. Paurō te mahana e ani era ki te ꞌAtua mo hāꞌūꞌū i te aŋa nei. E toru meꞌe haŋa mo ravaꞌa i huri ai i te puka nei:
● He haka ꞌite tī-tika i te roŋo parautiꞌa o te ꞌAtua.
● He pāpaꞌi hai vānaŋa mo hōrou mo aŋi-aŋi.
● He huri hai ꞌarero vānaŋa o te hora nei.
Mo ravaꞌa i te ŋā meꞌe nei, ꞌina kai huri i te puka nei mai te puka tire mau nō e tahi. I huri ai i taiꞌo i te rauhuru nō atu Pīpīria o te rauhuru nō atu ꞌarero, ꞌe ꞌātā hai ꞌarero kirieko. Pē ira te puka nei i huri ai ki te vānaŋa rapa nui.
ꞌI ruŋa i te puka nei e eꞌa ena te ꞌīŋoa o te nuꞌu, te vānaŋa, ꞌe te huru o te haka tere iŋa o te hūrio taꞌe aŋi-aŋi e te rahi raꞌa o te taŋata. ꞌO ira, nā ko tāpaꞌo ꞌana mo kimi o kōrua mo aŋi-aŋi o ruŋa. Te meꞌe tāpaꞌo hai tiꞌaraꞌa riki-riki e kimi ꞌi raro nui o te kaka. ꞌE te vānaŋa puru ꞌi roto i te ŋā meꞌe nei ˻...˼ e kimi a te hopeꞌa o te puka nei a te kona hāꞌaki Mo ꞌata aŋi-aŋi. ꞌI ruŋa takoꞌa nei e eꞌa rō ꞌana te mapa ꞌe te tātū mo ꞌata aŋi-aŋi o kōrua i te kona ꞌe i te huru o te meꞌe.
Te ŋā puka ena e piti ꞌahuru mā hitu o te rua ꞌapa o te Pīpīria i pāpaꞌi ai hai ꞌarero kirieko. ꞌI te noho iŋa pāpaꞌi o te ŋā puka taꞌatoꞌa nei ꞌina he mākini mo haka rahi. ꞌO ira i haka pāpaꞌi i haka rahi ai i nei ŋā puka ꞌo ŋaro. ꞌI ruŋa i te tētahi o te ŋā puka haka pāpaꞌi era i ꞌāmui rō e te nuꞌu pāpaꞌi i te kupu vānaŋa ꞌina o ruŋa i te puka haka pāpaꞌi era ki a rāua. Ka ai atu pē ira, te ŋā kupu vānaŋa ꞌāmui era, taꞌe he meꞌe nui-nui mo huri ꞌō i te roŋo o te ꞌAtua. ꞌI ruŋa i te puka nei e eꞌa rō ꞌā te kupu vānaŋa e tāpaꞌo rō ꞌā hai [...]. Nei ŋā vānaŋa ko te vānaŋa ꞌāmui era.
Te ꞌAtua, a roto i tāꞌana Vānaŋa, te aŋa nō he hāꞌūꞌū mai mo aŋi-aŋi o tātou ko ai mau a ia, pē hē te rahi o tōꞌona haŋa mo tātou, he aha tāꞌana meꞌe i aŋa hai Ietū Kiritō mo eꞌa o te taŋata mai roto i te ūtuꞌa o te hara, ꞌe pē hē te haka tere iŋa tano mo te nuꞌu haka moe i te manaꞌu ꞌi ruŋa i a Ietū. Te ŋā meꞌe nei, mo haŋa ōꞌou mo ꞌite ꞌi kona hē e haka ꞌite mai ena, e uꞌi a te kaka hopeꞌa o te puka nei ꞌi te kona hāꞌaki ꞌI hē koe ana taiꞌo mo ꞌite ōꞌou.
Te manaꞌu o te nūnaꞌa aŋa i te puka nei: pē hiva ꞌana hai Vānaŋa nei o te ꞌAtua huri nei ki te ꞌarero rapa nui, ana ꞌata rahi te nuꞌu māhani i te ꞌAtua, haka hāhine ki a ia ꞌina he riꞌa-riꞌa ꞌe ravaꞌa mai i a ia i te haumārū ꞌe i te koa haŋa e ia mo vaꞌai mai.